Pagmantala sa Maayong Balita Diha sa “Polynesianhong Siyudad” sa New Zealand

“ANG Kinadak-ang Polynesianhong Siyudad sa Kalibotan.” Kana maoy pagtawag sa uban sa kaulohan sa Auckland sa New Zealand. Ngano? Dili lamang tungod kay kaugalingong pinuy-anan kini sa mga Polynesianhon sa New Zealand, ang Maori, kondili tungod kay tinagpulo ka libo pang mga Polyne­sianhon ang nagpuyo didto. Sa mga katuigang dili pa dugay, sila milalin gikan sa Western Samoa, sa Cook Islands, Tonga, Niue, ug ubang mga isla sa Pasipiko. Gani, karon aduna nay mas daghang Cook Island Maori sa New Zealand kay sa tanang ubang mga grupo sa Cook Island mismo! Sa susama, ang mga molupyo sa Niue sa Auckland nalabwan sa gidaghanon niadtong anaa sa Niue.

Bisan pag kining mga islahanon sa Pasipiko mibalhin ngadto sa Auckland tungod sa ekonomikanhong mga katarongan, sila usab adunay ubang mga panginahanglan nga tagan-an. Ang importante alang niining mga katawhan nga mahigugmaon sa Bibliya mao ang ilang espirituwal nga panginahanglan. (Mateo 5:3) Nakaamgo niini, ang mga Saksi ni Jehova sa New Zealand mihimog igong paningkamot sa pagmantala sa “maayong balita sa gingharian” diha niining mga islahanon. (Mateo 24:14) Unsa ang gihimo niining bahina, ug sa unsang paagi misanong ang mga islahanon?

Ang mga Taga-Samoa Mauswagon

Ang komento nga gipahayag sa usa ka misyonaryo sa Samoa mopadayag kanato bahin sa panglantaw sa mga islahanon sa espirituwal nga mga butang. “Dihang una mong mahinagbo ang usa ka taga New Zealand, kustombre na ang pagpangutana bahin sa iyang sekular nga trabaho,” siya misaysay. “Sa Samoa ang unang pangutana nga kasagarang ibangon may kalabotan gayod sa imong gianibang relihiyon.” Busa, dili ikahibulong nga ang duha ka nagasultig-Samoano nga kongregasyon sa mga Saksi ni Jehova sa Auckland mas kusog nga miuswag kay sa kasarangang kongregasyon sa New Zealand.

Ang unang Samoano nga kongregasyon sa Auckland natukod niadtong 1977. Tungod sa hinatag sa Diyos nga kauswagan, ang ikaduhang kongregasyon natukod pito ka tuig sa ulahi. (Itandi ang 1 Corinto 3:6.) Diha niining duha ka kongregasyon, adunay total nga 154 ka magmamantala sa Gingharian, 12 kanila ang aktibo sa bug-os panahong ministeryo. Sa kasagarang adlaw nga Dominggo, kapin sa 275 ka tawo ang tigtambongan sa gipasukad sa Bibliya nga mga miting nga gihimo sa Kingdom Hall.

Ang taga Samoa nga mga igsoong lalaki ug babaye seryoso sa ilang pagtuo, sama sa gipasundayag sa kasibot ug determinasyon nga ilang gipakita diha sa ilang pagsangyaw sa Gingharian ug sa buluhatong paghimog mga tinun-an. (Mateo 28:19, 20) Kini makita gikan sa mosunod nga eksperyensiya sa usa ka taga Samoa nga igsoong babaye:

Diha sa balay-ug-balay nga ministeryo, ang sister nakatagbog usa ka babaye nga nagtawag sa tanang relihiyon nga salingkapaw ug gisira ang pultahan. Nakurat ug nabalo, naglibog ang sister kon unsay buhaton. ‘Dili nako siya biyaang maghunahuna nga ang mga Saksi ni Jehova mga salingkapaw,’ siya naghunahuna. Busa siya mihukom sa pagbilin kaniya ug mubo nga sulat. “Sa mubo akong gipatin-aw ang Kasulatanhong pasikaranan sa akong buluhaton ug mihangyo nga hatagan niya ako ug panahon aron ipatin-aw ang paglaom nga gitanyag sa Bibliya. Gilakip ko usab ang numero sa akong telepono.”

