Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon sa Teokratikanhong Tunghaan sa Ministeryo sa semana nga magsugod sa Abril 28, 2008. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Marso 3 hangtod sa Abril 28, 2008.
MGA HIYAS SA PAGPANULTI
1. Nganong hinungdanon man nga gamiton ang giasayn nga materyal sa dihang maghan-ay ug mga pakigpulong, ug sa unsang paagi nato kini mahimo? [be p. 234 par. 1–p. 235 par. 1] Ang paghan-ay sa atong mga pakigpulong gamit ang giasayn nga materyal nagpakita nga kita nagtahod sa “pagkaon sa hustong panahon” nga gitagana sa “matinumanon ug maalamong ulipon.” (Mat. 24:45) Mahimo nato kini kon tun-an nato pag-ayo ang materyal ug analisahon ang mga kasulatang nalakip niana. Dayon angayng mopili kitag duha o tulo ka pangunang punto nga labing matulon-anon sa atong mamiminaw, ug maningkamot sa paghan-ay ug pagsaysay niana nga epektibo.
2. Nganong hinungdanon kaayo ang mga pangutana sa dihang kita manudlo? [be p. 236 par. 1-5] Ang mga pangutana makatabang aron masugdan ang pagbayloayg mga panghunahuna. Mopalihok kini sa mga tawo nga maghunahuna ug mopahayag sa ilang mga opinyon. Kini maghatag kanatog kahigayonan sa pagsaysay sa kamatuoran sa Bibliya. (Buh. 8:30, 31)
3. Sa unsang paagi matabangan ang mamiminaw sa mga pangutana aron mangatarongan bahin sa usa ka ulohan? [be p. 237 par. 3–p. 238 par. 2] Ingong pagsundog kang Jehova, mogamit kitag mga pangutana aron matabangan ang uban nga masabtan ang pagkamakataronganon sa kamatuorang gipresentar. (Mal. 1:2-10) Pananglitan, sa dihang magdumalag pagtuon sa Bibliya, kita makasuknag mga pangutana sama sa: “Sa unsang paagi ang atong ginahisgotan mohaom niining laing punto nga atong gitun-an? Nganong hinungdanon man kini? Unsay angay nga epekto niini sa atong mga kinabuhi?” Ang sama niini nga mga pangutana motabang sa atong mga estudyante nga gamiton ang ilang “gahom sa pagpangatarongan.” (Roma 12:1)
4. Sa dihang manudlo, nganong hinungdanon ang mahanasong paggamit ug mga pangutana aron ipadayag ang kinasulorang pagbati sa mamiminaw? (Prov. 20:5; Mat. 16:13-16; Juan 11:26) [be p. 238 par. 4-6] Sa dihang motubag ang mga tawo sa mga pangutana, sila tingali motubag lamang sa kon unsay ilang gihunahuna nga maoy atong gustong paminawon. Apan makatabang gayod kon maningkamot kita sa pagtugkad sa tinuod nga pagbati sa mga tawo pinaagig paggamit ug mga pangutana sama sa gigamit ni Jesus nga narekord sa Mateo 16:13-16 ug Juan 11:26.
5. Unsa ka hinungdanon ang paggamit ug mga simile dihang kita manudlo? (Gen. 22:17; Jer. 13:11) [be p. 240 par. 1-3] Pinaagi sa pipila lang ka pulong, makamugna kitag klarong mga hulagway diha sa hunahuna aron makuha ang pagtagad, madasig ang panghunahuna, ug mapukaw ang mga emosyon. Ang Bibliya naundag daghang simile. Pananglitan, ang usa ka tawo nga regular nga nagbasa sa Pulong sa Diyos “mahisama gayod sa usa ka kahoy nga natanom sa daplin sa kasapaan,” ug ang daotan “sama sa leyon” nga nagaatang sa iyang tukbonon. (Sal. 1:3; 10:9) May mga higayon diin mas mapausbaw ang kahinungdanon niini pinaagig pagdugang ug mubong katin-awan.
