Abundang Ani Nagahatag Kalipay sa Taiwan

ANG Taiwan maoy usa ka isla nga 390 ka kilometrong gitas-on ug 140 ka kilometrong gilapdon. Uban sa populasyon nga kapin sa 20,000,000, kini mao ang usa sa pinakadasok nga rehiyon sa kalibotan. Ang kadaghanan sa iyang mga molupyo maoy Inintsik, o Mandarin nga Inintsik ang sinultihan sumala sa pagtawag niana sa mga taga Kasadpan. Apan ubay-ubay nga mga sinultihan ug mga 13 ka tribonhon nga pinulongan ang gisulti usab dinhi.

Napahiluna sa Tropic of Cancer, ang Taiwan tabunok kaayo nga isla, nagapatunghag abundang mga ani sa humay ug uban pang mga abot nga nahimo kining usa ka eksporter sa pagkaon. Hinuon, usa ka pag-ani sa lain nga matang ang nagahatag kalipay sa nakigbahin niana. Kini maoy usa ka espirituwal nga pagpangani niadtong paborableng nagasanong sa “maayong balita sa gingharian.”—Mateo 24:14.

Usa ka Gamay Unang Pagtanom

Ang buluhaton sa pagsabwag sa mga binhi sa kamatuoran sa Bibliya sa Taiwan nagsugod sa mga 60 ka tuig kanhi, sa dihang ang usa ka hawas sa Watch Tower Society miabot gikan sa Hapon ug naghatag ug mga pakigpulong sa Bibliya sa Taipei, ang kaulohan. Usa ka Hapones nga batan-ong lalaki nga ginganlag si Saburo Ochiai paborableng misanong sa mensahe sa Gingharian ug dayon nagsugod sa pagpakigsulti sa uban bahin niana. Sa ulahi, gilibot sa duha ka bug-os-panahong ministro nga gikan sa Hapon ang isla, nagsabod ug binhi sa maayong balita. Sa kataposan, sila gipriso sa mga Hapones nga punoan sa militar ug gihatag ang ilang kinabuhi alang sa Gingharian sa Diyos. Daghan niadtong binhia nga gisabwag dali nga mitubo dinha sa Amis nga tribo, apan gamay nga interes ang makita dinha sa daghang mga Intsik nga nagapuyo sa kasadpan nga bahin sa baybayon sa isla. Sila kasagaran mga Buddhista o mga Taoista.

Ang buluhaton sa espirituwal nga pagpangani sa Taiwan nagsugod sukad niadtong gamay nga sinugdanan, mao nga karon ang isla nahimong usa ka mabungahon nga natad. Pananglitan, sa nangaging lima ka tuig, 529 ka tawo ang nabawtismohan, kasagaran gikan sa Intsik nga populasyon. Kini nagdala sa gidaghanong mga magmamantala sa Gingharian sa isla sa kinatas-an nga 1,552 sa 1989. Oo, ang mga Taoista, mga Buddhista, ug pipila ka Kristohanon nagasanong sa maayong balita ug nagtuon bahin kang Jehova nga Diyos! Apan sama sa unsa ang pakighisgot bahin sa Bibliya ngadto sa mga katawhan nga lainlain ang gigikanan? Ug unsa ang mga resulta?

Mahigalaon nga Pagsanong Batok sa Tim-os nga Interes

Ang buluhatong pagsangyaw sa Taiwan magantihon ug mahagiton tungod kay ang mga Intsik sa kinaiyanhon maoy mahigalaon. Sagad, matinahuron silang maminaw sa mga bisita. Sa dihang ang mga literatura sa Bibliya itanyag, kuhaon kini agig konsiderasyon. Ingong sangpotanan, ang ubang bug-os-panahong mga ministro nakapahimutang ug mga 300 ka magasin o nakakuhag 100 ka suskrisyon sa usa ka bulan. Sa daghang katuigan, daghang Bibliya, libro, magasin ug tracts ang nabilin sa mga tawo. Apan, ngano man nga hinay ang pagdaghan sa magmamantala sa gingharian?