Unya ang sister nagpadayon sa iyang ministeryo, giduaw ang ubang mga balay. Sa nakaabot siya sa ikaupat nga balay, siya gihatagan ug mensahe sa telepono sa pagbalik ngadto sa babaye nga nasuko nga misira sa pultahan nga sayosayo pa. “Ang babaye nangayog pasaylo sa iyang reaksiyon sa sinugdan,” miasoy ang sister, “ug mipahayag ug apresasyon sa mubong sulat nga akong gibilin. Usa ka mabungahong panaghisgot ang misunod, ug natukod ang usa ka pagtuon sa Bibliya.”

Makapadasig usab nga makita ang masakripisyohon sa kaugalingon nga misyonaryong espiritu nga gipakita sa ubang mga Saksi nga taga-Samoa. Usa ka igsoong lalaki ug ang iyang pamilya milalin gikan sa Auckland ngadto sa Welling­ton sa 1981 aron sa pagtabang sa gamay nga grupo sa buluhaton taliwala sa molupyong mga Samoano didto. Gikan sa unang pundok sa 11 ka magmamantala sa Gingharian sa maong panahon, usa ka kongregasyon sa 47 ka magmamantala ang natukod. “Ang mga ganti milabaw pag-ayo sa mga paghago,” matud sa igsoon. Dili pa dugay, siya ug ang iyang pamilya misanong sa ‘Panawag sa Macedonia’ ug mibalhin pag-usab ngadto sa Western Samoa. (Isaias 16:9, 10) Ang uban usab mibalik ngadto sa ilang mga dapit nga gipuy-an niadto ug misulod sa espesyal nga payunir, misyonaryo, o Bethel nga pag-alagad.

Ang Pagsanong sa mga Taga-Niue

Ang buluhatong pagsangyaw mauswagon usab taliwala sa mga taga-Niue sa Auckland. Ang nagapanaw nga magtatan-aw mitaho: “Diha sa balay-ug-balay nga ministeryo, kustombre na nga dapiton ka sa pagsulod. Ang Bibliya sa pamilya anaa kanunay, ug giisip nga normal ang paghisgot niini.”

Karon aduna nay usa ka aktibo kaayong kongregasyong Niueano sa Auckland. Sa panahon sa pagduaw sa nagapanaw nga magtatan-aw sa miaging tuig, ang 76 ka magmamantala sa Gingharian nga sakop niana nakaabiabi ug 127 ka tawo sa pahayag publiko sa Bibliya sa Dominggo. Ug anaa ang maayong espiritu diha sa mga igsoong lalaki ug babaye.

“Ang pagduaw gilantaw ingong usa ka espesyal nga semana sa pagdasig sa tanan,” miingon ang nagapanaw nga magtatan-aw. “Ang matag pangaon maoy kahikayan sa kongregasyon. Ug kini mao ang mga okasyon nga idulot ang kinaham nga mga pagkaong Niueano sama sa takihi (pagkaong sinaktan ug mga papaw [kapayas], taro [ube], ug nata sa lubi nga pinutos sa dahon sa saging), pitako (usa ka tinapay nga hinimo sa ube, saging, ug tapioca), ug punu povi (linata nga karnenorte) nga usahay kinomedyang ginganlan sa mga islahanon nga porter­house steak.”

Polynesianhon-ug-Pinulongang mga Publikasyon

Aron matagan-an ang espirituwal nga mga panginahanglan sa Polynesianhong populasyon sa Auckland ug sa ubang dapit, ang Watch ­Tower Soci­ety naghikay sa pagpatik ug igong mga publikasyon sa Bibliya sa mga pinulongan sa Polynesia. Pananglitan, ang Rarotongan, o Cook Island Maori, nga Watchtower gipatik makaduha sa usa ka bulan. Ang binulang Niueano nga Watchtower gidawat usab ug maayo. Ang sirkulasyon sa Rarotangan ug Niueano nga mga edisyon sa The Watchtower sa pagkakaron maoy duolan sa 1,000 ka kopya ang matag usa, ug mga 900 ka kopya sa edisyong Samoano ang giapod-apod karon sa New Zealand.

