Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon nga binaba panahon sa Teokratikanhong Tunghaan sa Ministeryo sa semana nga magsugod sa Hunyo 26, 2006. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan diha sa mga asaynment alang sa mga semana sa Mayo 1 hangtod sa Hunyo 26, 2006. [Matikdi: Kon walay mga reperensiya human sa pangutana, kinahanglang mohimo kag kinaugalingong panukiduki aron makaplagan ang mga tubag.—Tan-awa ang Tunghaan sa Ministeryo, p. 36-7.]
MGA HIYAS SA PAGPANULTI
1. Unsay modulasyon, ug nganong hinungdanon kini? [be p. 111, mga kahon] Ang modulasyon maoy pag-usab-usab sa gikusgon, paso, ug tono sa tingog sa atong pagsulti. Kini maoy hinungdanong hiyas sa pagpanulti, kay kini makapukaw sa emosyon ug makapadasig sa mamiminaw sa paglihok. Ang maayong modulasyon makatabang sa atong mga mamiminaw sa pagsabot sa diwa sa ulohan nga ginahisgotan.
2. Sa unsang paagi atong mausab-usab ang paso sa atong pagsulti sa dihang magpakigpulong? [be p. 112 par. 3-6, kahon] Ang paso sa atong pagsulti angayng magdepende sa atong ginasulti. Busa, ang hustong paso sa pagsulti dili mahimo pinaagi lamang sa pagpaspas o paghinay sa regular nga paagi. Pananglitan, kasagaran mas maayong paspason ang pagsulti kon ang hisgotan nga mga punto dili kaayo hinungdanon o kon gusto natong pahinamon ang mamiminaw. Sa laing bahin, kon maghisgot ug mas bug-at nga mga argumento, pangunang mga punto, ug kulbahinam nga mga bahin sa pakigpulong, kita angayng mosulti sa hinayhinay nga paso.
3. Sa unsang paagi atong maugmad ang kadasig alang sa ulohan sa atong pakigpulong, ug nganong hinungdanon kini? [be p. 115 par. 1–p. 116 par. 2, mga kahon] Maugmad ang kadasig kon atong andamon dili lamang ang impormasyon kondili ang atong kasingkasing usab, nga nagkahulogan nga kinahanglang ilangkit nato ang atong mga pagbati. (Esd. 7:10) Kon kita kombinsido nga bililhon ang atong materyal ug nga ang atong mamiminaw makakuhag kaayohan gikan niini, kita mobatig kahinam bahin sa atong isulti. Hinungdanon kini tungod kay ang kadasig motabang kanato sa paghupot sa interes sa atong mamiminaw ug mahimong mopalihok usab kanila.
4. Sa dihang tudloan nato ang uban, nganong hinungdanon ang hiyas sa pagkamainiton, ug unsay makatabang kanato sa pagpahayag niini? [be p. 118 par. 2–p. 119 par. 5] Ang pagkamainiton makadugang sa katin-aw ug katahom sa atong pakigpulong ug hinungdanon kini kon buot natong matandog ang kinabuhi ug kasingkasing sa atong mga mamiminaw. Kita matabangan sa pagpahayag niining hinungdanong hiyas kon kita mobatig kahingawa sa mga tawo, sama kang Jesus, ug buot gayod nga motabang kanila. (Mar. 1:40, 41; Luc. 8:48)
5. Isaysay ang kahinungdanon sa mga kompas ug ekspresyon sa nawong sa pagpakigkomunikar. (Mat. 12:48, 49) [be p. 121, mga kahon] Hinungdanong masabtan nga ang mga ideya, mga pagbati, ug mga tinamdan ikapaila dili lamang pinaagi sa tingog kondili pinaagi usab sa mga kompas ug mga ekspresyon sa nawong. Kasagaran, atong gamiton ang atong mga mata ug baba ug ang posisyon sa atong ulo sa pagpasiugda sa atong ginasulti ug sa pagpahayag sa atong pagbati. Kon dili husto ang pagkompas ug ekspresyon sa nawong sa mamumulong, kini makahatag ug impresyon nga siya nagsulti nga walay pagtagad sa iyang ulohan.
