Kon Unsaon Pagsulbad sa mga Problema sa Malinawong Paagi

ANG tawhanong kapintasan halos sama ka tigulang sa tawo. Ang Bibliya nagsubay sa kapintasan balik kang Cain, ang igsoon ni Abel ug kamagulangang anak sa unang tawhanong magtiayon. Sa dihang gikahimut-an sa Diyos ang halad ni Abel kay sa iyaha, si Cain “nasuko pag-ayo.” Sa unsang paagi giatubang niya ang kahimtang? “Giatake ni Cain si Abel nga iyang igsoon ug gipatay siya.” Human niadto, iyang nakita nga siya dako ug suliran uban sa Diyos. (Genesis 4:​5, 8-​12) Ang kapintasan wala makasulbad sa problema ni Cain nga dili maayong baroganan atubangan sa iyang Maglalalang.

Sa unsang paagi atong malikayan ang dalan ni Cain sa paggamit ug pisikal nga kusog sa pagsulbad sa mga problema?

Gikan sa Kapintasan Ngadto sa Pagpalabay

Palandonga ang usa ka tawo nga nahimuot nga nagtan-aw sa pagpatay kang Esteban, ang unang Kristohanong martir. (Buhat 7:​58; 8:1) Ang tawo, si Saulo sa Tarsus, supak sa relihiyosong baroganan ni Esteban ug mitabang sa mapintas nga pagpatay ingong makataronganong paagi sa pagpahunong sa mga kalihokan ni Esteban. Tinuod, si Saulo tingali dili mapintas diha sa tanang bahin sa iyang kinabuhi. Bisan pa niana siya andam sa pagdawat sa kapintasan ingong paagi sa pagsulbad sa mga problema. Human gilayon sa pagkamatay ni Esteban, si Saulo “misugod pagtratar nga malampingason sa [Kristohanong] kongregasyon. Nga ginasulong ang usa ka balay human sa lain ug, nga nagpangguyod sa mga lalaki ug mga babaye, iyang ipanugyan sila sa prisohan.”​—Buhat 8:3.

Sumala sa eskolar sa Bibliya nga si Albert Barnes, ang Gregong pulong nga gihubad dinhi nga “misugod pagtratar nga malampingason” nagpasabot sa mga kadaot nga mahimo sa ihalas nga mga mananap, sama sa mga leyon ug mga lobo. “Si Saulo,” nagpatin-aw si Barnes, “nayugot sa iglesya nga samag ihalas nga mananap​—usa ka kusganong pulong, nga nagpaila sa kasibot ug kapungot sa iyang gihimong paglutos.” Sa dihang si Saulo mipaingon sa Damasco sa pagdakop ug dugang pang mga sumusunod ni Kristo, siya “nagapangusmo pa gihapon ug hulga ug pagbuno batok sa mga tinun-an sa Ginoo [Kristo].” Sa iyang pagpaingon didto, nakigsulti kaniya ang nabanhawng Jesus, ug kini misangpot sa pagkakabig ni Saulo sa Kristiyanidad.​—Buhat 9:​1-19.

Human niadto nga pagkakabig, ang paagi sa pagpakiglabot ni Saulo sa uban nausab. Usa ka insidente nga nahitabo duolan sa 16 ka tuig sa ulahi nagpasundayag sa kausaban. Usa ka pundok sa mga tawo miadto sa iyang kaugalingong kongregasyon sa Antioquia ug nangawhag sa mga Kristohanon didto sa pagsunod sa Moisesnong Kasugoan. Miresulta ang ‘dakong panagbangi.’ Si Saulo, nga niining higayona mas nailhan ingong Pablo, mipadayag sa iyang baroganan. Dayag, sila grabeng naglalis. Apan si Pablo wala mohimo ug kapintasan. Hinunoa, siya miuyon sa desisyon sa kongregasyon nga iduol ang maong butang ngadto sa mga apostoles ug sa mga ansiyano sa kongregasyon sa Jerusalem.​—Buhat 15:​1, 2.

Sa Jerusalem, nahitabo usab ang “dakong panaglalis” diha sa tigom sa mga ansiyano. Si Pablo naghulat hangtod “ang tibuok panon mihilom” ug dayon nagtaho sa katingalahang mga buhat sa balaang espiritu sa Diyos taliwala sa dili-sirkunsadong mga magtutuo. Human sa Kasulatanhong panaghisgot, ang mga apostol ug ang mga ansiyano sa Jerusalem “bug-os nga nagkausa” sa dili paghatag ug wala-kinahanglanang kabug-at sa dili-sirkunsadong mga magtutuo kondili sa pagtambag kanila sa ‘pagpadayon sa paglikay sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas.’ (Buhat 15:​3-29) Sa pagkatinuod, si Pablo nausab. Siya nakakat-on sa pagsulbad sa mga isyu nga walay kapintasan.

