Dominican Republic—Bukas pa Alang sa Pagdiskobre

SA BATAN-ON pa, si Christopher Columbus misugod ug panakayan nga sa ngadtongadto mitultol kaniya sa pagdiskobre sa mga kaislahan nga karon nailhang West Indies. Niadtong Disyembre 1492, ang iyang pangunang barko, ang Santa María, nabara duol sa amihanang baybayon sa isla sa Española, karon nailhang isla sa Hispaniola, nga giambitan sa Haiti ug Dominican Republic. Didto gitukod ni Columbus ang unang Uropanhong balangay, usa ka kota nga gitukod ug dalidali, ug ginganlan kini ug La Navidad. Kining maong isla nahimong panukaran sa iyang dugang mga panuhid.

Nakaplagan ni Columbus nga ang isla gipuy-an sa ambongan kaayo, masaligon, ug maabiabihong mga tawo, ang Taino nga mga Indian. Dihay gibanabanang 100,000 kanila niadtong panahona. Ugaling, ubos sa mabangis nga pagtratar sa mga mananakop, kansang pangunang interes mao ang pagpangitag bulawan, ang lumad nga populasyon tulin nga mikunhod. Pagka-1570 sumala sa taho 500 na lamang ang nahibiling Taino nga mga Indian.

Karong adlawa, ang Dominican Republic gipuy-an sa mga tawong gikan sa daghang rasa ug lainlaing pamanit, kansang mga apohan milalin sa maong dapit. Bisan pa, dayag nga nakapanunod sila sa daghang maayong kinaiya sa mga Taino, nga kasagaran mahigalaon ug walay-libog nga mga tawo. Kini, uban sa sinserong pagtuo sa Diyos ug pagtahod sa Bibliya, maoy nakaingon nga malamposon kaayo ang pagwali ug pagpanudlo nga buluhaton sa mga Saksi ni Jehova niining yutaa.

Laing Matang sa Diskobre

Ang unang mga misyonaryo sa Watch Tower, si Lennart ug Virginia Johnson, miabot sa Dominican Republic sa panahon sa diktador nga si Trujillo. Ilang nadiskobrehan, sa ilang kalipay, nga daghan ang dihadihang misanong ug mauyonon sa ilang mensahe sa Bibliya. Hinunoa, wala kini makapahimuot sa mga awtoridad ug sa ilang relihiyosong mga magtatambag. Sa wala madugay miulbo ang paglutos, ug ang pagtuo sa unang mga Saksing Dominican nabutang sa grabeng pagsulay. Hangtod ning adlawa, ang ilang kamaunongon ug pagtuo​—bisan hangtod sa kamatayon​—kanunay gihapon nga gihisgotan.

Ang mga Saksi ni Jehova, nga karon mokabat na ug mga 16,000 sa maong nasod, ilado kaayo. Dili pa dugay sa miagi, lima ka estasyon sa telebisyon sa tibuok nasod ang nagpasalida sa video nga Jehovah’s Witnesses​—The Organization Behind the Name.a

Kini mihatag ug dakong publisidad sa buluhaton sa mga Saksi dili lamang diha sa dagkong mga dakbayan kondili usab sa mas gagmayng mga lungsod ug pipila ka banikang mga dapit. Ingong pagsunod, miorganisar sila ug espesyal nga kampanya aron ang maayong balita sa Gingharian masangyaw ngadto niining hilit nga mga dapit.

Mga Panalangin sa Pag-abot sa Hilit nga Teritoryo

Daghang batan-on, malagsik, ug masibotong mga Saksi ang miboluntaryo sa paggugol ug panahon nga tagduha ka bulan nga pagsangyaw niining lagyong mga teritoryo. Ang ilang mga paningkamot gigantihan ug maayo. Sa usa ka dapit duha ka Saksi ang nakakaplag ug talagsaong interes. Kay panahon kadto sa pagsaulog sa tinuig nga Memoryal sa kamatayon ni Jesus, mihimo sila ug mga kahikayan ug midapit sa mga tawo nga motambong. Ang tigomanan napunog mga tawo, ug gidumala nila ang tigom. Sa dihang nahuman kini, ilang nakaplagan, sa ilang dakong kahibulong, nga dihay laing dakong grupo sa mga tawo sa gawas sa tigomanan nga naghulat nga makasulod. Busa ilang gipasulod sila ug gisubli ang programa. Karon aduna nay kongregasyon sa maong dapit.

Ang manggihatagon ug mahigalaong kinaiya sa mga tawo sagad nga magpalihok kanila sa pagpakig-ambit sa kamatuoran sa Bibliya nga ilang nakat-onan ngadto sa mga membro sa ilang pamilya ug sa uban. Usa ka estudyante sa Bibliya ang nalipay kaayo sa dihang sa kataposan siya nahimong kuwalipikado sa pagpakig-ambit sa balay-ngadto-sa-balay nga ministeryo. Siya nagadumala nag lima ka pagtuon sa Bibliya sa iyang kasilinganan, apan nalipay siya nga nakabaton ug mas dakong bahin diha sa ministeryo.

