Dili Masanta sa Arsobispo!

SA MIAGING tuig, usa ka katigoman (solemne nga konsilyo sa mga kardinal) ang giorganisar aron hisgotan ang pipila ka butang nga dakog kalabotan sa Katolikong Simbahan. Ang usa niini, sumala sa mantalaang Il Sabato, mao “ang kadasig sa mga sekta.” Bisan pa, ang mantalaan miingon: “Dili problema sa mga kardinal nga magsabot niining puntoha. Ang tanan nagakauyon nga adunay panginahanglan alang sa mas lalom nga pagtuon sa tagsaong panghitabo sa bag-ong mga kalihokan sa relihiyon ug usab ang panginahanglan nga masanta, kutob sa mahimo, ang ilang pag-uswag.”

Apan, dayag nga “ang kadasig sa mga sekta” dili lamang usa ka problema sa Italya. Ang Il Sabato mitaho: “Samtang miduaw sa Batikano dili pa dugay, si Arsobispo Kirill sa Smolensk [usa sa labing karaang mga siyudad sa Russia] . . . nangayo sa papa ug ekumenikal nga tabang sa pagpugong sa kusog nga pag-uswag sa mga Saksi ni Jehova ug sa susamang mga grupo sa Unyon Sobyet.”

Sa unang siglo, ang mga lider sa natukod na nga relihiyon adunay samang mga reklamo sa dihang ang Kristiyanidad kusog nga gipakaylap pinaagi sa mga sumusunod niini. Sa usa ka higayon ang nasukong mga Hudiyo mireklamo sa magmamando sa siyudad: “Kining mga tawhana nga naghatag kasamok sa ginapuy-ang yuta ania na usab dinhi”! (Buhat 17:6) Balik niadto, ang relihiyosong mga lider naningkamot pag-ayo sa pagpahunong sa pagkaylap sa Kristiyanidad, apan sila napakyas. Karong adlawa usab, ang bisan unsang paningkamot sa pagsanta sa pagpakaylap sa matuod Kristohanong doktrina gihukmang mapakyas. Ang Diyos mismo nagsaad: “Walay hinagiban ang gibuhat batok kanimo nga magmalamposon, ug ang tagsatagsa ka dila nga molitok batok kanimo aron sa paghukom imo nga pagahukman. Kini mao ang panulondon sa mga alagad ni Jehova, ug ang ilang pagkamatarong nga gikan kanako.”​—Isaias 54:17.