Tan-awa Kon Unsay Nabuhat ni Jehova Alang Kanato!

“KAMI tig-ampo alang sa maong okasyon,” matud sa usa ka lalaki. Ang lain tigmata kada buntag sa alas kuwatro aron sa pag-ampo. Alang sa unsa? “Sa pag-ampo nga unta may adlaw nga mabatonan namo ang kagawasan sa pagsimba kang Jehova sa dayag,” matud niya. Sa Enero 1992, sa dihang nagtigom ang mga Saksi ni Jehova sa Etiopia sa Addis Ababa alang sa ilang “Mga Mahigugmaon sa Kagawasan” Distritong Kombensiyon, natin-aw nga gitubag ang maong mapaubsanon, sinserong mga pag-ampo.

Kadtong Etiopianhong kombensiyon usa ka timailhan sa pagkausab sa kahimtang sa Aprika. Sa katuigang bag-o pa ang katawhan ni Jehova sa 13 ka kanasoran didto nagkalipay sa pagdawat ug legal nga kagawasan diin sa nangagi gidid-an o gipiotan sila. Sa Etiopia, ang 34 ka tuig opisyal nga pagdili natapos sa Nobyembre 11, 1991, sa dihang ang opisyales sa gobyerno minghatag sa pag-ila ug nahitabo ang pagrehistro pag-usab. Dihadiha, gihimo sa mga Saksi ang kahikayan nga himoon ang usa ka internasyonal nga kombensiyon. Apan, ang paglantaw sa panon sa 7,537 nga nagtapok sa Addis Ababa City Stadium maoy halayo sa hinandom nga pangandoy sa matag usa. Alang sa kadaghanan sa mga tumatambong, nahisama kadto nga nagdamgo sila. Balikbalik silang nasig-ingon sa usag usa: “Igsoon, tan-awa kon unsay nabuhat ni Jehova nga atong Diyos alang kanato!”​—Itandi ang Salmo 66:1-5; 126:1.

Ang pagkanailalom nila sa pagdili sulod ug 34 ka tuig mimugnag pila ka wa-damhang mga suliran. Kadaghanan dili antigo sa nindot nga mga awit sa Gingharian. Sa unsang paagi makakat-on sila sa pagkanta niana una pa sa kombensiyon? Kap-atan ka awit, lakip ang 17 nga gigamit sa programa sa kombensiyon, gihubad nganha sa Amharic nga pinulongan. Dayon, usa ka espesyal nga koro giorganisar sa pagrekord sa mga awit sa audiocassette. Matag kongregasyon sa kaulohang siyudad nagdawat ug usa ka kopya sa teyp, ug matag kongregasyon migahin ug 30 ka minutos una pa ug tapos sa mga tigom aron sa pagbansay sa mga awit. Ang resulta? Ang estadyum nahupong sa tibuok-kasingkasing ug masadyaong pagkanta panahon sa kombensiyon.

Tungod sa mga kasamok sa silangang bahin sa nasod, naputol ang dalan paingon sa kaulohan gikan sa Diredawa ug Harar. Ang bugtong paagi sa biyahe gikan didto maoy pinaagi sa ayroplano. Kay dili man makaabot sa plete sa ayroplano, apan determinadong motambong sa kombensiyon, walo ka igsoon sa Harar miadto sa usa ka base militar ug mihangyo nga mosakay sa usa ka ayroplanong militar. Sa ilang katingala gitugot ang hangyo. Natagan-an silag libreng pagsakay paingon sa kombensiyon!

Ang pagkakita nga gitubag ang ilang mga pag-ampo nakapatunghag mga luha sa kalipay sa maong Etiopianhong mga igsoon, kinsa sa miaging tulo ka dekada nag-antos sa mga kalisod ug mga paglutos ug nakakita pang gipatay ang ilang mga higala tungod sa ilang pagtuo. Usa ka delegado miingon: “Naghilak ako sukad sa pagsugod sa kombensiyon.” Lain: “Kon makaarang ka sa pagbasa sa mga kasingkasing, makita nimo nga malipayon kaayo ako.” Oo, kahibulongan kaayo ang gibuhat ni Jehova alang niining matinumanong mga Saksi!​—Salmo 66:16, 19.

