Pagpakaylap sa Kamatuoran sa Bibliya sa Portugal

GIKAN sa Caminha sa amihanan ngadto sa Vila Real de Santo Antônio sa habagatan, libolibo sa mabulokong mga barko sa pangisda ang nagkatag sa 800 kilometros sa Dagat Atlantiko sa Portugal. Daghang siglo na nga ang mga mangingisda ‘nanagat diha sa ilang mga barko,’ nga naghimo sa isda nga pangunang abiyo sa pagkaon sa daghang taga-Portugal.​—Salmo 107:23.

Sa miaging 70 ka tuig, laing matang sa pagpangisda ang ginahimo sa Portugal. Ang mga Saksi ni Jehova puliki sa pagdala sa maayong balita ngadto sa mga tinagpulo ka linibong simbolikong isda. (Mateo 4:19) Sa Mayo 1995 dihay kinatas-ang 44,650 ka magmamantala sa Gingharian​—sa proporsiyon nga 1 sa matag 210 ka molupyo. Sa ubang mga siyudad ang proporsiyon maoy katunga niana.

Uban sa daghan kaayong magbubuhat, ang mga teritoryo nga pagasangyawan sa daghang dapit ginakobrehan matag semana o sobra pa. Busa ang mga Saksi nga taga-Portugal alisto kaayo sa paggamit sa nagkalainlaing mga paagi aron mapaambit ang ilang paglaom sa Bibliya sa uban. Oo, gipabilhan nila ang kahinungdanon sa pagpahibalo sa kamatuoran sa Bibliya sa tanang paagi nga posible.​—1 Corinto 920-23.

Pagtabang Niadtong Hilig sa Relihiyon

Sumala sa kaihapan sa 1991, 70 porsiento niadtong 18 anyos ang edad o mas edaran pa sa Portugal nag-angkon nga mga Romano Katoliko. Bisan pa niini, wala kaayoy kahibalo ang mga tawo sa Bibliya. Ang mantalaan nga Jornal de Notícias nag-ingon: “Kini maoy usa sa kinadak-ang mga trahedya sa Katolikong kalibotan: Kawalay alamag sa Bibliya!” Nganong ingon niini ang kahimtang? Ang Portuges nga mantalaan nga Expresso nagpunting sa tubag. Nagtaho bahin sa tigom sa 500 ka pari sa Fátima, ang mantalaan miingon: “Sumala sa obispo, kinahanglang dili magmaokupado ang pari sa daghan kaayong kalihokan aron maatiman niyag maayo ang iyang posisyon ingong ‘magwawali.’ . . . Kon kinasingkasing nga buhaton sa pari ang pagsangyaw sa Ebanghelyo, wala na siyay panahon sa uban pang mga kalihokan.”

Sa kasukwahi, ang mga Saksi ni Jehova sa Portugal puliki sa pagpahibalo sa kamatuoran sa Bibliya sa matag paagi nga posible. Tungod niini, daghang sinserong mga Katoliko ang nakabaton ug kahibalo sa Bibliya.

Si Carlota maoy usa ka debotadong Katoliko ug membro sa pundok sa mga batan-on sa usa ka relihiyosong kapunongan. Siya usab usa ka magtutudlo sa kindergarten diin si Antônio, nga usa ka Saksi, nagtrabaho. Kay usa ka regular payunir, o bug-os panahong ministro, naningkamot kanunay si Antônio sa pagpakig-estorya sa iyang mga isigkatrabahante bahin sa Bibliya sa oras nga tingpaniudto. Usa ka adlaw si Carlota nangutana kaniya bahin sa doktrina sa impiyerno ug sa kulto ni Maria. Gipakita ni Antônio kaniya kon unsay gitudlo sa Bibliya niining mga ulohana, ug mao kadto ang sinugdanan sa daghang panaghisgot sa Bibliya. Sa dihang mitambong si Carlota sa iyang unang tigom sa lokal nga Kingdom Hall, siya nakadayeg kaayo. Ugaling, ang mga oras sa tigom naatol sa relihiyosong kapunongan nga siya nahisakop. Naamgohan niya nga siya kinahanglang maghimog desisyon. Unsay iyang himoon?

