Dagayang mga Ganti Tungod sa Sagradong Pag-alagad

Sumala sa Giasoy ni Harry Bloor

Mga usa ka gatos ka tuig kanhi, ang akong lolo maoy usa ka malig-ong membro sa Metodistang Simbahan. Siya usab maoy usa ka tinahod nga magwawali, kinsa mihatag nga madagayaon sa pagpaluyo sa daghang kapilya sa Stoke-on-Trent, lungsod sa mga magkukulon sa Inglaterra. Unya naglisod siya sa panalapi. Sa pagtabang kang Lolo, gihikay sa akong amahan nga siya magdumalag usa ka gamayng tindahan sa balangay. Ang tindahan may lisensiya sa pagbaligyag serbesa, ug sa dihang nahibaloan kini sa mga Metodista, ilang gipalagpot dihadiha si Lolo.

NAGLAGOT si Papa ug nanumpa nga dili na gayod siya mag-apil-apil pa sa relihiyon​—ug siya nagtuman sa iyang pulong. Siya nahimong polis, apan sa ulahi siya nahimong tag-iya sa usa ka tindahag-ilimnon. Busa ako nagdako taliwala sa baho ug aso nianang dapita. Walay gidulang papel ang relihiyon sa akong kinabuhi, apan ako nakakat-on ug maayo sa pagdulag mga dulang dama! Apan, tungod sa sayong impluwensiya ni Lolo, nagpabilin kanako ang maayong pagtahod sa Bibliya, bisag diyutay lang ang akong nahibaloan bahin niana.

Nakakat-on Ako sa Kamatuoran sa Bibliya

Niadtong 1923, sa dihang ako 24 anyos, mibalhin ako sa sidlakan sa Nottingham ug nagsugod sa pagpangulitawo kang Mary, kinsa nagpuyo mga 40 kilometros ang gilay-on sa balangay sa Whetstone, sa habagatang kasadpan sa Leicester. Ang iyang amahan, si Arthur Rest, maoy organista sa lokal nga kapilya, apan niadtong higayona siya maoy usa ka masibotong Estudyante sa Bibliya, ingon sa pagtawag niadto sa mga Saksi ni Jehova. Si Arthur kanunay nga makigsulti kanako bahin sa iyang bag-ong nakaplagang pagtuo​—nga may diyutayng kalamposan. Apan, napukaw ang akong interes sa dihang miuban ako kaniya sa lokal nga kapilya sa Baptist sa hapon sa Dominggo, Hulyo 13, 1924, aron mamati sa pakigpulong sa usa ka membro sa parliamento kinsa maoy usa ka prominenteng Baptist. Ang iyang ulohan, “Ang mga Pagtulon-an ni Pastor Russell Gisusi Diha sa Kahayag sa Kasulatan,” nakapaikag kanako. May mga nota pa ako nga akong gikuha niadto.

Ang mga Baptist mibalibad sa hangyo sa mga Estudyante sa Bibliya nga tubagon ang pag-atake sa ilang mga pagtulon-an. Ako naglagot niini ug mihukom sa pagpangitag laing lugar nga dumalahan sa maong tigom. Ang duol nga kamalig maoy maayong dapit alang niini. Gihinloan namo kini, gikuhaan ug mga lawalawa, gihiklin ang panggiok nga mga makina sa usa ka kilid, ug dayon nangandam kaming tanan. Nakatigom kamig 70 ka lingkoranan, ug kami nakapakopyag mga handbill.

Sa dihang si Frank Freer miabot gikan sa Leicester sa paghatag ug pakigpulong, napuno ang tanang lingkoranan, ug laing 70 ka tawo ang nagtindog! Ang tin-aw nga pangatarongan ni Frank gikan sa Kasulatan nakadani kanako, sama nga kini nakadani sa daghang ubang nanambong. Sukad niadtong higayona, ang gamayng kongregasyon sa mga Estudyante sa Bibliya sa Blaby duol sa Leicester kusog nga miuswag. Kadto usab maoy panahon sa hinungdanong kausaban sa akong kinabuhi​—ingon man kang Mary. Niadtong 1925 gihimo namong duha ang among pagpahinungod kang Jehova, nabawtismohan, ug nagminyo.