Mas Dakong Kagawasan sa Kasadpan ug Sentral Aprika

Ang Benin maoy laing nasod diin ang buluhaton sa katawhan ni Jehova bag-o pang nalegal. Unsay gibati sa mga Saksi bahin niana? Usa ka mamumulong sa usa ka Kristohanong panagkatigom didto miila: “Tinuod nga usa ka gasa gikan kang Jehova ang kagawasan sa pagsimba niining nasora.” Oo, ang mga alagad ni Jehova didto dulot mapasalamaton nga sila karon makapahimulos na ug dili-piniotan nga kagawasan sa pagtigom diha sa pagsimba ug pagpakigsulti sa ilang mga silingan mahitungod sa Gingharian ni Jehova​—mga kagawasan nga gibale-wala lang sa kadaghanan kanato.

Sa unsang paagi igapadayag nila ang ilang kalipay? Ang gikutlo-sa-itaas nga mamumulong mipunting sa usa ka paagi sa miingon siya: “Ang atong pagpakig-ambit sa buluhatong pagsangyaw​—ilabina ang atong pagbalay-balay uban sa maayong balita—​mobanaag sa atong pagpabili sa maong kagawasan.” Sa Benin kini gayod ang nahitabo. Ingong ebidensiya, tan-awa lang ang mga gidaghanon sa mga payunir. Sulod sa Enero 1990, ang bulan sa pagwagtang sa 14-anyos nga pagdili, 77 ka magmamantala ang naghimo sa regular bug-os-panahong pag-alagad. Duha ka tuig sa ulahi ang gidaghanon mikapin sa tulo ka pilo, ngadto sa 244!

Dili kini pag-ingon nga ang mga Saksi sa Benin dili aktibo sa wala pa wagtanga ang pagdili. Sa pagkatinuod, ang ilang pagkamainantoson may dakong epekto sa usa ka opisyal sa militar nga naasayn sa usa ka kampo nga gidad-an kanila sa gipangdakop sila. Sanglit ang ilang determinasyon sa pag-alagad kang Jehova mitultol sa subsob nga mga pagdakop, siya halos kanunay nga nakakontak kanila. Apan kadto nagpahinumdom lang kaniya sa makapahimuot nga mga panaghisgot sa Bibliya nga iyang nabatonan uban kanila sa unang mga adlaw sa dihang gipahimuslan nila ang legal nga kagawasan.

Sa kataposan, ang ilang lig-ong pagtuo mipukaw sa pagbati sa pagkagutom sa espirituwal sa iyang kahiladman. Mibisita siya sa lainlaing mga simbahan ug mga sekta apan wala gayod makatagbaw sa maong kagutmanan. Maoy sa pagkawagtang lamang sa pagdili niadtong Enero 1990 nga siya nakahisgot nga libre sa Bibliya uban sa mga Saksi ug nakaplagan ang tubag sa iyang espirituwal nga panginahanglan. Siya karon bawtismado na ug nagaalagad nga usa ka payunir. Sa usa ka diwa, ang iyang kausaban nagapahinumdom sa mga igsoon sa Benin sa kon unsay nahitabo kang Saulo sa Tarso: “Ang tawo nga kaniadto naglutos kanato karon nagapahayag na sa maayong balita mahitungod sa pagtuo.”​—Galacia 1:23.

Niadtong Disyembre 1991, ang mga Saksi ni Jehova diha sa laing nasod sa Kasadpang Aprika, ang Niger, narehistro nga usa ka legal nga korporasyon, ug natapos ang mga pagpiot sa ilang buluhaton. May malipayon usab nga reaksiyon didto. Ang sangang-buhatan sa Nigeria, nga nagaatiman sa Niger, nagtaho sa sanong sa panahon sa usa ka kombensiyon: “Pagkatapos sa pasukaranang pakigpulong sa kombensiyon sa Maradi niadtong Biyernes, gipahibalo ngadto sa mga igsoon nga kita karon sa legal giila na sa Niger. Sila nalipay kaayo ug mipakpak sulod sa daghang gutlo. Sa pagkatapos sa sesyon, ang mga igsoon mapadayganon kaayo, nga naghaloganay sa usag usa ug nagmasadyaon tungod sa maong maayong balita.” Mahanduraw nato ang talan-awon, ug kita makamaya duyog kanila.