Gitigom ni Carlota ang tibuok relihiyosong kapunongan sa mga batan-on ug nagpatin-aw gikan sa Bibliya kon nganong siya moretiro. Ang tanan misaway sa iyang desisyon, gawas sa usa ka dalagita nga ginganlag Stela, nga namati gayod pag-ayo. Sa dihang si Carlota nakigsulti kaniya sa ulahi, si Stela nagpatugbaw ug daghang pangutana bahin sa sinugdanan ug katuyoan sa kinabuhi. Gihatagan siyag libro ni Carlota nga Life​—How Did It Get Here? By Evolution or by Creation?a ug gisugdan siya ug pagtuon sa Bibliya.

Kasamtangan si Carlota nakahimog maayong pag-uswag sa espirituwal, nabawtismohan niadtong Hunyo 1991, ug misugod sa pag-alagad ingong regular payunir unom ka bulan sa ulahi. Niadtong Mayo 1992 siya ug si Antônio nagminyo, nga nagpadayon sa payunir nga pag-alagad nga magkauban sa usa ka silingang kongregasyon nga adunay mas dakong panginahanglan. Ug si Stela? Nabawtismohan siya niadtong Mayo 1993 ug karon nag-alagad ingong usa ka regular payunir.

Ang batan-ong si Francisco relihiyoso kaayo. Matag Dominggo motambong siya sa Misa sa buntag ug mag-Rosaryo sa hapon. Nag-alagad siya ingong sakristan, nga nagtabang sa pari panahon sa Misa. Miampo pa gani siya sa Diyos nga siya himoong usa ka “santo” sa pipila ka adlaw!

Buot gayod ni Francisco nga makabatog Bibliya, ug usa ka adlaw gipahulam siyag usa sa iyang higala. Nakurat siya sa pagkakita nga ang Diyos adunay ngalan, si Jehova. (Exodo 6:3; Salmo 83:18) Sa dihang gibasa niya ang Exodo 204, 5 nga gidili sa Diyos ang paggamit ug mga imahen sa pagsimba, siya mas labi pang nakurat! Nakakita nga ang simbahan puno sa mga imahen, siya kinasingkasing nga miampo sa Diyos nga tabangan siyang makasabot niining tanang kalibganan. Daghang adlaw sa ulahi nahibalag niya ang kauban niadto sa eskuylahan ug nangutana kaniya kon nganong miundang siya sa pagtungha sa gabii.

“Ako nagtambongan karon sa mas maayong tunghaan sa gabii,” mitubag ang iyang higala.

“Unsang tunghaan kana, ug unsay imong ginatun-an?” nangutana si Francisco. Siya bug-os natingala sa tubag sa iyang higala.

“Nagtuon akog Bibliya sa Kingdom Hall sa mga Saksi ni Jehova,” gisultihan siya sa higala. “Gusto ka bang mouban?”

Halos dili makatuo si Francisco sa iyang nakita sa iyang unang tigom​—ang mga panagway malipayon, mapahiyomon; ang mga tawo nagsultihanay sa usag usa sa mainiton, mahigalaong paagi; ang mga anak nanglingkod uban sa ilang mga ginikanan ug namati sa gipamulong.

“Ania ako, bug-os nga dili kaila, ug gibati nako nga samag bahin sa pamilya!” miingon si Francisco. Siya regular nga tigtambong na sa mga tigom sukad niadto. Karon si Francisco nag-alagad ingong ansiano sa kongregasyon, ug uban sa iyang asawa ug duha ka anak, siya nalipay sa dagkong mga saad sa Gingharian diha sa Pulong sa Diyos.

