Pagkaplag sa Matuod nga Bahandi sa Hong Kong

ANG Hong Kong maoy usa ka dapit nga kakitaan ug daghang kuwarta sa mubo nga panahon​—kon ang tanang sirkumstansiya pabor kanimo. Sa kataposang 40 ka tuig o kapin pa, ang maong kolonya sa Britanya miuswag gikan sa wala kaayoy kisaw nga dunggoanan ngadto sa usa ka gahom sa ekonomiya nga hinungdanon kaayo dili lamang sa Habagatang-kasadpan sa Asia kondili usab diha sa natad sa negosyo sa tibuok kalibotan.

Ang ubos nga buluhisan nagadani sa langyawng mga negosyante ug nagahatag pangdani sa kugihang mga trabahante nga makita diha sa unom ka milyong mga molupyo sa Hong Kong. Paborable, usab, ang lugar niini ingong ganghaan tali sa habagatang Tsina ug sa rehiyon sa Asia-Pasipiko ug sa halayo pa. Uban sa modernong transportasyon ug sa mga sistema sa komunikasyon ug sa ugmad na kaayong sistema sa pinakyaw ug binuok nga pagpamaligya, ang Hong Kong organisado sa pagtagana dayon sa mga panginahanglan sa internasyonal nga pamatigayon.

Ang kalamposan sa ekonomiya nakahimo sa Hong Kong nga usa sa labing taas ug mga sukdanan sa pagkinabuhi sa kalibotan. Apan, ang tanan bang materyal nga kadagaya nakahatag ug katagbawan ug dayong kalipay sa mga molupyo sa Hong Kong? Wala, apan ang pipila nangita ug nakakaplag ug bahandi nga mas maayog matang.

Ilang Nakaplagan ang Espirituwal nga Bahandi

Taliwala niadtong nakakaplag ug bililhong espirituwal nga bahandi mao ang natawo-sa-Hong Kong nga si Alfred. Siya may malamposong karera ingong direktor sa usa ka internasyonal nga negosyo nga daghag kasosyong mga kompaniya nga adunay hedkuwarter sa Britanya. Sama sa daghan pang uban sa Hong Kong, ang iyang pangandoy sa kinabuhi mao ang pagtigom ug daghang salapi, makabaton ug iyang kaugalingong balay, makakaon ug maayo, ug magkinabuhi sa haruhay nga kinabuhi. Tungod sa iyang posisyon ug kita, daw nakab-ot niya kanang tanan. Apan siya ba malipayon? “Akong nakat-on gikan sa kasinatian nga ang salapi tinuod nga may mga limitasyon,” mahay pa ni Alfred. Nabalaka siya kanunay kon hangtod kanus-a mahurot ang iyang mga natigom kon pananglit siya mawad-ag trabaho. Sa dihang migahin siyag daghang panahon sa iyang trabaho, misugod pagtungha ang mga problema sa panimalay. Ang iyang asawa, si Emily, nasubo kaayo sa dihang kalit nga namatay ang ilang anak nga lalaki. “Buot kong masayod kon hain na siya karon aron matabangan ko siya,” siya miingon. Sanglit wala siyay mahimo, gibati niya ang dakong kaguol.

Si Justina namatyag amahan sa bata pa siya. Apan pinaagi sa iyang kaugalingong paningkamot siya nakagraduwar sa iladong Hong Kong University. Kini misangpot ug trabaho diha sa kagamhanan. Sa Cantonese kini gitawag gum fan woon, usa ka bulawang panaksan​—kasegurohan sa trabaho ug dakog suweldo. Apan, si Justina dili malipayon ni may katagbawan. Siya nahibulong kanunay kon unsay katuyoan sa kinabuhi ug kaugmaon sa umaabot. Ang iyang bana, si Francis, mibati usab nga walay katuyoan ang kinabuhi. Gibati niya nga samag usa ka gamayng piyesa sa usa ka higanting makina, walay pulos, nga nalaang sa dili matapos nga rotina.

Unya anaa si Ricky, ang manedyer sa usa ka negosyo. Bisag dakog kita, siya misugod sa pagkakita sa laing bahin sa kinabuhi​—grabeng kompetisyon sa kaubang mga trabahante ug mga problema sa iyang kaminyoon. Ang salapi wala makatabang kaniya sa pagsulbad niining mga problemaha. Alang sa iyang asawa, si Wendy, ang usa ka tinamod nga karera, daghang kuwarta, ug pagpuyo diha sa malig-on sa politika nga katilingban nagkahulogan ug kasegurohan. Apan hangtod kanus-a molungtad ang iyang daw seguradong kinabuhi? Natugaw siya niana tungod kay ang kamatuoran sa kamatayon mipabati kaniya nga ang iyang kinabuhi walay kahulogan ug walay katuyoan.

