Kapuloan sa Indian Ocean Nakadungog sa Maayong Balita
NAG-ARKO diha sa amihanang Madagascar ug nakatag sa kapig 1.5 ka milyong milya kuwadrado sa kasadpang Indian Ocean mao ang kapuloan sa Rodrigues, Mauritius, Réunion, ang Seychelles, Mayotte, ug ang Comoros. Bisan ug halapad kaayong hawan ang gikobre, kini nga mga isla milangkob lamang ug mga 7,300 kilometros kuwadrado nga yuta. Uban sa populasyon nga 2.3 ka milyon, sila lakip sa labing daghag populasyon nga mga pulo sa kalibotan.
Lakip niini nga populasyon ang mga 2,900 ka mga Saksi ni Jehova, kinsa makugihong nagasangyaw sa maayong balita sa Gingharian sa Diyos ngadto sa mga islahanon. Kay nahilit, gipabilhan gayod niini nga mga Saksi ang mga pagduaw sa nagapanaw nga mga magtatan-aw ug ang tinuig nga mga asembliya nga gihikay sa sangang buhatan sa Watch Tower Society sa Vacoas, Mauritius. Kini ang mga okasyon nga ilang kalipayan gayod ang kahulogan sa mga pulong sa Isaias 42:10: “Pag-awit kang Jehova ug usa ka bag-ong alawiton, ang iyang pagdayeg gikan sa kinatumyan sa yuta, kamo nga mangadto sa dagat ug ang tanan nga nagapuno niini, mga pulo ug kamong nagapuyo niini.”
Dili pa dugay, ang mga hawas gikan sa sangang buhatan mibiyahe ngadto niining mga puloa sa pagduaw sa mga kongregasyon ug aron himoon ang tinuig nga serye sa espesyal usa-ka-adlaw nga mga asembliya, nga naghisgot sa temang “Mahimong Balaan sa Tanan Ninyong Paggawi,” nga gipasukad sa 1 Pedro 1:15. Aron matadlas ang dakong hawan sa kadagatan, ang pagbiyahe sagad pinaagig ayroplano—usahay sa modernong mga jumbo jet apan kasagaran diha sa mas gagmay nga mga ayroplano. Ang mga barko ug mga bilusdos gigamit usab. Dali uban kanamo, ug tan-awa kon sa unsang paagi ang kapuloan sa halayong Indian Ocean nakadungog sa maayong balita!
Unang Paghunong—Rodrigues
Human sa usa-ug-tunga ka oras nga paglupad gikan sa Mauritius, nakita namo ang katakotan. Kini nagtimaan sa tumoy sa usa ka dakong lanaw nga naglibot sa gagmayng pat-ak nga yuta sa Indian Ocean. Kini mao ang among unang paghunong, ang pulo sa Rodrigues.
Ang airport gitukod diha sa yuta nga naporma gikan sa katakotan, nga gitawag Point Coraille. Niining dapita baga kaayo ang takot nga mahimong gabson nga bloke-bloke aron magamit sa pagtukod ug mga tinukod. Giagi kami sa gamay nga bus diha sa usa ka hiktin, naglikoliko nga karsada gikan sa airport paingon sa pangunang lungsod sa Port Mathurin. Sa usa ka higayon, among nakita sa tabok sa isla ang halayo nga katakotan, ang asul nga lanaw, ug ang batoon nga baybayon. Sanglit mao pay pagkatapos sa ting-ulan, ang mga kilid sa bungtod natabonan sa sagalsalon, humokong sagbot ug napat-akan sa nagapanibsib nga mga baka, karnero, ug mga kanding.
