Pagpanaksi sa Pransiya—Yuta sa Kadaiya

YUTA sa dakong kadaiya ang Pransiya. Harianong kabukiran, balodbalod nga kabungtoran, gibanlas-unos batoong kapangpangan, init balasong kalapyahan, bukas nga mga darohan sa lugas, gagmay kinoralan-tanom nga kaumahan, halapad nga kaparasan, sibsibanan, kalasangan sa kanunay-lunhaw nga pino ug madagdagon, kabalangayan, kabaryohan, kalungsoran, dagko modernong kasiyudaran—ang Pransiya tanan niini, ug daghan pa.

Bisan pa dakong bahin sa kabanikanhan miretiner sa katahom niini, ang sosyal Pranses nga talan-awon tuling nagakausab sa bag-o pang mga tuig. “Ang Pranses nga katilingban wala milatas sa yugto sa krisis,” matod sa edisyon 1989 sa Francoscopie, “apan milatas sa matuod nga pag-alsa. Ang mga estrukturang sosyal, mga prinsipyo, mga sukdanang kultural, ug mga tinamdan nakaagom sa lalom nga kausaban sa mas tulin nga paso.”

Apektado usab ang relihiyosong natad niining kusganong kausaban. Bisan pag ang Katolisismo sa gihapon ang relihiyon sa dakong mayoria, kini karon labaw ingong tradisyon inay relihiyon nga dunay bisan unsang matuod nga impluwensiya sa kinabuhi sa kadaghanang membro. Ang dugang kawalay pagtagad sa katawhan sa espirituwal nga mga sukdanan mipahunong sa pagtubo sa mga simbahan.

Sa dakong kasukwahi, ang kalihokan sa mga Saksi ni Jehova sa Pransiya tulin nga naglihok paunahan sulod sa miaging pipila ka tuig. Gikan sa Alsace sa amihanan-silangan ngadto sa Brittany sa Atlantiko, gikan sa habog nga Alps ngadto sa ubos nga Walog Loire, bisan sa pulo sa Corsica sa Mediteranyo, atubangon sa mga Saksi ang lainlaing sirkumstansiya ug mahibalag ang mga tawo uban sa lainlaing kagikanan. Pasagdi nga mopanaw kita sa hulagway ug tan-awon kon unsa ang kasama sa pagwali sa maayong balita sa Gingharian sa Pransiya, ang yuta sa kadaiya.​—Mateo 24:14.

ALSACE

Sa utlanan sa Alemanya, ang Alsace usa ka probinsiya nga ilado sa kaparasan niini ug sa matahom puno-bulak nga kabalangayan. Ang Strasbourg, kabisera niini, nahimong kuta nga Protestante sukad sa Repormasyon, ug ang mga taga-Alsace sagad may himsog nga pagtahod sa Bibliya. Ang mga Saksi ni Jehova nagwali na sa maayong balita sa Gingharian niining rehiyon sukad sayo niining siglo. Karon, ang bulohaton lig-on na pagkatukod, ingon gipakita sa kasinatian sa usa ka batan-on nga ginganlan Sylvie, nga mipahimulos sa oportunidad sa pagwali sa tunghaan.

Sa usa ka hisgot uban sa mga kasaring, gipatungha ni Sylvie ang katuyoan sa kinabuhi ug ang mga paglaom sa umaabot. Usa ka batang lalaki supisyente nga nainteres sa pagtugot kang Sylvie ug sa laing Saksi sa pagduaw kaniya sa balay. “Bisan pa kining Katolikong batan-on usa ka boy sa altar, daghan ang iyang mga pangutana nga sukad masukad wala matubag,” matod ni Sylvie. “Among gigamit ang Bibliya sa pagtubag sa pipila kanila, ug iyang gidawat ang regular nga pagtuon sa Bibliya.” Ang batan-ong lalaki gibawtismohan usa ka tuig sa ulahi ug human mahimong kalipikado misulod sa bug-os panahon nga ministeryo ingon regular payunir. Si Sylvie usab misulod nianang pribilihiyo sa pag-alagad.

BRITTANY

Mituybo ngadto sa Atlantiko, ang Brittany usa ka probinsiya sa kusganon Katolikong tradisyon. Bisan pa, pinaagi sa makanunayong paningkamot sa mga Saksi, dugang gidaghanon sa katawhan niining dapita midawat sa mensahe sa Gingharian. Nia ang usa ka panig-ingnan kon unsa ang nagkahitabo niining amihanan-kasadpang rehiyon sa Pransiya.

