Ang Matuod nga Kristiyanidad Nagapauswag sa Kinabuhi sa Sweden
ANG Sweden nagtagana sa populasyon niini ug usa sa labing taas nga mga sukdanan sa kinabuhi sa kalibotan. Dugang pa sa abundang pagkaon ug puy-anan, mga kotse, mga barko alang sa kalingawan, mga telebisyon, ug personal nga mga kompiyuter, ang mga molupyo sa Sweden nakapahimulos ug libreng medikal nga pag-atiman, pensiyon sa mga tigulang ug sa mga baldado, alawans sa kabataan, ug uban pang mga serbisyo nga gipaluyohan sa gobyerno.
Busa ikaw tingali makahinapos nga wala nay usa nga makapauswag pa sa matang sa kinabuhi diha nianang yutaa. Ugaling, bisan sa tanang materyal nga kauswagan niini, ang Sweden adunay iyang mga pahat sa mga suliran: diborsiyo, alkoholismo, abuso sa droga, krimen, ug paghikog. Ang relihiyon, nga gilaomang mohatag ug gamhanang impluwensiya sa moral, patay sa Sweden. Kapin sa 90 porsiento sa mga lungsoranon sa nasod maoy sakop sa Lutheran State Church, apan 2.1 porsiento lamang ang tigtambongan sa mga serbisyo niini sa regular. Miingon ang usa ka pari: “Ang Simbahan miritero na. . . . Kini nawad-an na sa hinungdanong puwersa ug nagapalayo gikan sa mga panginahanglan sa katawhan.”
Ang kapakyasan sa simbahan sa pagpauswag sa kinabuhi sa Sweden, hinunoa, wala magkahulogan nga napakyas ang matuod nga Kristiyanidad. Mga 22,000 ka mga Saksi ni Jehova sa 331 ka mga kongregasyon nagmalamposon sa pagtabang sa mga tawo sa pagpadapat sa mga prinsipyo sa Bibliya alang sa ilang kaayohan. Kining buluhatona namatikdan.
“Angay natong dayegon ang mga Saksi ni Jehova sa ilang kadasig sa paglakaw uban sa ilang mensahe!” matud pa sa usa ka magtutudlo sa relihiyon diha sa tibuok-nasod nga Pentekostal nga mantalaang Dagen (Ang Adlaw). Ang artikulo midugang: “Ang mga Saksi ni Jehova gilangkoban sa grupo nga nakadaog sa labing daghan bag-ong mga membro matag tuig ug nakabaton sa labing dakong panon sa mga batan-on . . . Kita angay magtuon gikan sa mga Saksi ni Jehova!”
Sa pagkamatuod, kadtong buot nga makakat-on gikan sa mga Saksi ni Jehova makakaplag ug usa ka butang. Unsa man kana? Kon sa unsang paagi ang mga kamatuoran sa Bibliya sa dramatikanhong makapauswag sa matang sa ilang mga kinabuhi.
Ang Kahibalo sa Bibliya Makatabang!
Palandonga ang usa ka sulat nga nadawat sa lokal nga sangang buhatan sa Watch Tower Society gikan sa usa ka batan-ong inahan nga walay bana. Siya misulat: “Buot ko nga pasalamatan kamo sa maayong kinabuhi nga akong natagamtam sukad nga ako misugod sa pagtuon sa mga Saksi ni Jehova. Ako adunay balay nga wala nay aso sa sigarilyo. Akong napabilhan na karon ang panginahanglan sa paggugol ug dugang panahon uban sa akong anak nga babaye. Ang akong pinansiyal nga kahimtang miuswag, bisag mao ra gihapon ang akong suweldo. Wala na kaayo akoy problema sa pagkatulog. Ako usab adunay tinuod nga mga higala nga kalipayan. Oo, dili nako ikabaylo ang akong paagi sa kinabuhi karon kay sa kinabuhi ko kaniadto.”
Ang laing pananglitan maoy may kalabotan sa diborsiyo—nga kumon kaayo sa Sweden. Bisan pa niana, ang Bibliya nakatabang sa usa ka magtiayong ginganlag Arne ug Ketie. Sila minyo sulod na sa 13 ka tuig ug adunay duha ka anak sa dihang ang personal nga mga kasungian maoy nagtukmod kanila sa pagkuha ug diborsiyo. Sila nagdumot sa usag usa.