Ang gamay, hinlo nga Kingdom Hall diha sa sentro sa Port Mathurin mao ang lugar alang sa among usa-ka-adlaw espesyal nga asembliya. Ang buluhaton sa Rodrigues unang gibuksan niadtong 1964. Karon, taliwala sa populasyong 37,000, dunay 36 ka magmamantala sa maayong balita. Pagkadako sa kalipay nga makita ang 53 ka tawo nga mitambong ug usa ka 18-anyos nga ulitawo ang gibawtismohan. Ang iyang inahan, bisag dili mahibalong mobasa, midawat sa kamatuoran niadtong 1969, ug siya nagpadayon sa pag-alagad kang Jehova bisan pa sa pagsupak sa pamilya. Karon duha sa iyang mga anak nakapahinungod na kang Jehova.
Human sa asembliya, migugol kamig usa ka semana sa pagsangyaw diha sa isla. Among gigamit ang among sinultihang Mauritian Creole, kay mao usab kini ang pinulongan nga gigamit dinhi sa Rodrigues. Ang pagsakay sa bus ug pagbaktas nagdala kanamo ngadto sa among teritoryo—usa ka lunhawng walog nga sangkad gikan sa ibabaw nga karsada palugsong hangtod sa dagat. Pagkatahom nga talan-awon—ang asul-berde nga lanaw, ang puting katakotan, ug ang itom nga pagkaasul nga dagat diha sa likoran! Napalagsik sa tugob, limpiyong hangin, kami andam na sa paglakaw.
Among gisubay ang mga dalandalan latas sa kaumahan ug gitabok ang sagbotong sapa aron maabot ang daghan gagmay nga mga balay sa walog. Kami nakadawat ug mainitong pag-abiabi sa matag balay ug nakapagpakigsulti sa mga tagbalay mahitungod sa mga panalangin sa Gingharian nga moabot sa dili madugay. Wala magdugay halayo na kamig naabtan diha sa walog, ug panahon na sa pagpamauli. Kini nagpasabot ug daghang pagtungas ug daghang oras sa pagbaklay, apan ang pagkamaabiabihon sa dapit nakatabang kanamo—gidapit kami sa pagsakay sa likod sa dyip.
Human sa mabudlay nga panaw, nalipay kaming nakabalik sa kahayahay sa matahom nga Balayng Bethel sa Vacoas. Duha ka espesyal nga mga adlaw sa mga asembliya ang giiskedyol diha sa Municipal Hall. Ang unang adlaw, 760 ka tawo ang mitambong. Sila maoy gikan sa katunga sa 12 ka kongregasyon sa isla. Sa pagkasunod nga adlaw, nakig-ambit kami sa samang programa uban sa 786 ka tawong mitambong gikan sa laing unom ka kongregasyon. Sa hinapos sa semana, upat ka bag-ohan ang gibawtismohan. Adunay 30 ka espesyal payunir ug 50 ka regular payunir ang nagadala sa maayong balita ngadto sa mga islahanon.
Ang Halayong Seychelles
Panahon na nga kami molupad na usab, diretso sa amihanan nga kapin sa 1,600 kilometros diha sa lawod ngadto sa isla sa Mahé sa Seychelles, nga gitawag Zil Elwannyen Sesel sa Creole, nga nagkahulogang “ang Halayong Seychelle nga Kapuloan.” Tungod sa gilay-on, ang sangang buhatan makahikay lamang ug duha ka pagduaw matag tuig. Ang espesyal nga adlaw sa asembliya ug ang sirkitong asembliya ginahimo sa tulo ka sunodsunod nga mga adlaw sa tingpamulak. Ang distritong kombensiyon ginahimo sa hinapos nga bahin sa tuig. Karon sa tungatunga sa Oktubre, kami ania dinhi alang sa distritong kombensiyon, nga sundan sa usa ka semana nga pagduaw sa kongregasyon. Dinhi na usab magamit namo ang among sinultihang Mauritian Creole.
