Pagsangyaw sa Yuta nga Daghag Kalainan

MGA kangaroo, koala, wombat, ug platypus, Ayers Rock ug Great Barrier Reef​—mao kining mga ngalana nga mosantop sa hunahuna sa dihang ang mga tawo maghunahuna bahin sa Australia. Apan bisag katingad-an kini, ang kadaghanan sa mga Australiano tingali wala pa gayod makaduaw sa Ayers Rock o sa Great Barrier Reef o makakitag koala, wombat, o platypus gawas sa parke sa mga hayop. Tungod kini kay ang 85 porsiento sa populasyon sa nasod nga 17.3 ka milyon maoy mga dakbayanon, nga nagpuyo sa lima ka dagkong dakbayan sa daplin sa baybayon.

Gikan sa kadaplinan sa baybayon ug mobiyaheg mga 200 ka kilometros o kapin pa painteryor, makaabot ka sa sinugdanan sa gibantog nga hilit nga dapit sa kontinente. Ang dagway sa yuta nagakausab gikan sa labong tropikal nga lasang ug tabunok nga umahan ngadto sa init, umaw, hawan nga yuta, diin mga balili lamang ug baga nga sagbot ang mabuhi. Hinuon, adunay kinabuhi ang hilit nga mga dapit. Ang dagkong mga ranso sa karnero ug baka, mga pastohan sumala sa pagtawag niana, nagkobreg gatosgatos ka kilometro kuwadrado. Sa interyor pa ang kainit sa disyerto naglagiting, diin usahay may mga tawong mamatay kon dili mohimog nagakaigong mga pagpangandam.

Ang Maayong Balita Nagalambo

Mao kini ang kahimtang nga ginawali ang maayong balita sa Gingharian sa Diyos niining yuta sa ubos sa kalibotan. Linibo tuig-tuig ang nagasanong sa saad ni Jehova sa usa ka matarong bag-ong kalibotan. Sa milabay nga tuig sa pag-alagad, ang gidaghanon sa mga magmamantala sa Gingharian miabot sa kinatas-ang ihap nga kapin sa 57,000, hapit doble sa milabayng napulo ka tuig. Samtang ang kadaghanan sa mga magmamantala, sama sa kinadak-ang bahin sa populasyon, nagpuyo sa mga dakbayan sa kadaplinan sa dagat, nagalambo usab ang maayong balita sa interyor.

Aron makakuhag ideya kon sama sa unsa ang pagwali niining halapad nga yuta nga daghag kalainan, mokuyog kita sa usa sa atong lima ka magtatan-aw sa distrito ug sa iyang asawa samtang sila nagaduaw sa pila ka kongregasyon sa halayong hilit nga mga dapit. Ang ilang biyahe mokobre sa estado sa Kasadpang Australia, katunga sa estado sa Queensland, ug ang Northern Territory, usa ka luna nga mokobre ug kapin sa 4.7 ka milyong kilometro kuwadrado. Kana maoy halos sa gidak-on sa Uropa, walay labot sa kanhing Unyon Sobyet.

Ang atong biyahe magsugod sa Perth, ang kaulohang siyudad sa Kasadpang Australia. Niining moderno kaayong siyudad sa 1.2 ka milyong tawo, karon aduna nay 49 ka kongregasyon sa mga Saksi ni Jehova. Dugang pa sa Ingles, adunay Grego, Italyano, Portuges, ug Espanyol nga mga kongregasyon, ingon man sa gagmayng grupo sa ubang mga pinulongan. Adunay kongregasyon usab nga gilangkoban lamang sa Aborigines nga mga igsoong lalaki ug babaye, nga nagatumong sa ilang paningkamot sa pagwali sa tunga niining lumad nga mga tawo sa kontinente. Daghan niining simpleng mga tawo ang nagasanong karon sa mensahe sa Gingharian. Apan sama sa unsa ang mga butang sa gawas sa dagkong mga siyudad?

Gikan sa Perth mobiyahe kitag 1,800 ka kilometros paamihanan ngadto sa Port Hedland, diin pagahimoon ang sirkitong asembliya. Ang kadaghanan sa 289 nga mitambong mibiyaheg mga 200-700 ka kilometros aron makaabot dinhi. Gikan pa sila sa hilit nga mga dapit diin ang kinaduolang kongregasyon maoy mga 250 ka kilometros ang gilay-on latas sa libaongong mga dalan nga may hait nga mga bato nga sagad motusok sa mga ligid sa sakyanan. Tulo ka kongregasyon niining dapita bag-o pang nakatukod ug mga Kingdom Hall, nga gigamit ang dinaliang paagi sa pagpanukod.