ASAYNMENT NUM. 1
6. Sa unsang paagi ang basahon ni Job nagbayaw kang Jehova ug nagpasiugda sa iyang matarong nga mga sukdanan sa pagkinabuhi? [si p. 100 par. 39, 41] Ang basahon ni Job naghisgot kang Jehova ingong Labing Gamhanan sa 31 ka beses, nga mas daghan pa kay sa tanang ubang bahin sa Kasulatan. Si Jehova subsob nga gidayeg tungod sa iyang tinuboy nga posisyon, walay-kataposang paglungtad, kaalam, gahom, hustisya, mahigugmaong-kalulot, ug kaluoy. (Job 10:12; 36:26; 37:23) Ang pagbindikar kang Jehova gihisgotan nga mas hinungdanon kay sa kaluwasan sa tawo. (Job 33:12) Ang basahon nagsaway sa materyalismo, idolatriya, panapaw, pagbayaw sa kaugalingon, inhustisya, paboritismo, pagkadili-matinud-anon, ug pagpamakak, nga kining tanan motultol sa dili pag-uyon sa Diyos. (Job 31:5, 9, 13, 17, 24-28)
7. Unsay nagpamatuod sa pagkatinuod sa mga Salmo? [si p. 102 par. 10-11] Human sa iyang pagkabanhaw, giingnan ni Jesus ang iyang mga tinun-an nga ang tanang gisulat bahin kaniya diha sa mga Salmo mamatuman. (Luc. 24:44) Busa iyang gipaila nga ang mga Salmo maoy matagnaon. Dugang pa, ang mga Salmo bug-os nga kaharmonya sa tibuok Kasulatan ug subsob nga gikutlo sa mga magsusulat sa Kristohanon Gregong Kasulatan. (Buh. 13:33; Roma 3:13)
8. Sa pagtumong sa tawong maalamon, ang Proverbio 13:16 naghubit ba sa usa nga malansison? Ipatin-aw. [w04 7/15 p. 28 par. 3-4] Niining tekstoha, ang pulong “maalamon” wala gamita sa pagpasabot ug “malansison,” o “malipatlipaton.” Ang pagkamaalamon dinhi nalangkit sa pagbaton ug kahibalo, nga mabatonan pinaagi sa pagsusi sa Kasulatan ug sa mga impormasyon, dili pinaagi sa pagpanaghap o pagsundog lang sa panglantaw sa kadaghanan. Kasukwahi sa usa ka hungog nga naggamit sa iyang dila sa pagpakaylap ug binuang, ang usa nga maalamon mosulti ug molihok sa maalamong paagi. Busa, ang maalamong tawo magpugong sa iyang baba ug makalikay sa kalisdanan nga motungha tungod sa dili-maayo o wala-hunahunaang sinultihan.
9. Sa unsang paagi ang balaang espiritu naglihok ingong magtatabang, ug ang pagkahibalo niini angayng magdasig kanato sa pagbuhat sa unsa? (Juan 14:25, 26) [be p. 19 par. 2-3] Ang balaang espiritu makatabang kanato sa paghinumdom sa importanteng mga butang nga atong natun-an sa nangagi. Kini dili magpahinumdom kanato sa mga butang nga wala pa gayod nato makat-oni. Kini mitabang sa mga magsusulat sa Ebanghelyo nga mahinumdoman ang mga detalye sa gisulti ug gibuhat ni Jesus sa dihang sila uban pa kaniya bisag daghang tuig na ang milabay. Kini angayng magdasig kanato sa pagbaton ug daghang kahibalo bahin kang Jehova kutob sa atong maarangan ug sa pagtabang sa uban sa pagbuhat usab niana.