Ang mga igsoon sa duol nga mga isla sa Praslin ug La Digue nakaabot na. Kamakapahinam nga adunay 12 ka nasyonalidad ang gihawasan! Ang dapit nga asembliyahan mao ang lokal nga Kingdom Hall, usa ka dako nga garahe sa likod sa balay sa usa ka Saksi. Sanglit unom lamang ka igsoong lalaki, lakip sa mga bisita, ang kuwalipikadong makabahin sa programa, ang uban may pribilehiyo sa paghatag ug ubay-ubay nga mga pakigpulong sulod sa upat ka adlaw. Ang 81 ka magmamantala nalipay nga nakita ang 216 nga mitambong sa kataposang adlaw sa kombensiyon.
Human sa kombensiyon, kami misakay ug barko paingon sa Praslin, 40 kilometros amihanan-silangan sa Mahé. Ang 18 metros nga barko hinimo gikan sa kahoyng tacamahac. Ang maanindot nga barko makapasakay ug 50 ka pasahero ug mga 36 metrikong toneladang karga. Samtang kami mibiya sa pantalan sa Mahé ug minabigar paingon sa destinasyon sa Praslin sa halayong kapunawpunawan, among mabati ang pag-andar sa makinang diesel nga gitabangan sa duha ka puting layag nga mikabadkabad diha sa duha ka palo.
Sa milabay ang duha ka oras ug tunga, milibot kami sa batoon nga punta aron makasulod sa mas malinaw nga katubigan sa matahom nga Luok sa St. Anne. Sa dihang mitikang na kami sa dunggoanan, nakita namo ang mga igsoon nga naghulat. Dunay 13 ka magmamantala niining gamayng isla, ug 8 ka bisita ang miabot gikan sa ubang mga dapit. Busa uban sa dakong kasadya nga nakita namo ang gamayng tigomanan nga napuno sa 39 ka tawo alang sa espesyal nga pakigpulong. Pagkamaayong potensiyal sa pag-uswag!
Samtang dinhi sa Praslin, kinahanglan namong duawon ang matahom nga Vallée de Mai. Kini mao ang dapit sa Coco-de-mer palm, nga maoy gituboan sa kinadak-ang liso sa kalibotan, ang kada usa motimbang ug 20 kilos. Diha sa bugnaw lunhawng landong sa kalasangan, nakita namo kining mga palmaha diha sa tanang matang sa gidak-on sa pagtubo. Ang gitaganang kahubitan alang sa mga bisita nagpatin-aw nga ang kinatas-ang palma maoy 31 metros ang gitas-on dihang gisukod kini niadtong 1968. Ang pipila niining tag-as nga mga kahoy gibanabanang 800 anyos na. Mokabat ug 25 anyos una pa mosugod sa pagpamunga ang maong kahoy ug 7 ka tuig una pa mohingkod ang bunga niini. Dili ikatingala nga ang brosyur nagpahimangno: “Letrato lamay kuhaa, mga tunob lamang ang ibilin”!
Sa pagkaalas siyete sa buntag, misakay kami ug barko paingon sa gamayng isla sa La Digue. Daghang sakayan ang nagtapok sa dunggoanan. Kini ang pangunang mga sakayanan sa 2,000 ka molupyo ug sa gawas nga kalibotan. Gisugat kami sa edarang magtiayon nga gikan sa Switzerland nga nagpuyo na niining islaha sukad pa niadtong 1975. Inay nga mosakay sa karomatang “taksi,” nanglakaw kami diha sa daplin sa baybay nga may maanindot bulok rosas nga mga batong graniso nga napahamis sa dagat ug ulan. Human sa piknik nga estilo sa pamahaw, kami miagi sa gamayng gireserbang lasang, diin ang itom nga flycatcher didto nagpuyo, ngadto sa balay sa pipila ka interesadong mga tawo. Trese ka tawo ang nagtigom sa pagpamati sa pakigpulong nga gihatag sa Creole nga pinulongan. Among nakaila ang magtiayon kinsa mihimo sa tanang mga kahikayan aron mahimong legal ang ilang kaminyoon aron sila mouswag sa espirituwal. Sa pagkatinuod, si Jehova nagatigom sa mga bililhon sa kanasoran bisan dinhi niining hilit kaayong kapuloan.