Pagpakig-ambit sa Kamatuoran Uban sa mga Paryente

Si Manuela, usa ka regular payunir sa dapit sa Lisbon, daghang nakuhang espirituwal nga isda tungod sa iyang pagkamalahutayon sa malulotong pagsangyaw sa tanan, lakip sa mga paryente. Lakip kanila mao ang iyang igsoon sa unod, si José Eduardo, nga nabansay sa karate ug sa paggamit ug mga hinagiban. Daghang higayong nakalapas siya sa balaod nga siya sa kataposan gikiha sa 22 ka sumbong ug gisilotan sa 20 ka tuig nga pagkabilanggo. Siya mapintas kaayo nga bisan ang kaubang mga binilanggo mahadlok kaniya, ug siya gibartolina.

Sulod sa pito ka tuig mapailobong giduaw ni Manuela si José Eduardo, apan kanunay niyang gidumilian ang iyang mensahe sa Bibliya. Sa kataposan, sa dihang ang librong Life​—How Did It Get Here? By Evolution or by Creation? gipatik, gidawat niya kini, ug usa ka pagtuon sa Bibliya ang gisugdan. Dihadiha mihimo siyag dagkong kausaban sa iyang paggawi. Usa ka semana sa ulahi mihatag siyag personal nga pamatuod sa 200 ka binilanggo, ug sa pagkasunod semana sa 600 pa. Nakadawat pa siyag permiso sa pagduaw sa kaubang mga binilanggo sa laing mga bloke sa prisohan. Tungod sa talagsaong kausaban sa iyang paggawi, ang sentensiya gimenosan ug 15 ka tuig. Human makaserbisyog 10 ka tuig, gibuhian siya nga pinanid-an. Sukad niadto lima ka tuig na ang milabay, ug si José Eduardo karon maoy usa na ka bawtismadong Saksi ni Jehova, nga nag-alagad ingong ministeryal nga alagad sa usa ka lokal nga kongregasyon. Tinuod gayod nga usa ka kahimtang bahin sa ‘lobo nga mopuyo uban sa nating karnero’!​—Isaias 11:6.

Tungod sa iyang padayong paningkamot sa pagsangyaw sa iyang pamilya, si Manuela nakabatog kalipay sa pagtabang sa iyang bana ug sa upat pang mga membro sa iyang pamilya nga mahimong aktibo sa pag-alagad kang Jehova. Ang iyang bana usa na karon ka ministeryal nga alagad.

“Gukdon Ko Silag Patid ug Latigo”

Si Maria do Carmo nagpuyo sa ilaya sa Lisbon sa dihang giduaw siya sa mga Saksi. Nagustohan niya ang iyang nadungog ug nangutana sa iyang bana, si Antônio, kon siya mahimo bang magpatuon sa Bibliya sa balay. “Ayaw gayod paghunahuna niana!” siya mitubag. “Kon makakita akog mga Saksi ni Jehova sa atong balay, gukdon ko silag patid ug latigo.” Si Antônio instruktor sa karate ug blak belter sa ikatulong ang-ang. Busa mihukom si Maria do Carmo nga himoon ang iyang pagtuon sa Bibliya sa laing dapit.

Dayon, si Antônio kinahanglang moadto sa Inglaterra alang sa walo ka adlaw nga kurso sa karate, ug maampingong giputos ni Maria do Carmo diha sa iyang maleta ang publikasyong Akong Basahon sa mga Estorya sa Bibliya.b Sanglit daghag panahon si Antônio sa iyang pagbiyahe, iyang gibasa ang libro. Sa iyang pagpauli sakay sa ayroplano, nauyog pag-ayo ang ayroplano sa bagyo, ug naglisod kini sa paglanding. Sa unang higayon sa iyang kinabuhi, si Antônio miampo kang Jehova.

Sa nakapauli na sa balay si Antônio, gidapit siya sa Saksi nga nagdumala ug pagtuon sa iyang asawa sa tigom. Gidawat niya ang pagdapit ug nakakita nga ang tanan mahigalaon kaayo. Ang mga kahikayan gihimo alang sa usa ka pagtuon sa Bibliya, ug sa mubong panahon, nahibalo si Antônio nga siya kinahanglang mohimog pipila ka desisyon. Ang sangpotanan mao nga siya miundang sa pagtudlog karate ug misugod sa pagtudlo sa iyang mga estudyante kon unsaon sa pagkinabuhi sa makigdaitong mga kinabuhi karon ug sa umaabot. Usa kanila, nga blak belter usab, usa na karon ka bawtismadong Kristohanon.