“Usa ka batan-ong magtiayon milbalhin sa apartment sa among itaas,” mitaho ang usa ka lokal nga Saksi. “Usa ka panahon sa ulahi, akong nahibalag ang batan-ong babaye sa hagdanan, uban sa anak nga lalaki nga gikugos. Sa pagkahibalo nga ang iyang ngalan Jonathan, nangutana ako kon nahibalo ba siya sa sinugdan nianang ngalan. ‘Gikan tingali kini sa Bibliya, apan mao ra kana ang akong nahibaloan,’ tubag niya. Namati siya sa saysay nga akong gitanyag, ug miingon siya nga siya ug ang iyang bana naintriga sa Bibliya. Bisan pa kami dunay dugang kokabildo, walay butang tinong naugmad niadto.

“Usa ka tuig sa ulahi, ang magtiayon nangayo kanako ug tambag sa pipila ka problema. Akong gigamit ang Bibliya pagtubag, ug nadani sila sa impormasyon nga gitanyag niini. Makausa pa akong gidapit sila sa pagtuon sa Bibliya. Sunod adlaw ang batan-ong babaye midawat. Pipila ka semana sa ulahi, ang iyang bana miduyog sa pagtuon. Karon silang duha bawtismadong mga Saksi na.”

ANG ALPS

Ang Alps nabantog sa matahom nga talan-awon. Ang mga tawo moadto didto sa paghibulong sa harianong mga tumoy sa kabukiran, labi na sa Mont Blanc, ang kinatas-ang tayuktok sa Kasadpang Europa. Niining rehiyon usab, ang gidaghanon sa mga magmamantala sa Gingharian nga naghimaya sa Maglalalang miuswag. Ang mga tawo sa tanang panuigon ug gikan sa tanang lakaw sa kinabuhi miduyog sa ilang mga ranggo, ingon gipakita sa mosunod nga talaan.

Upat ka batan-on nianang dapita may igoigong rekord. Nangawat sila ug mga sakyanan ug ubang butang, sagad mahubog, mogamit ug mobaligya sa mga droga, ug nalangkit sa prostitusyon ug espiritismo. Walay ilang trabaho ug kanunay makabangga sa kapolisan, ug silang tanan nakaagi ug priso. Bisan pa, tanang upat nakadungog na sa kamatuoran sa ilang pagkabata sanglit ang ilang mga pamilya mituon uban sa mga Saksi ni Jehova matag karon ug unya.

Human sa pipila ka tuig sa patuyang nga kinabuhi, usa sa mga batan-on miusab sa kasingkasing ug mihukom sa pag-alagad kang Jehova. Gipahinabo niini ang reaksiyon ingon sa kadena. Usa ka adlaw ang kapolisan dunay rutina nga pagsusi, ug ilang gipangutana ang usa sa mga batan-on sa pag-abli sa iyang bag. Gidahom nga makakaplag ug droga o kinawat nga mga butang, nahingangha sila sa pagkaplag lamang ug Bibliya ug pipila ka pulyeto. Gigamit sa batan-ong lalaki ang Bibliya sa pagpatin-aw kon unsa ang nakapahinabo sa kausaban sa iyang kinabuhi. Nakakaplag niini nga lisod tuohan, usa sa kapolisan nangutana: “Buot nimong ipasabot nga dili ka na manigarilyo, moinom, o motomar ug droga?” Sa kaulahian gidawat sa polis ang pagpatin-aw ug gipalakaw siya nga wala nay kuskos pa. Karon kining upat ka batan-ong lalaki bawtismado na, ang tanan nag-alagad sa kongregasyon ingon ministeryal nga mga alagad, ug tulo kanila mga regular payunir.

WALOG LOIRE

Ang Walog Loire gitawag ang hardin sa Pransiya. Gikan kini sa Orléans, 110 ka kilometro habagatan sa Paris, ngadto sa bukana sa Suba Loire sa Kabaybayonan Atlantiko. Kining rehiyon ilado sa daghang kastilyo niini, kanhi mga residensiya ug mga abutan sa pagpangayam sa mga harianon. Dunay mga kongregasyon sa mga Saksi ni Jehova sa tanan dagkong lungsod niining dapita.