Balik sa Réunion
Ang Réunion mao ang labing ugmad nga isla nga among naduaw niining biyahea. Samtang kami nagkaduol sa yuta, nakita namo ang upat-ka-agianang haywey, nga naghuot sa mga sakyanang gikan sa kaulohang, Saint-Denis. Ang tag-as nga mga tinukod ang miokupar sa luna tali sa dagat ug sa bukid. Kining islaha mao ang pinuy-anan sa mga 580,000 ka tawo ug napamatud-ang usa ka mabungahong natad sa pagsangyaw sa Gingharian. (Mateo 9:37, 38) Aduna nay mga 2,000 ka masibotong magmamantala sa maayong balita diha sa 21 ka kongregasyon.
Ang adlaw sa espesyal nga asembliya gihimo diha sa dakong istadyom nga inatopan. Kami nalipay nga makita ang 3,332 ka tawong nanambong, ug pagkamakapahinam nga makita ang 67 ka bag-ohan nga nagtanyag sa ilang kaugalingon nga magpabawtismo! Human natagamtan ang asosasyon uban sa mga misyonaryo sa maong pulo, kami mibiyahe na usab sa among sunod nga destinasyon.
Mayotte—Ang Isla sa Pahumot
Human sa duha ka oras nga paglupad, ang among 40-ka-lingkoranang jet misugod sa pagpaubos diha Pamanzi airport, nga diha sa gamayng isla nga gikonektar sa 1.9 kilometros nga taytayan paingon sa Dzaoudzi, ang kaulohan sa Mayotte. Ang asul nga kalangitan, puting kapanganoran, lunhawng kabukiran, ug ang itom nga pagkaasul nga kadagatan nahugpong aron ipaabot ang hulagway sa usa ka malinawong paraiso sa tropiko. Sa tukma, ang Mayotte gianggaan ug Isla sa Pahumot tungod sa lalim nga kahumot sa kahoyng ilang-ilang. Ang pinuga gikan sa mga bulak niini ipadala sa Pransiya ingong pangunang sambog alang sa mga pahumot nga ilado-sa-kalibotan.
Kinse minutos lamang ang biyahe diha sa usa ka barge paingon sa kinadak-ang isla. Human namainit diha sa balay sa mga misyonero, gidapit kami sa usa ka pagtuon sa libro nga 19 kilometros ang gilay-on sa pikas nga bahin sa isla. Kana nagtapos sa among gidahom nga lingawlingaw nga pagduaw! Kami misakay sa way-atop nga dyip alang sa usa ka makuyaw nga biyahe diha sa hiktin nga mga dalan. Kanunay nga daw hapit kami makabangga ug mga tawo, baka, ug ubang mga sakyanan. Apan ang among Pranses nga drayber sinati sa dalan. Sa wala magdugay, nakaabot kami sa Chiconi, diin among nahibalag ang pamilya kansang balay didto gihimo ang pagtuon.
Ang amahan, usa ka Muslim kanhi, nagpailaila sa iyang walo ka anak. Ang iyang kamanghurang anak, kuwatro-anyos, mihatag kanamo nga among nahibaloan sa ulahi nga mao ang tradisyonal nga pangomosta. Iyang gibutang ang iyang usa ka palad diha sa laing palad nga nagsaod sa iyang kamot nga nagbarog sa atubangan namo. Misulay kami sa paglamano sa iyang mga kamot, unya ang akong asawa misulay pagbutang sa iyang mga kamot diha sa iyang ulo. Ang gamayng bata uban ang nagdako lingin nga mga mata mapailobong nagpaabot, way-duhaduha nahibulong sa among gibuhat. Sa kataposan among nakuha kini—among gibutang ang iyang mga kamot diha sa iyang ulo. Ang pagtuon gisugdan nga may 14 ang mitambong. Sa tungatunga, usa ka interesadong tawo miabot ug nakiglamano sa tanan. Kana usab dayag nga usa sa ilang mga kostumbre.
