Hinungdanon ba kon sa Unsang Paagi Ikaw Nagasimba?

ANG gamayng lungsod sa Aprika naglagiting sa kainit panahon sa udtong tutok. Gikan sa haduol nga walog madungog ang tingog sa gubot nga pagtambol, pagkanta, ug malipayong pagpakpak. Apan kini dili usa ka sosyal nga kalihokan. Kini usa ka tradisyonal nga Aprikanhong pagsimba. Hinunoa, ang mga tingog nakigkompetensiya sa kasaba sa mga tingog gikan sa haduol nga simbahan sa karismatik. Didto ang madasigong mga magsisimba naghimo ug milagrosong mga “pagpang-ayo” ug nagsulti sa mga dila. Sa pikas tumoy sa lungsod may lain pang matang sa pagsimba. Ang lanog nga tingog sa usa ka muezzin nagtawag sa kaubang mga magsisimbang Muslim aron mag-ampo.

Oo, ang daghang matang sa relihiyosong debosyon makita sa daghang Aprikanhong mga siyudad ug mga lungsod. Sulod sa mga kaliwatan ang mga Aprikano tagbaw lamang nga mosunod sa ilang kaugalingong relihiyosong mga tradisyon. Apan unya miabot ang mga misyonaryo sa Kakristiyanohan, nga nagsunod sa mga armi sa lainlaing Uropanhong mga nasod, ug mapintasong misulay sa “paghimong Kristohanon” sa tanan​—lakip pa gani sa ilang mga ngalan.

Ang resulta? Usa ka matang sa relihiyon nga nagsagol sa tradisyonal nga Aprikanhong mga pagtulon-an ug mga tulomanon uban sa relihiyosong mga pagtuo sa laing nasod. Hangtod karong adlawa daghang “Kristohanong” mga magsisimba ang naggamit sa tradisyonal nga mga lumay ug mga anting-anting. Sa gihapon, ang mga misyonaryo sa Kakristiyanohan sayop nga naghawas sa matuod nga Kristiyanidad, ug sila nagbilin ug kayugot. Sa dakong gilapdon, sila responsable sa siradong-hunahuna nga tinamdan sa Bibliya nga naglungtad taliwala sa pipila ka Aprikano karon.

Bisan pa niana, daghang dagway sa “Kristiyanidad” ang kaylap gihapong ginatuman. Sa di pa dugayng katuigan ang karismatik nga relihiyosong mga grupo ilabinang nahimong popular; ang mga iglesya nga nagapanambal pinaagig pagtuo midaghan. Usa ka kolumnista sa mantalaan mipatin-aw sa pangdani niining mga iglesyaha pinaagi sa pag-ingon nga ‘ang Aprikanhong panghunahuna bahin sa relihiyon sa katibuk-an maoy aron mapahimuslan. Alang sa panghunahuna sa Aprikano, ang relihiyon kinahanglang may katakos sa paghatag ug direktang materyal nga katagbawan sa tawhanong paglungtad. Busa, alang sa Aprikano nga naghunahunang ang espirituwal nga palaumagian maoy kinahanglanon sa halos tanang butang, ang mga paagi sa paglihok sa espirituwal [o nagapanambal pinaagig pagtuo] nga mga iglesya maoy sumala sa mga panginahanglan sa iyang paagi sa kinabuhi.’ Ikasubo, hinuon, daghang karismatik nga mga iglesya ang tin-awng gitukod ingong mga negosyo.

Karong adlawa, kapin sa 6,000 ka relihiyosong mga sekta ang naglihok sa Aprika. Tingali gibati nimo nga kining tanang relihiyon ug mga sekta naghupot sa yawi sa kaluwasan. Apan ang tinuod nga pangutana mao, Unsay pagbati sa Diyos?

Ang Bisan Unsa Bang Relihiyon Makapahimuot sa Diyos?

Tino, ang Maglalalang sa uniberso magatultol kanato niining bahina. (Amos 3:7; Buhat 17:26, 27) Ug daghan kaayo ang pamatuod nga ang diyosnong giya makaplagan diha sa Bibliya. Dili, ang Bibliya dili, ingon sa pagtawag niana sa pipila, basahon sa mga puti. Sa pagkatinuod, walay tawo​—itom o puti​—ang mahimong modawat ug pasidungog tungod niana. “Ang tibuok Kasulatan gidasig sa Diyos,” matud sa 2 Timoteo 3:16. Ang matinud-anon, prangkang mga pagtulon-an sa Bibliya, ang kakaraan na kaayo niini, ang paglungtad niini bisan sa mapintas nga mga pag-atake, ang tukmang mga tagna niini ug ang dili-hitupngang tibuok-yutang pagpanagtag​—kini maoy tin-awng mga pamatuod sa diyosnong pagkasinulat niini.