Usa ka rason mao nga ang mga ideya ni Confucius nakaumol sa panghunahuna sa mga Intsik sa gatosan ka tuig. Sumala kang Confucius, siya kinsa “agig pagtahod sa mga Espiritu dili makigsuod kanila, sa ingon matawag nga maalamon.”a Ang katuyoan mao nga ang maalamon nga tawo dili kaayo makiglangkit sa pagsimba sa mga espiritu o sa mga diyosdiyos. Busa, tingali daghan ang maukit-ukiton mahitungod sa mensahe sa Gingharian, apan pipila lamang ang magpalangkit sa usa ka pagtuon sa Bibliya. Ug usab, bisan ang mga Intsik nagtuo ug daghang espiritu ug mga diyosdiyos, ang pagtuo ug usa ka supremo nga Maglalalang may pagkalangyaw sa kadaghanan kanila. Dugang pa, bisan ang inilang mga tawo sa Bibliya sama ni Abraham ug David wala kaayoy kahulogan kanila. Busa, dali nga makita kon nganong dakong panahon ug pailob ang gikinahanglan aron sa pagtabang sa mga tawo dinhi sa pagdawat sa Bibliya ingon nga dinasig nga pulong sa Diyos ug sa pag-ugmad sa personal nga relasyon sa Maglalalang, si Jehova nga Diyos. Uban sa panalangin ni Jehova, hinuon, ang maong mga paningkamot nagantihan.

Padasig Alang sa Pagtubo

Sa daghang katuigan, ang mga kongregasyon sa katawhan ni Jehova sa Taiwan nagagamit ug inabangan nga mga tigomanan alang sa ilang mga miting. Ang panginahanglan sa mas angayan nga tigomanan gitagad sa mga ansiano sa dihang usa ka tawong interesado miingon: “Kon kamo ang nakabaton sa kamatuoran, unsay inyong ginahimo sa lugar nga sama niini? Nganong wala kamoy permanente nga tigomanan?” Busa uban sa pagsalig kang Jehova, ang maong kongregasyon nagsugod sa pagpangita ug mas angayan nga dapit alang sa Kingdom Hall. Sa kataposan, sila nakapalit ug duha ka nagtapad nga mga apartment sa usa ka dako nga tinukod, ug karon aduna na silay maayong Kingdom Hall.

Sa miaging unom ka tuig, 11 ka Kingdom Hall ang natukod o napalit sa Taiwan. Sa matag kaso, kini miresulta ug dakong pag-ani ug daghang tumatambong sa tigom. Ang usa ka pananglitan mao ang kongregasyon sa habagatang siyudad sa Tainan. Sa 1981 kining dakong siyudad sa 600,000 ka tawo aduna lamay 44 ka magmamantala sa Gingharian. Tungod sa panginahanglan kining maong grupo midesidir sa pagtukod sa ilang kaugalingong Kingdom Hall. Uban sa pagtuo kang Jehova nga magapanalangin kanila, gipadayon sa mga brader ug sister ang proyekto bisan pag ang tigomanan mikantidad ug mga $200,000. Giamot sa uban ang ilang mga bugay nga bulawan; gipalangan sa uban ang ilang mga biyahe sa gawas sa nasod. Ang tanan sa kongregasyon mihatag sa ilang bug-os nga tabang. Sa dihang nahibaloan sa mga igsoon sa sangang buhatan sa Watch Tower Society ang maong proyekto, sila midesidir sa pagtukod ug usa ka puy-anan sa misyonero sa itaas sa Kingdom Hall, sa ingon nakigtunga sa gasto. Ang tigomanan natapos sulod sa duha ka tuig. Ang resulta? Sa dihang nahuman ang Kingdom Hall, ang total nga gidaghanon sa magmamantala miabot ug 74! Sa karon nga panahon, duha ka kongregasyon, nga adunay total nga 160 ka magmamantala, ang nagagamit sa maong tigomanan, ug ang senemanang tumatambong sa mga tigom nagaaberids ug mga 250. Ang duha ka kongregasyon karon nagplano nga magtukod ug ikaduhang Kingdom Hall.

Pagpangani Taliwala sa Tribonhong mga Grupo

Ang pagpangani taliwala sa mga tribo sa kasadpan nga bahin sa Taiwan nagapadayon na sukad nga gisugdan ang buluhaton sa Gingharian sa maong isla. Ang pipila sa mga Amis nga unang nakahibalo sa kamatuoran kapin sa 50 na ka tuig aktibo gihapon. Latas sa katuigan, sila nakatagbo ug daghang mga hagit. Sa panahon sa okupasyon sa mga Hapones niadtong Gubat sa Kalibotan II, sila napugos sa pagsulti ug Hinapon. Sa dihang ang isla gibalik sa Tsina pagkahuman sa gubat, sila kinahanglang mahibalo usab ug Inintsik. Sa sayo sa katuigan sa 1960, sila nakaatubang ug usa ka pagsulay sa lain nga matang. Niadto nga panahon, daghang inila sa Amis nga tribo ang mibiya sa mahinlo nga organisasyon ni Jehova o nakit-an nga dili takos sa pakig-uban niana. Bisan pa niining tanan, usa ka grupo sa matinumanon nga mga Saksi padayong nag-alagad kang Jehova. Daghan sa mga apo niining maunongong mga tigulang nga mga brader ug sister maoy nagapanguna karon diha sa buluhatong pagsangyaw.