Sa among pagpamauli latas sa nagakangitngit na nga palibot, nakakita kami ug dagkong mga kulaknit nga nanglupad paingon sa mga kahoy alang sa ilang pagpaningaon magabii. Among nasimhotan usab ang nanghumot nga hinog nga nangka nga nahulog diha sa nag-ikis-ikis nga dalan ug ang kahumot sa mga mangga, kapayas, ug mga bayabas. Kini mao ang pinuy-anan sa mga lemurs, ang gagmay samag-unggoy nga mga hayop nga samag-lobo ang dagway ug tag-as, lingig-tabas, lubayng mga ikog. Samtang miliko kami diha sa tumoy sa bungtod, kami gisugat sa usa ka matahom kaayo nga talan-awon. Ang pulahong takdol nga bulan mao pay paggitib ibabaw sa lanaw, nga nagpasidlak ug nagapangidlak nga silaw diha sa linaw nga katubigan. Bisan ang among drayber mipahinay ug dagan sa pagdayeg niana. Alang sa nahibilin sa biyahe, among gitan-aw kana sa matag liko namo sa dalan.
Sa pagkasunod nga buntag kami miuban sa pagsangyaw sa mga misyonero. Una, giduaw namo ang usa ka ulitawo nga magtutudlo ug maayo mosultig Pranses. Siya milingkod sa salog, ug kami milingkod sa iyang katre. Ang sunod nga pagtuon usab maoy usa ka batan-on nga lalaki, ug iyang gidapit kami sa paglingkod sa iyang kama diha sa salog sa iyang gamay nga lawak. Sa wala magdugay misugod kami sa paglisoliso, bisan pag among gipaningkamotang makalimtan ang paminhod sa among mga bitiis ug ang pagdaligdig sa singot sa among mga likod. Uban sa radyo sa sunod nga pultahan nga kusog kaayong nagpatokar sa kinaulahiang popular nga mga awit, malisod ang paghatag ug pagtagad sa gitun-an, nga gidumala diha sa mga bahin sa pinulongang Pranses ug Mahoriano.
Ang among kataposang duawon mao ang usa ka ulitawo gikan sa kasikbit nga Comoros. Siya nangayog pasaylo nga dili kaayo makasultig Pranses, mikuha sa iyang brosyur, ug nangandam alang sa pagsugod. Kon ang misyonero may isulti nako, siya mosalga ug moingon nga iyang basahon ang parapo. Siya matinahurong misulti kanamo sa paghilom. Silang tanan maoy mga Muslim, apan sila nagpabili gayod sa ilang nakat-onan sa Bibliya.
Kami nahibulong kon nganong daghan sa mga ulitawo ang nagtuon, ug diyutay rang mga babaye o mga dalaga ang nagtuon. Kini, kami giingnan, maoy resulta sa katilingbanon ug pamilyahanong mga tradisyon. Samtang ang pagbaton ug daghang asawa gitugotan sa relihiyon ug sa katilingban ug ang matag asawa mopuyo diha sa iyang kaugalingong balay, ang impluwensiya sa amahan diyutay ra; ang inahan mao ang usa nga nagakontrolar. Among nasayran usab nga ang mga anak nga babaye sa naandan magpabilin sa balay sa ilang inahan hangtod sila maminyo. Ang mga anak nga lalaki, sa laing bahin, mobiya sa balay sa pagkatin-edyer ug magtukod ug ilang kaugalingong banga, o payag, o moipon sa ubang batan-ong mga lalaki diha sa banga. Ubos niining maong mga kahimtang ang batan-ong mga lalaki may kagawasan sa pagtuon kon buot nila, apan pipila lamang sa mga babaye ang aduna nianang maong kagawasan.
