Usa ka Pagsusi sa Panglawas Alang Kanimo?

Ang Watch Tower Society dili mohimog mga rekomendasyon o mga desisyon alang sa mga indibiduwal bahin sa mga paagi sa pagtambal ug pagdayagnos. Hinunoa, kon ang pila ka pamaagi dunay mga bahin nga kadudahan basi sa mga prinsipyo sa Bibliya, hayan ikapunting ang pagtagad ngadto niini. Dayon ang matag indibiduwal makatimbangtimbang sa mga butang nga nalangkit ug makadesisyon kon unsay himoon.

Minahal nga mga Igsoon: Gusto kong masayod sa inyong opinyon. Ang usa ka [mananambal] daw makaayog mga sakit, apan nagduda ko sa gigamit niyang pamaagi. . . . Pinaagi sa pag-eksamin iyang tinoon kon unsay suliran. Dayon aron mahibal-an ang matang o gidaghanon sa gamitong tambal, iyang isaghid ang botelya sa tambal diha sa panit nga duol sa glandula o organo. Sulayan niyag bira paubos ang giisang kamot sa pasyente. Ang matang ug gidaghanon sa tambal nga gamiton nagdepende sa kusog nga iyang gikinahanglan sa pagbira paubos sa kamot. Ang teoriya mao nga ang mga elektron, sama sa koryente, molatay gikan sa medisina agi sa metal nga takop sa botelya ngadto sa bahin sa lawas, nga maglig-on niana. Sama ba kini sa pagpanag-an kon diin ang dapit nga adunay tubig?

KINING maong sulat gikan sa Oregon, T.B.A., may kalabotan sa usa ka paagi nga gigamit sa pipila aron mahibal-an ang gikinahanglang sustansiya, mabalansi ang emosyonal nga mga isyu, matimbangtimbang ang panumdoman, ug masulbad ang mga suliran sa matag adlaw nga pagkinabuhi. Bisan unsa pa ka ordinaryo sa pamaagi, ang mga katahap ba sa nagsulat makataronganon?

Maayong Panglawas​—Sa Unsang Bili?

Sukad sa karaang mga panahon, naningkamot ang mga tawo nga masabtan kon nganong sila magkasakit ug kon sa unsang paagi sila mamaayo. Ang mga Israelinhon dunay bentaha sanglit nasayod sila nga sila mga makasasala, ug duna silay mga balaod gikan sa Diyos nga nakabulig kanila aron makalikayng mataptan o makatakod ug daghang sakit. (Levitico 5:2; 11:39, 40; 13:1-4; 15:4-12; Deuteronomio 23:12-14) Bisan pa, ang katawhan sa Diyos nangayo usab ug tabang gikan sa kuwalipikadong mga doktor sa ilang adlaw.​—Isaias 1:6; 38:21; Marcos 2:17; 5:25, 26; Lucas 10:34; Colosas 4:14.

Pagkalahi sa katawhan sa karaang Babilonya ug Ehipto! Ang ilang “mga doktor” dunay pipila ka tambal basi sa natural nga mga sangkap, apan daghan sa ilang “mga pagtambal” giila karon ingong popanambal ra. Usa ka Ehiptohanong tekstong hieroglyphic nagsugilon sa usa ka doktor nga migamit ug hugawng miksklada sa mga mata sa baboy, antimony, tai sa puthaw, ug dugos sa pagtambal sa pagkabuta. Kining maong timplada gibubo ngadto sa dalunggan sa masakitong tawo! Usa ka karaang asoy nangangkon nga kining paagiha sa pagtambal “ekselente kaayo.” Hayan ang pagkakahibulongan o pagkamisteryoso niini nakadugang sa pangdani niini.

Ang mga taga-Babilonya ug mga Ehiptohanon subsob nga mangayog tabang sa okultong mga gahom.a Tingalig hangyoon sa pari/tambalan ang pasyente sa pagginhawa ngadto sa mga ilong sa usa ka karnero, nga nagtuo nga ang pipila ka gahom, o enerhiya, molatay gikan sa pasyente ngadto sa laing linalang ug adunay epekto. Ang karnero ihawon, ug ang atay niini magbutyag kuno sa sakit sa pasyente o sa iyang kaugmaon.​—Isaias 47:1, 9-13; Ezekiel 21:21.