10. Sa unsang diwa nga si Jesus moabot, ug unsang ‘pag-abot’ ang gihisgotan ni Jesus sumala sa narekord sa Mateo 16:28? [w04 3/1 p. 16 kahon] Si Jesus moabot sa diwa nga iliso niya ang iyang pagtagad ngadto sa katawhan o sa iyang mga sumusunod, kasagaran aron sa paghukom. (Mat. 24:46, 50; 25:19, 31) Sa Mateo 16:28, si Jesus nagtumong sa pagsugod sa iyang harianong presensiya ingong naentrono nga Mesiyanikong Hari sa 1914.
SENEMANANG PAGBASA SA BIBLIYA
11. Unsay atong makat-onan sa tubag ni Job kang Jehova nga gihisgotan sa Job 42:1-6? Si Job natabangan sa pagkakita sa Diyos o pagkahibalo sa kamatuoran bahin kaniya sa dihang iyang napatalinghogan ang pulong ni Jehova ug napahinumdoman pinaagi sa pasundayag sa iyang gahom. (Job 19:26) Kini nag-usab sa iyang panghunahuna. Sa dihang kita tul-iron pinasukad sa Kasulatan, angay natong dawaton dayon ang atong sayop ug maghimog mga kausaban. [Mayo 1, w06 3/15 “Ang Pulong ni Jehova Buhi—Mga Haylayt Gikan sa Basahon ni Job”]
12. Unsang “walay-pulos nga butang” ang padayong giyagubyob sa mga nasod? (Sal. 2:1, 2) Ang “walay-pulos nga butang” mao ang kanunayng gikabalak-an sa tawhanong mga kagamhanan sa pagpatunhay sa ilang kaugalingong awtoridad. Kini walay-pulos tungod kay ang ilang katuyoan seguradong mapakyas. Makalaom ba gayod nga molampos ang nasodnong mga pundok sa dihang sila mobarog ‘batok kang Jehova ug batok sa iyang dinihogang hari’? [Mayo 8, w06 5/15 “Ang Pulong ni Jehova Buhi—Mga Haylayt Gikan sa Unang Basahon sa mga Salmo”]
13. Unsang mga patukoranan ang pagalumpagon? (Sal. 11:3) Kini mao gayod ang mga patukoranan sa tawhanong katilingban—ang balaod, kahusay, ug hustisya. Kon kini dili na organisado, magkaguliyang ang katilingban ug mawala ang hustisya. Ubos niana nga mga kahimtang, ang “matarong” angayng bug-os nga mosalig sa Diyos. (Sal. 11:4-7) [Mayo 15, w06 5/15 “Ang Pulong ni Jehova Buhi—Mga Haylayt Gikan sa Unang Basahon sa mga Salmo”]
14. Sa unsang paagi ang mapahitas-ong tawo ‘pagabalosan sa hilabihan gayod’? (Sal. 31:23) Ang balos nga gihisgotan niining Salmoha mao ang silot. Ang usa nga matarong makadawat ug disiplina gikan kang Jehova ingong balos alang sa iyang dili-tinuyong mga sayop. Kay ang mapahitas-ong tawo dili mobiya sa iyang daotang dalan, siya pagabalosan sa hilabihan gayod pinaagig grabeng silot. (Prov. 11:31; 1 Ped. 4:18) [Mayo 29, w06 5/15 “Ang Pulong ni Jehova Buhi—Mga Haylayt Gikan sa Unang Basahon sa mga Salmo”]
15. Unsang kahupayan ang atong makuha gikan sa Salmo 40 nga makatabang kanato sa pagsagubang sa pagkadili-hingpit sa makasasalang unod ug sa lainlaing katalagman niini nga sistema sa mga butang? (Sal. 40:1, 2, 5, 12) Ang paglaom kang Jehova makatabang kanato sa pagsagubang sa depresyon ug sa paggawas “gikan sa nagadaguok nga gahong, gikan sa lapok sa mga linugdang.” Ang mga katalagman o ang mga kabalaka bahin sa atong kaugalingong mga kasaypanan dili makapabug-at kanato kon atong hinumdoman nga ang atong mga panalangin ‘daghan pa kay sa atong ikabatbat.’ [Hun. 12, w06 5/15 “Ang Pulong ni Jehova Buhi—Mga Haylayt Gikan sa Unang Basahon sa mga Salmo”]