Kaumahan nga Hinog na Aron Pagaanihon sa Brazil
“IYAHAT ninyo ang inyong mga mata ug lantawa ninyo ang kaumahan nga hinog na aron pagaanihon. Ang mga mag-aani nagadawat na ug suhol, ug nagahipos ug bunga alang sa kinabuhi nga dayon.” (Juan 4:35, 36) Ang maong matagnaong mga pulong ni Jesu-Kristo matuod karong adlawa diha sa halayong mga dapit sa halapad nga nasod sa Habagatang Amerika sa Brazil.
Sa daghang katuigan ang mga Saksi ni Jehova sa Brazil nagapahimulos ug maayong mga pag-uswag. Sa Abril 1991, ang kinatas-ang ihap nga 308,973 ka mag-aani sa Gingharian nakadumalag kapin sa 401,574 ka pagtuon sa Bibliya sa balay. Niadtong Marso 30, 1991, ang total nga 897,739 ka tawo ang nagtigom sa pagsaulog sa kamatayon ni Jesus, ang usa nga maoy nagsugod sa buluhatong pag-ani.
Bisan pa sa maayong mga resulta, ang bahin sa kaumahan naghulat gihapon nga pagaanihon. Kapin sa lima ka milyong katawhan nagpuyo sa mga dapit sa Brazil diin diyutay o kaha walay buluhatong pagsangyaw ang gihimo sa mga Saksi ni Jehova. Unsay gihimo aron maabot ang pagpangani niining mga dapita?
Mga Payunir nga Nagapangani
Sa dili pa dugay nga unom-ka bulang yugto, ang sangang buhatan sa Watch Tower Society sa Brazil nagpadalag bug-os panahong mga magmamantala sa Gingharian—100 ka temporaryong espesyal payunir ug 97 ka regular payunir—ngadto sa 97 ka lungsod, kadaghanan diha sa daghag populasyon sa sidlakang bahin sa nasod. Ang mga magmamantala sa Gingharian gikan sa nagkalainlaing mga kongregasyon mibolunter usab sa pagsangyaw dinhi ning dapita sa mubong mga panahon. Bisan pa sa mga babag nga kinahanglang buntogon, ang mga resulta makatagbaw.
Pananglitan, sa São João da Ponte, sa estado sa Minas Gerais, ang mga payunir miduaw sa magtutudlo sa relihiyon diha sa lokal nga tunghaan. Human nakadungog sa mensahe, siya mipididog 50 ka kopya sa librong Ang Imong Pagkabatan-on—Pagpahimulos sa Labing Maayo Niini alang sa iyang klase sa katekismo. Laing magtutudlo misulti sa talilakaw nga mga payunir: “Dili angay molakaw kamo, sanglit maayo kaayong buluhaton ang inyong gihimo dinhi. Kamo lamang ang makahatag ug tin-aw nga pagsaysay sa Bibliya.”
Dili tanan ang nalipay niining maayong buluhaton. Pananglitan, tagda ang sulat nga gipatik diha sa usa ka lokal nga mantalaan (Diário de Montes Claros) ubos sa ulohan sa unang panid “Pari Giakusar nga Nagpukaw ug Kabangisan ug Pagpihig.” Ang sulat nag-ingon: “Diha sa simbahan, [ang pari] naanad na sa pagsaway sa mga tawo nga nagsunod sa ubang mga sekta ug mga relihiyon, bisan pag walay igong Katoliko ug Kristohanong pagtultol ang gihatag sa pari labot sa Ebanghelyo alang sa mga matinumanon. Diha sa Misa, iyang giatake ang mga ministro sa mga Saksi ni Jehova nga nangabot sa lungsod, bisag maayo ang ilang pagtagad sa mga Katoliko.” Wala magpakitag kasilag, ang magsusulat sa artikulo (usa ka teologo) mitambong sa pakigpulong sa Bibliya nga gipahayag sa mga payunir ug nagdala usab ug mga interesado. Silang tanan nalipay sa tigom.