Natural, ang mahadlokon sa Diyos nga doktor sa karaang Israel wala mogamit ug espiritistikong mga paagi. Ang Diyos maalamong nagsugo: “Dili hikaplagan kaninyo . . . ang si bisan kinsang nagagamit sa panagna, salamangkero o nagapangitag mga tilimad-on o diwatahan . . . Kay ang tanang nagabuhat niining mga butanga dulumtanan kang Jehova.” (Deuteronomio 18:10-12; Levitico 19:26; 20:27) Mao gihapon ang mapadapat sa Kristohanong mga alagad sa Diyos karon. Haom ang magbantay.

Niining bag-o pang katuigan daghang tawo ang nagtagad sa “alternatibo” nga mga teknik sa pagdayagnos ug mga pagtambal. Kini sa pagkatinuod maoy butang nga pagadesisyonan sa personal. (Mateo 7:1; itandi ang Roma 14:3, 4.) Siyempre pa, ikasubo gayod kon ang usa ka Kristohanon malangkit kaayo sa kontrobersiyal nga mga isyu sa panglawas nga maawngan niini ang ministeryo, nga mao lamang ang seguradong paagi sa pagluwas ug mga kinabuhi. (1 Timoteo 4:16) Ang Bibliya wala mag-ingon nga sa bag-ong kalibotan ang mga sakit mamaayo ug mahingpit ang panglawas pinaagi sa medikal nga mga pamaagi, mga dahondahon, mga pagkaon, o mga programa sa pagtambal sa tibuok pagkatawo. Sa pagkatinuod, ang bug-os nga pagkaayo ipahinabo lamang pinaagi sa kapasayloan sa sala pinasikad sa halad lukat ni Jesus.​—Isaias 33:24; Pinadayag 22:1, 2.

Unsang mga Gahom ang Nalangkit?

Unsa kahay gustong konsiderahon sa usa ka Kristohanon sa dihang modesisyon sa kaugalingon bahin sa pagsusi sa kaunoran sa kusog nga gihisgotan diha sa pangbukas nga sulat?

Ang pipila ka paagi sa pagsusi sa kalig-on o reaksiyon sa mga kaunoran sa kusog maoy bahin sa kasagarang pagpanambal, ug diyutay ra ang magduhaduha sa pagkaangay niini. Pananglitan, ang polio makapaluya sa kaunoran sa kusog, ug ang terapiya alang niini mahimong maglangkit sa gitawag nga kinesiology​—“ang pagtuon sa kaunoran sa kusog ug paglihok sa kaunoran.” Ang maong kinesiology gigamit usab sa terapiyang makapaarang-arang sa mga naistrok. Kadaghanan sa mga tawo makasabot ra sa maong pagtambal.

Apan komosta na man ang pagsusi sa kaunoran sa kusog nga gihubit sa sulat sa sinugdan niining artikuloha? Kining maong matang sa “kinesiology” gigamit sa paningkamot nga mahibal-an kon unsang matanga sa mga pagkaon, mga dahondahon, o mga bitamina ang makatabang o makadaot sa usa ka tawo. Ingon sa naandang paagi, ituy-od sa indibiduwal ang iyang bukton, ug birahon kini paubos sa mananambal aron susihon ang kalig-on sa kaunoran. Sunod mougom ang pasyente ug bitamina o ubang substansiya, o ibutang kana sa iyang dughan, o sa iyang kamot. Dayon ang mga kaunoran sa bukton susihon pag-usab. Sumala pa kon gikinahanglan niya ang maong sustansiya, ang iyang bukton molig-on; kon kana makadaot niya, ang kaunoran mangluya.b

Ang pila nga nakasulay niini nagtuo nga kini misaler ug nahitabo kini tungod sa mga gahom sa sulod sa lawas. Sila nangatarongan nga dunay daghang butang nga dili ikasaysay sa modernong siyensiya apan nagakahitabo o maobserbahan. Busa, sila nangangkon nga mahimong dunay mga agianan sa enerhiya o koneksiyon tali sa mga gahom ug mga substansiya, bisan pa kon wala kini madiskobrehi o wala dawata sa mga doktor.

