Mga Magmamantala sa Gingharian Nagtaho

Ang Matuod nga mga Kristohanon Pagalutoson

SUKAD sa mga adlaw ni Abel, daghang alagad ni Jehova ang nag-antos ug relihiyosong paglutos. (Lucas 11:49-51) Ug dili ikatingala, kay ang Bibliya nagpasidaan nga “ang tanan kanila nga nagatinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab”! (2 Timoteo 3:12) Ingong sangpotanan, karong adlawa sa kapin sa 25 ka nasod, ang mga Saksi ni Jehova nailalom sa pagdili ug nag-antos sa paglutos.

Sa usa ka nasod diin ang mga Saksi ni Jehova dili lang kay gidili kondili gilutos usab sa mga relihiyonista, kapin sa 12,000 ka magmamantala sa maayong balita ang nagpadayon sa pagbuhat nga masiboton, nga nagatuon sa Bibliya uban sa kapin sa 15,000 ka tawo. Siyempre, ang ilang buluhatong pagsangyaw gihimo uban ang kaigmat. Kasagaran, himoon nila ang Kristohanong mga tigom diha sa pribadong mga balay, ug sila mabinantayon sa dihang modapit sa interesadong mga tawo ngadto sa maong mga tigom.

Di pa dugay ang gobyerno misagop ug mas matugotong tinamdan ngadto sa mga Saksi, nga sa pagkakaron nagahimo sa kadaghanan sa ilang buluhaton nga walay agresibong pagbalda. Bisan pa niana, ang lainlaing relihiyosong mga grupo ang naggamit sa ilang impluwensiya sa pagpatunghag kasamok.

Sa usa ka siyudad ang masuk-anong magubtanong panon sa mga 200 ka relihiyosong mga panatiko nangadto sa usa ka balay diin dihay duolan sa 50 ka Saksi ni Jehova nga naghimog tigom sa kongregasyon. Ang pipila diha sa magubtanong panon nagdala ug mga bato ug nagsinggit ug mga eslogan. Ang ilang tuyo dayag nga mao ang pag-atake sa mga Saksi ug paghimog bandalismo diha sa balay. Tin-aw nga ang relihiyosong mga lider taudtaod nang nagbantay sa mga kalihokan sa miting ug naghulat sa tukmang panahon nga moatake. Ang magubtanong panon mosulod na unta sa balay sa dihang 15 ka polis ang miabot ug gimandoan ang panon nga magbulagbulag. Nahibulong niini ang mga Saksi, sanglit walay usa kanila nga nakahigayon sa pagpahibalo sa kapolisan.

Sa laing mga higayon, hinunoa, ang mga magsusupak mas malamposon. Daghang Saksi ang gitaral ug gisentensiyahan nga mabilanggo. Usa ka kaso sa korte ang wala pa madesisyoni sulod sa daghang tuig, ug dayag nga ang mga nagdemanda nawad-ag interes niana. Hinunoa, gumikan sa paghulhog sa lokal nga klero, ang hitabo gipasaka pag-usab sa korte, ug ang Saksi gisentensiyahan nga mabilanggo.

Sa laing dapit usa ka grupo sa mga Saksi ang nagtigom diha sa usa ka pribadong balay sa paghandom sa Panihapon sa Ginoo. Sa ulahi nianang gabhiona daghang polis ang midakop sa tagbalay ug sa ansiano nga nagdumala sa tigom. Sa estasyonan sa polis, gibunalan sila pag-ayo. Usa ka linuog nga pagsukitsukit ang mikabat ug daghang oras. Usa sa mga Saksi nag-antos usab sa pagsakit nga gilusbog sa atabay sa bugnawng tubig.

Nganong ang kapolisan nagahimo sa maong pag-atake? Sa makausa pa, usa ka grupo sa relihiyosong mga panatiko, uban sa tabang sa lokal nga klero, maoy nagpaluyo sa gihimo sa kapolisan. Sa ulahi ang hepe sa kapolisan mipadayag nga ang mga pagpangdakop gihimo nga walay pagtugot gikan kaniya. Nangayo sila ug pasaylo, ug ang mga indibiduwal nga responsable sa pagpamunal gidisiplina.

Sa tibuok kalibotan ang mga Saksi ni Jehova nagpadayon sa pagsangyaw sa maayong balita sa Gingharian sa Diyos, bisan atubangan sa mapintas nga pagsupak. Ilang gisunod ang tambag ni Jesus: “Tan-awa! Nagapadala ako kaninyo ingong mga karnero taliwala sa mga lobo; busa pamatud-i ang inyong kaugalingon nga mabinantayon ingon sa mga halas apan inosente ingon sa mga salampati.”​—Mateo 10:16.

[Hulagway sa panid 31]

Si Abel mao ang unang gilutos