Tungod kay dako ang teritoryo nga dili maduaw sa regular nga paagi sa mga magmamantala sa Gingharian, gipaningkamotan nga masangyawan ang mga tawo sa mga bus ug kadtong mangadto sa mga dakbayan aron magnegosyo o mamalit. Kini misangpot ug makapalipayng mga resulta, sama sa gipakita sa usa ka eksperyensiya sumala sa usa ka sulat nga nadawat sa sangang buhatan. Kadto maoy gikan sa duha ka lalaki sa usa ka banikang dapit, kinsa mihangyo ug pagtuon sa Bibliya. Sa dihang giduaw sila sa usa ka Saksi, nasayran nga ang “mga lalaki” maoy 10 ug 11 anyos ang pangedaron. Apan sa unsang paagi sila nahibalo bahin sa kahikayan sa pagtuon sa Bibliya? Aw, usa ka lalaki gikan sa maong balangay ang miadto sa kabisera alang sa usa ka transaksiyon. Nahibalag niya ang usa ka Saksi sa dalan, kinsa mihatag kaniya ug tract ug mitanyag ug libreng pagtuon sa Bibliya sa balay. Sa pagpauli sa iyang balangay, gihatag sa lalaki ngadto sa 12-anyos nga silingang babaye ang tract ug giingnan bahin sa kahikayan sa pagtuon sa Bibliya. Sa baylo, gipasa sa babaye ang impormasyon ngadto sa duha ka batang lalaki, nga sa walay langan mipadalag sulat. Usa ka pagtuon sa Bibliya ang gisugdan uban sa mga batang lalaki, sa babaye, sa lalaki, ug sa iyang duha ka anak.

Maayong Pagsanong sa mga Batan-on

Sa pagkatinuod, ang mga batan-on, nga gimatuto sa kamatuoran ug ang uban nga wala namatuto sa ingon, dayag nga seryoso sa ilang pagsimba sa Diyos. Pananglitan, si Tamar ug ang iyang manghod nga babaye si Keila parehong nabawtismohan sa edad nga 10 anyos ug misulod sa bug-os panahong ministeryo sa edad 11. Si Wendy Carolina maoy 12 anyos sa dihang gisimbolohan niya ang iyang pagpahinungod pinaagi sa bawtismo sa tubig, ug duha ka tuig sa ulahi, niadtong 1985, misugod siya sa pag-regular payunir. Karon siya usa na ka epektibong magtutudlo sa kamatuoran, sa gihapon malipayon sa bug-os panahong ministeryo. Ang batan-ong si Jovanny, nga nabawtismohan sa edad nga 10 ug nag-regular payunir sa edad 11, nagadumala ug upat ka pagtuon sa Bibliya sa balay. Sa dihang nadiskobrehan sa diyes anyos nga si Rey nga ang tigbaligya ug segunda-manong libro dunay usa ka basahon nga gipatik sa mga Saksi ni Jehova, gihangyo ni Rey ang iyang inahan nga paliton kana alang kaniya. Iya kanang gibasa gikan sa hapin ngadto sa hapin. Ang iyang pagpangita alang sa dugang literatura sa Bibliya sa kataposan mitultol kaniya ngadto sa sangang buhatan. Karon nagapahimulos siya sa bug-os panahong pag-alagad, ug ang iyang inahan nag-alagad usab sa Diyos.

Unsay nakatabang niini ug sa ubang mga batan-on aron maapresyar ang bili sa espirituwal nga mga butang? Sa daghang kaso ang hustong giya sa ginikanan nagdula ug hinungdanong papel. Mao kini ang nahitabo kang Josué, kansang Kristohanong mga ginikanan maoy mga magtutudlo sa eskuylahan. Sa dihang misugyot ang usa ka nagapanawng magtatan-aw nga ang mga ginikanan motabang sa labing menos usa sa ilang anak nga mosulod sa bug-os panahong ministeryo, ilang gihatagag pagtagad si Josué. Ingong maayong estudyante, si Josué eskolar sa kagamhanan nga nagtuon ug enhinyeriya. Human sa usa ug tunga ka tuig sa unibersidad, iyang gidawat ang imbitasyon nga moapil sa proyekto sa konstruksiyon sa mga tinukod sa hedkuwarter sa mga Saksi ni Jehova sa Dominican Republic. Ang iyang mga ginikanan mipahayag ug lalom nga kalipay sa paghatag sa ilang anak nga lalaki sa pag-alagad kang Jehova.

“Mga Manunuhid” Gikan sa Ubang Kayutaan

Ang mga pulong ni Jesus nga “dako ang anihon, apan diyutay ang mga mamumuo” mapadapat gayod dinhi niining natara. (Mateo 9:37) Ang dakong panginahanglan ug ang maayong pagsanong nakatukmod sa mga Saksi gikan sa ubang kayutaan nga mangadto aron makig-ambit sa pagsuhid sa teritoryo alang sa tinuod modernong mga bahandi​—sinserong mga tigpangita ug kamatuoran.