Sa laing bahin, ang librong Applied Kinesiology nagpahayag: “Usahay [ang mga libro] nagtudlo nga ang kemikal nga mga substansiya, sama sa mga bitamina, gitimbangtimbang pinaagi sa paggunit sa substansiya ug pagsusi sa kaunoran sa kusog. Walay ebidensiya nga kining maong paagi sa pagsusi kasaligan. . . . Mahimong hugot kaayo ang pagtuo sa mananambal nga mosaler ang iyang panambal sa paagi nga ang iyang gituohan daan nga ideya makaapektar sa katukma sa impormasyon nga makuha diha sa proseso sa pagsusi.” “Ang usa ka tig-eksamin nga eksperyensiyado sa manomanong pagsusi sa kaunoran sa kusog dali rang makamaneobra sa kaunoran sa pasyente aron makita kining luya o lig-on sumala sa iyang gusto pinaagi lamang sa pag-usob . . . ug diyutay sa pagsusi.”

Pagbantay!

Hinunoa, ang pila ka pagsusi sa kaunoran sa kusog labaw pa niini. Tagda ang gitawag nga “puli nga pagsusi.” Hayan himoon kini sa kaso sa usa ka tigulang o usa ka masuso nga luya kaayo aron susihon. Samtang gigunitan sa kapuli ang bata, susihon sa mananambal ang bukton sa kapuli. Gigamit gani kini sa binuhing mga mananap; ang bukton sa kapuli susihon samtang ang iyang usa ka kamot gipahiluna diha sa collie, German shepherd, o ubang masakitong binuhing mananap.

Kami wala sa kahimtang aron mohukom sa maong mga aksiyon, apan makapangutana ka, ‘Ang mga gahom ba sa lawas nagpaluyo niining mga epekto?’ Ang mga siyentipiko nakapamatuod sa paglungtad sa kosmikong mga bidlisiw, mga microwave, ug lainlaing matang sa elektromagnetikong radyasyon. Apan, ang tanan bang linalang, bisan mga masuso ug mga binuhing mananap sa balay, nagbaton niining mga gahoma nga molatay ug makapatunghag masusi nga epekto diha sa laing tawo? Ang mga taga-Babilonya nagtuo nga ang mga gahom mahimong molatay ug makaapektar sa usa ka karnero. Makapangutana ka sa imong kaugalingon, ‘Ako ba nagtuo nga ang susamang butang mahitabo sa mga tawo o mga hayop karon? O tingali ang mga epekto dunay laing katin-awan?’

Nangangkon ang pipila ka mananambal nga mahimong masukod ang “mga gahom” sa usa ka tawo pinaagi sa mga galamiton sama sa mga likoslikos nga metal o mga pendulom. Kini kunohay molihok samtang ang “natad sa enerhiya” sa mananambal motagbo nianang iya sa pasyente. Usa ka mananambal ug magsusulat bahin niining natara, nga kanhi usa ka tigdukiduki nga siyentipiko, usahay modayagnos pinaagi sa usa ka pendulom. Nangatarongan usab siya nga makit-an niya ang “natad sa enerhiya sa tawo” o buloknong palibot nga gituohang naglikos sa mga indibiduwal. Siya nangangkon nga migamit siya ug “panihag sa mga butang nga tago” sa pagtan-aw sa sulod sa lawas aron makita ang mga tumor, mga selula sa dugo, o mga kagaw, ug sa pagtan-aw sa nangagi.c

Ingon sa gihisgotan sa sinugdan, ang pagsukod ug mga gahom pinaagig kusog sa bukton gigamit usab sa pagsusi sa mga emosyon. Ang usa ka himalitang libro nag-ingon: “Kon buot nimong iapil ang gamayng pagsusi sa emosyon sa samang panahon, pangutana lang nga madungog ‘Duna ka bay suliran?’ ug susiha pag-usab. Kini usahay magpaluya sa bukton kon kulang sa sustansiya.” Ang pila mogamit sa maong pagsusi “aron mahibal-an ang edad kon kanus-a ang espisipikong pisikal, emosyonal o espirituwal nga suliran” nahitabo. Gigamit usab kini sa paghimog ‘oo o dili’ nga mga desisyon labot sa matag adlaw nga mga butang.

Malagmit, ang daghan nga mihimo sa maong pagsusi sa kaunoran sa kusog (kinesiology) moingon nga ang paaging ilang gigamit lahi gikan sa bag-o lang gihisgotan, nga walay nalangkit nga espiritismo, o nga sila dili mohimog emosyonal nga pagsusi. Bisan pa niana, ang ila bang gihimo gipasikad gihapon sa pagtuo sa mga gahom sulod sa matag tawo nga mahimong susihon o makita lamang sa pipila ka tawo nga nangangkong dunay espesyal nga mga gahom?