Pagbuntog sa Mapintas nga mga Kiling

“Ang ulipon sa Ginoo dili kinahanglan nga makig-away,” si Pablo nagtambag sa ulahi, “kundili kinahanglan nga magmalumo sa tanan, kuwalipikado sa pagpanudlo, padayong nakapugong sa kaugalingon ilalom sa daotan, nagatudlo nga may kalumo kanilang nakiling sa pagkadili-mauyonon.” (2 Timoteo 2:​24, 25) Giawhag ni Pablo si Timoteo, nga usa ka batan-ong magtatan-aw, sa pagdumala sa malisod nga mga situwasyon nga malinawon. Si Pablo realistiko. Siya nahibalo nga ang emosyon mapukaw bisan taliwala sa mga Kristohanon. (Buhat 15:​37-​41) Uban sa maayong katarongan, siya nagtambag: “Pagkapungot, apan ayaw pagpakasala; ayaw pasalopa ang adlaw nga kamo anaa sa suko nga kahimtang.” (Efeso 4:26) Ang pagpugong sa kasuko nga walay pagsilaob sa dili-mapugngang kapungot mao ang hustong paagi sa pagpakiglabot sa maong emosyon. Apan sa unsang paagi mahimo kini?

Karong adlawa, dili masayon ang pagpugong sa kasuko. “Ang pagkamabangis popular,” matod pa ni Dr. Deborah Prothrow-Stith, luyoluyong dean sa Harvard School of Public Health. “Sa pagkatinuod, ang abilidad sa pagkamaayong makig-uban​—pakigsabot, kompromiso, empatiya, pagpasaylo​—kasagaran iya sa mga hadlokan.” Bisan pa niana, kini maoy mga hiyas nga linalaki, ug kini hinungdanon sa pagpugong sa mapintas nga mga kiling nga magbukal sa atong kinailadman.

Sa dihang nahimong Kristohanon, si Pablo nakakat-on sa labing maayong paagi sa pagpakiglabot sa kalainan sa opinyon. Kini gipasukad sa mga pagtulon-an sa Bibliya. Ingong usa ka batid nga eskolar sa Hudaismo, si Pablo sinati sa Hebreohanong Kasulatan. Siya dayag nga nahibalo sa mga kasulatan sama sa: “Ayaw kasinahi ang tawong mapintas, ug ayaw pilia ang iyang mga dalan.” “Siya nga mahinay sa kasuko labi pang maayo kay sa tawong gamhanan, ug siya nga nagagahom sa iyang espiritu kay sa usa nga nagaagaw ug siyudad.” “Sama sa usa ka siyudad nga nalumpag, nga walay kuta, mao ang tawo nga walay pagpugong sa iyang espiritu.” (Proverbio 3:​31; 16:​32; 25:28) Bisan pa, kana nga kahibalo wala makapugong kang Pablo, sa wala pa siya makabig, sa paghimog kapintasan batok sa mga Kristohanon. (Galacia 1:​13, 14) Apan unsay nakatabang kang Pablo, ingong Kristohanon, sa pagsulbad sa kontrobersiyal nga mga isyu pinaagi sa paggamit ug katarongan ug pag-awhag imbes kapintasan?

Gihatagan kita ni Pablo ug ilhanan sa dihang siya miingon: “Magmahimong mga tigsundog kanako, sama gayod nga ako mao kang Kristo.” (1 Corinto 11:1) Iyang gipabilhan pag-ayo ang nahimo ni Jesu-Kristo kaniya. (1 Timoteo 1:​13, 14) Si Kristo nahimong iyang sulondan nga pagasundon. Siya nahibalo sa pag-antos ni Jesus alang sa makasasalang katawhan. (Hebreohanon 2:​18; 5:​8-10) Makapamatuod si Pablo nga ang tagna ni Isaias bahin sa Mesiyas natuman diha kang Jesus: “Siya gidaogdaog, ug iyang gitugotan ang iyang kaugalingon nga sakiton; bisan pa niana wala niya bukha ang iyang baba. Siya gidala sama sa karnero ngadto sa ihawan; ug sama sa usa ka baye nga karnero nga walay timik sa atubangan sa iyang magtutupi, wala usab niya bukha ang iyang baba.” (Isaias 53:7) Si apostol Pedro nagsulat: “Sa dihang siya [Jesus] gisultihag pasipala, wala siya mobalos sa pagsultig pasipala. Sa dihang nag-antos siya, wala siya manghulga, kundili nagpadayon sa pagpiyal sa iyang kaugalingon ngadto sa usa nga nagahukom sa pagkamatarong.”​—1 Pedro 2:​23, 24.

Ang pagpabili ni Pablo sa paagi sa pagpakiglabot ni Jesu-Kristo sa malisod nga mga kahimtang nagpalihok kaniya sa pagbag-o. Siya nakatambag sa iyang kaubang mga magtutuo: “Padayon nga mag-inantosay sa usag usa ug bukas nga magpinasayloay sa usag usa kon ang usa may hinungdan sa pagreklamo batok sa lain. Maingon gayod nga si Jehova bukas nga nagpasaylo kaninyo, buhata usab ninyo ang ingon.” (Colosas 3:13) Ang pagdawat nga kinahanglang dili magmapintas dili igo. Ang pagpabili sa nahimo ni Jehova ug ni Jesu-Kristo alang kanato makatabang sa paghatag ug panukmod nga gikinahanglan sa pagbuntog sa mapintas nga mga kiling.

