“Mga Luha sa Apresasyon”

“UBAN sa mga luha sa apresasyon, bag-o ko pang nahuman ang pagbasa sa artikulong ‘Kon Unsaon Pagtabang sa mga Nagmagul-anon nga Mapasig-uli ang Kalipay.’” (Ang Bantayanang Torre Marso 15, 1990, mga panid 26-30) Gisugdan niana ang usa sa daghang sulat sa apresasyon nga nadawat sa Sosyedad alang sa mga artikulo bahin sa depresyon nga mipatim-aw sa atong Marso 1 ug Marso 15, 1990, nga mga isyu. Hinuon, kining partikular nga pagpahayag naggikan sa usa ka sister sa Hapon kansang batang lalaki karong bag-o gitakboyan sa schizophrenia. Misaysay siya:

“Kay nagalingaw ug nagadasig sa usa ka kalag nga may depresyon sa kada adlaw, usahay ako mobating gikapoy kaayo aron sa pagpadayon. Inig-abot sa kangitngit, ang akong anak lalaki mobati sa kahadlok ug kahigwaos. Busa ako siyang hatagag mga pildora sa pagpakatulog ug molingkod sa iyang tapad nga magahinolhinol sa iyang mga kamot ug magbutang sa akong kamot sa iyang agtang hangtod nga siya makatulog. Kini sama sa pagpakatulog sa usa ka masuso, ug tapos sa duolag usa ka oras, siya sa kataposan mahinanok. Kana mao ang panahong mobati akong nahupayan, apan sa samang panahon, sultihan ko ang akong kaugalingon nga sa pagkabuntag may lain na usab nga adlaw nga antosonon.

“Ang akong anak moingon, ‘Ako walay pulos. Wala na akoy paglaom.’ Kada adlaw siya masulob-ong mangutana, ‘Kanus-a ba ako maayo sa akong sakit? Kanus-a ba ako makagawas sa medisina? Hangtod kanus-a pa kining matanga sa kinabuhi?’ Sa maong mga panahon mogamit akog mga pangutana sa pag-usob sa iyang hunahuna sumala sa gisugyot sa mga magasin, ug kini motabang kaniya nga maarang-arang ug diyutay. Apan kami mobalik sa samang butang sa sunodsunod nga adlaw.

“May mga panahon usab sa dihang ang akong anak magpatawag sa mga ansiano [gikan sa lokal nga kongregasyon] sa tungang gabii sa dihang mobati siya sa hilabihang kahigwaos ug mohangyo kanila nga moampo alang kaniya. Kini daw makahupay kaayo kaniya ug magpapahulay sa iyang hunahuna. . . . Sa makadaghan, ang kahimtang sa akong anak mograbe sa dihang ang akong bana (nga dili magtutuo) wala sa balay kay nagabiyahe sa iyang trabaho. Sa dihang ako mangayog tabang pinaagi sa telepono, daghang igsoong lalaki ang modali pag-anha sa among balay.

“Nagapasalamat ako kaninyo, mga igsoon, gikan sa kahiladman sa akong kasingkasing tungod sa inyong pagpatik sa maong matang sa mga artikulo matag karon ug unya ug sa pagpakita nga kamo nagatagad sa mga panginahanglan sa mga mahuyang.”

[Pirmado] H. H.