Si Arne, nga milayas ug nag-inusara sa pagpuyo, nakontak sa mga Saksi ni Jehova ug misugod sa pagtuon sa Bibliya. Siya nalipay kaayo sa iyang nakat-onan nga usa ka adlaw niana nagdali siya nga miadto kang Ketie ug gipugos siya ug ang mga anak nga magtuon usab! Sa dihang siya midumili, iyang gidasok siya sa bungbong ug miingon: “Pagtuon, kay kon dili patyon ti ka!” Gitawag ni Ketie ang mga Saksi ni Jehova ug mireklamo, nga nag-ingon: “Unsa ba ka mabangis nga Diyos kana si Jehova?”
Si Ketie mapailobong gisultihan nga si Jehova maoy usa ka mahigugmaong Diyos nga dili magpugos kang bisan kinsa. Siya naikag ug gusto nga makakat-on pa ug dugang. Samtang si Arne nakabaton ug dugang kahibalo sa diyosnong mga prinsipyo, siya mikalma ug wala na makigbungol kang Ketie. Sila regular nga magkita sa mga tigom sa Kingdom Hall. Ang resulta? Human nga silang duha nahimong bawtismadong mga Saksi, sila nagpakasal pag-usab! Sila naminyo sulod na sa walo ka tuig, ug si Arne nag-alagad ingong usa ka ansiano sa kongregasyon. “Ang among kaminyoon mas maayo na karon kay sa niadto,” sila miingon. “Daghan kaayong butang nga angay namong pasalamatan si Jehova.”
Ang mga kamatuoran sa Bibliya nagtabang usab sa mga batan-on sa pagpauswag sa kalidad sa ilang mga kinabuhi. Ang batan-ong lalaki nga ginganlag David nahinumdom: “Ang akong mga ginikanan nagbulag, ug daw nadaot ang tanan sa akong kinabuhi. Wala na akoy pagtagad sa bisan unsa. Kanunay ako nga moipsot sa klase ug wala mohimog mga homwork sulod sa kataposang tulo ka tuig. Bation ko usahay ang kinabuhi nga dili na gani angay nga pagakinabuhian. Ako nagsul-ob ug nagkagidlayng jeans ug daang mga sapatos. Ang akong buhok miabot sa katunga sa akong likod. Akong gisulayan ang nagkalainlaing estilo-sa-kinabuhi, sama nianang sa punk rocker ug hard rocker. Ako hinabako ug hinginom ug nalangkit sa krimen.
“Sa 1986 usa sa mga Saksi ni Jehova miduaw kanako. ‘Lain na usab nga katahapang relihiyosong grupo,’ sa hunahuna ko. ‘Pangutan-on ko siya ug mga pangutana nga dili siya makatubag.’ Sa akong katingala, siya nakatubag niini. Ako miuban sa usa sa iyang mga pagtuon sa Bibliya ug nakakita nga siya adunay makataronganong tubag halos sa tanang mga pangutana—nga walay lungag diha sa kamatuoran. Ako mitambong ug asembliya ug nahingangha nga nakakita ug mahinlo, mahigugmaong mga tawo. Ako misugod sa pagtambong sa mga tigom sa mga Saksi ni Jehova ug nakurat sa dihang daghan ang miduol ug nakiglamano kanako. Pagkadalayegon sa panaghiusa niining mga tawhana!”
Sa usa ka tuig ug tunga sa ulahi, si David nabawtismohan ingong usa sa mga Saksi ni Jehova. Ang iyang mga paryente, mga higala niadto, mga magtutudlo, ug ang uban halos dili makatuo nga kining hinlo ug pamesti ug mahapsay nga batan-ong lalaki mao si David nga ilang nailhan niadto.
Gagmay nga Epekto
Ang pultahan ug pultahan nga pagsangyaw sa Sweden usahay dili makadasig. Ang mga Sweko higpit nga nagbantay sa ilang pribasiya. Inigbagting sa doorbell, siya igo lang molili sa usa ka gamayng lungag, ug ang kadaghanang mga pultahan sirado alang sa mga Saksi ni Jehova. Apan sila wala mawad-ig kadasig. Ang mga Saksi nahibalo nga ang mga manulonda makatultol sa mga tawo nga matarong ug inklinasyon. (Pinadayag 14:6; itandi ang Mateo 13:41.) Sa dihang motuhop ang kamatuoran sa kinabuhi sa maong tawo, kini kasagaran mokanap—samag gagmayng mga balod diha sa tubig—ngadto sa mga paryente ug mga higala.
