Mga Saksi Ngadto sa Kinalay-ang Dapit sa Yuta

ETAH

THULE

GODHAVN

GODTHÅB

JULIANEHÅB

ANGMAGSSALIK

ANG Thule maoy bahin sa usa ka ngalan nga gigamit sukad pa sa karaang mga panahon sa paghubit sa kinatas-ang tumong, sa geograpikanhon o sa laing paagi. Karon ang Thule maoy ngalan sa usa ka balangay sa halayong amihanang Greenland, ang kinadak-ang pulo sa kalibotan. Ang balangay ginganlan sa ingon niadtong 1910, sa dihang ang Olandes nga eksplorador nga si Knud Rasmussen migamit niini ingong panukaran alang sa mga ekspedisyon sa polo. Bisan karon, ang pag-adto sa Thule maoy usa ka ekspedisyon kay sa usa ka lingawlingaw nga biyahe.

Bisan pa, adunay dinaliang panginahanglan alang sa maong panaw ngadto sa Thule. Sa pagsanong sa sugo ni Jesus: “Mahimong mga saksi nako . . . ngadto sa kinalay-ang dapit sa yuta,” ang mga Saksi ni Jehova andam sa pagdala sa maayong balita sa Gingharian sa Diyos ngadto niini nga dapit, usa ka dapit sa halayong amihanan nga permanenteng mga balangay sa tawo sa yuta.​—Buhat 1:8; Mateo 24:14.

‘Kanus-a Kita Mangadto sa Thule?’

Niadtong 1955 duha ka Saksi nga Olandes nga buot makig-ambit sa pagsangyaw “ngadto sa kinalay-ang bahin sa yuta” miabot sa Greenland. Ang uban miabot sa ulahi, ug sa hinayhinay ang ilang buluhatong pagsangyaw nakaabot sa habagatan ug kasadpang baybayon hangtod sa Melville Bay ug sa katunga ngadto sa sidlakang baybayon. Apan ang mas halayo pang mga bahin sama sa Thule halos naabot lamang pinaagig sulat o telepono.

Usa ka adlaw sa 1991, si Bo ug iyang asawa, si Helen, duha ka bug-os panahong mga ministro, nagbarog sa bato nga bantaaw sa Melville Bay. Nagtan-aw sa amihanan sila naghunahuna, ‘Kanus-a kaha kita makaadto sa Thule sa pagdala sa maayong balita sa Gingharian sa mga tawo didto?’

Niadtong 1993, si Werner, laing bug-os panahong ministro, nangahas sa pagtabok sa Melville Bay sa iyang 5.5 metros nga matuling barko nga Qaamaneq (Kahayag). Nakalawig na siyag 1,200 kilometros gikan sa Godthåb hangtod sa dapit sa Upernavik. Ugaling, ang pagtabok sa Melville Bay​—nga 400 kilometros sa nanganawkanaw nga katubigan sa Artiko​—dili sayon nga buhaton. Halos sa tibuok tuig, ang luok maalihan sa yelo. Si Werner milampos sa pagtabok sa luok, bisag namatyan siyag usa ka makina tungod sa yelo. Ug siya nakahimog pipila ka pagsangyaw nga buluhaton sa wala pa siya mipauli.

Paingon sa Thule

Human niana nga biyahe, gisugdan ni Werner ang paghimog bag-ong mga plano. Nakigsulti siya kang Arne ug Karin​—kinsa may barko usab, nga 7-metros ang gitas-on nga may upat ka kamarote ug, labaw sa tanan, may modernong himan sa paglawig​—nga magamit sa dungan nga pagbiyahe ngadto sa Thule. Ang mga barko mahimong mga sak-anan, ug pinaagi sa duha ka barko nga dungang mobiyahe, ang pagtabok sa Melville Bay dili kaayo peligroso. Aron makobrehan ang dakong lungsod nga may 600 ka molupyo niini ug sa unom ka balangay sa dapit, sila nagkinahanglag dugang tabang. Busa gidapit nila si Bo ug Helen ug si Jørgen ug Inge​—tanan maoy eksperyensiyadong mga ministro nga pamilyar sa pagbiyahe niining nasora​—sa pag-uban. Lima niining grupoha ang makasulti usab ug Greenlandiko.