Unsay gitudlo kanato nianang basahona? Usa ka butang, kana nagtug-an kanato nga aduna lamang ing usa ka “matuod nga Diyos.” (Juan 17:3) Kon mao kana, sa unsang paagi nga adunay kamatuoran sa tanang relihiyon? Dili ba ang relihiyosong mga pundok nagkabangi sa usag usa sa dihang maghisgot bahin sa pagkamao ug kinaiyahan sa Diyos? Ang magsusulat sa Bibliya nga si Santiago naghisgot bahin sa “putli ug tinuod nga relihiyon.” (Santiago 1:27, Today’s English Version) Kon kinahanglang ilhon ang matuod nga relihiyon, kinahanglang maglungtad usab ang bakak o mini nga relihiyon. Kini mosukwahi sa ideya nga ang tanang relihiyon mao lamay lainlaing mga dalan sa pagduol sa Diyos.

Ang mga Sukdanan sa Maglalalang sa Pagsimba

Unsa ang hustong paagi sa pagsimba sa Diyos? Ang Bibliya nagtudlo kanato nga ang tinuod nga pagsimba gipasikad sa tukmang kahibalo. Ang dakong manalagna nga si Jesu-Kristo kas-a nagsulti sa usa ka Samarianhong babaye: “Ikaw nagsimba sa wala nimo hiilhi.” (Juan 4:22) Hayan bang matuod kini kanimo? Natudloan ka ba nga ang Labing Gamhanang Diyos adunay personal nga ngalan, nga Jehova? (Salmo 83:18) Nasayod ka ba kon unsa ang iyang mga katuyoan maylabot sa tawo ug sa yuta? (Mateo 6:9, 10; Efeso 1:9, 10; 3:11) Ang imo bang relihiyon nagtagana kanimo ug tinuod nga paglaom alang sa mas maayong kaugmaon? Ug kon giisip nimo ang imong kaugalingon nga usa ka Kristohanon, makasaysay ka ba sa imong gituohan gikan sa Kasulatan, o kana ba pinasa lamang nga mga kabilin nga wala gayod nimo susiha?

Kon ikaw nakulangan sa tukmang kahibalo, mabatonan nimo kini pinaagi sa pagtuon sa Pulong sa Diyos, ang Bibliya. Gidahom ni Jehova nga Diyos nga ang iyang matuod nga mga magsisimba masinati sa kon unsay gitudlo sa maong Sagradong Basahon. Labaw pa niana, gidahom niya nga sila mopadapat niana sa ilang mga kinabuhi. Ang atong tinamdan kinahanglang sama sa iya sa salmista kinsa miingon: “Ang imong pulong maoy lamparahan sa akong tiil, ug usa ka iwag sa akong alagianan.” (Salmo 119:105) Sa unsang gilapdon nga ang imong relihiyon nagtabang kanimo sa pagkahibalo ug pagsabot sa Bibliya?

Ang laing hinungdanong bahin sa matuod nga pagsimba mao ang pagtuo kang Jesu-Kristo, dili lamang ingong usa ka bantogang manalagna kondili ingong bugtong-inanak nga Anak sa Diyos. Ang Kasulatan tin-awng nagpahayag nga si Jesus mao “ang Pangulong Ahente sa kinabuhi.” (Buhat 3:15; 4:12) Daghan ang nag-angkong nagtuo kang Jesus, apan unsa ka tinuod ang ilang pagtuo? Ang tinuod nga pagtuo kang Kristo nagkinahanglang tumanon ang iyang mga sugo. Ang Diyos mismo nagdasig niini sa dihang siya mipahayag: “Kini mao ang akong Anak, ang pinalangga; pamati kaniya.” (Marcos 9:7) Busa ang tinuod nga mga magsisimba naningkamot nga suod nga magsunod sa mga lakang ni Jesus kutob sa maarangan. (1 Pedro 2:21) Ang usa ka paagi sa pagbuhat nila niana mao ang pagpakig-ambit sa publikong pagsangyawng buluhaton nga iyang gisugdan. (Mateo 4:17; 10:5-7) Ang imo bang relihiyon nagdasig kanimo sa pagbaton ug personal nga bahin niining buluhatona?

