Kinsay Mipuli Kang Judas Iscariote Ingong Ikanapulog-duhang Apostol?
Tungod sa pagbiya ni Judas Iscariote, nga namatayng dili matinumanon, may 11 na lamang ka apostoles ang nahibilin, ug sulod sa 40 ka adlaw gikan sa pagkabanhaw ni Jesus hangtod sa iyang pagkayab sa langit wala siya magtudlo ug kapuli. May panahon sulod sa napulo ka adlaw tali sa pagkayab ni Jesus ug sa adlaw sa Pentekostes gilantaw nga kinahanglanon ang pagpili ug lain sa paghulip sa bakanteng gibiyaan ni Judas, dili sa yano pinasikad sa iyang pagkamatay apan, hinoon, pinasikad sa iyang daotang pagbiya, ingon sa gipasabot sa gikutlo nga Kasulatan ni Pedro. (Buhat 1:15-22; Salmo 69:25; 109:8; itandi ang Pinadayag 3:11.) Mao nga, sa pagtandi, sa dihang ang matinumanong apostol nga si Santiago gipatay, walay rekord sa bisan unsang kabalaka sa pagtudlo kang bisan kinsa sa pagsunod kaniya sa iyang kaakohan ingong apostol.—Buhat 12:2.
Dayag gikan sa mga pahayag ni Pedro nga kaniadto giisip nga si bisan kinsang indibiduwal nga mohulip sa kaakohan sa apostol ni Jesu-Kristo kinahanglang may kalipikasyon nga may personal nga kasinatian labot kaniya, nakasaksi sa iyang mga binuhatan, iyang mga milagro, ug sa partikular sa iyang pagkabanhaw. Tungod niini makita nga ang bisan unsang apostolikong sumusunod sa lakaw sa panahon mahimong imposible, gawas kon may langitnong paglihok sa paghatag niining mga kinahanglanon sa matag indibiduwal nga kaso. Nianang partikular nga yugto ayha pa ang Pentekostes, hinuon, may mga lalaki nga nakaabot niining mga kinahanglanon, ug duha ang gipabarog ingong takos ipuli sa dili-matinumanong Judas. Sa walay duhaduha nga naghunahuna sa Proverbio 16:33, naghimog pagripa, ug si Matias ang napili ug human niadto “giihap nga kauban sa napulog-usa ka mga apostoles.” (Buhat 1:23-26) Mao nga siya naapil tali sa “napulog-duha” nga naghusay sa suliran mahitungod sa Grego-sinultihang mga tinun-an (Buhat 6:1, 2), ug dayag si Pablo naglakip kaniya sa paghisgot bahin sa “napulog-duha” sa dihang nagsulti bahin sa tapos-pagkabanhaw nga mga pagpakita ni Jesus nga nasulat sa 1 Corinto 15:4-8. Busa, sa dihang miabot ang Pentekostes, may 12 ka apostolikong patukoranan diin ang espirituwal nga Israel nga naporma kaniadto mapahiluna.
Pagkaapostol sa Kongregasyon
Si Matias dili lang yanong apostol sa kongregasyon sa Jerusalem, maingon nga mao usab ang nahibiling 11 ka apostoles. Ang iyang kahimtang lahi gikan nianang sa Levitang si Jose Barnabas nga nahimong apostol sa kongregasyon sa Antioch, Syria. (Buhat 13:1-4; 14:4, 14; 1 Corinto 9:4-6) Laing mga lalaki usab gikaingong “mga apostoles sa kongregasyon” sa diwa nga sila pinadala sa maong mga kongregasyon sa paghawas kanila. (2 Corinto 8:23) Ug, sa pagsulat ngadto sa mga taga-Filipos, si Pablo naghisgot bahin kang Efaprodito ingong “inyong gipadala [a·poʹstolon] ug pribadong alagad alang sa akong panginahanglan.” (Filipos 2:25) Ang pagkaapostol niining mga lalakiha tataw nga dili tungod sa bisan unsang apostolikong pagkasumusunod, ni sila nahimong bahin sa “napulog-duha” sama ni Matias.
