Kagawasan sa Relihiyon Gilabanan sa Hapon

SULOD sa daghang tuig sa Hapon, ang batan-ong mga estudyante nga mga Saksi ni Jehova nag-atubang sa usa ka gumonhap: Angay ba nilang sundon ang ilang nabansay-sa-Bibliya nga konsensiya, o angay ba nilang dawaton ang kurikulum sa tunghaan nga naglapas sa ilang konsensiya. Nganong may gumonhap man? Tungod kay ang mga bansaybansay sa martial arts maoy bahin sa kursong physical education sa ilang mga tunghaan. Gibati sa batan-ong mga Saksi nga ang maong mga bansaybansay dili uyon sa mga prinsipyo sa Bibliya, sama nianang hikaplagan sa Isaias kapitulo 2, bersikulo 4. Mabasa kini: “Pagasalsalon nila ang ilang mga espada ngadto sa mga lipya sa daro ug ang ilang mga bangkaw ngadto sa mga galab. Ang nasod dili mobakyaw ug espada batok sa nasod, ni sila makakat-on pa ug gubat.”

Kay dili gustong makatuon sa magubatong mga kahanas, nga naglangkit sa pagdaot sa laing tawo, ang batan-ong Kristohanong mga Saksi mipatin-aw ngadto sa ilang mga magtutudlo nga sumala sa konsensiya dili sila makasalmot sa martial arts. Human paningkamoti ang pagdani sa maong mga estudyante nga dawaton ang kurikulum sa tunghaan, daghang masinabtanong mga magtutudlo sa kadugayan miuyon nga tahoron ang mga konsensiya sa mga estudyante ug itagana ang kapuling mga kalihokan sa tunghaan.

Ugaling lang, ang pipila ka magtutudlo nahimong emosyonal, ug ang pipila ka tunghaan naghikaw sa batan-ong mga Saksi sa mga grado alang sa physical education. Sa 1993, labing menos siyam ka Saksi ang wala mapromot sa sunod nga grado ug napugos sa pag-undang pag-eskuyla o palagpoton tungod kay dili mosalmot sa martial arts.

Dayag, kadto panahon na nga panalipdan ang katungod sa batan-ong mga Kristohanon nga magadawat ug edukasyon nga dili kinahanglang ikompromiso ang ilang konsensiya. Lima ka estudyante nga wala mapromot sa ikaduhang grado sa Kobe Municipal Industrial Technical College (gitawag ug Kobe Tech sa minubo) mihukom sa pagkiha.

Unsay Nameligro?

Sa tingpamulak sa 1990 sa dihang misulod ang lima ka estudyante sa Kobe Tech, ilang gipatin-aw ngadto sa mga magtutudlo nga dili sila makasalmot sa kendo (Hapones nga eskrima) nga bansaybansay tungod sa ilang mga pagtuo nga gibase sa Bibliya. Ang physical education nga mga magtutudlo misupak pag-ayo ug mihikaw kanila sa bisan unsang kapuling programa aron magradohan sa physical education. Sa kadugayan, ang mga estudyante nahagbong sa klase sa physical education ug ingong resulta kinahanglang mosubli sa unang grado (primer anyo sa kurso sa kolehiyo). Sa Abril 1991 sila mikiha sa Distritong Korte sa Kobe, nga miangkong ang gihimo sa tunghaan maoy supak sa garantiya sa kagawasan sa relihiyon sumala sa batakang-balaod.a

Gipangangkon sa tunghaan nga ang pagtaganag kapuling mga kalihokan mahimong katumbas sa pagpakitag pabor sa usa ka linaing relihiyon ug sa ingon manghilabot sa pagkaneyutral sa physical education. Gawas pa, giangkon nila nga sila walay mga pasilidad o mga kawani aron itagana ang kapuling programa sa physical education.

Desisyon sa Distritong Korte Nakaukay Niadtong Nahibalo

Samtang gihusay ang kaso, duha sa lima ka estudyante wala na usab makapasar sa physical education, samtang ang tulo pa igo rang nakapasar ug napromot sa sunod nga grado. Ang mga lagda sa tunghaan nag-ingon nga ang mga estudyante kansang mga grado maoy dili maayo ug nagsubli sa samang grado sa duha ka magsunod nga mga tuig ikapalagpot. Tungod niadto, usa sa duha ka estudyante mihukom sa pag-undang pag-eskuyla sa dili pa ipalagpot, apan ang lain, si Kunihito Kobayashi, midumili sa pag-undang. Busa siya gipalagpot. Makaiikag, ang aberids ni Kunihito alang sa tanang subject lakip ang physical education, nga niana siya wala makapasar uban sa eskor nga 48, maoy 90.2 sa 100. Siya ang nanguna sa iyang klase nga may 42 ka estudyante.