Gipadala nilag una ang mga suplay nga literatura sa Bibliya. Ang mga barko usab gikargahan ug literatura, ingon man sa gikinahanglang mga tagana sa pagkaon ug tubig, gasolina, reserba nga makina, ug usa ka bote nga goma. Dayon, sa Agosto 5, 1994, human sa daghang bulan nga pagpangandam, ang grupo gitigom ug ang duha ka barko andam na ug gikargahan sa dunggoanan sa Ilulissat. Gisugdan ang biyahe paamihanan. Si Werner, Bo, ug Helen misakay sa mas gamay sa duha ka barko. “Ang mahimo lang nimo mao ang paglingkod o paghigda sa imong kamarote ug manggunit,” misulat si Bo. Atong sundan ang inadlaw nga biyahe sa barko.

“Nanganawkanaw ang linaw nga dagat. Nahikyad sa among mga mata ang nindot kaayong mga talan-awon​—ang nagpangidlap nga dagat, bagang pundok sa gabon, hayag nga adlaw ug asul nga kalangitan, samag mga bukid nga yelo nga makaiikag kaayog mga porma ug mga bulok, ang brawn ug kolor nga walrus nga nagpabulad sa naglutaw nga yelo, makita sa lapyahan ang hanap nga porma sa kabukiran ug gagmayng kapatagan​—ang nagbag-obag-o nga talan-awon walay kataposan.

“Apan, ang labing makaiikag nga bahin mao ang pagduaw sa mga balangay nga among maagian. May mga tawo gayod kanunay, kasagaran mga bata, sa pantalan sa pagtan-aw kon kinsa ang mga bisita ug sa pag-abiabi kanila. Giapod-apod namo ang literatura sa Bibliya ug nagpahulam sa mga tawo sa video bahin sa atong organisasyon. Daghan ang nakatan-aw niana sa wala pa kami makagikan. Sa Habagatang Upernavik, daghang tawo ang misugat nga nagbaroto sa among mga barko bisag wala pa kami nakaabot. Busa sa tibuok gabii, kami may sakay nga mga bisita ug nagtubag sa daghang pangutana sa Bibliya.”

Karon, human sa unang 700 kilometros nga biyahe, ang duha ka barko andam na sa pagtabok sa Melville Bay.

Ang Peligrosong Hagit

“Gituohan sa kadaghanan nga kini ang peligrosong bahin sa biyahe. Ug kami napugos sa pagtabok nga walay hunonghunong tungod kay ang balangay sa Savissivik (diin magsugod ang teritoryo ug diin kami adunay kapundohan) naalihan pa ug yelo.

“Busa mitabok kami. Sanglit lukop ang yelo, kami nagpalawod pa. Maayo na lang, linaw ang katubigan. Ang unang daghang oras mahapsay​—nga migilisgilis sa daghang kilometro sa kalaworan. Sa pagkagabii nakit-an namo ang Cape York ug hinayhinay nga miliko nga nagpaamihanan, nga mas duol sa piliw. Karon may yelo na usab​—ang daan, baga, ug nagkabungkag nga mga yelong naglutaw kutob sa makita sa mata. Gisubay namo ang kilid sa yelo sa halayong distansiya, usahay nagmaneobra sa tunga sa gagmayng mga agianan. Unya anaa ang gabon, nga morag baga abuhong sopa, nga ilabinang matahom sa kahayag sa nagsalop nga adlaw. Ug ang mga balod! Gabon, mga balod, ug yelo sa usa ka panahon​—bisan hain niini kasagarang igo na nga mahimong hagit.”

Pag-abiabi Kanamo

“Misulod kami sa mas linaw nga katubigan samtang nagkaduol kami sa Pituffik. Ang kalalangan naghatag kanamog talagsaong pag-abiabi: ang adlaw diha sa asul, asul nga kalangitan; sa atubangan kanamo, ang lapad, sinaw nga fjord, nga gikatagan sa naglutaw samag mga bukid nga yelo; ug sa halayo ang hanap nga dagway sa bato sa Dundas​—ang karaang Thule!” Duolan sa 100 kilometros paamihanan, ang mga biyahedor nakaabot sa ilang kataposang destinasyon.