Upat ka igsoon gikan sa Fortaleza mibiyahe sakay sa ayroplano paingon sa Fernando de Noronha Island, 400 kilometros gikan sa kinadak-ang isla. Ang 1,500 ka molupyo sa isla wala makadawat sa maayong pagpamatuod kapin sa 15 ka tuig. Sulod sa napulo ka adlaw ang mga igsoon nakapahimutang ug 50 ka libro ug 245 ka magasin ug mga brosyur, ug sila nakasugod ug 15 ka mga pagtuon sa Bibliya. Napulog duha ka tawo ang mitambong sa Memoryal sa kamatayon ni Kristo, nga gihimo sa panahon sa pagduaw. Ang mga payunir naglaom nga uban sa tabang ni Jehova ang buluhaton sa dili madugay lig-ong matukod didto. Ang ubang mga igsoon nagpalandong sa pagbalhin ngadto sa isla.
Ang Impluwensiya sa Klero Nakaapektar sa Pagpangani
Ang usa ka pundok sa mga magmamantala sa Gingharian sa Kongregasyon sa Arpoador sa Rio de Janeiro miboluntaryo sa paggugol ug duha ka semana sa pagsangyaw sa daghang lungsod sa estado sa Minas Gerais, hapit 200 kilometros ang kalay-on. Sa ilang kalipay ilang nakita ang lokal nga mga tawo nga maabiabihon ug maluluton kaayo. Ang mga lalaki may batasan nga tangtangon ang ilang mga kalo sa matag higayon ang Diyos o ang iyang ngalan, Jehova, hisgotan. Tungod sa ilang pagtahod sa Diyos, hinunoa, sila daling maimpluwensiyahan sa pari.
Diha sa usa ka lungsod gitambagan sa pari ang mga tawo sa dili pagpamati sa mga Saksi ni Jehova o sa pagtambong sa tigom nga ilang giplanong himoon. Siya nag-iskedyol usab ug espesyal nga Misa sa samang panahon sa tigom, ug ang Misa kusog kaayong gipalanog sa gawas sa iyang simbahan. Apan, bisan pa sa iyang mga paningkamot, 29 ka lokal nga mga molupyo ang mitambong sa tigom, dugang pa sa mga bisita.
Lahi kaayo ang usa ka kanait nga lungsod. Didto gisultihan sa pari ang mga tawo sa pagpamati kon moduaw ang mga Saksi. Ang resulta mao nga 168 ka tawo ang mitambong sa unang tigom. Sa ulahi, iyang gisultihan sila sa pagpamati sa mga Saksi ni Jehova nga magsaulog sa Memoryal tungod kay, matud pa niya, “gihimo nila kini sa hustong paagi.” Sulod sa duha ka semana sa buluhatong pagsangyaw sa Gingharian sa maong lugar, 1,014 ka libro ug 1,052 ka magasin ug brosyur ang napahimutang.
Padayong mga Paningkamot Nagpatunghag mga Panalangin
Sa milabay ang usa ka bulan 34 ka magmamantala sa Gingharian mibalik aron sa pag-atiman sa mga pagtuon sa Bibliya sa panahon sa unang pagduaw. Ang Kristohanong ansiano nga nanguna misulat: “Makalilipay kaayo ang pagtan-aw sa mga interesado sa pag-abiabi kanamo uban ang pasalamat ug mga luha sa kalipay sa ilang mga mata.” Ang usa ka igsoong babaye nahinumdom nga giduol siya sa usa ka babaye ug sa ubang mga Saksi ni Jehova sa usa ka kan-anan si kinsa “mihangyo, nga may mga luha sa iyang mga mata, aron kami moadto ug tun-an siya.” Laing babaye nagtuon tulo ka higayon sa semana nga didto ang mga Saksi. Sa matag higayon, andam na siya sa iyang mga leksiyon ug naghulat sa pagtuon. Ang babaye miingon nga siya nagsugod sa pag-ampo sa matuod nga Diyos, si Jehova. “Diha sa akong kasingkasing mao gayod kini ang dugay na nakong gihulat,” siya midugang.
