Ang Malipayong Nasod

ANG malipayong nasod! Kini bang kabatbatana mohaom sa bisan unsang nasod sa katawhan karong adlawa? May nasod ba nga makahimo sa malipayong pangangkon nga kini nakapapas sa kapintasan, krimen, kakabos, polusyon, mga sakit nga makapabakol, politikanhong kahiwian, relihiyosong mga dinumtanay? May nasod ba nga nagtanyag sa tinuod nga paglaom sa pagkab-ot sa maong mga tumong? Halayo kana!

Unsay ikasulti sa tibuok-kalibotang hulagway? Si Mikhail Gorbachev, ang presidente sa U.S.S.R., mipahayag sa miaging Hulyo 16: “Ginabiyaan nato ang usa ka panahon sa internasyonal nga mga pakiglabot, ug nagasugod sa lain, sa usa ka yugto, sa akong hunahuna, sa lig-on, molungtad nga pakigdait.” Bisan pa niana, ang magasing Time sa samang petsa mitaho nga ang Tinipong Bansa nagapuntiriya gihapon sa Moscow uban sa 120 ka nuclear warheads, nga bisan hain niana bug-os maglaglag sa maong siyudad. Ug walay duhaduha nga ang mga Sobyet andam nga mobalos sa sama. Tungod kay ang ubay-ubayng mga membro sa Hiniusang Kanasoran karon nagbaton sa kahibalo sa paggamag nukleyar nga armas, wala ing kalipay ang pagpalandong kon kinsa kaha ang mouna sa pagtiro.

Usa ka Tinuod Malipayong Nasod

Kas-a sa kasaysayan​—mga 3,500 ka tuig nga miagi—​dihay usa ka tinuod malipayong nasod. Kadto mao ang karaang Israel. Sa giluwas sa Diyos kanang nasora gikan sa pagdaugdaog sa Ehipto, sila miduyog kang Moises sa masadyanong awit sa kadaogan, ug sila mipadayon sa pagkalipay samtang gisugot nila ang ilang Diyos ug Manluluwas.​—Exodo 15:1-21; Deuteronomio 28:1, 2, 15, 47.

Ilalom sa pagmando ni Solomon “ang Juda ug ang Israel maoy daghan, sama sa balas nga anaa sa daplin sa dagat tungod sa pagkadaghan, nga nangaon ug nanag-inom ug nagkalipay.” Kadto usa ka panahon sa dakong pagsadya, nga ang tayuktok mao ang pagtukod sa lagmit mao ang labing matahom nga tinukod sa tibuok nga kasaysayan, ang templo sa pagsimba kang Jehova sa Jerusalem.​—1 Hari 4:20; 6:11-14.

Ang Modernong-Adlaw Malipayong Nasod

Ang karaang Israel naglandong sa usa ka modernong nasod. Hain ba niana? Ang politikanhong Israel sa Tungang Sidlakan? Ang mga balita nagpaila nga ang nakigbisog nga nasod dili gayod malipayon. Ang gitawag bang Hiniusang Kanasoran naghatag ug tinuod nga kalipay sa membrong mga estado niini? Wala, ang tinuod nga kalipay dili hikaplagan taliwala sa politikanhong mga nasod karong adlawa. Ang kadalo, kahiwian, ug pagkalimbongan dagaya, ug diha sa daghang kayutaan ang kasagaran nga katawhan nakigbisog nga masulob-on aron lang mabuhi.​—Proverbio 28:15; 29:2.

Bisan pa niana, adunay usa ka talagsaon nga nasod karong adlawa nga labing malipayon. Kini dili politikanhon, kay ang Pangulo niini, si Kristo Jesus, miingon bahin sa iyang katawhan: “Kamo dili bahin sa kalibotan.” (Juan 15:19) Samtang ang Hiniusang Kanasoran nahiusa sa ngalan lamang, ang malipayong nasod nagadani sa iyang mga sumusunod “gikan sa tanan nga kanasoran ug kabanayan ug mga katawhan ug mga pinulongan.” (Pinadayag 7:4, 9) Kini karon moabot sa kapin sa upat ka milyon, mao nga ang populasyon niini mas daghan kay sa mga 60 sa 159 ka membrong nasod sa UN. Ang lumad nga mga pinulongan niining upat ka milyong tawo moabot sa mga 200; bisan pa niana silang tanan nahiusa sa pagsulti sa usa ka “maputling pinulongan.”​—Sofonias 3:9.

Dili ba katingad-ang ang daghan kaayong lainlaing kultura magasulti sa usa ka pinulongan? Dili gayod, kay kining usa ka nagapahiusang pinulongan nagaapil sa mensahe sa umaabot nga Gingharian sa Diyos sa pagkamatarong. Kining malipayong nasod nagagikan sa “kinatumyan sa yuta” ug nailhan sa tibuok kalibotan ingong ‘mga Saksi ni Jehova.’ (Isaias 43:5-7, 10; Zacarias 8:23) Halos bisan diin ka mobiyahe sa nawong niining yutaa, imo silang hikaplagan.

Sa Isaias 2:2-4, ang propeta sa Diyos nagbatbat sa usa ka panon nga nagagula gikan sa tanan nga nasod, nga nagaingon: “Umari kamo, kamo nga katawhan, ug manungas kita ngadto sa bukid ni Jehova, ngadto sa balay sa Diyos ni Jacob; ug siya magatudlo kanato mahitungod sa iyang mga dalan, ug kita magalakaw sa iyang mga alagianan.” Nga madasigon, kini sila nagadapit sa uban sa pagdawat ug instruksiyon gikan kang Jehova pinaagi sa iyang Pulong, ang Bibliya, aron sila makakat-on sa pagbuhat sa iyang kabubut-on. Kining usa ka nasod nagasubay sa dalan sa matuod nga pakigdait, kay ang katawhan niini nakasalsal na ‘sa mga espada ngadto sa mga punta sa daro ug sa mga bangkaw ngadto sa mga galab, nga dili na makakat-on pa sa gubat.’ Usa gayod ka malipayong nasod!

Makaambit ka usab niining kalipaya. Makakat-on ka bahin sa kusog-nagsingabot nga adlaw sa dihang ang Hari, si Kristo Jesus, magapapas sa malaglagong mga tawo ug mga kagamhanan ug magpasig-uli sa Paraiso sa yuta. (Daniel 2:44; Mateo 6:9, 10) Bisan karon, ingong nahiusa gayod nga nasod, ang mga Saksi ni Jehova nagakalipay pag-ayo sa ilang buluhaton sa pagpangandam alang nianang mahimayaong panahon nga may tinuod nga pakigdait, sumala sa ipakita sa mosunod nga mga panid.