Usa ka Lakang sa Pagpasig-uli

‘SIYA namulong kanila pinaagi ug mga ilustrasyon.’ Ang Bibliya sa ingon nagpailaila sa tulo ka halandomong mga ilustrasyon ni Jesus mahitungod sa kaluoy​—ang usa ka nawalang karnero, ang nawalang drakma, ug ang anak nga mausikon.​—Lucas 15:3-32.

Gituki sa duha ka artikulo diha sa Ang Bantayanang Torre sa Abril 15, 1991, kadtong mga ilustrasyona ug nagtabang sa daghang mga magbabasa sa pagkakita kon sa unsang paagi ang kaluoy mahimong ipaabot karong adlawa. Ang pangunang gihatagag pagtagad mao ang espirituwal nga mga magbalantay nga maoy mouna sa pakigkita sa mga tawong napalagpot apan tingali mosanong sa malulotong mga pagduaw. Unsay nahimong resulta niining mga artikuloha ug sa bag-ong paagi?

Wala madugay human gipatik ang magasin, usa ka tawo sa estado sa Washington, T.B.A., misulat: “Ang pamatuod sa dagaya mahigugmaong kalulot ni Jehova miabot diha sa akong koreyo karong adlawa. Ako naglingkod dinhi nga may mga luha sa akong mga mata ug kalipay sa akong kasingkasing tungod sa mga tagana ug mga kausabang gitagana sa Labing Hataas. Ang usa ka matuod matarong nga Diyos lamang ang makatabang alang niadtong mga tawong samag-karnero nga nangawala. . . . Oo, ako napalagpot apan anaa na sa dalan sa pagpasig-uli.” Niadtong Oktubre siya napasig-uli.

Apan komusta ang mga pagduaw nga gihimo sa duha ka ansiano sa kongregasyon? Usa ka Kristohanong asawa misulat: “Dili matukib sa mga pulong ang akong gibati. Ang akong bana napalagpot sa mga 13 na ka tuig. Giduaw siya sa mga ansiano, sama sa gisugyot sa artikulo. Sa miaging gabii sa unang higayon sa daghang katuigan, siya mitambong sa usa sa mga tigom. Siya karon nagapaningkamot sa pagbag-o sa iyang kinabuhi ug sa pagbalik.”

Samtang nagaduaw ang mga magtatan-aw sa sirkito sa matag kongregasyon, nakita nila ang mga sangpotanan. Usa ka magtatan-aw sa sirkito misulat sa dili pa dugay:

“Sa dihang ang Abril 15, 1991, nga Bantayanang Torre gipatik, daghan ang nahibulong kon unsa kaha ang pagsanong ngadto sa mga ansiano nga mohimo sa pagduaw. Ang tubag nahimong dayag.

“Diha sa among sirkito, ang kataposang upat ka kongregasyon nga akong giduaw nakasaksi sa pagbalik ngadto sa mga Kingdom Hall ug siyam ka tawo. Bisag usa pa lamang ang napasig-uli, ang laing walo nagahimo ug maayong pag-uswag. Ang mga ansiano ug mga kongregasyon nalipay sa pagkakita sa mga bunga sa ilang paghago ug sa kaalam sa pagpadapat sa teokratikanhong mga pagtultol.

“Kami nalipay niining maayo, maluloy-ong kahikayan. Sama sa gikomento sa usa ka napasig-uling igsoon nga babaye, ‘wala akoy kaisog nga mobalik sa akong kaugalingon, sanglit gibati kong gihukman atubangan ni Jehova. Apan sa miduaw ang mga ansiano, kadto mao ang pagdasig nga akong gikinahanglan sa pagbalik.’ Ang iyang kainit nakadasig ug dako sa kongregasyon.”

Bisan kon ang kadaghanan sa giduaw wala mosanong, dayag nga maayo ang nahimo niining maluloy-ong kahikayan. Busa, sugod karong Septiyembre susihon sa mga ansiano sa matag kongregasyon ang mga ngalan niadtong mga napalagpot diha sa teritoryo ug maghikay sa pagduaw sa tanan nga ilang gibati nga lagmit mosanong sa ginapaabot nga kaluoy.