Si David adunay iyang kaugalingong sugilanon nga iasoy. Ang iyang edukasyon sa unibersidad naghatag kaniya ug maayong trabaho ug kasegurohan sa ekonomiya, apan wala siyay nakaplagang katagbawan. Ngano? Siya natuhop sa ebolusyon ug pilosopiya, ug nagtuo siya nga ang kinabuhi kutob ra niining kahimtanga karon. Gibati ni David nga wala siyay palaaboton, ug ang tanan niyang materyal nga bahandi wala mopugong kaniya sa pagbating walay mahimo.

Bisag lainlain ug kagikan kining mga tawhana, sila may butang nga gikausahan. Silang tanan nakakab-ot sa ilang gituohan nga mohatag kalipay ug katagbawan sa kinabuhi. Bisan pa, sa dihang nakab-ot nila ang punto diin sila nagtuo nga matuman na ang ilang mga damgo, haw-ang ang ilang mga kinabuhi.

Ang kahimtang ni Alfred, Justina, ug sa uban nga bag-o pang gihisgotan sama gayod sa kinabuhi niadtong adunahang tawo sa sambingay ni Jesus. Siya ‘nagtigom ug bahandi alang sa iyang kaugalingon apan dili bahandianon ngadto sa Diyos.’ (Lucas 12:21) Apan, makalilipay, sila nakakaplag ug butang nga mas maayo​—usa ka kinabuhi nga tugob sa matuod nga bahandi. Kadtong kinsa nangandoy sa matuod nga kalipay ug katagbawan kinahanglang “magbutang sa ilang paglaom, dili diha sa walay kasegurohan nga bahandi, kondili diha sa Diyos, nga nagatagana sa tanang mga butang nga madagayaon gayod alang sa atong kalipay.” (1 Timoteo 6:17) Oo, ang pagkahibalo sa matuod nga Diyos, si Jehova, ug pagbutang sa ilang pagsalig diha kaniya nakahimog kalainan diha sa kinabuhi sa matag usa niining mga indibiduwala. Atong tan-awon kon sa unsang paagi kining tanan mitungha.

Si Alfred ug Emily nagun-ob dihang sa kalit namatay ang ilang anak nga lalaki, ug ang tanan nilang materyal nga mga butang wala makahupay sa ilang kasakit. Misimba sila apan sa gihapon gibati nila ang kahaw-ang ug kawalay katagbawan. Unya usa sa mga Saksi ni Jehova miduaw sa ilang pultahan ug nangutana: “Unsay paglaom sa tawo alang sa umaabot?” Mitubag si Alfred sumala sa iyang nadunggan sa simbahan bahin sa langit ug impiyerno. Hinunoa, gikan sa Bibliya siya gipakitaan nga ang patay “walay kahibalo sa bisan unsa” ug nga kadtong anaa sa panumdoman sa Diyos anaa sa komon nga lubnganan sa katawhan nga nagapaabot ug pagkabanhaw. (Ecclesiastes 9:5, 10; Juan 5:28, 29) Kini rasonable ug makataronganong pamation alang kang Alfred. Karon siya nakaamgo nga ang iyang anak wala mag-antos sa laing dapit apan natulog lamang diha sa kamatayon, nga may paglaom nga tingali makauban pag-usab sa iyang pamilya pinaagi sa pagkabanhaw. Pagkadakong kalipay ug kahupayan! Sa ulahi si Alfred ug iyang asawa midawat sa pagtuon sa Bibliya sa balay ug misugod sa paghupot nga malig-on sa matuod nga bahandi nga gitanyag sa Bibliya.

Si Justina nawad-ag kadasig sa dihang napakyas siya sa pagkakita diha sa kaubanan niya sa trabaho ug usa ka andam nga espiritu sa pagtabang sa pag-atiman sa mga tawo. Usa ka debotadong Katoliko, nawad-an siya ug kadasig dihang nakita niya nga nanabako ug tigbayle ang pari, sama sa ubang mga lalaki. Unya iyang nahimamat ang mga Saksi ni Jehova ug misugod sa pagkabatog makatagbaw nga mga tubag sa Kasulatan sa daghang pangutana. Walay gihatag kaniya ang pari gawas sa iyang kaugalingong opinyon, ug siya wala makaabli ug Bibliya sulod sa 16 ka tuig, bisag siya usa ka regular nga tigsimba ug nahimong mamumuo nga layko sa 10 ka tuig.