Sa Pebrero 22, 1993, ang Distritong Korte sa Kobe mihukom pabor sa Kobe Tech ug miingon: “Ang mga gihimo sa tunghaan wala maglapas sa batakang-balaod,” bisan pag giila niini nga “dili ikalimod nga ang kagawasan sa pagsimba sa mga kihante napiotan ug diyutay sa panginahanglan sa tunghaan nga mosalmot sa mga bansaybansay sa kendo.”

Sama kang apostol Pablo sa unang siglo, ang mga kihante mihukom sa pag-apelar ngadto sa mas taas legal nga mga awtoridad. (Buhat 25:11, 12) Ang kaso gidala sa Hataas nga Korte sa Osaka.

Dili-Mahakogong Tinamdan sa mga Kihante

Usa ka iladong eskolar, si Propesor Tetsuo Shimomura sa Tsukuba University, misugot nga mohatag ug pamatuod ingong usa ka ekspertong saksi sa Hataas nga Korte sa Osaka. Ingong usa ka batid sa edukasyon ug sa balaod, gipasiugda niya kon unsa ka kawalay-konsiderasyon ang mga gibuhat sa tunghaan sa pagdumala sa mga estudyante. Si Kunihito Kobayashi nagpahayag sa iyang mga gibati sa korte, ug ang iyang sinserong tinamdan nagtandog sa mga kasingkasing niadtong diha sa korte. Dugang pa, sa Pebrero 22, 1994, ang Kobe Bar Association, nga nagpahayag nga ang mga gibuhat sa tunghaan nanghilabot sa kagawasan sa pagsimba ni Kunihito ug sa iyang katungod nga makadawat ug edukasyon, mirekomendar nga pabalikon siya sa tunghaan.

Samtang nagsingabot ang panahon sa pagpakanaog sa desisyon sa Hataas nga Korte sa Osaka, ang tanang batan-ong mga Kristohanon nga nalangkit naikag nga mahimong bahin sa legal nga pakigbugno hangtod sa kataposan. Gibati nila nga sila nakig-away sa usa ka legal nga pakigbugno alang sa linibo ka batan-ong mga Saksi nga nag-atubang sa samang isyu sa mga tunghaan sa tibuok Hapon. Apan sanglit sila wala man ipalagpot gikan sa tunghaan, lagmit kaayo nga ang korte magdismis sa ilang kaso. Ug ilang nasabtan nga kon ilang isibog ang ilang asunto, ang pagkadili-makataronganon sa tunghaan sa pagpalagpot kang Kunihito matataw. Busa, ang tanang estudyante gawas kang Kunihito mihukom sa pagsibog sa kaso.

Sa Disyembre 22, 1994, si Pangulong Huwes Reisuke Shimada sa Hataas nga Korte sa Osaka mipakanaog sa usa ka desisyon nga nagbalit-ad sa desisyon sa Distritong Korte sa Kobe. Nakaplagan sa korte nga ang katarongan ni Kunihito sa pagdumili sa bansaybansay sa kendo maoy sinsero ug nga ang kapildihan kaniya tungod sa iyang buhat nga gibase sa iyang relihiyosong pagtuo maoy labihan ka dako. Ang tunghaan, matod ni Pangulong Huwes Shimada, angay nga magtaganag kapuling mga kalihokan. Kining labing maayong desisyon nakatukbil sa mauyonong sanong gikan niadtong mabalak-on sa tawhanong mga katungod. Ugaling lang, ang tunghaan nag-apelar sa kaso ngadto sa Korte Suprema sa Hapon, nga naghikaw kang Kunihito sa edukasyon sulod sa lain pang tuig.

Ngadto sa Korte Suprema

Usa ka editoryal sa mantalaang Kobe Shimbun sa ulahi mipahayag: “Ang Hunta sa Tunghaan sa Kobe City ug ang tunghaan angay nga nagpabalik kang Gn. Kobayashi sa tunghaan niadtong panahona [human sa desisyon sa Hataas nga Korte sa Osaka]. . . . Ang ilang way-hinungdang maharongon nga tinamdan naghikaw sa usa ka tawo sa hinungdanong panahon alang sa edukasyon sa iyang pagkabatan-on.” Bisan pa niana, ang Kobe Tech nagmagahion sa maong kaso. Ingong resulta, kadto nahimong usa ka topiko sa balita sa tibuok nasod. Ang mga magtutudlo ug mga awtoridad sa tunghaan sa tibuok nasod nakamatikod, ug ang usa ka desisyon gikan sa kinatas-ang korte sa nasod maghawas sa mas lig-ong legal nga pasiuna sa susamang mga kaso sa umaabot.