Mahitungod kang Antônio, siya gibawtismohan niadtong Abril 1991. Sa adlaw human sa iyang bawtismo, siya misugod sa pag-alagad ingong oksilyare payunir. Unom ka bulan sa ulahi siya misugod sa pag-alagad ingong regular payunir, ug dayon siya nagdumalag 12 ka pagtuon sa Bibliya sa balay. Niadtong Hulyo 1993 gitudlo siya ingong ministeryal nga alagad sa kongregasyon.

Sa Subsob nga Gikobrehang Teritoryo

Sa daghang dapit sa nasod, ang teritoryo ginakobrehan matag semana o kapin pa. Sa unsang paagi gipadayon sa mga Saksi ang ilang mga kalihokan sa “pagpangisda” sa mabungahong paagi?

Si João naningkamot sa pagkontak sa matag tawo diha sa matag balay. Sa dihang miduaw sa usa ka babaye, siya nangutana kon aduna bay laing nagpuyo sa balay. Ang babaye mitubag nga ang iyang bana ug duha ka anak nga lalaki nagpuyo didto, apan dili masayon ang pagkontak kanila sanglit sila nagtrabaho ug gabii na nga maanaa sa balay. Busa si João nagpadayon ug miduaw sa uban diha sa dapit. Mga usa ka oras ug tunga nga milabay, giduol siya sa usa ka tawo.

“Miingon ka nga buot kang makig-estorya kanako,” ang tawo miingon kang João. “Palihog sultihi ako kon unsay imong tuyo.”

“Pasayloa ako, apan wala ako makaila kanimo,” mitubag si João, nga natingala. “Kinsa ka man?”

“Ako si Antônio, ug ako nagpuyo niining karsadaha lamang. Gisultihan nimo ang akong inahan nga buot nimong makigsulti sa uban sa pamilya, busa mianhi ako aron mahibalo kon unsay imong tuyo.”

Mihatag si João ug bug-os nga pagpamatuod kang Antônio ug gisugdan ang pagtuon sa Bibliya kaniya. Human sa ikaduhang pagtuon, nangutana si Antônio kon ang pagtuon mahimong himoon kaduha sa usa ka semana. Sa upat lamang ka bulan, siya miuban kang João ug misugod sa pagsangyaw sa maayong balita diha sa iyang kaugalingong karsada. Tulo ka bulan sa ulahi, siya gibawtismohan. Dili pa dugay ang iyang inahan usab misugod sa pagtuon sa Bibliya. Pagkahinungdanong maningkamot nga makasulti sa tanang membro sa panimalay diha sa ministeryo!

Ang maong makaiikag nga mga kasinatian nagpakita nga adunay daghan pang espirituwal nga pagpangisda ang pagahimoon diha sa katubigan sa Portugal. Gipanalanginan ni Jehova ang makugihong mga Saksi didto ug libolibong mauswagong mga pagtuon sa Bibliya. Samtang padayon silang nangitag dugang ug dugang nga mga paagi sa pagpahibalo sa kamatuoran sa Bibliya ngadto sa tanan, ang mga pulong ni apostol Pablo sa mga Kristohanon sa Filipos sa pagkatinuod natuman sa Portugal karon: ‘Sa tanang paagi . . . si Kristo ginamantala.’​—Filipos 1:18.

[Mga footnote]

[Mapa sa panid 23]

(Alang sa aktuwal nga pagkahan-ay, tan-awa ang publikasyon)

ESPANYA

PORTUGAL

[Mga hulagway sa panid 24, 25]

Gigamit sa mga Saksi sa Portugal ang tanang higayon sa pagpahibalo sa kamatuoran sa Bibliya