Sila karon naghinamhinam nga mosugod sa pagsangyaw gikan sa balay ug balay. Duha kanila nakadawat ug dili maayong pagsanong sa ilang unang pultahan. “Kami gibalibaran samag didto kami sa Denmark,” matod nila. “Apan ang kadaghanan naghatag kanamog kinasingkasing nga pag-abiabi. Ang mga tawo mahinuktokon ug daghag nahibaloan. Ang uban nag-ingon nga sila nakadungog na bahin kanamo ug nalipay nga kami sa kataposan miabot. Nahibalag namo ang pipila ka maayong mga tawo, sama sa mga tigpangayam ug poka nga nakapanaw sa Polo Norte, ug sa mga lumad, nga kontento ug daginotan ug may daw maduhaduhaon nga panglantaw sa modernong sibilisasyon.”

Ang nagsunod pipila ka adlaw nakahatag ug maayong mga kasinatian sa tanan. Ang literatura sa Bibliya gidawat nga may pagpabili bisan asa. Sa daghang balay ang mga Saksi nakasugod ug mga pagtuon sa Bibliya dihadiha. Si Inge miasoy bahin sa usa ka balay diin siya nakakaplag ug interes: “Kadto maoy usa ka hinlo ug haruhay usag-lawak nga balay. Sa sunodsunod nga tulo ka adlaw, giduaw namo ang malumo nga tawo nga nagpuyo didto ug nasuod pag-ayo kaniya. Siya tinuod gayod nga tigpangayam ug poka, nga may iyang baroto gawas sa iyang balay. Siya nakaposil ug daghang oso sa polo, walrus, ug, siyempre, mga poka. Sa among kataposang pagduaw, kami nag-ampo uban kaniya, ug ang iyang mga mata napuno sa mga luha. Karon itugyan na namo ang tanan sa mga kamot ni Jehova ug naglaom sa panahon ug higayon nga makabalik.”

Ang Thule kanunayng ginaduaw sa mga Eskimo sa Canada. Si Inge nagtaho: “Si Helen ug ako nakahibalag ug ubay-ubayng mga Eskimo gikan sa Canada. Makaiikag nga sila makasulti sa sinultihan sa mga taga-Greenland; ang mga tawo sa dapit sa Artiko daw nagsultig susamang mga pinulongan. Bisag ang mga Eskimo sa Canada may ilang kaugalingong sinulat nga pinulongan, sila makabasa sa among literatura nga Greenlandiko. Basin magbalos kini ug makaiikag nga kahigayonan alang kanila.”

Ang mga balangay nga 50 ngadto sa 60 kilometros ang gilay-on nga sakyon ug barko giduaw usab. “Sa among pagpaingon sa balangay sa Qeqertat, namidpid kami sa baybayon, naglaom nga makakitag mga tawong tigpangisdag mga narwhal. Tinuod man, ibabaw sa nagsiwil plat nga bato, among nakita ang usa ka kampo nga may tulo o upat ka pamilya, nga nagbistig mga balahibo sa hayop, uban sa ilang mga tolda ug mga baroto. May sapang sa ilang kamot, ang mga lalaki nagpulihay sa paglingkod diha sa bato sa pagbantay sa gipangita nga narwhal. Kay naghulat nga walay nakuha sa daghang adlaw, wala kaayo sila mahimuot sa pagkakita kanamo tungod kay basig mabugaw namo ang mga narwhal! Sila daw puliki kaayo sa ilang buluhaton. Ang mga babaye mikuhag pipila ka literatura, apan dili kadto hustong panahon alang sa dugang pakig-estoryahay. Sa kataposan miabot kami sa Qeqertat sa alas 11 sa gabii ug gitapos ang among kataposang pagduaw sa balangay sa mga alas 2 sa buntag!”

“Sa kataposan nakaabot kami sa Siorapaluk, ang kinatumyan nga balangay sa amihanang Greenland. Nahimutang kini sa balasong baybayon sa tiilan sa pipila ka berde, natabonan ug sagbot nga mga bato diha sa awaaw nga palibot.” Ang mga Saksi sa literal nakaabot sa kinalay-ang mga bahin sa yuta, sa labing menos sa amihanang direksiyon, sa ilang buluhatong pagsangyaw.