Espirituwal nga mga Panalangin

Sa nagsunod nga tuig, ako gitudlo ingong direktor sa pag-alagad sa Kongregasyon sa Blaby. Ako ug ang akong asawa buot nga mosunod sa mga lakang sa mga kolportyur ug mahimong bug-os-panahong mga ebanghelisador, apan wala magdugay nadayag nga ang panglawas ni Mary dili magtugot kaniya nga makab-ot ang maong puliking eskedyul. Bisag nag-antos siya sa dili maayong panglawas hangtod sa iyang kamatayon niadtong 1987, siya maoy usa ka maayong kauban ug ekselenteng ministro kinsa batid sa impormal nga pagsangyaw ug pagsugod ug mga pagtuon sa Bibliya. Kadaghanan sa among gabii gigugol namo sa pagtambong sa mga tigom o pagpakig-ambit sa mga kamatuoran sa Bibliya uban sa among mga silingan.

Ako usa ka inhenyero ug nagtrabaho sa usa ka kompaniya nga naggamag makinang iggagabas. Ang akong trabaho naglangkit ug malukpanong pagbiyahe palibot sa Britanya, ingon man sa Pransiya, ug sagad mouban kanako si Mary. Kining maong mga pagbiyahe naghatag kanamog mga higayon sa pagsangyaw nga malukpanon.

Mga Pundasyon sa Pag-uswag

Niadtong 1925 nagtukod kami ug maayong tinukod alang sa among mga tigom sa Blaby, ug gikan didto giorganisar namo ang epektibong programa sa pagsangyaw. Matag buntag sa Dominggo, kami mag-abang ug bus nga magdala kanamo sa nagkatag nga mga balangay ug sa mas gagmayng mga lungsod. Diha sa dalan pakanaogon ang mga magmamantala aron magsugod sa pagsangyaw, ug unya sila pasakyon sa bus inigbalik niini. Panahon sa mainit nga mga bulan sa ting-init, kami may mga pagtuon sa Bibliya sa ulahing kahaponon sa Dominggo, nga gigamit ang bag-ong isyu sa The Watchtower. Human niana, sa alas otso, magkita kami sa tiyanggihan sa Leicester alang sa usa ka pakigpulong publiko diha sa gawas. Usa ka gabii 200 ka tawo ang namati. Kini nga kalihokan nakapahimutang sa mga pundasyon alang sa daghang kongregasyon nga karon naglungtad sa sulod ug palibot sa Leicester.

Niadtong 1926 ang hinungdanon kaayong kombensiyon duyog nga gihimo sa Alexandra Palace ug Royal Albert Hall sa London. Niadtong okasyona si Joseph F. Rutherford, kanhing presidente sa Watch Tower Society, nagluwat sa librong Deliverance. Ang resolusyong “Usa ka Testimonya sa mga Magmamando sa Kalibotan” ug ang kusganong pahayag publiko ni Brader Rutherford nga “Kon Nganong Nagsusapinday ang mga Gahom sa Kalibotan​—Ang Sulbad” gipatik sa bug-os diha sa nag-unang mantalaan sa pagkasunod adlaw human kini gipresentar. Kapin sa 10,000 ang nakadungog sa pahayag publiko, ug 50,000,000 ka kopya sa resolusyon ang sunod nga giapod-apod sa tibuok kalibotan. Ang maong kombensiyon nagpauswag sa buluhatong pagsangyaw sa Britanya.

Dagkong Kombensiyon sa Panahon sa Gubat

Ang ikaduhang gubat sa kalibotan mibuto sa Septiyembre 1939, ug sa pagka-1941 ang gubat diha na sa kinapungkayan niini. Ang mga tigbomba nga mga Aleman namomba adlaw ug gabii, ug gipatuman ang tibuok-nasod nga kawalay-koryente. Nihit ang pagkaon, ug ang pagkaon nga mabatonan gipahatpahat ug maayo. Limitado ang transportasyon, bisag pinaagi sa tren. Luyo niining daw dagkong kababagan, gihimo namo ang lima ka adlaw nga nasyonal nga kombensiyon sa Septiyembre 3-7, 1941.

