Nagasidlak Ingong mga Kahayag sa Kalibotan

SA USA ka kalibotang nadaot sa moral nga kabaliko ug kahiwian, matuod nga mga Kristohanon sa tibuok yuta ang mga tuboran sa kahayag. Sila kinahanglan mao ang mga kahayag diha sa mangitngit nga kalibotan. (Filipos 2:15) Linibo ang andam sa paghimo niini isip mga payunir, o bug-os-panahong mga magsasangyaw. Daghan kanila nakagugol nag daghang katuigan sa maong pag-alagad ug gigantihan sa pagkakita sa tanang matang sa mga tawo nga mihimog mga kausaban diha sa ilang mga kinabuhi aron mahimong matuod nga mga tinun-an ni Jesu-Kristo.​—Mateo 28:19.

Aron madasig ang maong mga payunir sa pagpadayon niining sagradong pag-alagad ug pagpauswag sa ilang mga kahanas sa pagpanudlo, ang mga Saksi ni Jehova nag-organisar sa Tunghaan sa Payunir nga Pag-alagad. Kini maoy napulo-ka-adlaw binase-sa-Bibliyang kurso nga gidesinyo sa pagtabang sa mga payunir sa tulo ka natad: paglakaw uban kang Jehova ingong mga sumusunod ni Jesu-Kristo; pagpadagaya sa gugma alang sa tibuok kapunongan sa kaigsoonan; pagsidlak ingong mga kahayag sa kalibotan.

Tunghaan sa Payunir sa Republika sa Sentral Aprika

Sa Bangui, ang kaulohan sa Republika sa Sentral Aprika, 48 ka estudyante ug 2 ka instruktor nagtigom sa Agosto 1991. Ang mga estudyante magdawat ug mga instruksiyon ug praktikal nga mga sugyot alang sa ilang buluhaton. Unsay nakapahimo sa klase sa Bangui nga makapaukyab kaayo?

Sa usa ka bahin, 21 sa mga estudyante nagtungha pa sa sekular nga tunghaan. Samtang nagtungha, sila nakahikay sa ilang eskedyul aron sa pagpahimulos sa regular payunir nga pag-alagad. Ilang gigamit ang mga bulan sa ilang bakasyon, ilang libreng mga hinapos-sa-semana, ug ang mga hapon sa pagsangyaw ug pagpanudlo.

Kining mga batan-ona nakakita sa kahinungdanon sa pag-alagad sa ilang Maglalalang karon. (Ecclesiastes 12:1; itandi ang 1 Corinto 7:29.) Talagsaon ang kamatuoran nga 12 kanila adunay mga ginikanan nga dili magtutuo. Sa balay sila lang ang anaa sa kamatuoran. Duha ka batan-ong lalaki, nga managsoon sa unod, gipugos sa ilang amahan sa pagpahawa sa balay tungod sa ilang pagtuo. Usa ka batan-ong magtiayon sa kongregasyon nagpapuyo sa maong duha ka batang lalaki.

Ang kaso lahi alang kang Michée ug Sulamithe Kaleb. Silang duha mga payunir ug sila nagatungha usab, apan ang ilang mga ginikanan maoy mga Saksi ni Jehova. Ngani, ang ilang amahan maoy estudyante sa samang klase!

Ang mga kongregasyon sa Bangui mibuylog usab sa tunghaan, sa lain lamang nga paagi. Sila nagtagana sa materyal nga mga panginahanglan, sama sa pagkaon. Ang kuwarta, ingon man mga manok, kalamay, humay, ug balanghoy giamot aron sa pagpakaon sa klase.

Ang dug-ol nga mga kongregasyon miorganisar ug mga grupong tigluto aron sa pagdegamo ug yano pero lamiang mga pagkaon. Ang Republika sa Sentral Aprika bantog tungod sa ngunza, usa ka potahe nga gusto sa tanan. Ang resipe? Mga dahon sa balanghoy, lana sa palma, sibuyas, daghang ahos, dagkong mga tibugol sa peanut butter, ug pailob aron kana bug-os nga maluto. Ang matag pundok may kaugalingong linaing paagi sa pagdegamo niana. Kadto dakong kalamposan; walay nakalikay sa pagkaon kay lami man kaayo kana.

Sa gawas sa Bangui duha ka laing klase ang gihimo, ang usa sa Bouar ug ang lain sa Bambari, nga naghimo sa tibuok gidaghanon sa mga estudyante nga 68. Sulod sa miaging duha ka tuig, ang Republika sa Sentral Aprika nakakitag pag-uswag sa gidaghanon sa mga payunir. Sa Enero 1992 dihay 149 ka regular payunir ug 17 ka espesyal payunir kauban ang 78 ka auxiliary pioneers. Misangpot kana sa miusbaw nga kalihokan sa tibuok nasod uban sa bag-ong kinatas-ang mga ihap sa mga magmamantala, mga oras, mga subliduaw, ug mga pagtuon sa Bibliya. Sa dihang daghan ang mga mangangani, ang ani modaghan.​—Isaias 60:21, 22; Mateo 9:37, 38.

Ang among pasalamat moadto kang Jehova nga Diyos tungod sa maong mga tagana ug sa iyang yutan-ong organisasyon tungod sa paghikay sa maong mga klase. Sila nagatabang sa samang mga estudyante ug mga instruktor sa pagsidlak ingong mga kahayag niining mangitngit nga kalibotan.

[Hulagway sa panid 24]

Kawhaag-usa ka estudyante sa tunghaan sa payunir nga nagatungha pa sa hayskul

[Hulagway sa panid 25]

Kining duha ka batang lalaki kinahanglang mopahawa sa balay tungod sa kamatuoran