Sulod sa reses sa tunghaan usa ka adlaw, ang diyotay nga Emma, usa ka unom-tuig mahigalaon ug mahigugmaon batang babaye, mibalik sa iyang lawak-saring aron sa pagtimbaya sa iyang maestra. Napugwat nga ang iyang maestra nanigarilyo, mihilak siya ug midagan. Gigukod siya sa maestra ug nangutana ngano siya mihilak, apan si Emma dili mosulti sa bisan unsa. Sa dihang ang maestra miinsister, mibakho si Emma ug mitubag: “Tungod kay nanigarilyo ka. Masakit ka ug mamatay!”

Sunod adlaw gitawag sa maestra ang inahan ni Emma ug gisultihan siya nga natandog siya sa reaksiyon sa iyang anak babaye. Busa gisaysay sa inahan ang baroganan sa mga Saksi mahitungod sa tabako. Unya ang maestra mitug-an nga ang iyang pamilya mihangyo na kaniya sa paghunong na sa pagpanigarilyo, apan wala kini mosaler. Niining panahona, bisan pa, labihan siya nga natandog sa tunay nga sanong ni Emma nga mihunong siya sa pagpanigarilyo sulod lamang sa duha ka adlaw.

CORSICA

Ang isla sa Corsica, bisan pa gitawag “ang humot nga isla,” ilado usab sa kusganong espiritu sa mga pumuluyo niini, nga sagad miresulta sa duguon nga mga panimalos. Sulod sa katuigan ang mga Saksi giisip ingon usa ka relihiyon “gikan sa Kontinente.” Bisan pa, ang gahom sa kamatuoran sa Bibliya miusab sa mga kasingkasing sa daghan didto.

Usa ka bag-o gibawtismohan nga Saksi miasoy nga makausa siya mipauli gikan sa bakasyon nadiskobre niya nga ang tanang portabol nga mga gamit sa iyang uma gikawat. “Pinaagi sa pagsalig kang Jehova,” mitug-an siya, “lahi ang akong reaksiyon kay sa akong reaksiyon unta sa miagi.” Samtang nakigsulti sa iyang mga silingan, kalma nga iyang gihisgotan ang nawala kaniya.

“Sa ulahi, ang pipila ka silingan dunay mga problema. Gibiyaan nako ang akong trabaho ug miadto sa pagtabang kanila. Pipila ka adlaw sa ulahi, ako nakadawat ug tawag sa telepono gikan sa usa kanila sa pag-anha sa labing madali. Naghunahuna nga siya naproblema na usab, miadto ako sa gilayon. Iyang gidapit ako sa paglingkod ug nangutana: ‘Nahibalo ka ba ngano ako mihangyo kanimo sa pag-anhi? Mahitungod kini sa imong mga gamit. Ako mao ang mikawat kanila. Apan sa dihang nakita ko ang imong maloloton ug mahigalaong tinamdan, miingon ako sa akong kaugalingon, “Dili nako kana mahimo kaniya!” Ug human nimo kami tabangi, dili na ako makatulog sa gabii.’” Ang matuod nga Kristiyanidad kon ipadapat mosangko sa maayo.

Pagkatapos sa ikaduhang gubat sa kalibotan, sa dihang gibuksan pag-usab ang bulohaton sa pagsangyaw sa Gingharian sa Pransiya, duna lamang 1,700 ka Saksi sa tibuok nasod. Ang tahas sa pag-abot sa entiro populayon uban sa mensahe sa Gingharian daw imposible. Bisan pa, latas sa katuigan, gipanalanginan ni Jehova ang iyang katawhan sa Pransiya uban sa kinahanglanong mga gamit—mga planta sa pagpatik, mga Kingdom Hall, mga Assembly Hall, ug uban pa—ug ang masinugtanong espiritu sa pagtuman sa tahas. Karon, uban sa kapin 117,000 ka aktibong magwawali, ang mensahe nga ang Gingharian ni Jehova pinaagi ni Kristo mao lamang ang bugtong paglaom sa katawhan giwali latas niining yuta sa kadaiya.

[Mapa/Hulagway sa panid 23]

(Alang sa aktuwal nga pagkahan-ay, tan-awa ang publikasyon)

FRANCE

BRITTANY

LOIRE VALLEY

THE ALPS

ALSACE

ATLANTIC OCEAN

MEDITERRANEAN SEA

ENGLISH CHANNEL

CORSICA