Ang husto nga pagsabot niining halapad nga kapadapatan sa terminong “apostol” makatabang sa pagpatin-aw sa bisan unsang morag panagsumpaki tali sa Buhat 9:26, 27 ug Galacia 1:17-19, sa dihang ipadapat sa susamang kahimtang. Ang unang asoy nagpahayag nga si Pablo, sa pag-abot sa Jerusalem, gidala “ngadto sa napulog-duha” ni Barnabas. Sa asoy diha sa Galacia, hinuon, si Pablo nagpahayag nga siya nagbisita kauban ni Pedro ug nagdugang: “Apan wala akoy nakita nga laing apostoles, si Santiago lamang nga igsoon sa Ginoo.” Si Santiago (dili ang orihinal nga apostol nga Santiago nga anak ni Zebedeo ni ang Santiago nga anak ni Alfeo, apan ang igsoon ni Jesus sa inahan) sa dayag gilantaw ingong “apostol” sa halapad nga diwa, sa ato pa, ingong “usa nga pinadala” sa kongregasyon sa Jerusalem. Kini motugot alang sa mga asoy sa Buhat sa paggamit sa titulo diha sa dinaghan sa pag-ingon nga si Pablo gidala ngadto “sa mga apostoles” (kana mao, si Pedro ug Santiago).—Itandi ang 1 Corinto 15:5-7; Galacia 2:9.
Ang Pagpili Kang Pablo
Lagmit mga tuig 34 K.P., si Saulo sa Tarso nakombertir ug sa ulahi nailhang Pablo. Siya nahimong tinuod nga apostol ni Jesu-Kristo ug maoy direktang pinili sa nabanhaw ug nakakayab nang Jesu-Kristo. (Buhat 9:1-22; 22:6-21; 26:12-23; 13:9) Siya nangatarongan labot sa iyang pagkaapostol ug mipresentar sa iyang kalipikasyon ang kamatuoran nga siya nakakita sa nabanhawng Ginoong Jesu-Kristo, nga siya nakahimog mga milagro, ug siya nakaalagad ingong kanal alang sa pagpaambit sa balaang espiritu sa bawtismadong mga magtutuo. (1 Corinto 9:1, 2; 15:9, 10; 2 Corinto 12:12; 2 Timoteo 1:1, 11; Roma 1:1; 11:13; Buhat 19:5, 6) Sanglit ang apostol nga si Santiago (ang igsoon ni Juan) wala mamatay hangtod sa mga tuig 44 K.P., “ang napulog-duha” buhi pa sa panahon nga si Pablo nahimong apostol. Wala gayod niya ihapa ang iyang kaugalingon nga kauban sa maong “napulog-duha,” samtang sa samang panahon giangkon niya nga dili ubos ang iyang pagkaapostol kon itandi niana.—Galacia 2:6-9.
Ang pagkaapostol ni Matias ug ni Pablo parehong balido alang sa katuyoan nga kadtong mga lalakiha “gipadala,” bisan pa sa dihang si apostol Juan nakakitag panan-awon sa langitnong Bag-ong Jerusalem diha sa Pinadayag (gihatag sa mga 96 K.P.) siya nakakita lamang ug 12 ka patukoranang mga bato ug kanila nakulit “ang napulog-duha ka ngalan sa napulog-duha ka mga apostoles sa Kordero.” (Pinadayag 21:14) Ang pamatuod sa Balaang Kasulatan maoy tin-aw nga si apostol Pablo wala gayod ilha ingong usa sa “ang napulog-duha.” Busa, makataronganon nga ang usa sa “napulog-duha ka ngalan sa napulog-duha ka mga apostoles sa Kordero” nga nakulit sa patukoranang mga bato sa Bag-ong Jerusalem maoy iyaha ni Matias ug dili ni Pablo. Kini nagkahulogan nga ang panan-awon ni apostol Juan nagasumbalik sa kahimtang nga naglungtad sa sinugdanan sa Kristohanong kongregasyon sa adlaw sa Pentekostes sa tuig 33 K.P.