Mga Graduwado sa Gilead Maikagon sa Pagsangyaw sa Maayong Balita
“ANG labing kahibulongang butang nga among mahanduraw sukad.” Kana ang gibati ni Anders ug Amalia Groth sa ilang misyonaryong pagbansay. Gipahayag nila ang mga pagbati sa tanang 48 ka graduwado sa ika-97ng klase sa Watchtower Bible School of Gilead sa pagdugang: “Ang pagbansay sa Gilead nagdasig ug nag-andam kanamo, mao nga maikagon kami nga moadto na sa among bag-ong mga asaynment.”
Namatikdan namo ang maong kangaya samtang gikomentohan sa mga estudyante ang programa sa graduwasyon; 6,420 ang nagtigom niadtong Septiyembre 4, 1994, alang sa okasyon.
“Si Theodore Jaracz sa Nagamandong Lawas ang nag-abli sa programa pinaagi sa pagpahayag bahin sa temang ‘Pagkatinudloan ni Jehova,’” matud ni David Abel ug sa iyang asawa, si Kelli. “Ang puntong dili gayod namo hikalimtan maoy sa dihang si Igsoong Jaracz miingon: ‘Kinahanglan nga ilhon nato ang atong kaugalingong pagkagamay kon itandi kang Jehova,’ ug giilustrar kana sa gamhanang pagtulon-an nga makaplagan sa Job mga kapitulo 38 ug 39. Gipunting ni Igsoong Jaracz nga bisan pag miuswag ang among kahibalo sa Bibliya pinaagi sa Tunghaan sa Gilead, wala kami masayod sa tubag sa tanang pangutana. Kinahanglan nga kami magpadayon sa pagtuon sa Pulong sa Diyos.”
Si Christian ug Angele Coffy sa maong panahon misulti: “Nakadayeg kami sa pakigpulong nga gihatag ni Max Larson bahin sa temang ‘Unsa ang Bili sa Usa ka Maayong Patukoranan?’ Nakaangay kami sa pagtandi niya kanamo ngadto sa usa ka tinukod nga nagkinahanglag lalom nga patukoranan diha sa gahing yuta aron magpabiling lig-on bisan panahon sa usa ka linog. Pinaagi sa makugihong pagtuon, kami makaugmad ug mas suod nga relasyon uban kang Jehova ug makapasukad sa among pagtuo diha sa lalom nga kahibalo aron kami makapabiling malig-on sa mga panahon sa kalisdanan.”
“Ang pakigpulong ni Milton Henschel, ang presidente sa tunghaan, bahin sa temang ‘Ang Umahan Puti na Aron Anihon’ mahinumdoman sa dugay nga panahon,” mipahayag si Gary ug Lynn Elfers. “Ang yawing kasulatan, ang Juan 4:35-38, nagpasiugda sa pribilehiyo nga among nabatonan sa pagsulod sa usa ka umahan nga napugsan na sa nangaging mga mamumuo. Kini modasig kanamo sa pagtrabaho uban ang pagbati sa pagkadinalian.” Nga miuyon niini, si Jan ug Sirpa Vaahtola miingon: “Gipasamot ni Igsoong Henschel ang among kahinam mahitungod sa pag-ani nga himoon pa pinaagi sa paghatag sa kinabag-ohang taho gikan sa Baltic nga mga Estado. Ang pag-uswag sa Estonia maoy 51 porsiento, sa Latvia 106 porsiento, ug sa Lithuania 51 porsiento. Pagkamakapaukyab! Ang mga igsoon didto nagapangaliyupo sa Agalon sa pagpadalag mas daghang mamumuo. Kami ang ilabinang nalipay sa pagkabati niini, kay ang among asaynment maoy ngadto sa Estonia!”
