Namatay Ninyong mga Minahal—Hain Sila?
SI Alec naguol kaayo. Sa usa ka semana, duha sa iyang mga higala ang namatay. Ang usa kanila, si Nevil, naposilan. Ang lain, si Tony, namatay sa aksidente sa sakyanan. Ang mga pangutana nga wala makatugaw kaniya kaniadto karon naghasol sa 14-anyos nga batan-ong lalaki nga taga-Habagatang Aprika. ‘Nganong ang mga tawo mamatay man? Ug unsay mahitabo human sa kamatayon?’ siya nahibulong.
Sa iyang pagpaingon sa paglubong ni Nevil, tim-os nga naglaom si Alec nga iyang makita ang mga tubag niining mga pangutanaha. “Apan,” siya nahinumdom, “nagbasa lang ang pari ug libro ug miingon nga si Nevil miadto na sa langit. Unya, diha sa lubnganan, siya miingon nga kita maghulat pa sa pagkabanhaw. Naglibog ako. Kon si Nevil atua sa langit, sa unsang paagi siya naghulat ug usa ka pagkabanhaw?”
Sa hapon niadtong adlawa, si Alec mitambong sa paglubong ni Tony. Ang rituwalistikanhon nga serbisyo gihimo sa pinulongan nga wala niya masabti. Bisan pa, ang grabeng pagtiyabaw sa pipila sa mga nagbangotan nakakombinsi kang Alec nga kini walay nahatag nga paglipay. “Niadtong gabhiona,” siya miingon, “naguol kaayo ako. Gibati ko nga walay mahimo ug naglibog. Walay usa ang nakahatag ug makatagbaw nga mga tubag sa akong mga pangutana. Sa unang higayon sa akong kinabuhi, ako gayod naglibog kon aduna ba gayoy usa ka Diyos.”
Tuig-tuig minilyon, sama kang Alec, ang nawad-an ug mga minahal diha sa kamatayon. “Sa tibuok-kalibotan,” matud pa sa 1992 Britannica Book of the Year, “dihay 50,418,000 ka kamatayon sa 1991.” Ug pila ka minilyon pa ang nangamatay sukad? Hunahunaa ang daghang luha nga gipatulo sa nagbangotang namatyan! Dugang pa sa ilang kaguol mao ang kalibog nga gipahinabo sa nagkasumpaking mga ideya bahin sa kamatayon.
Busa daghan, sama kang Alec, ang nawad-ag paglaom ug nagduhaduha kon aduna bay basehanan sa paglaom sa umaabot nga kinabuhi human sa kamatayon. Sumala sa Encyclopedia of Religions, “sa tanang katuigan, ang mapamalandongong mga tawo wala moduyog sa kadaghanan sa ilang mga pagtuo, . . . apan nagduhaduha kon sa unsang paagi ang indibiduwal nga kalag o kinabuhi maglungtad nga bulag gikan sa indibiduwal nga utok ug lawas.”
Makaiikag, ang ibabaw nga ensiklopedia miadmiter nga ang relihiyosong teoriya sa usa ka kalag nga dili-mamatay nga naglungtad nga bulag gikan sa lawas wala pamatud-i sa Bibliya. Tinuod, sa pipila ka dapit, ang Bibliya naghisgot bahin sa “kalag” sa usa ka tawo nga mibulag ug gani mibalik sa usa ka patayng lawas, apan niining mga higayona ang “kalag” gigamit sa diwa sa “kinabuhi,” nga namatay o nabuhi pag-usab. (Genesis 35:16-19; 1 Hari 17:17-23) Sa masubsob, ang pulong “kalag” gigamit sa Bibliya sa paghubit sa dili-makitang mga linalang nga unod ug dugo, oo, buhing mga linalang. (Genesis 1:20; 2:7) Busa, ang Bibliya masubsob nga nag-ingon nga ang kalag mamatay. (Ezekiel 18:4, 20; Buhat 3:23; Pinadayag 16:3) Ang Pulong sa Diyos nag-ingon nga sa dihang mamatay ang mga kalag, sila “dili mahibalo sa bisan unsa.”—Ecclesiastes 9:5, 10.
