‘Oh, Maayo Untag ang Tanan Sama Kanila!’

Kini ang gipamulong sa usa ka kolumnista sa mantalaan sa Luxembourg nga Letzebuerger Journal. Kinsay iyang gipasabot?

Miadto siya sa Polandia sa pagtambong sa selebrasyon sa ika-50ng anibersaryo sa kagawasan sa Auschwitz ug nakamatikod nga ang usa ka grupo nga nag-antos pag-ayo didto wala gayod hisgoti. Sa iyang lindog sa Pebrero 2, 1995, siya nag-ila niining grupoha ingong mga Saksi ni Jehova ug misulat: “Dili ang labing pintas nga bilanggoan o kampo konsentrasyon, ni ang hulga sa kakuraw o kamatayon pinaagi sa atsa o gilotina ang makapasalikway kanila sa ilang pagtuo.” Siya mipadayon: “Bisan ang mabangis nga mga guwardiyang SS nahibulong sa kaisog nga uban niana giatubang sa mga Saksi ni Jehova ang ilang kamatayon.”

Ang mga Saksi ni Jehova dili gustong mahimong mga martir. Apan, sama sa mga Kristohanon sa unang siglo, linibo kanila ang mipili sa kamatayon inay mokompromiso sa Kristohanong mga prinsipyo. Ang maong pagtuo nagpaila kanila nga lahi kaayo sa mangiob nga mga adlaw sa Pagmando sa Nazi.

Ang kolumnista mihinapos: “Oh, maayo untag ang tanang tawo sama sa mga Saksi ni Jehova!” Kon sama pa sila kanila, ang ikaduhang gubat sa kalibotan dili gayod unta mahitabo.