“Si Joel Adams ang sunod nga mihatag ug pakigpulong bahin sa temang ‘Salig Kang Jehova,’” nahinumdom si Kevin ug Evelyn Cortina. “Gitambagan niya kami nga dili gayod kami angay maghunahuna nga usahay kami makasalig kang Jehova ug usahay kami makasalig sa among kaugalingong kaalam. Sa among asaynment atubangon namo ang daghang hagit—panglawas, pagkaon, pinulongan, mga kostumbre, ug uban pa. Kanang tanan magkinahanglan nga kami mosalig kang Jehova.”
Ang sunod nga mamumulong mao si Gerrit Lösch, usa ka membro sa Nagamandong Lawas, kinsa naghan-ay sa temang “Padayon sa Pagpalandong sa Kaluoy ni Jehova.” Si Alen ug Ann Marie Gokavi miingon: “Iyang gipunting nga usa ka timailhan sa Kristohanong pagkahamtong ang pagpaabot ug kaluoy ngadto sa among isigkamisyonaryo ug niadtong among gipaambit sa maayong balita. Ang langyawng mga asaynment naglangkit sa sakripisyo, apan kon wala ang kaluoy, nan ang among sakripisyo diyutay ra kaayog bili.” (Mateo 9:13) Si Peter ug Fleur Hupston midugang: “Si Igsoong Lösch miingon nga angay nga kami magmaluluy-on sa among mga igsoong lalaki ug mga babaye usab, nga tan-awon sila pinaagi sa pikas nga tumoy sa largabista, ingnon ta, aron ang ilang mga sayop dili dako nga tan-awon inay kay mahimong dako.”
“Si Jack Redford, usa sa mga instruktor namo sa Gilead, ang sunod nga nagpakigpulong bahin sa temang ‘Makadawat Ka ba sa Usa ka Pagbadlong?’” nahinumdom si Mickey ug Sherry Minsky. “Iyang gipunting nga ang garbo magpalisod sa pagdawat sa pagbadlong ug kon kita sensitibo kaayo sa tambag, kita mahikawan sa mga benepisyo niini. Unya mihatag siyag pipila ka praktikal nga mga sugyot bahin sa pagdawat sa pagbadlong nga gipasukad sa Lamentaciones 3:27-31.” Si Charles ug Joan Held midugang: “Kadaghanan sa panahon kita walay kasayoran sa atong kaugalingong mga kahuyangan; busa, kinahanglang isipon nato ang pagbadlong ingong usa ka paagi sa pagpaamgo nato sa mga butang nga wala nato hiamgohi. Ang pagbadlong o tambag gikan ni Jehova maoy usa ka ebidensiya sa iyang gugma kanato.”
“Ang laing instruktor, si Ulysses Glass, namulong bahin sa temang ‘Batoni ang Praktikal nga Kaalam nga Motultol sa Kinabuhi.’ Siya nangutana: ‘Sa unsang paagi ipadapat nimo ang imong natun-an?’” matud ni Kenneth ug Lisbeth Ardkäll. “Unya gihatag niya ang usa ka ilustrasyon nga gibase sa Proverbio 30:24-26 mahitungod sa gamayng rock badger ug kon giunsa pagsangkap sa bug-os kini ni Jehova aron mabuhi. Kita, sa laing bahin, sa kinaiyanhon dili maalamon, mao nga gikinahanglan nga kita manlimbasog aron makabatog kaalam. Si Jehova nagsangkap kanato sa tanang butang nga atong gikinahanglan sa pagbuhat niana. Samtang kita mosuod kang Jehova ug sa usag usa diha sa gugma, dako ang atong mahimo.”
Pangunang Pakigpulong
“Si Igsoong Karl F. Klein, usa ka membro sa Nagamandong Lawas, madasigong naghisgot sa ika-19ng Salmo uban kanamo diha sa iyang pakigpulong nga ‘Usa ka Mutya Taliwala sa mga Mutya,’” matud ni Jay ug Gwen Abraczinskas. “Gipasiugda niya ang lalom nga pagpabili sa salmistang si David kang Jehova ug ang paghigugma niya sa Pulong sa Diyos.” “Gibahin ni Igsoong Klein ang salmo sa tulo ka parte,” miingon si Keith ug Donna Hornback. “Ang parte 1 (mga bersikulo 1-6) nagpakita sa pagpabili ni David sa kalalangan sa Diyos, ang parte 2 (mga bersikulo 7-10) nagpahayag sa iyang pagpabili sa mga balaod sa Diyos, ug ang parte 3 (mga bersikulo 11-14) nagpahinumdom kanato nga, sama kang David, kinahanglang kita magtinguhang makabaton ug maayong relasyon uban kang Jehova.”
