Kining Basahona Nagbag-o sa Ilang mga Kinabuhi

Katuigan nga miagi ang usa ka babaye nakabatog diborsiyo gikan sa iyang bana. Sa kadugayan ang iyang anak lalaki si Steve nahimong usa sa mga Saksi ni Jehova. Si Steve misulay nga wala molampos sa pagpakigsulti sa iyang inahan mahitungod sa iyang mga pagtuo. Miadto usab siya sa pagpakigkita sa iyang amahan, kinsa himalatyon sa kanser.

Inay nga mosultig daghan, gibilin lang ni Steve ang basahong Ikaw Mabuhing Walay Kataposan sa Paraiso sa Yuta sa kiliran sa higdaan sa iyang amahan ug miingon nga ang pagbasa niana makatabang kaniya. Gibasa sa iyang amahan ang basahon ug sa iyang kaugalingon misugod sa pagtambong sa mga tigom sa mga Saksi ni Jehova sa Enero 1988.

Kasamtangan, ang inahan ni Steve may kahigayonan panahon sa mga tapoktapok sa pamilya sa pagpaniid sa bag-ong personalidad nga gipadayag sa iyang kanhi-bana. Kadto nakapadayeg kaayo kaniya mao nga miuyon siya sa pagtambong sa usa ka tigom sa mga Saksi ni Jehova. Misugod siya sa pagtambong nga regular sa mga tigom, ug sa wala madugay siya naglingkod panahon niana tupad sa iyang kanhing bana. Sa kadugayan sila nagminyo pag-usab.

Ang amahan ni Steve namatay sa Septiyembre 1988 apan una niana siya misugod na sa pag-ambit sa Kristohanong ministeryo. Ang inahan ni Steve, kinsa nag-atiman sa iyang amahan panahon sa kataposang mga bulan sa iyang sakit, nabawtismohan sa Hunyo 1988 ug karon usa ka madasigong Saksi.

Ang Ikaw Mabuhing Walay Kataposan sa Paraiso sa Yuta maoy usa ka basahon nga nagahatag ug paglaom pinaagi sa pagpunting sa mga tubag sa Bibliya sa mga suliran sa kinabuhi. Kini nahimong instrumento sa pagpabag-o sa daghang kinabuhi. Alang sa impormasyon kon unsaon pagbatog kopya, pel-api ug ipadala ang nagaubang kupon.

Buot kong makadawat sa gahig-hapin 256-panid nga basahong Ikaw Mabuhing Walay Kataposan sa Paraiso sa Yuta. (Pagsulat sa direksiyon sa ubos alang sa impormasyon. Gawas sa Pilipinas, pagsulat sa lokal nga sangang-buhatan sa Watch Tower alang sa impormasyon. Tan-awa ang panid 2.)