Samtang ang mga Saksi nagtuon sa Bibliya uban kang Justina ug sa iyang bana, si Francis, siya nakadayeg sa ilang tibuok yutang panaghiusa sa pagtuo ug buhat. Nakombinser si Francis nga tinuod ang Diyos. Human nahisgotan ang mga butang, ang buhi, matuod nga Diyos lamang ang may impluwensiya ibabaw sa internasyonal nga grupo sa katawhan. Pagkadako sa kalipay niining magtiayona nga ilang nakaplagan ang matuod nga bahandi!

Si Ricky ug Wendy nasayod nga kinahanglang maghimo gayod silag lakang sa dihang nakita nila nga sila anam-anam nga naputos sa mabug-at nga personal nga mga problema. Sanglit silang duha nakapakigsulti na sa mga Saksi ni Jehova sa miagi, tagsatagsang nangita silag paagi sa pagpangita kanila pag-usab. Pinaagi sa masibotong paningkamot, nakaplagan ni Ricky ug Wendy dili lamang ang mapuslanong mga solusyon sa ilang mga problema kondili usab ang matuod nga bahandi sa personal nga relasyon uban “sa malipayong Diyos,” si Jehova.​—1 Timoteo 1:11.

Ang kinabuhi ni David nabag-o usab sa dihang ang mga Saksi ni Jehova miduaw kaniya. Nagtinguha lamang sa pagyagyag sa ilang mga sayop, siya misugot nga sila mobalik. Sa ulahi, hinunoa, nabuksan ang iyang mga mata, kay siya misugod sa pagkakita nga ang Bibliya maoy tukma sa siyensiya, sa kasaysayan, ug uban pa. Kining tanan nakatabang kang David sa paglantaw sa Bibliya ingong usa ka basahon sa kamatuoran nga naghatag kaniya ug tinuod nga katuyoan sa kinabuhi. Pagkamalipayon ug pagkatugob nga kausaban alang kaniya!

Nagatabang sa Daghan Pang Uban sa Pagkaplag sa Matuod nga Bahandi

Diha sa dakong populasyon sa Hong Kong, si Alfred, Emily, Justina, Francis, ug ang uban nga gihisgotan dinhi maoy pipila lamang niadtong nakakaplag sa matuod nga bahandi sa kamatuoran sa Bibliya ug pagtuo diha kang Jehova nga Diyos. Sa 1992 mga 2,600 ka mga Saksi ni Jehova ang migugol sa total nga gidaghanon nga mga 900,000 ka oras sa pagduaw sa mga tawo sa Hong Kong ug nagadumalag kapin sa 3,800 ka pagtuon sa Bibliya sa balay uban kanila. Bisan pa, tulin ang lakat sa kinabuhi sa Hong Kong, ug ang mga tawo okupado. Busa, dugang pa sa pagduaw sa balay ug balay, ang mga magmamantala sa Gingharian dakog kalamposan sa pagsangyaw sa kadalanan. Ginakontak usab nila ang mga tawo diha sa mga trabahoan pinaagi sa pagduaw sa mga tawong nagtrabaho sa opisina, tigbantay sa tindahan, mag-uuma, ug mga tawo nga namauli gikan sa pagpanagat sa South China Sea.

Tinuod nga ikaingon nga “dako ang alanihon, apan diyutay ra ang mangangani” sa Hong Kong. (Mateo 9:37) Sa pagkakaron, ang proporsiyon sa mga Saksi sa populasyon maoy 1 sa matag 2,300. Nakasabot sa pagkadinalian sa buluhatong pagpangani, halos 600 sa 2,600 ka magmamantala sa Gingharian maoy mga payunir, o bug-os panahong mga magwawali sa maayong balita. Ang mga Saksi ni Jehova sa Hong Kong, sama sa ubang dapit, nakaamgo nga ‘ang panalangin ni Jehova ang makapadato.’ (Proverbio 10:22) Busa, sila nagkugi pag-ayo sa pagtabang sa daghan pang katawhan diha nianang mauswagong komunidad sa pagkaplag sa matuod nga bahandi.

[Mapa sa panid 23]

(Alang sa aktuwal nga pagkahan-ay, tan-awa ang publikasyon)

SOUTH CHINA SEA

CHINA

Hong Kong

Kilometros

Milya

15

15