Ang mga tawo sa laing tribo miuswag usab sa espirituwal. Pananglitan, adunay usa ka matinumanong grupo sa magmamantala sa Gingharian taliwala sa Bunun nga tribo. Ang uban sa ilang mga katigulangan maoy mga tigpunggot-ug-ulo. Karon kining mga tawhana nagasangyaw sa malinawong mensahe sa Gingharian sa Diyos. Ang Lukai ug Paiwan nga mga tribo nakadawat usab sa maayo nga pagpamatuod, ug daghan kanila ang naghimo ug dagkong kausaban sa ilang mga kinabuhi. Si Ba Chu Fu nga naghinumdom sa iyang eksperyensiya, miingon:

“Ako natawo sa bukiron nga rehiyon sa Pingtung. Sanglit kay ang akong amahan mao man ang punoan sa Lukai nga tribo, ang mga tawo magdala ug mga gasa nga pagkaon, busa dili kinahanglang motrabaho kami sa bug-at nga buluhaton. Sa ingon niini nga palibot, naugmad nako ang usa ka mapahitas-on nga espiritu. Nahimo ako nga ‘punoan’ sa usa ka gang sa batan-ong mga bugoy, manghadlok sa mga tawo ug maghukhok ug kuwarta gikan kanila. Gikahadlokan ako sa among baryo. Sa edad nga 22, akong gikuha ang usa sa akong daghang trato ingon nga asawa. Apan ang imoral nga pagkinabuhi ug sige nga pag-inom midulot kaayo kanako nga tungod niana akong nakita nga malisod dawaton ang kinabuhing minyo. Wala madugay ang among kaminyoon nabungkag, ug ako mibalik sa akong karaan nga pagkinabuhi.

“Niining panahona, ang akong asawa misugod na sa pagtambong sa mga tigom sa mga Saksi ni Jehova. Ako dili interesado ug nag-isip sa akong kaugalingon nga usa ka ateyista. Ingong resulta sa sinsero ug masiboton nga mga paningkamot sa akong asawa, hinuon, sa 1973 ako misugot sa pagkuyog sa usa ka internasyonal nga kombensiyon sa Taipei. Kami miestar diha sa usa ka Intsik nga pamilya. Ang kalulot ug pagkawalay pagpihig sa Intsik nga sister nagbilin ug dili mapapas nga impresyon kanako. Sa pag-uli sa balay, nagsugod ako sa pagtuon sa Bibliya ug naghimo ug sinsero nga paningkamot nga mag-usob. Ako nabawtismohan niadtong 1974.

“Sukad niadto, dihay daghan kaayong mga pagsulay. Ang usa mao ang pagtuon sa pagbasa ug Inintsik. Ang pagkanahilit lain usab. Tungod kay walay hamtong nga mga igsoong lalaki nga akong ikauban o kapangayoan ug tabang, ako gidasig sa pagsalig kang Jehova. Ako nakatuon sa pagkahimong mapaubsanon ug sa pagtapot sa organisasyon ni Jehova. Ang resulta? Karon, tanan sa akong pamilya aktibo sa kamatuoran. Ako nakapribilehiyo sa pagkahimong usa ka ministeryal nga alagad sa kongregasyon, nga karon adunay 60 ka masibotong mga magmamantala. Bisan pag ako walay espesyal nga abilidad, gipanalanginan ug gipaluyohan ni Jehova ang akong mga paningkamot sa pagpangani nga buluhaton.”

Ang Pagpangani Nagapadayon

Ang Taiwan maoy gamay lamang nga bahin sa tibuok kalibotan nga natad. Apan, ang mga pulong ni Jesus, “Daghan unta ang anihon, apan diyutay ra ang mamumuo,” matuod gihapon dinhi. (Mateo 9:37) Sa miaging tuig, 4,534 ang mitambong sa Memoryal sa kamatayon ni Jesus. Ug sa dihang ang pagpangani nagakaduol na sa tayuktok, ang mga mamumuo nga nagapangabudlay sa Taiwan nagapangani uban sa usa ka masadya nga pagsiyagit.—Itandi ang Salmo 126:5, 6.

[Footnote]

[Mapa/Mga hulagway sa panid 31]

(Alang sa aktuwal nga pagkahan-ay, tan-awa ang publikasyon)

HAPON

TSINA

TAIWAN

PILIPINAS

[Mga Hulagway]

Usa ka Kingdom Hall nga bag-o lang gitukod sa kasadpang bahin sa baybayon sa Taiwan

Mga magwawali sa Gingharian nagahatag kalipay sa daghan niining malunhaw nga yuta