Unsaon paggamit sa mga igsoon didto ang ilang bag-ong-kaplag nga kagawasan? Usa ka payunir nga sister sa Niger wala magduhaduha bahin sa tubag nianang pangutanaha. Misulat siya: “Ang mga kamatuoran nagpadayag nga sa among teritoryo sa Niger, kadtong manggula sa Bantogang Babilonya sa dili pa ang kataposan maoy daghan. Ingong pamatuod niini, ako nakatahog gikan 80 ngadto sa 85 ka balik-duaw kada bulan ug nagadumalag 13 o 14 ka pagtuon sa Bibliya, bisan pa nga gihatag nako ang akong mga balik-duaw ngadto sa ubang mga magmamantala.” Midugang kining matinumanong sister: “Tungod sa akong mga suliran sa panglawas, dili ako makabuhat ug daghan pa sumala sa akong gusto diha sa pag-alagad sa kanataran, apan ang matag usa nagabuhat kon unsay iyang maarangan.”

Sa Rwanda sa Sentral Aprika, ang kahimtang sa mga Saksi ni Jehova dako kaayog kausaban. Sa Abril 1992 usa ka dokumento giluwatan nga sa pagkatinuod sila sa kataposan usa na ka legal nga organisasyon. Ang dokumento nadawat sa samang semana sa Memorial, ug ang 1,526 ka magmamantala sa Rwanda nalipay sa pagkakitang 6,228 mitambong sa maong okasyon. Ipasundayag ba niining minahal nga mga igsoon ang ilang kalipay ug pagpabili pinaagi sa dugang kalihokan sa pagmantala sa maayong balita? Dayag gayod! Sulod nianang bulan mismo sa Abril, ang mga magmamantala sa kongregasyon miaberids ug 27.7 ka oras sa buluhatong pagsangyaw ug 17 ka balik-duaw, nga nagdumala sa aberids nga 2.4 ka pagtuon sa Bibliya. Ug mga 40 porsiento kanila ang diha sa usa ka matang sa bug-os-panahong pag-alagad.

Nalegal sa Habagatang Aprika

Didto sa habagatang Aprika, ang lab-as nga hangin sa kagawasan mihuros sa duha ka manindot nga nasod, ang Mozambique ug Angola. Sa Mozambique gitugot ang pagkalegal niadtong Pebrero 1991. Samtang ang kahimtang miluag didto, ang Watch Tower Bible and Tract Society nagpadalag mga misyonaryo sa nasod, nga sa kaalaot gidaot sa gubat sibil. Nakaplagan sa mga misyonaryo ang tambok nga yuta. Ang mga basahon sa Bibliya​—ilabina ang librong Mga Pangutanang Gisukna sa mga Batan-on​—Mga Tubag nga Mosaler—​pinangita pag-ayo. Usa ka misyonaryo mitaho nga nakapahimutang ug 50 ka libro sa walay duha ka oras ug tunga.

Ang mga tawong interesado daling mosanong. Usa ka misyonaryo miduaw sa usa ka direksiyon nga gihatag sa Sosyedad, ug misangpot nga kadto iya sa usa ka tawong militar. Ang maayong panaghisgot nahimo uban sa tawo mismo ug duha sa iyang mga paryente. Sa usa ka balik-duaw, ang laing mabungahong panaghisgot nahimo uban sa tawo ug sa lima pa nga uban. Dayon gidawat nila ang pagdapit nga motambong sa pakigpulong publiko ug Pagtuon sa Bantayanang Torre​—ang tanan sulod sa upat ka adlaw.