Ang mga Kristohanon dili magpakamenos niining mga isyuha. Ang Diyos nagtambag sa Israel: “Ang bag-ong bulan ug ang adlaw nga igpapahulay, ang pagtawag sa mga katigoman​—ako dili makaantos sa misteryosong gahom uban sa maligdong nga pagtigom.” (Isaias 1:13) Sa dihang nahimong apostata ang maong nasod, sila ‘nagagamit ug panagna ug nagapangitag mga tilimad-on.’ (2 Hari 17:17; 2 Cronicas 33:1-6) Dayag nga sila nangitag impormasyon pinaagi sa linaing mga rituwal, ug dayon sila managsulti “kon unsay misteryoso.”​—Zacarias 10:2.

Ang pila ka pagsusi sa kaunoran sa kusog mahimong inosente, nga walay kadaot sa pasyente o mananambal. Hinunoa, dayag nga ang pila dunay misteryoso o labaw-kinaiyanhong mga bahin, sama sa pagkakita sa tagong butang, misteryosong mga palibot, ug paggamit sa pendulom. Ang mga Kristohanon kinahanglang dili mogamit ug misteryosong mga gahom. Sila dili gayod angay mag-eksperimento niana, tungod kay sila dili mausisaon bahin sa halalom nga mga butang ni Satanas. (Pinadayag 2:24) Hinunoa, dunay maayong katarongan sa pagpanagana bahin sa bisan unsang butang nga daw nalangkit sa paggamit ug espiritismo, nga gisaway sa Pulong sa Diyos.​—Galacia 5:19-21.

Ang usa ka mananambal manubag sa iyang ginahimo, ug dili namo katuyoan nga susihon ug hukman ang mga gipangangkon o mga pamaagi sa usa. Bisan pag gibati nimo nga ang pipila niining mga gigamit nga paagi tinuod nga nalangkit sa misteryosong gahom, dayag nga daghan nga misulay niini mihimo niini sa kawalay alamag, nga wala maghunahuna nga posibleng nalangkit ang espiritismo. Hayan timailhan lamang kini sa dako kaayo nilang tinguha alang sa maayong panglawas. Sa gihapon, ang pipila nga nalangkit sa maong mga paagi nakahukom sa ulahi nga ang bisan unsang lagmit nga kaayohan sa panglawas dili takos sa espirituwal nga kapeligrohan.

Sa makausa pa, ang matag indibiduwal kinahanglang magbuot kon unsay iyang himoon bahin niining personal nga mga butang. Bisan pa, angay nga hinumdoman sa mga Kristohanon ang tambag sa Diyos: “Ang bisan kinsa nga walay kasinatian motuo sa matag pulong, apan ang maalamon magatagad sa iyang mga lakang.” (Proverbio 14:15) Kana mapadapat sa mga paagi sa panambal usab.

Gusto ni Satanas nga malinga ang mga alagad sa Diyos gikan sa matuod nga pagsimba. Ang Yawa malipay kon iya kining mahimo pinaagi sa pagpahinabo sa mga Kristohanon nga madani sa ubang intereses. Gani mas malipay siya kon sila madani sa mga butang nga, o daw, misteryosong mga paagi nga mahimong modaldal kanila ngadto sa espiritismo.​—1 Pedro 5:8.

Bisan tuod ang mga Kristohanon dili ilalom sa Balaod ni Moises, ang tinamdan ni Jehova nga Diyos bahin sa mga paaging okulto wala mausab. Sumala sa unang gihisgotan, ang Diyos nagsugo sa mga Israelinhon nga “ang si bisan kinsang nagagamit sa panagna, salamangkero o nagapangitag mga tilimad-on o diwatahan, o maglalamat sa uban” dili hikaplagan sa ilang taliwala. “Ang tanang nagabuhat niining mga butanga dulumtanan kang Jehova . . . Kinahanglang pamatud-an nimo ang imong kaugalingon nga walay ikasaway kang Jehova.”​—Deuteronomio 18:10-13.

Nan, pagkamaalamon alang sa mga Kristohanon karong adlawa nga padayong “isul-ob ang kompletong armadora gikan sa Diyos . . . tungod kay kita adunay pakigdumog . . . batok sa tuman-kadaotang mga puwersa nga espirituhanon diha sa langitnong mga dapit”!​—Efeso 6:11, 12.

[Mga footnote]