Pagpaambit sa Pagsabot sa Namibia

PILA ka pinulongan nga nadungog mo ang ekspresyong “Wala ako mahibalo”? “Hi nokuzuva,” miingon ang babayeng taga Herero, nga nagsul-ob sa iyang naandang taas nga besti ug sa pormag-sungay nga kalo sa ulo. “Nghi udite ko,” mitubag ang dalagitang Kwanyama, nga nagpahiyom. “Kandi uvite ko,” mitubag ang taga-balangay sa Ndonga, nga nagpakibo sa abaga. “Kapi na kuzuvha,” matud sa usa ka magbalantayg kanding nga Kwangali.

Kining mga tawhana nag-ingon, “Wala ako mahibalo.” Pagkamaayong pananglitan kini sa suliran nga ginaatubang sa mga Saksi ni Jehova sa Namibia ang malisod nga pinulongan diha sa ilang paningkamot sa pag-abot sa 1,370,000 ka molupyo niining dako kaayong teritoryo nga duolan sa 824,000 ka kuwadrado kilometro!

Ug dili ikahibulong! Dili lamang ang mga Herero ug Nama, kondili usab ang mga Ovambo, Kavango, Tswana, Capriviano, Himba, Lugotnon, ug Damara sa Namibia adunay ilang kaugalingong mga pinulongan. Sa pagtandi, ang mga Saksi nasangkapan ug literatura sa Bibliya nga Iningles ug Aprikaans lamang. Dayag, aron ang kamatuoran masabtan sa mas daghan pang tawo, hinungdanon ang paghubad. Kini nagsugod sa gamay kaayo nga paagi sa daghang katuigang milabay sa Windhoek, ang kaulohan sa siyudad nga kaniadto ginganlag Habagatan-Kasadpang Aprika.

“Sa Windhoek, dihay grabe nga pagsupak sa among buluhaton sa pagsangyaw gikan sa iglesya ug sa kapolisan,” nahinumdom si Dick Waldron. Uban sa iyang asawa, si Coralie, siya miabot niining nasora niadtong 1953 ingong graduwado sa Watchtower Bible School of Gilead. “Wala kami tugoti sa pag-adto sa mga lugar diin nagpuyo ang mga itom, ug kami usahay hasion kon makita nila kami nga nakigsulti sa mga tawong itom. Sa ulahi nakakita kami ug lugar nga kami wala hilabti​—ang naughang Suba sa Gammans! Gawas na kini sa lungsod. Nasalipdan ilalom sa mga punoan sa akasya, among gidumala didto ang mga pagtuon sa Bibliya.”

Didto usab nga unang gihubad ang mga publikasyon sa Watch Tower sa lokal nga mga pinulongan. Apil niini ang pipila ka tract sa Kwanyama ug ang pulyetong “Kining Maayong Balita sa Gingharian” sa Nama nga pinulongan. Si Igsoong Waldron nahinumdom ug kataw-anang eksperyensiya bahin niining pulyetoha, diin ang usa ka tawong interesado mitabang sa paghubad. Dili mahubad sa Nama ang mga pulong, “Si Adan maoy usa ka tawong hingpit.” Busa ang tawong interesado miingon: “Isulat lamang nga si Adan sama sa usa ka hinog nga peach. Ang mga Nama makasabot nga siya hingpit.” Nan, niining paagiha nga nasugdan ang pagpaambit sa kahibalo sa Kasulatan ngadto sa daghan diha sa lumad nga mga tawo sa Namibia.​—Itandi ang Daniel 11:33.

Pag-abot sa Halandomong Yugto

Ang halandomong yugto naabot sa sayong katuigan sa 1970 sa dihang ang librong Ang Kamatuoran nga Motultol sa Kinabuhing Dayon gihubad ngadto sa Ndonga ug Kwanyama. Kini ang duha sa pangunang mga pinulongan nga maoy sinultihan sa dakong bahin sa mga Namibianhon sa Ovamboland, nga duolan sa 700 ka kilometros sa amihanan sa Windhoek. Usa ka balay alang sa mga payunir ang gitukod sa Ondangwa, usa ka baryo sa Ovamboland. Aron matabangan ang mga tawong interesado niining lugara nga makapahimulos gikan sa senemanang panaghisgot sa Bibliya binase sa Ang Bantayanang Torre, ang mga espesyal payunir nga nag-alagad sa Ovamboland gitudlo sa paghubad sa sumariya sa Ingles nga mga artikulo sa pagtuon ngadto sa Ndonga ug Kwanyama.

Ang “opisina” sa paghubad maoy inalihang suok sa usa ka garahe diin ang mga kopya sa hinubad nga artikulo sa Bantayanang Torre gigama sa usa ka daang makina sa pagkopya. Dili sayon ang pagbug-os sa imong hunahuna niining malisod nga trabaho, sanglit kinaraan man ang mga kahimtang ug ang temperatura sa panahon sa ting-init moaberids man gikan sa 38 ngadto sa 44 degrees Centrigrade. Bisan pa, dinhi nga ang bag-ong mga brosyur ug ang librong Ikaw Mabuhing Walay Kataposan sa Paraiso sa Yuta gihubad.

Sa natukod ang mga kongregasyon sa Ovamboland ug sa ubang dapit sa Namibia, maayo kaayo ang pagsanong nga mas dako ug mas maayong lugar ang gikinahanglan. Dugang pa, mas maayo ang lugar nga anaa sa sentro aron kahatagan ug pagtagad ang mga panginahanglan sa ubang bahin sa nasod. Kasamtangan, ang pagpihig batok sa buluhatong pagsangyaw sa Gingharian nagkamenos. Busa nakuha ang permiso sa pagsugod sa pagtukod diha sa dakong luna nga yuta nga gidonar sa usa sa mga Saksi ni Jehova sa Windhoek. Wala magdugay, kapin sa 40 ka boluntaryo nga mga trabahante and gipapuyo diha sa luna nga tukoran, ug sa miaging Disyembre 1990 ang mga opisina sa paghubad natapos.

Karon, diha sa komportableng mga opisina ug mga lawak niining modernong tinukod, ang buluhaton sa paghatod sa pagsabot ngadto sa daghan ginahimo karon sa makusog. Bag-ong literatura padayong ginahubad ngadto sa Herero ug sa Kwangali. Labot sa Ndonga ug Kwanyama, usa ka duhay-pinulongan nga binulang edisyon sa Ang Bantayanang Torre karon nagagula nga de-kolor. Kini nasudlan sa tanang artikulo sa pagtuon ug ubang mga materyal. Kini, sa pagkatinuod, lahi kaayo gikan sa gamay nga pagsugod diha sa naughang suba sa daghang katuigang miagi.

“Wala ako mahibalo” panagsa na lang madungog karong adlawa. Hinunoa, kapin sa 600 ka Saksi ni Jehova sa Namibia mapasalamaton kaayo sa ilang langitnong Amahan, si Jehova, ug sila karon makaingon: “Ang ginapadayag mismo sa imong pulong nagahatag ug kahayag, nagahatag kini ug salabotan sa mga walay kahibalo.”​—Salmo 119:130.

[Hulagway sa panid 25]

Nagsangyaw sa maayong balita taliwala sa mga Herero

Naghubad sa Kristohanong mga publikasyon aron makapahimulos ang mga tawo sa Namibia

Mga opisina sa paghubad sa Namibia