Dinaliang Pagkatukod nga mga Tigomanan sa Hilit nga mga Dapit

Pagkadako sa kalainan sa pagpanukod ug Kingdom Hall niining mga dapita ug sa pagtukod sa mga siyudad ug sa mas dagkong mga lungsod! Ang kadaghanan sa materyales sa pagtukod kinahanglang hakoton sa trak gikan sa Perth, nga 1,600 kilometros pahabagatan. Gatosan ka igsoong lalaki ug babaye ug kapin pa ang mobiyahe niining distansiyaha sa tinudlong hinapos-sa-semana sa pagpangadto ug sa pagtukod sa Kingdom Hall diha sa 40-45 ka grado Sentigrado nga kainit. Ang paghugop ngadto niining gagmay hilit nga mga komunidad maoy usa na ka dakong pamatuod. Sa dihang usa ka Kingdom Hall ang gitukod sa Tom Price, usa ka gamay nga lungsod sa minahan sa puthaw, ang atubangang panid sa lokal nga mantalaan mipahayag: “Malipayong pag-abot sa boluntaryong mga mamumuo ug mga katabang nga motrabaho sa tulo ka adlaw ‘dinaliang pagtukod’ ug Kingdom Hall sa mga Saksi ni Jehova sa Tom Price.”

Halos ang tanan sa lungsod maikagon sa pagtabang. Inay sa naandang $11,000 nga kantidad sa paghakot sa 50 ka toneladang materyales, usa ka manggihatagong tag-iya sa trak misukot sa mga igsoon alang sa gasolina lamang. Ang lokal nga mga kontratista sa pagpintal midonar ug 100 ka litrong pintal. Ang mga kontratista sa pagbuldos nagpahulam sa makinarya, ug gipagamit sa kompaniya sa mina ang crane nga walay bayad. Ang pagpangitag sak-anan alang sa 300 ka bisita nakahatag suliran, apan ang kooperasyon sa mga lungsoranon maoy talagsaon. Adunay pipila nga mitelepono ug nagpahulam ug mga katre. Usa ka lalaki mitelepono sa pagpahibalo nga may lakaw siya sa hinapos-sa-semana apan iyang biyaan nga bukas ang pultahan sa luyo. Siya miingon: “Magamit ninyo ang balay hangtod mahuman ang proyekto.”

Dihay nahitabong kataw-anan sa dihang ang pila ka igsoon gihatagan ug adres aron kuhaon ang usa ka treyler nga gipanag-iya sa lokal nga sirkito. Sila nalibog sa pagkakita sa paskin sa pultahan nga nagaingon, “Dili Modawat ug Relihiyosong mga Bisita.” Apan atua didto nagbarog ang treyler. Busa ilang giingnan ang ginang sa balay nga ilang kuhaon ang treyler, nga puno sa basura. Samtang ila kining gihinloan, dihadiha ilang naamgohan nga kini dili mao ang treyler sa sirkito! Sa dihang miabot sa balay ang tag-iya sa treyler, giingnan siya sa iyang asawa nga gikuha sa mga Saksi ni Jehova ang iyang treyler. Sa wala madugay namalik ang mga igsoon dala ang wala nay sulod nga treyler, nagpatin-aw sa sayop. Usa ka maayong kolokabildo ang misunod, ug kining kanhing mga magsusupak daghan ug gipangutana bahin kanamo ug sa among buluhaton. Sila karon maikagon sa pag-adto ug sa pagtan-aw sa bag-ong Kingdom Hall.

Ang pagwali sa maayong balita niining dapita nagkinahanglan ug pag-antos. Una, anaa ang lagyo kaayong mga distansiya. Usa ka payunir nga igsoong babaye ug iyang bana sa regular mobiyaheg kapin sa 350 ka kilometros idabuwelta agi sa libaongon, abogon nga mga dalan, gikan sa Port Hedland ngadto sa Marble Bar, aron sa pagbalik-duaw ug sa pagdumalag mga pagtuon sa Bibliya. Ang Marble Bar maoy usa sa labing init nga dapit sa Australia, ang temperatura kasagarang moabot ug kapin sa 50 ka grado Sentigrado gikan sa Oktubre hangtod sa Marso.