Gikan sa tapad nga isla sa Puerto Rico nangabot ang mga pamilyang Saksi kinsa nakakaplag ug tinuod nga kalipay sa pag-alagad sa lainlaing dapit sa Dominican Republic. Matud sa usa ka ulo sa pamilya: “Ang pagkahimong makapahayag sa imong pagtuo ug paglaom ngadto sa mga andam maminaw naghimo gayod sa kamatuoran nga buhi!” Pagkahibalo sa panginahanglan dinhi, si Cecilia gikan sa Sweden ug si Nia gikan sa Tinipong Bansa miabot sa pagduyog sa daghang ubang batan-ong bug-os-panahong mga ministro. Sila nag-alagad sa interyor diin ilang nakita ang mas habog nga dapit ug mas maayong klima. Sa susama, didto sa hataas bugnaw punog-kahoyng-pino nga kabukiran, duha ka pamilyang taga-Canada miduyog sa usa ka pamilyang Dominican nga mipauli gikan sa Tinipong Bansa. Sila maoy bahin sa usa ka gamayng kongregasyon ug nakaarang sa pag-abot sa mga tawo nga wala pa maduaw sa mga Saksi ni Jehova sulod sa napulo ka tuig.

Si Alfredo ug Lourdes ug ang ilang lima ka anak mibalik gikan sa Siyudad sa New York ug nakig-uban sa gamayng kongregasyon sa usa ka nindot nga lungsod sa baybayon nga pangturista. Nalipay sila nga nakapakig-ambit sa pagpangita sa mga matinud-anon ug kasingkasing ug sa pagtabang sa kongregasyon nga motubo. Si Roland, usa ka operetor sa kompiyuter gikan sa Austria, ug ang iyang asawa, si Yuta, mipuyo sa mainit, uga, habagatang bahin sa nasod. Nalipay sila nga nakakita sa pagtukod ug usa ka bag-ong kongregasyon sukad sa ilang pag-abot. Sa sikbit nga lungsod, usa ka grupo sa tulo ka payunir nga mga sister ug usa ka magtiayon gikan sa California ang mitaho nga daghan ang mihangyo kanila ug pagtuon sa Bibliya nga dili na nila madumalahan ang tanan. Busa ilang gidasig ang mga interesado nga motambong sa mga tigom sa lokal nga Kingdom Hall ug ipalista ang ilang ngalan apil niadtong naghulat sa pagtuon sa Bibliya. Ang manghod nga lalaki ni Yuta si Stefan matinumanong nag-alagad uban sa usa ka gamayng kongregasyon sa matahom nga lungsod sa Samaná, sa amihanan-sidlakan. Sa duha lamang ka tuig, midoble ang gidaghanon sa mga magmamantala sa Gingharian didto.

Ang gugma ug kasibot nga gipasundayag nila ug sa uban kinsa nangadto aron motabang dalayegon gayod. Ilang gidawat ang hagit dili lamang sa pagbalhin ngadto sa usa ka bag-ong nasod nga lahi ug kultura ug kustombre kondili usab, sa kadaghanang kahimtang, sa pagtuon sa usa ka bag-ong pinulongan aron maatiman ang espirituwal nga mga panginahanglan sa karnerohong mga tawo. Ang ilang mga paningkamot misangpot sa positibong pagsanong sa lokal nga mga tawo.

Ang pipila ka pamilyang Dominican mibiya sa kaharuhay sa dagkong mga dakbayan ug namalhin ngadto sa mga banika. Ang tanan dagayang gigantihan pinaagi sa kalipay nga makadiskobre sa tinuod nga mga bahandi sa sinserong mga tigpangita sa kamatuoran.

Ang ika-15ng siglo nga tigpangita ug bahandi wala modalag mga panalangin, apan hinuon kaulipnan ug dili-ikabatbat nga pag-antos sa lumad nga katawhang Taino. Bisan si Columbus mismo wala makapahimulos gikan sa mga bahandi sa Bag-ong Kalibotan. Kadugayan siya gidakop ug gikuha gikan sa isla nga iyang nadiskobrehan ug gidalag balik sa Espanya nga kinadenahan.

Karon usa ka laing matang sa pagsuhid ang nagakahitabo, ug mas bililhong bahandi ang nakaplagan. Ang katawhan ni Jehova puliki sa pagpangita sa matinud-anon ug kasingkasing nga mga tawo nga mosanong sa maayong balita sa Gingharian. Ang resulta mao ang nagatubong gidaghanon sa panon nga nagapahimulos sa kagawasan nga ikahatag lamang sa Pulong sa Diyos. (Juan 8:32) Sila nagalantaw sa unahan ngadto sa panahon sa dihang kining maong yuta sa kabukiran, nindot nga mga busay, matahom nga mga baybayon, ug madanihong mga langob mahimong, dili lamang usa ka paraisong isla, kondili bahin sa usa ka bag-ong kalibotan nga nagalukop sa tibuok yuta.​—2 Pedro 3:13.

[Footnote]

[Mapa sa panid 24]

(Alang sa aktuwal nga pagkahan-ay, tan-awa ang publikasyon)

Dominican Republic

[Hulagway sa panid 24, 25]

Ang mga batan-on nakadiskobre sa bili sa espirituwal nga mga butang pinaagi sa pagsulod sa bug-os-panahong pag-alagad