ASAYNMENT NUM. 1
6. Unsa ang pipila ka giyang mga prinsipyo ang gipasiugda sa basahon ni Marcos nga makatabang aron atong mabatonan ang kinabuhi pinaagi sa Gingharian sa Diyos? [si p. 186 par. 32] Ang Ebanghelyo ni Marcos nagpasiugda sa panginahanglan sa pagsakripisyo sa kaugalingon, paghimog kusganong mga lakang aron dili kita makapandol, pagkamapainubsanon ug pagkahimong daling-tudloan sama sa usa ka bata. (Mar. 8:35; 9:43-48; 10:13-15) Naghisgot usab kini kon unsa ka lisod alang niadtong mga sapian “ang pagsulod sa gingharian sa Diyos.” (Mar. 10:23-25) Ang pagsunod sa duha ka kinadak-ang sugo mas labaw pa ug bili sa daghang mga halad. (Mar. 12:28-34)
7. Sa unsang paagi ang balaang espiritu nagtabang sa mga alagad sa Diyos karon? (Juan 14:25, 26) [be p. 19 par. 2-3] Ang balaang espiritu dili gayod magbutang sa atong mga hunahuna sa mga butang nga wala pa gayod nato hikat-oni, apan kini nagsilbing magtatabang aron atong mahinumdoman ang importanteng mga butang nga natun-an na sa nangagi.
8. Unsang kinadak-ang kaayohan ang atong makuha sa pagbasa? [be p. 21 par. 3] Ang pagbasa makapaarang kanato aron “makaplagan ang mismong kahibalo sa Diyos.” (Prov. 2:5) Sa katibuk-an, ang atong pag-uswag sa espirituwal nagdepende sa pagbasa sa Pulong sa Diyos. Daghang bahin sa atong pag-alagad sa Diyos ang naglangkit sa pagbasa. Kita mobasa sa Bibliya ug sa binase-sa-Bibliyang mga publikasyon diha sa mga tigom maingon man usab sa kanataran.
9. Unsay nalangkit sa pagtuon? [be p. 27 par. 3–p. 28 par. 1] Ang pagtuon maoy dili lamang basta pagbasa. Nalangkit niini ang maampingon ug linaing pagtagad sa ulohan. Naglakip kini sa pag-analisar sa atong gibasa ug pagsabot sa mga katarongan sa gipahayag nga mga pulong. Ang pagtuon naglakip usab sa pagpamalandong sa atong ginabasa, kon unsay gitudlo niini kanato bahin kang Jehova ug sa iyang katuyoan, kon sa unsang paagi kini makatabang kanato sa pag-ila sa maayo ug sa daotan, kon sa unsang paagi nato mapadapat ang atong nakat-onan, ug sa pagtabang sa uban.
10. Sa unsang paagi ang Ebanghelyo ni Lucas naglig-on sa atong pagsalig sa pagkainspirado sa Hebreohanong Kasulatan? [si p. 192 par. 30-1] Ang Ebanghelyo ni Lucas naundan ug daghang tukmang mga katumanan sa Hebreohanong Kasulatan sama sa atong makita kon itandi ang Lucas 4:17-19 sa Isaias 61:1, 2; ug sa pagtandi sa Lucas 18:32, 33 sa Salmo 22:7; Isaias 50:6; 53:5-7; ug sa Jonas 1:17. Ang mga pulong ni Jesus nga narekord sa Lucas 24:44, 45 nagpamatuod nga ang Hebreohanong Kasulatan inspirado.
SENEMANANG PAGBASA SA BIBLIYA
11. Nganong gibadlong man ni Jesus ang tawo nga nagtawag kaniyag “Maayong Magtutudlo”? (Mar. 10:17, 18) [w08 2/15 “Ang Pulong ni Jehova Buhi—Mga Pangunang Punto Gikan sa Basahon ni Marcos”] Ang wala pagdawat ni Jesus sa maong titulo, nagpakita nga buot niyang himayaon si Jehova inay kay ang iyang kaugalingon ug iyang gipakita nga ang matuod nga Diyos mao ang tinubdan sa tanang maayong butang. Labaw sa tanan, gipasiugda ni Jesus ang pangunang kamatuoran nga ang Maglalalang lamang ang adunay katungod nga mohatag ug mga sukdanan sa maayo ug sa daotan.
