Naluwas sa Panahon sa mga Kalamidad — Watchtower ONLINE NGA LIBRARYA

Naluwas sa Panahon sa mga Kalamidad

ANG lima-ka-andana nga tindahan sa Seoul, Korea, kalit nga nalumpag, nga nagtanggong sa gatosan ka tawo sa sulod! Ang mga tigluwas naghago adlaw ug gabii aron maluwas ang kinadaghanang kinabuhi kutob sa maarangan. Sa paglabay sa mga adlaw, ang mga purohan nga makakaplag pa ug mga nakalabang-buhi nga nalubong sa nagtipun-og nga semento ug puthaw nagsugod sa pagkahanaw.

Sa diha nga wala na gayod maglaom, usa ka katingalahang butang ang nahitabo. Usa ka hinay, masulub-ong singgit ang nadungog gikan sa ilawom sa mga gun-ob. Ang mga tigluwas natarantar sa pagkalot nga walay kahimanan aron mapagawas ang 19-anyos nga babaye nga nalubong buhi sulod sa morag dugay kaayong 16 ka adlaw. Ang nahugno nga pultahan sa elebetor nagsilbing panalipod sa ibabaw niya ug nanalipod kaniya gikan sa daghang nangahulog nga semento. Bisan tuod nahutdan pag-ayo sa tubig ug samdan, siya nakalingkawas sa kamatayon!

Karong mga adlawa, halos kada bulan dunay mga taho sa usa ka matang sa katalagman, linog kaha, hilabihan ka kusog nga bagyo, pagbuto sa bolkan, usa ka aksidente, o gutom. Ug ang talagsaong mga sugilanon bahin sa mga pagluwas ug mga nakalabang-buhi nakapainteres ug naglingaw sa minilyon nga nagsunod sa mga balita. Bisan pa niana, ang pasidaan sa umaabot nga kalamidad—usa nga mas dako kay sa bisan unsa sa kasaysayan sa tawo—sa katibuk-an wala panumbalinga. (Mateo 24:21) Ang Bibliya nagbatbat niining umaabot nga hitabo niining mga pulonga: “Tan-awa! Ang kalamidad modangat sa nasod ngadto sa nasod, ug ang usa ka dakong bagyo mismo pagapatuyboon gikan sa kinatumyang mga bahin sa yuta. Ug kadtong mga pinatay ni Jehova nianang adlawa tinong molukop gikan sa usa ka tumoy sa yuta ngadto sa laing tumoy sa yuta. Sila dili pagahilakan, ni sila pagahiposon o igalubong. Sila mahimong kinalibang sa ibabaw sa nawong sa yuta.”—Jeremias 25:32, 33.

Makapakurat nga mga pulong! Apan dili sama sa kinaiyanhong mga katalagman ug mga aksidente, kining maong kalamidad dili kay walay-pili nga pagpamatay. Sa pagkatinuod, ang paglabang-buhi—imong paglabang-buhi—maoy posible!

Usa ka Panahon sa Pagkadinalian

Aron masabtan sa bug-os kining kamatuorana, ang usa kinahanglang makasabot kon nganong kining tibuok-yutang kalamidad mahitabo. Sa pagkatinuod, mao lamang kini ang tinuod nga solusyon sa mga suliran sa katawhan. Pipila lang ka tawo karong adlawa ang mobating luwas ug seguro. Bisan pa sa paningkamot pag-ayo sa siyensiya, ang mananakod nga mga sakit nagpadayon sa paghasi sa populasyon sa yuta. Ang mga gubat nga misangpot gumikan sa relihiyoso, tribonhon, ug politikanhong mga kabangian nagkalas sa tawhanong mga kinabuhi sa tinaglibo. Ang gutom nagdugang sa kagul-anan ug pag-antos sa inosenteng mga lalaki, mga babaye, ug kabataan. Ang moral nga kadunotan nagdaot sa patukoranan sa katilingban; bisan ang kabataan gidaot.

Uban ang talagsaong katukma, ang tagna sa Bibliya nga gisulat kapin sa 1,900 ka tuig kanhi naghubit sa atong kahimtang. Kini nag-ingon: “Kinahanglang maamgohan nimo nga sa kataposang mga adlaw ang mga panahon matugob unya sa kapeligrohan.”—2 Timoteo 3:1, The New Testament in Modern English, ni J. B. Phillips; itandi ang Mateo 24:3-22.

Makataronganon ba alang kanimo nga ang usa ka mahigugmaong Diyos dili magtagad sa atong kahimtang? Ang Bibliya nag-ingon: “Siya ang matuod nga Diyos, ang Tig-umol sa yuta ug Magbubuhat niini, . . . wala maglalang niini sa walay kapuslanan, [siya] nag-umol niini aron pagapuy-an.” (Isaias 45:18) Oo, inay tugotan kining matahom nga planeta nga malaglag ug mamatay ang tanang nanagpuyo niini, ang Diyos mosalga. Ang pangutana mao, Sa unsang paagi buhaton niya kana?

Pilia ang Kinabuhi!

Ang Bibliya nagtubag diha sa Salmo 92:7: “Sa dihang ang mga tuman-kadaotan manurok ingon sa balili ug ang tanang mamumuhat ug daotan molabong, kini mao nga sila pagalaglagon sa walay kataposan.” Ang solusyon sa Diyos sa mga suliran sa yuta mao ang pagpapha sa pagkadaotan mismo. Ikalipay, wala kini magpasabot nga ang tanang tawo kinahanglang paphaon. Ang Salmo 37:34 nagpasalig kanato: “Paghulat kang Jehova ug pagbantay sa iyang dalan, ug siya magabayaw kanimo sa pagpanunod sa yuta. Sa dihang ang mga tuman-kadaotan pagalaglagon, ikaw makakita niana.”

Kining mga pulonga nagpakita nga adunay kahigayonan nga maluwas latas sa kinadak-ang kalamidad nga mahitabo sukad sa katawhan. Ang Diyos naghatag kanato ug kapilian. Ang mga pulong nga giawhag ni Moises sa mga Israelinhon samtang sila nangandam sa pagsulod sa Yutang Saad mapadapat usab kanato karong adlawa: “Gibutang ko ang kinabuhi ug kamatayon sa imong atubangan, ang panalangin ug ang tunglo; ug pilion mo gayod ang kinabuhi aron nga mabuhi ka, ikaw ug ang imong kaliwatan.” (Deuteronomio 30:19) Apan sa unsang paagi ang usa ‘mopili sa kinabuhi’ ug maluwas? Unsay kahulogan sa matuod nga kaluwasan?

[Picture Credit Line sa panid 2]

[Picture Credit Line sa panid 3]

Yunhap News Agency/Sipa Press