Natapos ang Biyahe

Natapos sa mga Saksi ang ilang buluhaton. Sila nakasangyaw gikan sa balay ug balay ug gikan sa tolda ug tolda, nakapahimutang ug literatura, nakapakuhag mga suskrisyon, nakapasalidag mga video, nakigsulti sa daghang taga-Greenland, ug nakadumalag mga pagtuon sa Bibliya. Karon panahon na sa pagpauli. “Sa nakasakay kami sa among bote niadtong gabhiona nga namugsay palayo sa balangay sa Moriusaq, daghang tawo sa baybayon ang nagpagikan kanamo, nagwarawara sa mga libro o mga brosyur nga ilang nakuha.”

Sa ulahi, sa awaaw nga bahin sa baybayon, ang mga Saksi nakurat nga nakita ang usa ka tawo nga nagwarawara diha sa bato​—sa hilit kaayong dapit! “Siyempre, kami midunggo sa paghimamat kaniya. Usa siya ka batan-on gikan sa Berlin, Alemanya, nga nagbiyahe duol sa baybayon sa iyang baroto ug naglawig sa mga usa ka bulan na. Sa Alemanya ginaduaw siya nga regular sa mga Saksi ni Jehova ug nakakuhag ubay-ubay sa ilang mga libro. Migugol kamig duha ka oras uban kaniya, ug siya tinuod gayod nga nakadayeg sa pagkakitag mga Saksi sa ingon niining dapita.”

Sa balangay sa Savissivik, nga gilabyan sa pagpauli, ang nagapanaw nga ministro nakadawat ug mainit nga pag-abiabi. Ang pipila ka tawo didto nakadawat ug nakabasag literatura sa miaging tuig, ug gigutom sila ug dugang sa espirituwal nga pagkaon.

Ang pagpauli tabok sa Melville Bay mikabat ug 14 oras. “Nakita namo ang pagsalop sa adlaw, nga dinhi maoy usa ka kasinatian sa daghang oras, uban ang kanunay nga pagbag-obag-o sa makalamat nga mga bulok. Ang pagsubang sa adlaw, nga mosunod dayon, mokabat usab ug taas nga panahon. Samtang nangalimbukad ang pagsalop sa adlaw sa pula ug lutong pagkapula nga nagtabon pa sa amihanan-sidlakang kalangitan, ang adlaw migitib ug diyutay sa habagatan. Kini maoy usa ka talan-awon nga imposible nga mahubit​—o bisan maletratohan​—ug husto.” Ang tripulante nagpabilin sa tibuok gabii.

“Sa pag-abot namo sa Kullorsuaq, kami gikapoy pag-ayo. Apan kami malipayon ug natagbaw. Malamposon namong natapos ang biyahe! Sa nahibilin sa biyahe, nakit-an namo ang dakong interes diha sa mga lungsod ug mga balangay sa kabaybayonan. Ang pangutana sagad masubli, ‘Nganong dili magpabilin ang pipila kaninyo uban kanamo? Maguol kami nga makita kamo nga mobiya dayon!’”

Sa Qaarsut gidapit sa usa ka mahigalaong pamilya ang lima ka bisita sa pagpanihapon uban kanila. “Buot sa pamilya nga matulog kamig usa ka gabii. Apan sanglit adunay mas maayong dapit nga among kapundohan sa mga 40 kilometros sa unahan, mibalibad kami ug nagpadayon sa paglawig. Sa ulahi nadungog namo nga usa ka dakong samag bukid nga yelo ang natipak sayo sa pagkasunod buntag, ug gipatikyaob sa balod ang 14 ka gagmayng barko nga gipundohan kanhi sa among barko!”