Ang Dominggo mao ang adlaw sa espesyal nga asembliya. Maayo ang panahon sa sinugdan, apan sa pagkaudto misugod ang pagdag-om, ug sa wala madugay mibundak ang makusog nga ulan. Maorag walay usa ang nagpakabana niana, sanglit kana nagpabugnaw man sa panahon. Dinhi na usab nakaplagan namo ang dagayang espirituwal nga bahandi samtang ang 36 ka magmamantala ug mga payunir nalipay nga nakita ang 83 ka nanambong ug 3 ka bag-ong nabawtismohan.
Ang pagluwat sa brosyur nga Tagamtama ang Kinabuhi sa Yuta sa Walay Kataposan! sa ilang kaugalingong pinulongan maoy usa ka dako nga okasyon. Dili lamang kini ang bugtong publikasyon sa Watch Tower diha sa Mahorianong pinulongan kondili mao usab kini ang bugtong publikasyon nga mabatonan sa pagkakaron sa maong pinulongan. Kini adunay Arabiko nga sinulatan nga gisulat sa ubos sa Romano nga letra. Ang mga tawo nakakat-on sa Arabic nga sinulatan sa tunghaan apan dili ang Arabic nga pinulongan. Sila makalitok ug mga pag-ampo sa Arabic ug makabasa sa Koran diha sa Arabic; apan sila dili makasabot sa ilang ginalitok. Samtang ilang basahon ang Arabic nga sinulatan diha sa brosyur, sila natingala nga sila makasabot man niini. Ang ilang gibasa sa aktuwal mao ang ilang kaugalingong Mahorianong pinulongan nga gisulat diha sa Arabic nga sinulatan. Usa ka kalipay nga makita ang ilang nawong nga modan-ag samtang ilang masabtan ang ilang ginabasa.
Ang brosyur dali nga mapahimutang uban sa mga tawo. Sa usa ka halayong mga balangay, usa ka lalaki miduol kanamo samtang among gisangyawan ang usa ka babaye. Siya misugod sa pagsulti nga kusganon kaayo ngadto sa among igsoon diha sa Mahoriano. Alang kanamo siya maorag supak kaayo. Ang tawo nagpadayon, uban ang labihang pangumpas. Ang igsoon sa ulahi nagpatin-aw nga ang tawo nagreklamo: “Sa unsang paagi makadahom kamo nga among mahinumdoman ang mga butang nga inyong isulti kanamo nga mobisita man lang kamo namo kausa sa usa ka tuig? Sa unsang paagi makadahom kamo? Kamo kinahanglang moduaw kanunay aron makigsulti kanamo niining mga butanga.”
Kadtong panapos nga mga pulong nagpahayag sa among mga hunahuna usab. Si Jehova tinong nagatigom sa tilinguhaong mga butang sa tanang mga nasod pinaagi sa maayong balita sa Gingharian. Bisag gibulag sa dakong hawan sa kadagatan, ang mga islahanon nagadugang sa ilang mga tingog ngadto sa kusganong singgit sa pagdayeg nga gitanyag ngadto sa ilang Magbubuhat ug langitnong Amahan, si Jehova nga Diyos.—Hageo 2:7.
[Mapa sa panid sa panid 21]
(Alang sa aktuwal nga pagkahan-ay, tan-awa ang publikasyon.)
SEYCHELLES
INDIAN OCEAN
COMOROS
MAYOTTE
MADAGASCAR
MAURITIUS
RÉUNION
RODRIGUES
[Hulagway sa panid 23]
Ang batoong punta sa Praslin, Bay St. Anne
[Hulagway sa panid 24]
Ang karomatang “taksi” sa La Digue, Seychelles
[Hulagway sa panid 25]
Pagsangyaw uban sa bag-ong brosyur sa Mayotte