Pilay Kantidad sa Usa ka Bibliya?
ANG Librarya sa Britanya sa dili pa dugay miuyon nga mobayad ug halos $1,600,000 sa usa ka kopya sa Ingles nga hubad ni William Tyndale sa Kristohanon Gregong mga Kasulatan. Gipatik sa 468 ka tuig kanhi, kini mao lamang ang kompletong edisyon sa Bibliya ni Tyndale nga nakalahutay
sa hugot nga mga paningkamot sa pagwagtang niana. Kini nga Bibliya nadispley na sa publiko sa London.
Ang Bibliya ni Tyndale gipalit gikan sa Bristol Baptist College sa Inglaterra, diin kini gitipigan sukad pa sa 1784. Si Dr. Roger Hayden, bise-tsirman sa komite sa kolehiyo, nag-ingon: “Kini maoy usa ka nasodnon, kultural ug Kristohanong dokumento nga may dako kaayong importansiya ug buot namo nga kini makita sa daghan, sanglit among gitipigan lamang kini diha sa mga kaha nga tipiganan.”
Sa daghang siglo ang Bibliya mabatonan lamang sa kadaghanan diha sa Latin ug mabasa lamang sa klero ug sa edukadong mga tawo. Sama kang John Wycliffe nga una pa kaniya, buot ni Tyndale nga mabatonan ang usa ka Bibliya nga mabasa ug masabtan sa tanan. Siya kas-a miingon sa usa ka klerigo nga misupak kaniya: ‘Kon ako tugotan sa Diyos nga mabuhi sa daghang tuig, pahinaboon ko nga ang usa ka batang magdadaro labaw pang makasabot sa Kasulatan kay kanimo.’
Kini usa ka peligrosong buhat, sanglit ang mga klero batok gayod sa bisan unsang paningkamot sa paghimo sa Kasulatan nga mabatonan sa kasarangang mga tawo. Busa, mikalagiw si Tyndale gikan sa Inglaterra ngadto sa Alemanya. Didto iyang gihubad ang “Bag-ong Testamento” gikan sa orihinal nga Grego. Mga 3,000 ka kopya ang napatik ug gipayuhot sa Inglaterra. Gipalit sa obispo sa London ang matag kopya nga iyang makaplagan ug gisunog kini sa publiko diha sa nataran sa simbahan sa St. Paul. Sa kataposan, si Tyndale gidakop, gihusay, ug gihukman nga erehes. Niadtong 1536 siya gituok ug gisunog sa estaka. Pagkamakaiikag nga ang usa ka Bibliya nga gidumtan pag-ayo sa mga klero karon dako kaayog kantidad!
Ang mga Saksi ni Jehova sa tim-os naningkamot nga ipaambit ang tukmang kahibalo sa Bibliya ngadto sa tanang nagapangita niini. Gawas sa pagpatik ug pag-apod-apod sa ubang mga bersiyon, sila nakapatungha gikan sa orihinal nga mga pinulongan sa usa ka hubad sa tibuok Bibliya nga tukma ug sayon nga basahon. Sa pagka 1995 kapig 74,000,000 ka kopya niining New World Translation of the Holy Scriptures ang napatik sa 12 ka pinulongan. Siyempre, ang tinuod nga bili sa bisan haing Bibliya mao ang nagahatag-kinabuhing mensahe niini.
[Hulagway sa panid 32]
Si William Tyndale
[Credit Line]
Gikan sa usa ka karaang kinulit sa Bibliothèque Nationale