Sa kataposan, duha ka payunir ang gitudlo didto sa pag-atiman sa interes sa maong lugar. Sama sa unang siglo K.P., “kadtong matinguhaon alang sa kinabuhing dayon nangahimong mga magtutuo.” (Buhat 13:48) Ug sama sa babayeng Samarianhon nga gisangyawan ni Jesus diha sa atabay ni Jacob, sila nagsugod sa pagsulti ngadto sa uban mahitungod sa ilang nakat-onan. (Juan 4:5-30) Karong adlawa ang 2 ka payunir adunay kauban nga 6 pa nga nag-alagad uban kanila, ug 20 ka tawo ang kasagarang nagtambongan sa senemanang mga tigom.
Maikagon kaayo labot sa kalamposan niining linain nga buluhaton, ang 29 ka magmamantala sa Kongregasyon sa Arpoador miadto aron sa pagsangyaw sa lungsod sa Mutum, mga 500 kilometros ang kalay-on. “Talagsaon kaayo ang pagsanong,” miingon ang ansiano nga nanguna sa grupo. “Ang kadaghanang mga tawo namati pag-ayo ug maikagon nga 170 ka pagtuon sa Bibliya ang nasugdan, ug nagtuo kami nga daghan kanila ang magpadayon.” Sa duha ka semana ang mga magmamantala nakasangyaw sa aberids nga 90 ka oras matag usa ug nakapahimutang ug duolan sa 1,100 ka literatura diha sa mga tawo. Ang labing taas nga 181 ang mitambong sa mga pakigpulong publiko nga gihatag sa mga igsoon.
Sa milabay ang mga bulan, nag-abang ang kongregasyon ug maanindot nga balay sa sentro sa Mutum aron magamit ingong Kingdom Hall ug balay sa payunir. Ang unang taho nga gipadala ngadto sa Sosyedad sa duha ka igsoong babayeng payunir nga gitudlo didto sa lakbit mabasa: “Uban sa daghan kaayong mga pagtuon nga nasugdan, kami nagkinahanglag dugang pang mga payunir. Bisan sa tabang sa mga igsoon gikan sa Rio de Janeiro kausa sa usa ka bulan, ang buluhaton dako kaayo. Siyam gikan sa napulo ka tagbalay nga among napakigsultihan mihangyo kanamo sa pagbalik. Nagkinahanglan usab kamig tabang sa pagdumala sa mga tigom.” Laing payunir karon miuban kanila.
Mga Kinabuhi Nabag-o
Makapadasig kaayo ang pagtan-aw sa kamatuoran sa Bibliya nga migamot ug nagapamungag maayong bunga. Ang usa ka tawong interesado misulat: “Ang pagkabaton niini nga kahibalo sa Bibliya mao ang labing maayong butang nga nahitabo kanako sukad. Ang akong kinabuhi nabag-o sa maayo, wala na ako magkinahanglang motomar pag pangpakalma. . . . Hinaot gantihan kamo ni Jehova sa inyong tanang gihimo alang kanako.”
Laing indibiduwal miingon: “Natingala gayod ako sa paagi sa pagbukas ni Jehova sa akong mga mata. Bisag namatyan ako ug apohan niining semanaha, ako karon dunay paglaom nga makakita pa kaniya pag-usab. Nagpaabot ako nga mabawtismohan, apan gusto kong mahanas pag-ayo una. Hinaot nga panalanginan kamo ni Jehova sa pag-anhi dinhi aron ipakita kanamo ang hiktin nga dalan nga nagatultol sa kinabuhing dayon.” Laing tawo miingon: “Buot kong masayod kamo nga mihunong na ako sa pagpanabako usa na ka bulan. Malipayon kaayo ako sa magasing inyong gipadala kanako. Kini nasudlan ug daghan kaayong mga butang nga nakatabang kanako sa pagbuhat sa ingon.” Matuod, ang pag-ani naghatag maayong katarongan sa pagsadya.