“Naangayan namo ang punto nga ang pagkahadlok kang Jehova hinungdanon aron malikayan nato kon unsay daotan. Kini motultol kanato sa pagbuhat kon unsay putli sa iyang mga mata,” matud ni David ug Raylene Long. Si Frank ug Vibeke Madsen miuyon. “Ang mga komento ni Igsoong Klein bahin sa pagkamakaayo sa mga pahinumdom, mga balaod, ug mga sugo ni Jehova haom nga nagsumada kon unsay nakat-onan namo sa Gilead,” matud nila. “Kana naghimo kanamo nga labi pang determinado sa pagsunod sa Pulong sa Diyos sa umaabot ug sa pag-isip niana nga samag usa ka kaban sa mga mutya.”
Human sa pangunang pakigpulong, nadawat sa mga estudyante ang ilang mga diploma, ug gianunsiyo ang ilang langyawng mga asaynment. Human sa usa ka pahulay alang sa meryenda, ang tanan nagtigom na usab alang sa sesyon sa hapon. Ang mga graduwado misalmot sa pagtubag sa mga pangutanang gisukna panahon sa pinamubong Pagtuon sa Bantayanang Torre.
“Dayon misunod ang programa sa estudyante nga ‘Nabansay Aron Mahimong mga Magmamantala sa Gingharian sa Tibuok Yuta,’” nahinumdom si Bob ug Shannon Lakatos. “Ang unang bahin sa programa nagpasundayag sa mga kasinatian sa mga estudyante sa pagsangyaw sa kanataran sulod sa among lima-ka-bulan nga kurso. Kana gipunting sa mahanasong paggamit sa mga pangutana diha sa atong ministeryo. Ang usa ka bahin nga interbiyo nagpakitag positibong mga paagi sa pag-atubang sa mga hagit ug nagkausab nga mga kahimtang sa misyonaryong kinabuhi. Ang tulo ka presentasyon sa mga slayd, sa Costa Rica, India, ug Malawi, mihatag kanamo sa usa ka pasiklap sa tibuok-kalibotang organisasyon ni Jehova.”
“Ang drama nga misunod, Mahimong Teokratikanhon, Dili Kalibotanon, nag-ilustrar sa mahimong daotang epekto sa pipila ka kalibotanon, independenteg-hunahunang mga paryente,” miingon si Jesse ug Michelle Duncan. “Kana nagpakita nga ang mga Kristohanon kinahanglang moila sa mga lagda ug mga direksiyon sa Teokrasya ingong kinahanglanon ug mapuslanon,” midugang si Wenzel ug Kelly Koula.
Ang kataposang awit ug pag-ampo nagtapos sa makapahimuot nga programa. Samtang ang mga graduwado nanglakaw nga nagpaabot sa ilang paglarga alang sa langyawng mga asaynment sa 18 ka nasod, ang ilang mga hunahuna maayong pagkapahayag niining panamilit nga komento ni Tommi ug Jael Kauko: “Maikagon kaayo kami nga moadto sa among asaynment ug ipadapat ang among nakat-onan. Daghan kaayo ang among nadawat—karon amo nang turno ang paghatag.”
[Hulagway sa panid 26]
Ika-97 nga Klase nga Migraduwar sa Watchtower Bible School of Gilead
Sa listahan sa ubos, ang mga lumbay ginumerohan gikan sa atubangan paingon sa likod, ug ang mga ngalan gilista gikan sa wala patuo sa matag lumbay.
(1) Hong, J.; Hong, D.; Groth,A.; Cortina, E.; Lakatos,S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.