Usa ka Linain Kaayong Kasal
SA AMIHANAN sa Mozambique nahimutang ang lunhawng walog nga gilibotan sa matahom nga kabukiran—ang uban batoon, ang uban napuno sa labong nga mga tanom. Dinhi nahimutang ang balangay sa Fíngoè. Sa hayag nga mga gabii sa tingtugnaw, ang mga langit mogilak sa mga bituon, ug ang bulan hayag kaayo nga kini maglamdag sa uhot-ug-atop nga kabalayan sa mga taga-balangay. Dinhi niining matahom nga dapit nga ang usa ka talagsaong kasal nahitabo.
Gatosan ka tawo ang nagbaktas sulod sa daghang oras, mga adlaw pa gani, aron pagtambong niining linaing okasyon. Ang uban mitabok sa umaw ug peligrosong mga dapit nga gipuy-an sa mga hyena, mga leyon, ug mga elepante. Gawas pa sa personal nga dala, daghang bisita ang nagdala ug mga manok, mga kanding, ug mga utanon. Sa pag-abot sa balangay, miadto sila sa usa ka hawan nga lugar nga kasagarang gamiton alang sa Kristohanong mga kombensiyon. Bisan tuod gikapoy sa biyahe, sila malipayon, ug ang ilang mapahiyomong mga nawong nagbanaag ug mahinamong pagpaabot sa sunod nga mahitabo.
Kinsa bay nagpakasal? Daghan sila! Oo, daghan kaayong parisan. Dili kini bahin sa hilabihan ka makapaukyab nga dinaghang pagpakasal. Sa kasukwahi, sila maoy sinsero ug maayog tumong nga mga parisan nga kanhi wala makaparehistro sa ilang mga kaminyoon tungod kay sila nagpuyo sa hilit nga mga dapit nga halayo sa mga rehistrohanan. Kining tanang parisan nakahibalo sa mga sukdanan sa Diyos bahin sa kaminyoon sa dihang nagtuon sila sa Bibliya uban sa mga Saksi ni Jehova. Ilang nakat-onan nga kinahanglan silang magpakasal sumala sa mga balaod sa nasod aron sa pagpahimuot sa ilang Maglalalang, ang Tagmugna sa kaminyoon, maingon nga si Jose ug Maria misunod sa mga kinahanglanon sa pagparehistro sa panahon sa pagkatawo ni Jesus.—Lucas 2:1-5.
Pagpangandam Alang sa Okasyon
Ang sangang buhatan sa mga Saksi ni Jehova sa Mozambique mihukom sa pagtabang. Una, ang Ministries of Justice and Interior sa kaulohan sa nasod, sa Maputo, gikontak aron sa pagtino kon unsang mga pamaagi ang gikinahanglan sa balaod. Sunod, ang mga misyonaryo sa kaulohang siyudad sa probinsiya sa Tete mikontak sa lokal nga mga awtoridad aron mapahapsay pa ang mga kahikayan. Gitino ang petsa sa pagbiyahe sa mga misyonaryo ug sa mga opisyal gikan sa Notary and the Civil Identification Department ngadto sa balangay sa Fíngoè. Kasamtangan, ang sangang buhatan nagpadalag sulat sa pagpatin-aw nga naghatag ug mga instruksiyon ngadto sa tanang kongregasyon nga nalangkit. Ang mga Saksi ug ang lokal nga mga opisyal mahinamong nagpaabot sa talagsaong okasyon.
Sa Dominggo, Mayo 18, 1997, tulo ka misyonaryo duyog sa mga opisyal sa gobyerno miabot sa Fíngoè. Ang lokal nga mga awtoridad nag-andam ug komportableng mga sak-anan alang sa mga opisyal nga kasikbit sa tinukod alang sa tagdumala. Apan, ang nanagduawng mga opisyal nakadayeg kaayo sa pagkamaabiabihon sa mga Saksi ni Jehova nga mipalabi sila sa pagpuyo uban sa mga misyonaryo sa inayom-ayom nga mga payag. Sila natingala sa pagkahibalo nga usa sa mga kosinero maoy ansiyano sa lokal nga kongregasyon ug nga usa ka nagapanawng magtatan-aw nalakip sa mga boluntaryo nga naghimo sa mas ubos nga mga trabaho sa pagpangandam alang sa kasal. Sila usab nakamatikod sa maayong kinaiya sa mga misyonaryo, kinsa, nga walay reklamo, mipuyo sa yanong payag ug naligo ginamit ang gamayng kabo nga lata. Wala pa sukad sila makakita ug ingon ka lig-ong bugkos tali sa mga tawo sa lainlaing mga kagikan. Apan, ang nakapadayeg pag-ayo kanila mao ang pagtuo nga gipasundayag sa paghimog dagkong mga sakripisyo aron moharmonya sa balaod sa nasod ug sa kahikayan sa Diyos.
Usa ka Malipayong Okasyon
Samtang nangabot ang mga parisan, sila nangandam dayon alang sa unang ang-ang sa pagminyo: pagkuhag sertipiko sa pagkatawo. Ang tanan mapailobong naghulat nga naglinya atubangan sa tem sa Civil Registry aron sa paghatag sa ilang personal nga impormasyon. Unya miadto sila sa laing linya aron letratohan, nga human niana sila miadto sa tem gikan sa Civil Identification Department aron sa pagkuha sa ilang mga identity card. Sunod, mibalik sila sa tem sa Civil Registry alang sa paghikay sa gitinguha pag-ayong sertipiko sa kaminyoon. Human niini, sila nagbarog nga mapailobon nga naghulat nga tawgon ang ilang mga ngalan pinaagi sa megapon. Ang pagpanghatag sa mga sertipiko sa kaminyoon maoy makapatandog nga esena. Dihay dakong kalipay samtang ang matag magtiayon nag-isa sa ilang sertipiko sa kaminyoon samag bililhong mga tropeyo.