Sa Angola ang mga Saksi nagpahimulos sa nagakadakong kagawasan nga misangko sa pagkalegal sa ilang buluhaton niadtong Abril 1992. Giunsa nila paggamit ang ilang mas dakong kagawasan? Sila nagapakigbahin sa pag-alagad sa kanataran! Adunay mga 17,000 ka magmamantala sa Angola, ug ang maong mga magmamantala nagadumalag halos 60,000 ka pagtuon sa Bibliya. Pagkadako nga kalaoman sa pag-uswag!

Ang mga Batan-on Nakig-ambit sa Pagsangyaw

Niining mga nasod diin bag-o pang nalegal ang buluhatong pagsangyaw, bisan ang mga batan-on ug mga wala pay bawtismo nagapakita sa ilang pagpabili pinaagi sa pagbuhat diha sa ministeryo. Sa Cape Verde Republic, diin ang mga Saksi ni Jehova nalegal sa Nobyembre 1990, sa usa ka kombensiyon usa ka 17-anyos nga dalagita mitindog aron sa paghimog publikong pagpahayag sa pagtuo. Human sa bawtismo, ang usa ka bisita nakakita sa usa ka panon alirong niya. Siya miduol aron sa pagpahalipay kaniya ug nangutana kon kinsa ang panon. “Ay,” mitubag siya, “sila akong mga gitun-an sa Bibliya.” Nagdumala siyag pito ka pagtuon, ug sila nagpahalipay kaniya sa iyang bawtismo. Siya nakasulat na sa iyang aplikasyon sa pag-alagad nga usa ka auxiliary payunir ug nagpanan-aw nga sa kataposan makuwalipikado ingong regular payunir.

Usa ka diyes-anyos nga batang babaye sa Angola gisukna kon siya usa ba ka magmamantala. Mitubag siya: “Oo.” Nagdumala ba siyag mga pagtuon sa Bibliya? “Siyempre.” Pila man? “Pito,” mitubag ang maong diyes-anyos.

Mabasa nato diha sa basahong Buhat nga sa usa ka punto sa unang siglo, “ang kongregasyon sa tibuok nga Judea ug Galilea ug Samaria misulod sa usa ka yugto sa kalinaw, nga nalig-on; ug samtang kini nagkinabuhi sa pagkahadlok kang Jehova ug sa paglipay sa balaang espiritu kini nagdaghan.” (Buhat 9:31) Kami nagaampo nga alang sa among mga igsoon sa Aprika, kini usab mosangpot nga usa ka yugto sa kalinaw. Kami nagamaya duyog kanila samtang sila gilig-on, ug kami nagaampo nga ang espiritu ni Jehova magauban kanila samtang pahimuslan nila ang ilang kagawasan sa pagpalapnag sa maayong balita ug magpadayon sa pagdaghan.

[Mapa sa panid 24]

(Alang sa aktuwal nga pagkahan-ay, tan-awa ang publikasyon)

Mga Nasod Diin ang mga Saksi ni Jehova Nalegal o Gikuha ang mga Pagpiot Kanila

 1. Ang Gambia, Disyembre 1989

 2. Benin, Enero 1990

 3. Cape Verde Republic, Nobyembre 1990

 4. Mozambique, Pebrero 1991

 5. Ghana, Nobyembre 1991

 6. Etiopia, Nobyembre 1991

 7. Congo, Nobyembre 1991

 8. Niger, Disyembre 1991

 9. Togo, Disyembre 1991

10. Chad, Enero 1992

11. Kenya, Marso 1992

12. Angola, Abril 1992

13. Rwanda, Abril 1992

[Hulagway sa panid 23]

Sa Benin usa ka magmamantala sa Gingharian nagbasal sa mga pulong sa Mateo 24:14 diha sa iyang bombo nga mosulti

[Hulagway sa panid 25]

Sa daghang Aprikanhong kanasoran, ang matuod nga mga Kristohanon nagapahimulos ug maayo sa ilang bag-ong-kaplag nga kagawasan

[Hulagway sa panid 26]

Bag-ong mga Saksi nagapasimbolo sa ilang pahinungod kang Jehova pinaagi sa bawtismo sa tubig