Sa Enero 17, 1995, mga usa ka semana human sa pag-apelar sa tunghaan sa kaso ngadto sa Korte Suprema, ang linog sa Kobe mihapak sa Ashiya City diin si Kunihito ug ang iyang pamilya nagpuyo. Sa mga alas singko imedya niadtong buntaga, pipila ka minutos una pa mahitabo ang linog sa dapit, si Kunihito mibiya sa iyang balay aron moadto sa iyang inoras nga trabaho. Siya nagbisikleta subay sa dalan sa ilalom sa Hanshin Expressway, ug sa dihang nahitabo ang linog, siya nagsingabot gayod sa bahin nga nalumpag. Dihadiha siya mibalik sa balay ug nakadiskobreng ang unang andana sa iyang balay hingpit nga natumpag. Nakita ni Kunihito nga dali untang nawad-an siya sa iyang kinabuhi tungod sa linog ug nagpasalamat kang Jehova tungod sa pagtugot kaniya nga mabuhi pa. Kon namatay pa siya, lagmit ang kaso sa kendo matapos unta nga wala ang desisyon sa Korte Suprema.

Ang Korte Suprema sa Hapon kasagarang magsusi sa mga apelasyon pinaagi sa mga sulat lamang ug maghukom kon kaha ang mga desisyon sa ubos nga korte maoy husto o dili. Gawas kon adunay hinungdanong katarongan sa pagbali sa desisyon sa ubos nga korte, walay mahitabong mga husay. Ang korte dili magpahibalo sa kihante ug sa gikiha kon kanus-a igahatag ang desisyon. Busa si Kunihito nasorpresa sa buntag sa Marso 8, 1996, sa dihang gisultihan siya nga ang desisyon ipakanaog niadtong buntaga. Sa iyang kalipay ug kahimuot, iyang nasayrang ang Korte Suprema naglaban sa desisyon sa Hataas nga Korte sa Osaka.

Upat ka huwes, nga si Huwes Shinichi Kawai ang nagdumala, mihukom nga nagkahiusa nga “ang mga gibuhat sa tunghaan angayng isipon nga labing dili tukma gikan sa punto de bista sa gidawat-sa-katilingbang mga sukdanan, nga mitipas gikan sa natad sa mga katungod, ug busa maoy supak sa balaod.” Giila sa korte ang kasinsero sa pagdumili ni Kunihito sa bansaybansay sa kendo ug miingon: “Ang katarongan sa giapelahan nga modumili pagsalmot sa bansaybansay sa kendo maoy tim-os ug suod nga nalangkit sa pundasyon sa iyang pagtuo.” Ang Korte Suprema mihukom nga ang tunghaan makatagana unta ug angayng magtaganag kapuling programa aron ang relihiyosong pagtuo sa giapelahan matahod.

Layog-Abot nga Epekto

Kining desisyona pihong magtaganag maayong sumbanan pabor sa kagawasan sa pagsimba diha sa mga tunghaan. Ang The Japan Times miingon: “Ang maong hukom sa Korte Suprema maoy una bahin sa isyu sa edukasyon ug sa kagawasan sa relihiyon.” Bisan pa niana, ang desisyon wala magwagtang sa responsabilidad sa matag batan-ong estudyante nga mobarog sumala sa iyang konsensiya inig-atubang sa mga pagsulay sa pagtuo.

Si Propesor Masayuki Uchino sa Tsukuba University mikomento nga usa sa mga katarongan nga nakatandog sa mga huwes aron ihatag ang kadaogan kang Kunihito mao nga siya “sinserong estudyante kansang akademikanhong kahimoan maoy talagsaon.” Ang Bibliya naghatag niining tambaga ngadto sa mga Kristohanon nga nag-atubang ug mga pagsulay sa ilang pagtuo: “Padayong-hupti ang inyong panggawi nga maayo taliwala sa mga nasod, aron nga, sa butang nga sila nagapamulong batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita magahimaya sa Diyos sa adlaw sa iyang pagsusi.” (1 Pedro 2:12) Ang matinumanong batan-ong mga Kristohanon makapasundayag nga ang ilang gibase-sa-Bibliya nga baroganan angay sa pagtahod sa mga tawo pinaagi sa pagsunod sa mga sukdanan sa Bibliya sa tibuok nilang kinabuhi.

Human sa desisyon sa Korte Suprema, si Kunihito Kobayashi gidawat pag-usab sa Kobe Tech. Kadaghanan sa mga estudyante nga misulod sa tunghaan kauban ni Kunihito nakagraduwar na. Si Kunihito karon nagtungha uban sa mga estudyanteng manghod niyag lima ka tuig. Sa mga mata sa daghang tawo sa kalibotan, morag anugon ang lima ka bililhong katuigan sa iyang pagkabatan-on. Bisan pa niana, ang integridad ni Kunihito maoy bililhon sa mga mata ni Jehova nga Diyos, ug ang iyang sakripisyo tinong wala makawang.

[Footnote]

[Mga hulagway sa panid 20]

Wala: Ang balay ni Kunihito human sa linog

Ubos: Si Kunihito karong adlawa