Kining tanan nahitabo ilalom sa naglagiting nga kainit sa adlaw. Bisan pa niana, ang kalipay sa okasyon wala mabalda sa kainit ug abog.
Ang mga lalaki hinlog mga besti, daghan ang nagdyaket ug nagkorbata. Ang mga babaye nagsinina sa naandang paagi, nga naglakip sa taas, hayag ug kolor nga panapton nga gitawag ug capulana nga ilang gibakos. Ang uban nagdalag mga bata nga giputos sa mao gihapong panapton.
Ang mga kalihokan hapsay nga nagpadayon, apan daghan ra kaayo nga dili maproseso sa usa ka adlaw. Sa dihang mikilumkilom na, ang mga opisyal sa gobyerno malulotong mihukom sa pagpadayon sa pag-atiman sa mga parisan. Sila mikomento nga dili sila makabiya sa “atong mga igsoon” nga magpaabot human sila makahimog dako kaayong pagsakripisyo aron makaadto didto. Kining espiritu sa pakigtambayayongay ug pagsakripisyo sa kaugalingon kanunay gayong mahinumdoman.
Ang gabii giduyogan sa hilabihang kabugnaw. Bisan tuod ang uban nagsaka sa mga payag, kadaghanan sa mga magtiayon diha sa gawas, nga nagpundok libot sa daob. Wala kini makaiban sa kalipay sa okasyon. Milabaw sa pitipiti sa kalayo ang tingog sa katawa ug awit, nga giawit sa upat-nga-bahing ganay. Daghan ang nagpaambit ug mga sugilanon sa ilang pagbiyahe, nga nagkupot sa ilang bag-ong nabatonang mga dokumento.
Pagkakadlawon ang uban nangarisgar pag-adto sa kinapusoran sa balangay aron sa pagbaligya sa ilang mga manok, mga kanding, ug mga utanon aron makaamot sa bayranan sa pagparehistro sa ilang mga kaminyoon. Daghan ang tinuod nga “nagsakripisyo” niadtong mga hayopa, nga nagbaligya niana nga menos kaayo sa tinuod nga bili niini. Alang sa mga kabos, ang kanding maoy bililhon ug mahalong butang; bisan pa niana andam sila sa paghimo niini nga sakripisyo aron makasal ug makapahimuot sa ilang Maglalalang.
Kalisdanan sa Biyahe
Ang ubang mga magtiayon layo ug gibaktas aron makaabot didto. Mao kini ang kahimtang ni Chamboko ug sa iyang asawa, si Nhakulira. Ilang gisugilon ang ilang sugilanon sa ikaduhang gabii sa okasyon samtang gidangka ang ilang mga tiil sa kalayo. Bisan tuod 77 anyos, buta ang usa ka mata ug halap ang pikas, si Chamboko milakaw nga nagtiniil sulod sa tulo ka adlaw nga gikuyogan sa uban pa sa iyang kongregasyon, kay siya determinado nga ipalegal ang ilang 52-tuig nga panag-ipon.
Si Anselmo Kembo, 72 anyos, nakig-ipon na kang Neri sulod sa mga 50 ka tuig. Pipila ka adlaw una sa biyahe, natusok ang iyang bitiis sa usa ka dakong tunok samtang nagtikad sa iyang plantasyon. Gidali siya sa kinadul-ang ospital aron matambalan. Bisan pa niana, mihukom siya sa pagbiyahe nga magbaktas, nga nagtakiang paingon sa Fíngoè sa kasakit. Gidangtan kadto ug tulo ka adlaw. Wala kapugngi ni Anselmo ang iyang kalipay samtang iyang gikuptan ang sertipiko sa kaminyoon.
Ang laing takos tagdong bag-ong kinasal mao si Evans Sinóia, usa ka kanhing poligamista. Sa dihang nakakat-on siya sa kamatuoran sa Pulong sa Diyos, mihukom siya sa pagpalegal sa iyang panag-ipon uban sa iyang unang asawa, apan midumili siya, nga mibiya kaniya tungod sa laing lalaki. Ang iyang ikaduhang asawa, nga nagtuon usab sa Bibliya, miuyon sa pagpakasal kaniya. Silang duha naglakaw latas sa peligrosong dapit nga gipuy-an sa mga leyon ug ubang ihalas nga mga mananap. Human sa tulo ka adlaw nga biyahe, sila usab milampos sa pagpalegal sa ilang kaminyoon.
Sa Biyernes, lima ka adlaw human ang mga misyonaryo ug mga opisyal unang miabot, natapos ang trabaho. Ang resulta mao nga 468 ka identity card ug 374 ka sertipiko sa pagkatawo ang giisyu. Ang gidaghanon sa mga sertipiko sa kaminyoon nga naisyu maoy 233! Ang atmospera mao kanang sa tumang kalipay. Bisan pa sa kakapoy, ang tanan miuyon nga kadto takos gayod. Sa walay duhaduha, kanang okasyona dili mapanas sa mga hunahuna ug kasingkasing sa tanang nalangkit. Tinuod gayod kadto nga usa ka linaing kasal!