Mga Saksi ni Jehova sa Tibuok Kalibotan—Nigeria

ANG Nigeria nasuksok diha sa punoan sa bugdo sa kasadpang Aprika. Nahimutang sa Gulf of Guinea, kini amihanan lamang sa equator ug adunay kapin sa 88 ka milyong molupyo.a

Sa milabayng duha ka tuig sa pag-alagad, ang sangang buhatan sa Watch Tower Society sa Nigeria naghatag ug linaing pagtagad sa mga batan-on. Usa ka surbi sa mga kongregasyon sa mga Saksi ni Jehova nagpakita nga 80 porsiento niadtong misugod sa pagsangyaw sa maayong balita sa Nigeria sulod sa 1992 maoy tali sa 10 ug 20 anyos ang edad. Taliwala niadtong nabawtismohan sa maong tuig, 63 porsiento maoy anaa sa maong grupo sa edad.

Mga Batan-ong Nagapangab-ot sa Pagpayunir

Daghang batan-on ang nagasulod sa bug-os panahong pagsangyaw nga buluhaton ingong mga payunir. Usa ka payunir nga ginganlag Hannah nag-ingon: “Sa hapit na akong matapos sa pagtungha, miduaw ako niadtong nagtungha sa Tunghaan sa Payunir nga Pag-alagad, diin nakaila ko ang duha ka edarang igsoong mga babaye. Nagpalandong ako sa akong kaugalingon, ‘Kon nakahimo silang duha sa pagpayunir, nganong ako dili?’

“Busa sa dihang ako nakatapos sa pagtungha, ako nagpayunir. Tulo ka bulan sa ulahi nakaila ko ang 26-anyos nga si Josephine, usa ka magsisimba sa juju. Siya miingon: ‘Daotang mga tawo kamong mga Saksi ni Jehova. Dili kamo magsaulog ug Pasko o mogamit ug mga anting-anting.’ Ako mitubag nga kon motugot siya nga ako siyang tun-an sa Bibliya, iyang mahibaloan kon nganong wala kami maghimo nianang mga butanga. Gidapit niya ako nga mobalik. Wala magdugay siya misugod sa pagtambong sa mga tigom ug mihimog daghang kausaban sa iyang kinabuhi. Niadtong Disyembre 1990 siya gibawtismohan. Sukad niadtong Agosto 1991, si Josephine nahimong usa ka payunir. Sa dihang siya mitungha sa Tunghaan sa Payunir nga Pag-alagad sa miaging tuig, gipailaila niya ako sa iyang mga kauban sa klase ingong iyang espirituwal nga inahan!”

Ang Video ug ang Kingdom Hall

Ang usa sa mga rekording sa video sa Sosyedad nakatabang sa usa ka gamayng kongregasyon nga makabaton ug yuta alang sa usa ka Kingdom Hall. Nangitag yuta nga paliton, upat ka igsoong lalaki miduol sa Onojie, ang tradisyonal nga magmamando sa lugar. Siya mitanyag ug usa ka lote nga 20,000 ka naira ($1,025, U.S.). Dili makaabot sa pagbayad ang kongregasyon nianang kantidara, sanglit 17 lamang ka magmamantala ang moabaga sa proyekto. Ang Onojie miingon nga siya mangitag laing luna.

Pipila ka bulan sa ulahi, usa sa mga ansiano sa kongregasyon miduaw sa balay sa Onojie. Ang Onojie nagtan-aw ug usa ka rekording sa video sa iyang koronasyon. Ang ansiano miingon: “Aduna koy video nga ipatan-aw nako nimo. Kini ginganlag Jehovah’s Witnesses​—The Organization Behind the Name.”

Sa ulahi, gipangutana sa ansiano kon unsay ikasulti sa Onojie bahin sa video. “Gitan-aw ko lima ka beses ang pelikula,” miingon ang Onojie. Gipahinumdoman sa ansiano ang Onojie bahin sa mga Kingdom Hall nga iyang nakita diha sa video ug gipatin-aw nga ang lokal nga kongregasyon gusto nga magtukod ug susama. Siya dayon nangutana kon ang kongregasyon mahimo bang makapalit ug yuta nga sikbit lang sa gamayng luna nga nabatonan na niini. Ang Onojie mitubag: “Sa miaging gabii human nakatan-aw sa video, mao usab kanay akong gihunahuna.” Niana, siya misukod ug sayis ka metros nga yuta nga sikbit sa propiedad sa kongregasyon. “Inyo na kini,” siya miingon. “Pinabuyon, makakuha kamo kutob sa inyong gikinahanglan. Andama ang mga dokumento, ug ako kining pirmahan.”

[Footnote]

[Kahon sa panid 9]

LARAWAN SA NASOD

1993 Tuig sa Pag-alagad

KINATAS-ANG GIDAGHANONG NAGSANGYAW: 174,582

PROPORSIYON: 1 ka Saksi sa 507

TUMATAMBONG SA MEMORYAL: 473,245

ABERIDS NGA PAYUNIR NGA MGA MAGMAMANTALA: 19,777

ABERIDS NGA MGA PAGTUON SA BIBLIYA: 242,028

GIDAGHANON SA NABAWTISMOHAN: 8,888

GIDAGHANON SA MGA KONGREGASYON: 3,289

SANGANG BUHATAN: SIYUDAD SA BENIN, ESTADO SA EDO