12. Unsay ipasabot ni Jesus sa dihang iyang gigamit ang kahoyng igos diha sa usa ka ilustrasyon maylabot sa nasod sa Israel? (Mar. 11:12-14, 20, 21) [w03 5/15 p. 26 par. 2-3] Sanglit ang unang mga igos makita uban sa mga dahon—ug usahay sa dili pa gani mogitib ang mga dahon—ang kawalay bunga sa kahoy nagpakita nga kadto walay pulos. Sama sa di-mabungahong kahoyng igos nga himsog tan-awon, ang Hudiyohanong nasod adunay malimbongong panggawas nga panagway. Apan wala kini nagpatunghag diyosnong bunga, ug kini sa kataposan nagsalikway sa Anak mismo ni Jehova. Gitunglo ni Jesus ang walay bunga nga kahoyng igos, ug pagkaugma, nakita sa mga tinun-an nga kini nalaya. Ang maong laya nga kahoy haom nga nagpasabot sa umaabot nga pagsalikway sa Diyos sa mga Hudiyo ingon nga iyang piniling katawhan.
13. Unsay gipaila sa mga pulong ni manulondang Gabriel sa dihang siya miingon nga si Maria ‘manamkon sulod sa iyang tagoangkan’ ingong resulta sa pagkunsad sa balaang espiritu sa Diyos ug sa iyang gahom? (Luc. 1:30, 31, 34, 35) [w08 3/15 “Ang Pulong ni Jehova Buhi—Mga Pangunang Punto Gikan sa Basahon ni Lucas”; it-2 p. 56 par. 2] Sanglit nahitabo ang aktuwal nga pagsamkon, tin-aw nga gipahinabo ni Jehova nga Diyos nga moturok ang usa ka binhi diha sa tagoangkan ni Maria, nga naghimo niini pinaagi sa pagbalhin sa kinabuhi sa iyang panganayng anak sa langit nganhi sa yuta. (Gal. 4:4) Niining paagiha lamang nga ang bata nga natawo sa ulahi makapabilin sa paghupot ug kinaiyahan nga sama sa persona nga nagpuyo didto sa langit ingong ang Pulong, ug niining paagiha lamang nga siya mahimong usa ka tinuod nga anak ni Maria ug busa usa ka tiunay nga kaliwat sa mga katigulangan ni Maria nga si Abraham, Isaac, Jacob, Juda, ug Haring David ug lehitimong manununod sa mga saad Diyos ngadto kanila. (Gen. 22:15-18; 26:24; 28:10-14; 49:10; 2 Sam. 7:8, 11-16; Luc. 3:23-34)
14. Ang mga tinun-an ba ni Jesus ‘nagahimo sa supak nga pagabuhaton sa adlaw nga Igpapahulay’? (Luc. 6:1, 2) [gt 31] Sila wala naglapas sa balaod ni Jehova sa Igpapahulay. Sumala sa mga Pariseo ang pagpangutlo ug uhay ug ang pagbagnod niini sa kamot aron kaonon maoy pag-ani ug paggiok. Apan ang ilang pagkapanatiko naghimo sa adlawng Igpapahulay nga mabudlay, nga unta kini maoy panahon man sa kalipay ug pagdinasigay. Busa, gitubag ni Jesus ang ilang mga akusasyon pinaagig Kasulatanhong mga pananglitan aron ipakita nga wala gayod uyoni ni Jehova ang maong dili makataronganong pagpadapat sa Iyang balaod sa adlawng Igpapahulay. (Mat. 12:3-5)
15. Unsay atong makat-onan sa tambag ni Jesus ngadto kang Marta? (Luc. 10:40-42) [w99 9/1 p. 31] Kitang tanan angayng ‘magpili sa maayong bahin’ pinaagi sa paghatag ug pangunang pagtagad sa espirituwal nga mga butang. Pinaagi sa pagtino sa mas hinungdanong butang, atong maangkon ang pag-uyon ug panalangin ni Jehova. (Filip. 1:9-11)