Ang De Montfort Hall sa Leicester maoy gipili ingong dapit sa kombensiyon tungod kay ang Leicester anaa sa sentro sa Inglaterra. Sanglit nalangkit pa ako sa negosyo sa kahoy, nakatabang ako sa paghimog mga karatula sa pahibalo. Gihikay ko usab ang lokal nga transportasyon alang sa mga kombensiyonista. Pinaagi sa pagpalit ug mga tiket nga abante ug pagbayad ug mas dako kay sa regular nga bayad, napapadayon namo ang pagbiyahe sa mga sakyanan sa Leicester bisan sa adlawng Dominggo.

Sanglit dihay mga restriksiyon sa pagbiyahe, gilaoman namo nga tingalig 3,000 lamang ka mga Saksi ang moabot. Hunahunaa ang kalipay sa dihang kapin sa 10,000 ka delegado ang miingon nga sila motambong! Apan asa sila mosaka? Ang mga lungsoranon sa Leicester malulotong nagdapit sa daghan nga mosaka sa ilang mga balay. Dugang pa, mga usa ka libo ang gipahiluna diha sa mga tolda nga gipatindog tres kilometros ang gilay-on gikan sa dapit sa kombensiyon. Ang Kampo ni Gideon, ingon sa among pagtawag niana, nakapakisaw ug diyutay sa komunidad.

Ang dagko puting mga tolda giabangan aron magamit alang sa mga departamento sa kombensiyon ug sa pagpahiluna sa dako kaayong panon. Sa dihang natino nga sa masanag nga kahayag sa bulan, ang mga tolda basin mahimong puntirya sa mga tigbomba sa Nazi, kini sila dihadiha gitabontabonan. Ang gubat, ug ilabina ang dili pag-apil-apil sa mga Saksi niini, nakapatugaw sa publiko. Gatosan ka Saksi sa maong panahon gibilanggo tungod sa ilang pinasukad-sa-Bibliya nga baroganan bahin sa neyutralidad.​—Isaias 2:​4; Juan 17:16.

Ang Sunday Pictorial, sa Septiyembre 7, 1941, nagtaho: “Usa ka katingalahang butang nga makakaplag ug 10,000 ka tawo, kadaghanan batan-on, nga migugol ug usa ka semana nga naghisgot bahin sa relihiyon nga wala maghisgot bahin sa gubat, gawas lang kon hinigayong hilisgotan.

“Ako nangutana kon ang mga Saksi may mga membro sa Alemanya. Oo, gisultihan ako, ug halos silang tanan, mga 6,000, anaa sa mga kampo konsentrasyon.”

Ang reporter midugang: “Aw, oo, ang mga Nazi maoy kaaway, apan ang mga Saksi wala kaayoy gibuhat bahin kanila, gawas sa pagpanagtag ug mga pulyeto ug pagpamati sa mga pakigpulong.”

Ang mga pahayag sa mantalaan bahin kanamo sa katibuk-an maoy negatibo, ug ang mga magsusupak mihimo gani ug kapintasan sa wala molampos nga mga pagsulay sa pagpahunong sa among kombensiyon. Bisan pa niana, ang Daily Mail sa London miadmitir, nga daw nagpanuko: “Ang organisasyon maoy hapsay, hilom, ug episyente.”

Giakusar kami nga maoy hinungdan sa pagkahurot sa suplay sa mga sigarilyo sa siyudad. Apan ang The Daily Mail nagpatin-aw: “Dili makareklamo ang Leicester ni ang Tigkontrolar sa Tabako nga ang mga Saksi ang nakahurot sa suplay sa mga sigarilyo sa Leicester. Sila dili manabako.” Lain pa, ang mga reklamo nga ang lokal nga mga molupyo gihikawan ug pagkaon sa mga Saksi napuypoy sa dihang gipatin-aw nga sila nagdala sa kadaghanan nilang suplay sa pagkaon. Ngani, sa kataposan sa kombensiyon, 150 ka 1.8-kilos nga pirasong tinapay ang gidonar ngadto sa Leicester Royal Infirmary​—usa ka igoigong amot niadtong panahona nga nihit ang pagkaon.