Sa kataposan, ang grupo mibalik sa Ilulissat, nga nakatapos sa ilang ekspedisyon sa Thule. Ug halos sa samang panahon nga ang grupo nakaabot sa Thule, laing duha ka magmamantala mibiyahe sa hilit nga mga dapit sa sidlakang baybayon sa Greenland. Niadtong duha ka pagbiyahe, ang mga magmamantala nakaapod-apod sa total nga 1,200 ka libro, 2,199 ka brosyur, ug 4,224 ka magasin, ug sila nakakuhag 152 ka suskrisyon. Ang pakigkontak sa daghang bag-ong mga interesado karon ginahimo pinaagi sa telepono ug sulat.

Bisag nagkinahanglan ug panahon, kusog, ug salapi, ang mga Saksi ni Jehova nakakaplag ug dakong kalipay sa pagtuman sa sugo sa ilang Agalon nga “mahimong mga saksi nako . . . ngadto sa kinalay-ang dapit sa yuta.”​—Buhat 1:8.

[Kahon sa panid 28]

Sa Sidlakang Baybayon sa Greenland

SA MAONG panahon nga ang grupo sa mga magmamantala nakaabot sa Thule, usa ka magtiayong Saksi, si Viggo ug Sonja, mibiyahe ngadto sa laing wala-pa-masangyawi nga teritoryo​—Ittoqqortoormiit (Scoresbysund) sa sidlakang baybayon sa Greenland. Aron makaabot didto sila kinahanglang mobiyahe ngadto sa Iceland, mosakayg ayroplano ngadto sa Constable Point sa baybayon sa Greenland, ug dayon maghelikopter.

“Kini ang unang higayon nga ang mga Saksi ni Jehova nakaabot dinhi,” miasoy kining duha ka payunir, kansang lumad nga pinulongan maoy Greenlandiko. “Bisan pa sa kahilit niini, ang mga tawo sa katingalahan daghag nahibaloan. Bisan pa, sila malipay usab nga makakat-on ug bag-ong mga butang. Ingong maayong mga estoryador, maikagon nga giasoyan nila kami sa ilang pagpangayam ug mga poka ug ubang mga kasinatian sa kinaiyahan.” Unsay ilang pagsanong sa buluhatong pagsangyaw?

“Sa pagsangyaw sa balay ug balay, nahibalag namo si J​——, nga usa ka katekista. ‘Salamat sa paglakip kanako sa inyong pagduaw,’ siya miingon. Gipakita namo kaniya ang among literatura ug kon unsaon paggamit kana. Sa pagkasunod adlaw siya miduol kanamo ug buot nga mahibalo bahin sa ngalan ni Jehova. Gipakita namo kaniya ang pagpatin-aw diha sa potnot sa iyang kaugalingong Greenlandiko nga Bibliya. Sa mibiya na kami, gitawagan niya sa telepono ang among mga higala sa Nuuk aron ipahayag ang iyang pasalamat sa among pagduaw. Paningkamotan namo nga padayong matabangan kining tawhana.

“Nahibalag usab namo si O​——, usa ka magtutudlo nga nahibalo bahin sa mga Saksi ni Jehova. Gihatagan niya kamig duha ka oras nga mosulti sa iyang klase sa 14 ngadto sa 16-anyos. Busa gipakita namo kanila ang among video ug nagtubag sa ilang mga pangutana. Ang Mga Pangutanang Gisukna sa mga Batan-on​—Mga Tubag nga Mosalera ug ubang mga libro daling nahurot. Nahimamat namo ang tulo ka dalagita sa klase. Daghan silag mga pangutana, usa kanila interesado gayod kaayo. Siya nangutana, ‘Unsaon nga mahimong Saksi? Tinong maayo gayod nga mahimong sama kaninyo. Ang akong amahan usab nakauyon sa inyong ginabuhat.’ Misaad kami sa pagsulat kaniya.

“Diha sa usa sa mga balangay, nahibalag namo ang laing katekista, si M​——, ug kami may makaiikag nga panaghisgot. Siya miingon nga iyang paningkamotan nga ang mga lalaki nga nagapangayam niadtong panahona makadawat sa among literatura inigbalik nila. Busa karon siya maoy among ‘magmamantala’ diha niadtong hilit nga dapit.”

Bisag kadto maoy libotlibot ug hagong biyahe, ang duha ka payunir mibati nga ang ilang mga paningkamot dagayang gigantihan.

[Footnote]