Paingon sa “Kinatumyan sa Amihanan”

Ang Darwin, nga 2,500 ka kilometros paamihanan pa, mao ang sunod nga lungsod alang sa sirkitong asembliya. Pahimuslan sa magtatan-aw sa distrito ug sa iyang asawa ang hataas nga oras sa pagmaneho alang sa personal nga pagtuon. Una ilang basahon ug hisgotan ang teksto sa matag adlaw. Unya maminaw sila sa pagbasa sa Bibliya sa teyp. Sa ilang pagpulipulig maneho, magpulipuli usab sila sa pagbasa sa mga artikulo sa Ang Bantayanang Torre ug Pagmata!

Ang paskin sa dalan nagapasidaan kanila nga magbantay sa mga “roadtrain.” Kadto maoy hataas dagkong mga trak nga nagaguyod ug tulo o upat ka treyler ug may gitas-ong mokabat ug 55 ka metros. Busa gikinahanglan ang dako nga distansiya kon ubirtikan kini. Kini gigamit sa paghakot sa mga baka ug sa ubang produkto ngadto sa hilit nga mga lungsod.

Kanunayng init ang temperatura ug ang kabanikanhan permanenteng uga. Ang umaw nga yuta masaypan nga usa ka halapad nga menteryo tungod kay ang yuta puno man sa maayong pagkatupong nga mga bungtod sa hulmigas. Kining mga bungtora lainlain ug kolor, depende sa yuta nga gigamit sa hulmigas, ug kini may gitas-ong mga tulo ngadto sa otso piye. Unya, sa dihang mitabok ang atong mga biyahedor sa Victoria River, ilang namatikdan ang daghang minantinel nga pagkahimong mga paskin. “Delikado: Gidili ang Paglangoy. Adunay mga Buayang Mokaog-Tawo Niining mga Subaa!” matud sa usa ka paskin. Sa maalamon, midesider sila sa pagpangitag laing paagi aron makaligo ug marepresko!

Sa kataposan, nakaabot sila sa tumoy sa amihanan sa Australia, nga sagad gitawag “Kinatumyan.” Sa Darwin, ang kaulohang siyudad sa Northern Territory, adunay duha ka dagkong kongregasyon sa mga Saksi ni Jehova. Ang nagkalainlaing kultura sa Darwin mamatikdan dayon sa dihang motambong ug sirkitong asembliya. Himamata ang 30-anyos nga si Charles, nga gikan sa gigusbat-sa-gubat nga East Timor sa Indonesia. Gimatuto siya sa iyang ginikanang Intsik sa pagsimba sa katigulangan. Siya usab nalangkit pag-ayo sa martial arts. Dili sayon ang pag-undang tungod kay lig-ong nalangkit kini sa espiritismo. Apan, kay nasilsil sa hunahuna ang saad ni Jesus nga “ang kamatuoran mohatag kaninyo ug kagawasan,” siya mibulag niining paagiha sa pagkinabuhi. (Juan 8:32) “Karon,” matud niya, “hinlo ang akong tanlag sa atubangan ni Jehova, ug karon usa ako ka ministeryal nga alagad. Ang akong tumong mao ang pagtambong sa Tunghaan sa Ministeryal nga Pagbansay.”

Sunod, himamata si Beverly gikan sa Papua New Guinea. “Sa sinugdan wala kaayo akoy pagsalig sa pagsangyaw sa mga puti,” matud pa ni Beverly, “tungod kay ang Ingles ikaduha ra nako nga pinulongan ug ang pila ka pulong, uban sa Australianhon nga tuno, nagpahimo niini nga lisod nakong masabtan. Apan nahinumdom nga ang Bibliya nagsulti kanato sa pagsalig kang Jehova ug sulayan ug tan-awon nga siya maayo, misugod ako sa bug-os-panahong pag-alagad ingong payunir niadtong Enero 1991. Ang akong unang estudyante sa Bibliya usa na karon ka payunir. Duha sa iyang mga anak babaye midawat usab sa kamatuoran, ug ang usa kanila nagpayunir, kauban sa iyang bana.”

Una pa mogikan sa Darwin, modaklit kitag biyahe ug 250 ka kilometros pasidlakan ngadto sa Kakadu National Park, nga ilado-kaayo sa pagkadaghang langgam niini. Dinhi atong mahibalag si Debbie, ang nag-inusarang magwawali sa maayong balita sa tibuok nga dapit. Gipangutana namo siya kon giunsa niya pagtigayon aron makapabiling malig-on sa espirituwal bisan nag-inusara. Siya mitubag: “Una, pinaagi sa pag-ampo. . . . Ug ako nakabaton ug paglipay gikan sa mga teksto sama sa Isaias 41:10, nga nagaingon: ‘Ayaw kahadlok, kay ako magauban kanimo. Ayaw kabalaka, kay ako mao ang imong Diyos. Palig-onon ko ikaw. Tabangan ko gayod ikaw. Hawiran ko ikaw pag-ayo sa akong tuong kamot sa pagkamatarong.’”

