Pagtuon sa Brosyur nga Padayon sa Pagbantay!

Ang mga kongregasyon sa tibuok kalibotan magtuon sa brosyur nga Padayon sa Pagbantay! sulod sa mga semana sa Mayo 23 hangtod sa Hunyo 20, 2005, diha sa Pagtuon sa Libro sa Kongregasyon. Palihog gamita ang mosunod nga mga pangutana sa dihang mangandam ug magdumala niining tigoma. Panahon sa pagtuon, basaha ang pinatik nga materyal, ug basaha ang gisitar nga mga teksto segun sa itugot sa panahon.

Semana sa Mayo 23

◼ Mga panid 3-4: Hain sa mga kahimtang nga gilista dinhi ang ilabinang nakaapektar sa imong kinabuhi? Unsay nagpaila kanimo nga kining maong mga kahimtang dili lamang ordinaryong mga panghitabo sa lokal nga mga dapit?

◼ Panid 5: Unsay nakapakombinsir kanimo nga may pagtagad gayod ang Diyos? Unsa tingali ang magpaila kon unsa ka dako ang atong pagtagad sa Diyos ug sa iyang ginabuhat?

◼ Mga panid 6-8: Unsay giingon sa Mateo 24:1-8, 14 bahin sa kahulogan sa presenteng mga kahimtang sa kalibotan? Ingon sa gipakita sa 2 Timoteo 3:1-5, unsa nang yugtoa sa panahon ang atong gikinabuhian karon? Kataposang mga adlaw kini sa unsa? Unsay nakapakombinsir kanimo nga ang Bibliya tinuod nga Pulong sa Diyos? Unsa ang Gingharian nga bahin niana atong ginasangyaw?

◼ Mga panid 9-10: Nganong kinahanglan natong tagdon pag-ayo ang atong inadlaw nga mga desisyon ug ang atong mga ginauna sa kinabuhi? (Roma 2:6; Gal. 6:7) Samtang imong repasohon ang mga pangutana diha sa panid 10, unsang mga teksto ang imong mahinumdoman nga angayng mag-impluwensiya sa kon unsay imong ginabuhat?

Semana sa Mayo 30

◼ Panid 11: Ngano gayong personal natong tagdon ang mga pangutanang gisukna niining panira? (1 Cor. 10:12; Efe. 6:10-18) Unsay gibutyag sa atong mga tubag niining mga pangutanaha kon unsa ka seryoso ang atong pagsunod sa tambag ni Jesus diha sa Mateo 24:44?

◼ Mga panid 12-14: Unsa ‘ang takna sa paghukom’ nga gihisgotan diha sa Pinadayag 14:6, 7? Unsay kahulogan sa ‘pagkahadlok sa Diyos ug paghatag kaniya sa himaya’? Unsa ang Dakong Babilonya, ug unsay mahitabo kaniya? Unsang aksiyon maylabot sa Dakong Babilonya ang kinahanglan natong buhaton karon? Unsa pa ang nalakip sa gitagnang takna sa paghukom? Unsay epekto sa atong wala pagkahibalo bahin “sa adlaw ni sa takna” sa gitagnang pagpahamtang sa Diyos sa paghukom nganhi kanato? (Mat. 25:13)

◼ Panid 15: Unsa ang isyu bahin sa pagkasoberano, ug sa unsang paagi kini makaapektar sa tagsatagsa kanato?

◼ Mga panid 16-19: Unsa ang “bag-ong mga langit” ug “bag-ong yuta”? (2 Ped. 3:13) Kinsay nagsaad niining mga butanga? Unsang mga kausaban ang himoon sa bag-ong mga langit ug sa bag-ong yuta? Personal ba kitang makapahimulos gikan niana?

Semana sa Hunyo 6

◼ Mga panid 20-1: Unsang pasidaan bahin sa pagkalagiw ang gihatag ni Jesus sa iyang mga sumusunod sa unang siglo? (Luc. 21:20, 21) Kanus-a gihimo ang maong pagkalagiw? Nganong dinalian ang pagkalagiw nga walay langan? (Mat. 24:16-18, 21) Nganong daghang tawo ang wala magpatalinghog sa mga pasidaan? Sa unsang paagi ang mga tawo sa Tsina ug sa Pilipinas nakabenepisyo tungod sa pagsunod sa kasaligang mga pasidaan? Nganong mas dinalian karon ang pagsunod sa pasidaan sa Bibliya bahin sa kataposan niining presenteng sistema sa mga butang? Tungod niining dakong pagkadinalian, unsay atong responsabilidad? (Prov. 24:11, 12)

◼ Mga panid 22-3: Sa Australia niadtong 1974 ug sa Colombia niadtong 1985, nganong daghan ang wala lang manumbaling sa mga pasidaan bahin sa katalagman, ug unsay mga resulta? Unsa untay imong reaksiyon maylabot sa maong mga pasidaan, ug ngano? Unsa tingali ang magpaila kon ato bang gisunod ang pasidaan sa adlaw ni Noe? Nganong ang mga tawo gustong mopuyo sa karaang Sodoma ug sa kasikbit niini? Sa unsang paagi kita makabenepisyo pinaagi sa seryosong paghunahuna bahin sa nahitabo sa Sodoma?

Semana sa Hunyo 13

◼ Mga panid 24-7: Gamita ang “Mga Pangutana sa Pagtuon” nga anaa sa panid 27.

Semana sa Hunyo 20

◼ Mga panid 28-31: Gamita ang “Mga Pangutana sa Pagtuon” nga anaa sa panid 31.

Ang atong pagtagad niining brosyura makatabang kanato sa ‘pagpadayon sa pagbantay’ ug sa pagpamatuod sa atong kaugalingon nga andam. Hinaot ang atong publikong ministeryo kanunayng magbanaag sa pagkadinalian sa gipahayag sa manulonda: “Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na.”—Mat. 24:42, 44; Pin. 14:7.