Dugang pa sa The Watchtower, daghang mga libro ug mga brosyur ang mabatonan diha sa nagkalainlaing mga pinulongan sa Polynesia. Ang librong Ang Kamatuoran nga Motultol sa Kinabuhing Dayon, gipatik sa Niueano sa 1989, mao ang unang publikasyon niana nga pinulongan nga nagtaganag pagsabot sa pangunang mga pagtulon-an sa Bibliya. Ilabinang epektibo diha sa nataran sa Cook Island Maori (Rarotongan) mao ang librong Ikaw Mabuhing Walay Kataposan sa Paraiso sa Yuta sa mao nga pinulongan. Halos ang tanang pagtuon sa Bibliya sa balay ginadumala uban sa tabang nianang libroha. “Sa pagpamatuod sa pagkaepektibo niini nga tabang sa pagtudlo,” miingon ang usa ka ansiano, “mao ang pagkaandam sa mga estudyante sa pagsugod sa pagtambong sa mga tigom sa kongregasyon.”

Dugang pa sa ilang naandang balay-ug-balay nga pag-apod-apod niining mga publikasyona, ang katawhan ni Jehova nakapahimutang ug daghang literatura diha sa gitawag nga pagsangyaw sa taboan. Tungod sa pagsulbong sa populasyon sa Polynesia diha sa Auckland sa dili pa dugay nga katuigan, ang dagkong mga taboan nga dunay temporaryong mga lamesa nga nagapanindag kinaham nga mga pagkaon sa mga taga Isla sa Pasipiko ug mga produkto nga ginama sa balay ang nanungha. Ingon ka daghan sa 25,000 ka tawo ang moanha sa maong taboan sa Sabado sa buntag. Nagapahimulos niini nga higayon, ang mga Saksi moadto niining maong mga taboan ug makigsulti sa mga tag-iya sa tindahan ug sa mga pumapalit mahitungod sa Gingharian sa Diyos.

Pinaagi sa ilang ministeryo, ang mga Saksi ni Jehova nakasabud ug dagayang binhi sa Gingharian ug nakapahimutang ug daghang literatura sa Bibliya diha sa Polynesianhon nga katawhan. Ang sangang buhatan sa Watch Tower Society nagtaho nga sulod sa 1990 nga tuig sa pag-alagad, 23,928 ka literatura sa Polyne­sianhon-ug-pinulongan ang ginapadala gikan sa pabrika.

Nagakalipay Diha sa Usa ka Espirituwal nga Lamesa

Tungod kay mahunahunaon sa ilang espirituwal nga panginahanglan, giuna sa mga Saksi nga Polynesianhon ang pagtambong sa senemanang Kristohanong mga tigom sa mga Kingdom Hall, ug sa pagtambong sa ilang mga asembliya ug mga kombensiyon. (Hebreohanon 10:23-25) Diha sa “Balaang Hustisya” Distritong Kombensiyon nga gihimo sa Auckland sa Disyembre 1988, ang separadong mga sesyon gihimo sa Samoano, Niueano, ug Cook Island Maori. Ang pangunang punto sa programa nga Samoano mao ang usa ka maayong pagkaensayo ug madasigong drama sa Bibliya. Ang Niueano ug Cook Island nga mga Saksi sa Auckland nagpasundayag sa ilang Kristohanong pagkamaabiabihon pinaagi sa pag-alagad ingong malipayong mga tig-abiabi sa mga bisita nga gikan sa ilang kaugalingong mga isla. Ang kombensiyon namatud-ang usa ka okasyon alang sa kombira ug kalipay diha sa espirituwal nga lamesa ni Jehova. Diha sa 1990 nga “Putling Pinulongan” nga Kombensiyon sa Auckland, ang kinatas-ang tumatambong nga 503 ang mitambong sa mga sesyon nga Samoano.

Ang positibong pagsanong sa mensahe sa Gingharian maoy dayag nga ebidensiya nga ang mga tawo gikan sa mga isla sa Polynesia sa Kasadpang Pasipiko ‘nagahulat sa kasugoan ni Jehova.’ (Itandi ang Isaias 42:4, 12.) Sa baylo sila malipayong nakigbahin sa pagmantala sa maayong balita diha “Polynesianhong siyudad” sa New Zealand.