Posible ba Kini?

Usa ka tawo sa Hapon nagkinahanglan ug ingon niana nga kusganong panukmod. Ang iyang amahan, nga usa ka sundalo nga daling masuko, nagdumala sa iyang pamilya nga mapintason. Sanglit usa ka biktima sa kapintasan ug nakakita sa iyang inahan nga samang nag-antos, ang tawo nakaugmad ug mapintas nga buut. Nagdaladala siya ug duha ka espadang samurai nga lainlain ug gitas-on nga iyang iwarawara sa pagsulbad sa mga problema maingon man sa paghulga sa mga tawo.

Sa dihang ang iyang asawa nagsugod sa pagtuon sa Bibliya, siya milingkod diha sa pagtuon nga wala kaayo magtagad niini. Apan, sa dihang nakabasa sa pulyeto nga nag-ulohang Kining Maayong Balita sa Gingharian,a siya nausab. Ngano? “Sa dihang nabasa nako ang materyal ilalom sa mga sub-ulohang, ‘Kristo Jesus’ ug ‘Ang Lukat,’ gibati ko ug kaulaw,” siya miingon. “Bisan pag baliko ang akong pagkinabuhi, buot ko gihapong magmaluloton sa mga tawong akong makasabot. Malipay ako sa paghimo sa akong mga higala nga malipayon basta dili kini makaapekto sa akong kaugalingong kinabuhi. Aw, ang Anak sa Diyos, si Jesus, andam sa paghatag sa iyang kinabuhi alang sa tawo, lakip sa mga tawong sama kanako. Ako nabungog, nga morag gidukdok ako ug maso.”

Siya mihunong sa pagpakig-uban sa iyang mga higala kanhi ug wala magdugay nagpalista sa Tunghaan sa Teokratikanhong Ministeryo sa kongregasyon sa mga Saksi ni Jehova. Kining tunghaana nagtabang sa mga nagpalista sa pagkabaton ug arte sa pagpanudlo sa Bibliya ngadto sa uban. Ang kurso nakahatag ug kaayohan niining tawhana. Siya nahinumdom: “Sa bata pa ako, mohimo ako ug mga hulga ug kapintasan tungod kay dili ako makapadayag sa akong mga pagbati ngadto sa uban. Sa dihang nakakat-on ako sa pagpadayag sa akong mga hunahuna ngadto sa uban, nagsugod ako sa pagpangatarongan kanila imbes maghimo ug kapintasan.”

Siya ba, sama kang Pablo, naghimo sa dalan sa kinabuhi ni Kristo nga iyang kaugalingon? Ang iyang pagtuo nasulayan sa dihang ang usa ka higala kanhi nga iyang gipanumpaan nga sila magtinagdanay ingong igsoon misulay sa pagpahunong kaniya sa pagkahimong Kristohanon. Gisumbag siya sa iyang “higala” ug gipasipalahan ang iyang Diyos, si Jehova. Gipugngan sa tawong mapintas kanhi ang iyang kaugalingon ug nangayog pasaylo nga wala makatuman sa gipanumpaan. Nahigawad, gipasagdan siya sa iyang “igsoon.”

Pinaagi sa pagbuntog sa iyang mapintas nga mga kiling, kining tawong masuk-anon kanhi nakabaton ug daghang espirituwal nga mga igsoong lalaki ug babaye, nga nahiusa sa gugma alang sa Diyos ug sa silingan. (Colosas 3:14) Sa pagkamatuod, kapin sa 20 ka tuig human nahimong dedikadong Kristohanon, siya karon nag-alagad ingong usa ka nagapanawng magtatan-aw sa mga Saksi ni Jehova. Pagkadako sa iyang kalipay nga makapakita gikan sa Bibliya nga ang mga tawo nga adunay samag hayop nga mga buut makakat-on sa pagsulbad sa mga panagbingkil nga walay kapintasan sama sa iyang pagkakat-on niana! Ug pagkadakong pribilehiyo alang kaniya nga makatudlo sa dakong katumanan sa matagnaong mga pulong: “Dili nila pagadaoton o pagagub-on ang tanan kong bukid nga balaan; tungod kay ang yuta mapuno sa kahibalo ni Jehova ingon sa mga tubig nga nagatabon sa dagat”!​—Isaias 11:9.

Sama kang apostol Pablo ug sama niining tawong mapintas kanhi, ikaw usab makakat-on sa pagdumala sa makapalagot nga mga kahimtang, nga magsulbad sa mga problema sa malinawong paagi. Ang mga Saksi ni Jehova sa imong lugar malipay sa pagtabang kanimo.

[Mga footnote]

[Blurb sa panid 5]

Si Pablo realistiko. Siya nahibalo nga ang emosyon mapukaw bisan taliwala sa mga Kristohanon

[Hulagway sa panid 7]

Ang pagpabili sa nahimo sa Diyos kanato makahatag ug makigdaitong mga relasyon