Ang kombensiyon nagtaganag dakong espirituwal nga pagdasig alang sa mga 11,000 ka Saksi sa Britanya. Sila nalipay nga duolan sa 12,000 ang mitambong! Nalipay ang mga delegado nga nakigbahin diha sa wala pa hitupnging gidaghanon sa pagsangyaw sa kadalanan sa Leicester, ug sila miduaw sa sikbit nga mga balangay uban sa mga presentasyon sa ponograpo.

Ang pangunang mga pakigpulong sa kombensiyon maoy mga rekording nga gihimo sa miaging bulan bahin sa mga pakigpulong nga gihatag sa lima-ka-adlaw nga kombensiyon sa mga Saksi ni Jehova sa St. Louis, Missouri, T.B.A. Ang rekording sa pakigpulong ni Brader Rutherford nga “Mga Anak sa Hari” maoy pangunang bahin sa kombensiyon. Sanglit imposible nga mag-importar ug mga kopya sa librong Children nga giluwat sa St. Louis, usa ka linaing nipis ug haping edisyon ang gipatik sa ulahi sa Britanya. Ang usa ka kopya niana gipadala sa tanang kabataan nga mitambong sa kombensiyon.

Ang Talagsaong Tinuig nga Tigom sa Leicester

Human sa gubat ang pag-uswag sa mga magmamantala sa Gingharian sa Britanya maoy talagsaon! Sa sayong bahin sa katuigang 1980, ang gidaghanon sa mga kongregasyon sa Leicester miabot ug napulo. Dayon kami gipahibalo nga ang Nagamandong Lawas sa mga Saksi ni Jehova mihukom nga himoon ang tinuig nga tigom sa Watch Tower Bible and Tract Society sa Leicester sa 1983. Ingong magtatan-aw sa siyudad sa Leicester, wala magdugay ako nalangkit sa mga pagpangandam, lakip sa pag-abang pag-usab sa De Montfort Hall.

Trese ka membro sa Nagamandong Lawas gikan sa hedkuwarter sa Sosyedad sa Brooklyn ang miabot alang sa okasyon. Ang bug-os nga gidaghanong 3,671 ka delegado​—niining panahona gikan sa tibuok kalibotan, ug kadaghanan karaang mga Saksi​—ang nagpuno sa awditoryum. Ang dugang 1,500 nakadungog sa programa sa kasikbit nga Assembly Hall.

Si Albert D. Schroeder, kinsa nakadumala sa sangang buhatan sa Watch Tower Society sa London sa among kombensiyon sa Leicester panahon sa gubat, ang nagdumala niining tinuig nga miting. Sa paghinumdom sa 1941 nga kombensiyon, si Brader Schroeder nangutana: “Pila kaninyo nga ania karong adlawa uban kanamo ang nakatambong niadto?” Kapin sa katunga sa mga nanambong ang nag-isa sa ilang mga kamot. “Oh! Pagkamaayong panagkitaay pag-usab alang kaninyong tanan nga mga matinumanon, mga maunongon!” siya miingon. Sa pagkatinuod kadto maoy dili-makalimtang kasinatian.

Sa edad nga 98 anyos, ako nag-alagad gihapon ingong sekretaryo sa among kongregasyon ug nagpadayon sa paghatag ug mga pakigpulong publiko, bisan pag gibuhat ko kana karon nga nagalingkod. Human mamatay si Mary niadtong 1987, ako naminyo kang Bettina, usa ka biyuda nga nakaila namo ni Mary sa daghang katuigan. Ako mapasalamaton nga giatiman pag-ayo, sa pisikal ug sa espirituwal. Bisan pa sa mga limitasyon nga gipahinabo sa dili maayong panglawas ni Mary ug karon sa akong kaugalingong katigulangon, nakaplagan nako nga ang pagbatog daghang buluhaton diha sa sagradong pag-alagad sa kanunay magantihon gayod.​—1 Corinto 15:58.

[Hulagway sa panid 26]

Nangandam sa pagpakigbahin diha sa ministeryo sa katuigang 1920

[Hulagway sa panid 26]

Mga esena sa kombensiyon sa Leicester