Ugaling, ang maong mga panalangin wala moabot nga walay kalisod. Pananglitan, sa dihang ang usa ka babaye ug ang iyang anak nga babaye misugod sa pagtuon, gipasidan-an sila sa lokal nga pari nga kon moadto sila sa mga tigom sa mga Saksi, iyang iekskomunikar sila sa simbahan. Wala magtagad sa hulga, sila miadto sa mga tigom. Sa maong panahon giayran sila sa ilang mga higala kanhi, giakusar sila sa pipila nga nabuang tungod kay “kana nga Jehova” dili makita diha sa Katolikong Bibliya. Sanglit ang babaye wala man makakita sa ngalan ni Jehova diha sa iyang Katolikong Bibliya, iyang gidapit ang iyang mga silingan sa pagduaw kaniya sa adlaw sa iyang pagtuon uban sa mga payunir. Usa ka babaye ang miabot uban sa iyang Catholic Paulinas nga bersiyon sa Bibliya. Sa dihang iyang nabasa ang ngalan sa Diyos diha sa potnot sa Exodo 6:3, siya midawat ug pagtuon sa Bibliya sa iyang balay.
Pakigbahin sa Bug-os sa Pagpangani
Unsay epekto sa pag-alagad diha sa panagsa rang masangyawan nga teritoryo sa mga mamumuo mismo? Ang usa ka magmamantala sa Gingharian miingon: “Kining buluhatona nag-alagad sa paglig-on sa among pagtuo ug sa among relasyon kang Jehova ug nakatabang kanamo sa pagbag-o sa mga butang nga pagaunahon sa kinabuhi.” Laing magmamantala miingon: “Kadtong 14-ka-adlaw nakapauswag sa akong gugma sa akong mga igsoon, kinsa nag-alagad ingong usa ka pamilya nga adunay usa ka tumong: sa pagpangita sa dugang pang mga maaghop. Kini nakadugang sa akong gugma sa mga tawo nga midawat sa among mensahe, nga kasagaran uban sa mga luha sa ilang mga mata, nga nagpakitag tinuod nga kauhaw sa kamatuoran. Ug labaw sa tanan, akong nabati ang gugma ni Jehova sa paghatag kanamo sa pribilehiyo sa pag-alagad kaniya.”
Gipunting sa usa ka ansiano nga nakigbahin sa pagsangyaw diha sa panagsa rang masangyawan nga teritoryo ang kalainan sa kinabuhi didto ug sa dagkong mga siyudad. Siya miingon: “Dili ako makapugong sa pagpalandong sa pagkadaghang kinabuhi sa mga igsoon ang mapalambo pinaagi sa pagbalhin ngadto sa mga lugar sa interyor. Halos walay kabangisan dinhi. Ang kinabuhi diha sa gamay ug kasarangang gidak-ong mga lungsod nakahimo kanamo dili lang sa pagkinabuhi sa mas gamay nga kita kondili sa pagbaton ug dugang panag-ubanay sa among mga igsoon ug sa paggugol ug dugang panahon sa espirituwal nga mga kalihokan. Makahimo ba ang dugang retiradong mga igsoon, mga batan-on nga wala kaayoy kaakohan sa pamilya, o mga igsoon kansang trabaho makatugot kanila sa pagdawat niining talagsaong pribilehiyo ug makahatag kalipay sa ilang kaugalingon, kang Jehova, ug sa ilang silingan?”
Kining taho labot sa panagsa rang masangyawan nga teritoryo sa Brazil nagpamatuod nga ang kaumahan hinog na aron pagaanihon. Sa duha lamang ka tuig, ang buluhaton niini nga kaumahan misangpot ug 191 ka bag-ong kongregasyon ug hilit nga mga grupo. Daghan pa kaayo ang buluhaton, apan tino nga magpadayon si Jehova sa paghatag sa iyang mga panalangin samtang dugang mga magmamantala sa Gingharian ang makigbahin sa mabungahong pagpangani. Ikaw makahimo ba sa dugang nga pakigbahin niana?
[Mapa/Hulagway sa panid 25]
Malipayong mga Saksi nga gikan sa Rio de Janeiro nakigbahin sa pagpangani
[Mapa]
(Alang sa aktuwal nga pagkahan-ay sa teksto, tan-awa ang publikasyon)
BRAZIL
[Hulagway sa panid 26]
Pagsangyaw diha sa banika sa Minas Gerais