Sa laing bahin, ang Bibliya nasudlan ug mga asoy bahin sa mga tawong patay nga gibuhi pag-usab. Sa kaso ni Lazaro, kini nahitabo human nga siya namatay sa upat na ka adlaw. (Juan 11:39, 43, 44) Apan, unsa kahay mahitabo sa mga tawo nga nangamatay na sa gatosan o libolibo na ka tuig ang milabay? Ang ila bang palaabuton sa umaabot nga kinabuhi nagkinahanglan nga pagabanhawon sa Diyos ang mao gihapong lawas nga ilang nabatonan sa dihang sila namatay?
Dili. Ang maong hunahuna dili magkatukma sa mahitabo sa mga atomo nga maoy naglangkob sa usa ka patayng lawas. Sa kadugayan, ang pipila niining mao gihapong mga atomo masuhop sa talamnon nga, sa baylo, kaonon sa ubang mga linalang ug mahimong bahin sa ilang mga lawas.
Kini ba nagpasabot nga wala nay paglaom ang mga tawo nga dugay nang namatay? Dili. Ang Maglalalang sa atong dako kaayong uniberso adunay usa ka katingalahan, walay-kinutoban nga panumdoman. Sulod sa iyang hingpit nga panumdoman, siya adunay katakos sa paghinumdom sa personalidad ug genetikanhong mga kinaiya sa tanang mga tawong patay nga iyang pilion nga hinumdoman. Dugang pa, si Jehova nga Diyos adunay gahom sa paglalang pag-usab ug usa ka tawhanong lawas nga adunay tukma kaayong genetikanhong lagda sa usa ka tawo kinsa nabuhi sa miagi. Siya usab makabutang diha niana sa panumdoman ug personalidad sa usa nga iyang hinumdoman, sama kang Abraham.
Halos duha ka libo ka tuig human nga namatay si Abraham, si Jesu-Kristo mihatag niini nga pasalig: “Nga ang mga patay pagabangonon bisan gani si Moises nagbutyag, sa asoy mahitungod sa tunokong-tanom, dihang iyang gitawag si Jehova nga ‘ang Diyos ni Abraham ug Diyos ni Isaac ug Diyos ni Jacob.’ Siya usa ka Diyos, dili sa mga patay, kondili sa mga buhi, kay kaniya silang tanan buhi.” (Lucas 20:37, 38) Gawas kang Abraham, Isaac, ug Jacob, milyon-milyon pang ubang mga tawong patay buhi sa panumdoman sa Diyos, nga naghulat sa umaabot nga pagkabanhaw. “Aduna unyay pagkabanhaw sa mga matarong ug sa mga dili-matarong.”—Buhat 24:15.
Sa milabay ang pipila ka semana human sa iyang pagbangotan, nakaplagan ni Alec ang mga tubag sa iyang mga pangutana. Usa sa mga Saksi ni Jehova miduaw sa iyang balay ug gipakita kaniya kon unsay gisulti sa Pulong sa Diyos bahin sa kamatayon ug bahin sa pagkabanhaw. Nahupayan si Alec niini ug naghatag ug bag-ong kahulogan sa iyang kinabuhi.
Buot ka ba usab masayod ug dugang bahin sa pinasukad-sa-Bibliya nga paglaom sa pagkabanhaw? Pananglitan, ang kadaghanan bang pagkabanhaw mahitabo sa langit o sa yuta? Ug unsa ang kinahanglang himoon sa usa ka tawo aron makabaton sa pag-uyon sa Diyos ug makasinati sa katumanan sa Iyang katingalahang saad nga ang mga tawo mahimong mahiusa pag-usab uban sa patayng mga minahal?