Ang gugma maoy usa usab ka kinahanglanon sa matuod nga pagsimba. Si Jehova nga Diyos gibatbat nga mao ang personipikasyon sa gugma, ug gisultihan ni Jesus ang iyang mga sumusunod nga sila mailhan pinaagi sa gugma nga ilang gipakita sa ilang taliwala. (Juan 13:34, 35; 1 Juan 4:8) Kon tagdon ang minilyong tawo karon nga nag-angkong Kristohanon, dili ba ang kalibotan matuhop unta sa gugma? Apan, sa pagkatinuod, ang atong kalibotan maoy usa ka labing walay-gugma nga dapit. Ang mga gubat nagkalas sa minilyong kinabuhi niining sigloha lamang. Ang krimen ug kapintasan nagpadayon sa pag-usbaw. Busa pangutan-a ang imong kaugalingon, ‘Kon ang tanan mahisakop sa akong relihiyon, ang kalibotan ba mahimong labi pang mahigugmaong dapit?’

Sa kataposan, ang Bibliya nagpakita nga ang matuod nga mga magsisimba kinahanglan nga magpabiling bulag sa kalibotan nga wala makaila sa Diyos. Sa dihang gipalahi sa Diyos ang nasod sa Israel ingong magbalantay sa putling pagsimba, siya nagpasidaan sa iyang katawhan nga likayan ang pagpakigsandurot sa daotan nga mga nasod nga naglibot kanila. (Deuteronomio 7:1-6) Sa Juan 17:16, si Kristo Jesus nag-ingon usab bahin sa iyang mga sumusunod: “Sila dili bahin sa kalibotan maingon nga ako dili bahin sa kalibotan.” Ang matuod nga mga magsisimba sa Diyos dili bahin sa politika, imoralidad, hakog nga komersiyalismo, o bisan unsang nagpasipala-sa-Diyos nga mga pilosopiya. (Juan 18:36; 1 Juan 2:15-17) Sila nagtuman sa sugo nga natala sa Roma 12:2: “Hunong na sa pagpahiuyon niining sistemaha sa mga butang.” Mao ba kanay gidasig sa imong relihiyon nga buhaton nimo?

Mabatonan ang Tabang

Oo, ang paagi sa imong pagsimba hinungdanon gayod sa Diyos. Sa iyang panglantaw, aduna lamay usa ka matuod nga relihiyon. (Efeso 4:4-6) Ang atong mubo nga panaghisgot nagtandog sa pipila ka yawing mga punto bahin sa pagtulon-an sa Bibliya. Nganong dili maningkamot nga mokat-on ug dugang?

Bisan unsa pang relihiyon ang imong namat-an, ang mga Saksi ni Jehova makatabang kanimo niining bahina. Sila nailhan sa tibuok yuta tungod sa ilang kaylap nga buluhaton nga edukasyon sa Bibliya. Gibati nilang obligasyon ang pagtabang sa katawhan sa tanang rasa ug relihiyosong mga kagikan nga makabaton ug mas lalom nga pagsabot sa Bibliya. (Proverbio 2:1-6) Sila nagpatik sa maayong-pagkadukiduki nga literatura sa Bibliya.a Sa pagkatinuod, sila moduaw pa gani sa imong balay nga libre aron sa pagtudlo kanimo sa Bibliya sa personal nga paagi. Minilyong tawo sa tibuok kalibotan karon ang nagapahimulos niining programaha sa edukasyon sa Bibliya. Nganong dili nimo mismo himoon kini? Sa pagkatinuod, hinungdanon nga imong buhaton kini tungod kay hinungdanon gayod kon sa unsang paagi ikaw nagasimba.

[Footnote]

[Hulagway sa panid 5]

Ang mga misyonaryo sa Kakristiyanohan sayop nga naghawas sa matuod nga Kristiyanidad

[Hulagway sa panid 5]

Daghang karismatik nga mga iglesya maoy mga negosyo

[Hulagway sa panid 6]

Ang pagtuo kang Jesus maoy hinungdanong bahin sa matuod nga pagsimba

[Hulagway sa panid 7]

Ang mga Saksi ni Jehova nagtabang sa minilyon sa pagbaton ug tukmang kahibalo pinaagi sa libreng mga pagtuon sa Bibliya diha sa balay