Gilabanan sa Korte Suprema sa Nigeria ang Kagawasan sa Relihiyon
GIKAWAT sa mga tagabalangay ang ani sa usa ka mag-uuma. Mihugop ang uban diha sa balay sa kantero ug gikuha ang iyang mga himan. Gidid-an sa uban ang usa ka babaye sa pagpalit ug pagbaligya. Nganong may ingon niana nga pag-abuso? Tungod kay ang mga biktima, tanan maoy mga Saksi ni Jehova, nga dili makigbahin sa asosasyon sa mga katalirongan. ‘Sa unsa?’ ikaw tingali mangutana.
Ang asosasyon sa mga katalirongan maoy mga tawo, kasagaran mga lalaki, nga gipanganak halos sa samang panahon ug diha sa samang balangay. Ang asosasyon sa mga katalirongan komun sa silangang Nigeria. Sila magpasiugdag proyekto sa komunidad, apan sila nagapakigbahin usab sa idolatrosong pagsimba ug nagahimog mga espiritistikanhong mga seremonyas aron ipakita nga ang mga membro may edad na. Sanglit gihukman sa Bibliya kining mga batasana alang sa matuod nga mga Kristohanon, ang mga Saksi ni Jehova wala makiglabot sa maong mga grupo.—1 Corinto 10:20, 21; 1 Juan 5:21.
Si Samuel Okogbue nagtrabaho ingong sastre sa Aba, Nigeria. Sayo sa 1978, gisuktan siya sa mga membro sa Umunkalu nga Asosasyon sa mga Katalirongan sa Alayi sa pagbayad ug “buhis” sa pagtabang sa pagtukod sa health center. Kay matuod nga Kristohanon, si Samuel naningkamot sa pagtabang sa ubang mga tawo, apan tungod sa iyang konsensiya midumili siya nga malangkit sa asosasyon sa mga katalirongan. Sa pagka Abril 22 niadtong tuiga, gilungkab sa unom ka membro sa grupo ang iyang tahianan ug gikuha ang iyang makina sa panahi, diin sila miingon nga ilang hawiran hangtod siya makabayad. Si Samuel miprotesta nga siya dili obligado sa pagbayad ug bisan unsa sanglit dili man siya membro sa ilang asosasyon. Kay dili man niya mabawi ang iyang makina, gisang-at kini ni Samuel sa korte.
Lainlain nga Korte
Diha sa Korte sa Labawng Mahistrado, ang asosasyon sa mga katalirongan nangatarongan nga tungod sa iyang edad, si Samuel awtomatiko nga nahimong usa sa ilang mga membro, nga may obligasyon sa pagbayad sa bisan unsang buhis nga ilang ipahamtang. Dugang pa, sumala sa lumad nga kostumbre nga kon ang usa ka membro dili makabayad ug buhis, ang iyang propiedad embargohon hangtod nga siya makabayad.
Ang korte wala mouyon. Sa Pebrero 28, 1980, kini mihukom nga si Samuel dili mapugos sa pagkahimong membro sa asosasyon sa mga katalirongan. Ang Labawng Mahistrado miingon: “Ang kostumbre nga naghikaw sa usa ka lungsoranon sa libre nga pagpilig asosasyon nahisupak sa S[eksiyon] 37 sa Batakang Balaod sa Pederal nga Republika sa Nigeria ug busa dili mapugos sa Balaod.”
Ang asosasyon sa mga katalirongan miapelar niining hukoma sa Hataas nga Korte ug nakadaog. Didto gimandoan sa huwes si Samuel sa pagbayad ug buhis, miingon nga kadto sa yano maoy usa ka paagi lamang sa pag-amot sa kauswagan sa iyang lumad nga komunidad.
Unya si Samuel miapelar sa nakita niya nga inhustisya. Gibalit-ad sa Korte sa Apelasyon ang desisyon sa Hataas nga Korte, mihukom pabor kang Samuel. Dili magpapildi, gisang-at sa asosasyon sa mga katalirongan ang kaso ngadto sa Korte Suprema sa Nigeria.
Kasamtangan, ang mga membro sa asosasyon sa mga katalirongan nagkapuliki sa balangay ni Samuel. Nangatarongan nga supak ang mga Saksi sa tanang mga proyekto sa komunidad, ilang gikombinsir ang hepe sa balangay nga idili ang kalihokan sa mga Saksi ni Jehova sa ilang lugar. Gipahayag sa opisyal nga tigpahibalo nga ang si bisan kinsa nga makiglabot sa mga Saksi ni Jehova pamultahon. Ang mga Saksi sa kasikbit nga mga lungsod nangilabot ug gipatin-aw kini sa mga tigulang sa balangay. Ilang gipatin-aw nga ang katawhan sa Diyos dili gayod supak sa kauswagan sa komunidad. Gani, gipakita ni Samuel ang mga resibo diha sa korte nga nagpamatuod nga siya nakaamot sa mga proyekto sa komunidad nga dili pinasiugda sa asosasyon sa mga katalirongan. Unya giusab sa mga tigulang sa balangay ang ilang desisyon sa pagsalikway sa mga Saksi.
Kagawasan sa Relihiyon Nagmadaogon
Sa Oktubre 21, 1991, lima ka huwes sa Korte Suprema sa Nigeria nagkahiusang mihukom pabor kang Samuel. Gipatin-aw ang gipakanaog nga pangunang desisyon ni Huwes Paul Nwokedi, si Huwes Abubakar Wali miingon: “Dili ang levy [gipabayad nga buhis] ang gidumilian sa pagbayad sa akusado nga si [Samuel] kondili ang pagkahimong membro sa bisan unsang sosyedad, klab o asosasyon sa mga katalirongan, kay kini supak sa iyang relihiyosong pagtuo, kay siya membro man sa [mga] saksi ni Jehova.”
Ang huwes nagpadayon: “Ang 1963 nga Batakang Balaod, sa seksiyon 24(1) nagagarantiya sa tanang mga lungsoranon sa Nigeria sa kagawasan sa tanlag, hunahuna, ug relihiyon. Ang akusado may katungod sa pagtuman sa doktrina sa iyang relihiyon, hunahuna ug tanlag nga nagdili kaniya sa pag-apil sa asosasyon sa mga Katalirongan. Ang bisan unsang kostumbre nga nagpahamtang ug laing paagi maoy supak sa Batakang Balaod ug busa nulo.”
Sa laktod, ang korte midesisyon nga walay tawo subay sa balaod ang mapugos sa pag-entra sa asosasyon sa mga katalirongan bisan pag ang pagpamembro niini maoy kostumbre sa komunidad. Kini nagpakanaog usab ug desisyon nga walay tawo subay sa balaod ang mapugos sa pagbayad ug mga buhis sa usa ka asosasyon nga siya dili membro, bisan pag ang bayranan maoy alang sa kauswagan sa komunidad. Busa niining daw gamayng detalye, gilabanan ang kagawasan sa relihiyon alang sa tanang mga taga Nigeria.