Si Jehova Magaluwas sa Yuta

USA ka tugpahanan sa ayroplano nga nahimutang sa usa ka isla sa Maldives sirado sa daghang oras matag adlaw. Ngano? Tungod kay ang tubig inigtaob mobaha sa landinganan, naghimo niining dili luwas sa mga ayroplano sa paglanding. Nahadlok ang pila ka siyentipiko nga ang lebel sa dagat sa mga isla sa Maldivian mahimong motaas labing menos usa ka metros sa sunod nga siglo. Samtang kini maorag diyutay ra kaayong sukod, ang maong pagtaas makawagtang sa tanang pito ka isla gikan sa mapa. Sa pagkatinuod, sumala sa UN Chronicle, ang duha ka metros nga pagtaas sa lebel sa dagat makalubong sa tibuok kapupud-an, sa mga 1,200 ka isla!

Unsay hinungdan sa pagtaas sa lebel sa dagat? Sumala sa Programa sa Kalikopan sa HK, ang polusyon diha sa atmospera sa yuta pinaagi sa “pag-init sa mga gas” magpadako sa kadagatan sa mas mainit nga mga rehiyon, maghilis sa mga ice cap ug mga bukid nga yelo, ug busa, motaas ang mga lebel sa dagat. Ang Panos Institute nga nahimutang sa London nag-ingon nga ang polusyon “mahimong magpasugod sa mahinay nga kalaglagan sa tibuok yuta nga mag-usab sa mga utlanan mismo sa yuta ug dagat.”

Ang paglungtad sa pag-init sa tibuok yuta gidebatehan pa gihapon taliwala sa mga siyentipiko. Bisan pa, kita makasalig nga ang mga suliran sa kalikopan dili makababag sa katuyoan sa Diyos. “Ang mabungahong yuta gitukod nga malig-on,” nag-ingon ang Bibliya. “Dili gayod kini matarog.” (1 Cronicas 16:30) Si Jehova maoy nagkontrol ibabaw sa kalikopan sa yuta, ug kita malipay nga siya sa dili madugay magaluwas sa yuta ug sa katawhan gikan sa pagkalaglag.​—Salmo 24:1, 2; 135:6; 2 Pedro 3:13.

[Picture Credit Line sa panid 31]

Dibuho gibase sa hulagway sa NASA