Sa Jilkmingan, 450 ka kilometros sa habagatan sa Darwin, nahibalag namo ang usa ka gamayng grupo sa Aborigines. Sa daghang katuigan kining komunidad sa Aborigines giisip ingong komunidad sa mga Saksi ni Jehova tungod kay daghan kaayo ang regular nga tigtambongan sa mga kombensiyon ug sa mga asembliya, bisan tuod walay mausa kanila ang nabawtismohan. Ang komunidad naila sa kahinlo niini. Makalilipay, ang pipila karon mibarog na alang sa kamatuoran ug nabawtismohan. Sila maoy una sa mga taga-banikang Aborigines nga naghimo niana. Gikinahanglan ang tinuod nga kaisog ug pagsalig sa balaang espiritu ni Jehova aron kining simpleng mga tawo makabulag gikan sa kasiglohan nang mga tradisyon ug espiritistikong mga buhat sa ilang katribo.

Ngadto sa Alice Springs ug Paggawas sa Hilit nga Dapit

Karon panahon na sa paggawas sa “Kinatumyan” ug sa pagbiyaheg 1,600 ka kilometros ngadto sa Alice Springs, sa “Pulang Sentro” sa kontinente, duol sa gibantog nga Ayers Rock. Dinhi niining air-conditioned nga Kingdom Hall, adunay komportableng lingkoranan ang gitagana alang sa asembliya, nga may 130 o kapin pang tumatambong gikan sa duha ka kongregasyon niining dapita. Sa makausa pa, atong makita ang malipayon nga mga Polynesian, Uropanhon, ug Aborigines nga nagtipon sa Kristohanong panag-ubanay.

Sa kataposan biyaan nato ang Alice Springs ug sugdan ang ulahing bahin sa atong biyahe uban sa atong nagapanaw nga distritong magtatan-aw ug ang iyang asawa. Kining biyahea mokabat ug duolan sa 2,000 ka kilometros tabok sa kontinente, paamihanan ug pasidlakan. Samtang kita nagabiyahe, manamilit kita sa hilit nga dapit, tungod kay ngadtongadto makaabot kita sa lunhawng tropikal nga lasang sa Queensland. Dinhi, sa baybayon sa amihanang Queensland​—ang yuta sa Great Barrier Reef​—adunay daghang kongregasyon nga may taas nga proporsiyon sa mga Saksi maylabot sa populasyon.

Dili pa nato matapos ang pagbiyahe, hinunoa, sa dili pa motambong ug usa pa ka sirkitong asembliya. Mosakay ug ayroplano sa Cairns​—ang tropikanhong lungsod sa Queensland sa gibantog nga Barrier Reef​—atong biyaan ang kontinente sa Australia alang sa usa ka mubong paghapit sa amihanang tumoy sa Cape York Peninsula, tabok sa Torres Strait, ngadto sa Thursday Island. Adunay gamayng kongregasyon dinhi sa 23 lamang ka magmamantala. Pagkamakapalipay ang pagtan-aw sa 63 ka tumatambong sa atong kataposang asembliya niining biyahea!

Naglaom kami nga nalingaw kamo niining daklit nga pagtan-aw sa buluhatong pagwali sa Gingharian nga ginahimo niining yuta nga daghag kalainan. Tingali sa usa ka adlaw makaduaw ka ra unya kanamo niining madanihong yuta sa ubos sa kalibotan ug sa paghibalag sa personal sa mga igsoong lalaki ug babaye nga matinumanong nagatuman sa ilang ministeryo sa ilang talagsaong asaynment.

[Mapa/​Hulagway sa panid 23]

(Alang sa aktuwal nga pagkahan-ay, tan-awa ang publikasyon)

Port Hedland

Canberra

Tom Price

Marble Bar

Newman

Darwin

Katherine

Alice Springs

Ayers Rock

Thursday Island

Cairns

Adelaide

Melbourne

Hobart

Sydney

Brisbane

Perth

[Hulagway sa panid 24]

Perth, kaulohan sa Kasadpang Australia

[Hulagway sa panid 25]

Pagpamatuod sa kadalanan nagapatunghag maayong mga bunga