Ang usa ka babaye sa Stockholm nahinumdom nga naglingkod sa lamesa sa iyang kosena nga naghilak tungod sa pagkawalay kalipay sa iyang kinabuhi. “Ako nawad-ag paglaom,” siya miingon. “Sa kalit, ako misugod sa pag-ampo: ‘Ginoo, buot kong makigsulti kanimo bahin sa kinabuhi.’ Ang doorbell mibatingting. Diha sa lilianan, akong nakita ang tawo nga maayog-pamesti, busa akong giablihan ang pultahan. Siya miingon nga buot niyang ipakig-ambit ang pipila ka makadasig nga mga hunahuna gikan sa Pulong sa Diyos. Siya usa sa mga Saksi ni Jehova. Nangutana ako kon siya nakaduaw ba sa uban diha sa andana nga akong gipuy-an. ‘Wala,’ siya miingon, ‘Mopauli na unta ako sa balay gikan sa usa sa akong gidumalahan ug pagtuon sa Bibliya sa dihang mihukom ako nga mohimog mga pagduaw. Nahitabo lang nga ako nagsugod dinhi.’ Ako nakurat tungod kay ako nagpuyo sa taas-taas nga andana. Naikag ako sa iyang gipakita kanako.”
Wala magdugay kining babayehana misugod sa pagtuon sa Bibliya. Sa pagkamadasigon, siya misugod sa pagpaambit sa iyang nakat-onan uban sa mga paryente ug mga higala. Siya nakaapod-apod ug 28 ka Bibliya ug 96 ka libro. Ang resulta? Ang iyang bana, duha sa iyang mga igsoong babaye, ang iyang pag-umangkong babaye ug pag-umangkong lalaki, ang iyang bayaw nga lalaki, iyang amahan ug inahan, anak nga lalaki gikan sa unang kaminyoon, iyang kauban sa trabaho, ug kauban sa trabaho sa iyang bana ug ang iyang asawa wala magdugay nagtuon sa Bibliya ug nangandam alang sa bawtismo. Busa, 13 ka tawo ang nakabaton ug higayon sa pagpauswag sa kalidad sa ilang kinabuhi pinaagi sa pagduaw sa usa sa mga Saksi ni Jehova. Kining babayehana miingon: “Ang pagpahiuyon sa kabubut-on ni Jehova nakahimog dako kaayong kaayohan sa among mga kinabuhi nga kita angay nga magpasalamat kaniya diha sa atong mga pag-ampo sa matag adlaw!”
Pagpamatuod Diha sa Tunghaan
Adunay seryosong mga suliran sa pagdisiplina sa daghang mga tunghaan sa Sweden. Apan ang batan-ong mga Saksi nahimong usa ka positibong impluwensiya pinaagi sa pagpaambit sa mga kamatuoran sa Bibliya uban sa mga magtutudlo ug sa kaubang mga estudyante. Pananglitan, ang batan-ong si Jorgen prangkang miingon sa iyang mga magtutudlo ug mga kauban sa klase nga siya usa sa mga Saksi ni Jehova. Siya gitahod sa iyang pagkaprangka ug maayong paggawi. Si Jorgen kanunay nga mitubag bisan sa mahagitong mga pangutana nga matinahuron ug inubanan sa mga pagkutlo sa Bibliya. Kini nakahatag ug lalom nga impresyon sa iyang mga kauban sa klase. Miingon si Jorgen:
“Usa ka tuig human nga natapos sa pagtungha, akong nahibalag si Peter, ang kauban nako niadto sa klase. Human sa pipila ka mga panaghisgot, akong gisugdan siya ug pagtuon sa Bibliya. Sa misupak ang iyang inahan, kami nagtuon diha sa baybayon. Si Peter nabawtismohan niadtong Marso 1988. Namatikdan sa iyang inahan nga ang iyang anak nausab, mao nga siya usab misugod sa pagtuon. Wala magdugay, siya gibawtismohan.
“Ang laing kauban sa klase niadto, si Torbjorn, misugod sa pagtuon sa Bibliya. Ug ang iyang inahan usab. Sila karon bawtismado na usab.” Tanan-tanan, upat ka mga kauban sa klase ni Jorgen ang nagtuon sa Bibliya, ug ang ikalima nagpakita ug interes. “Naglaom ko nga kini nga kasinatian makadasig sa batan-ong mga Saksi sa tunghaan nga magpaila,” mihinapos si Jorgen. “Ang ilang Kristohanong paggawi ug malig-ong pagbarog alang sa kamatuoran magapugas ug mga binhi nga sa ulahi mamungag maayong bunga.”
Nagapakig-away Alang sa Relihiyosong Kagawasan
Ang mga Saksi ni Jehova usab nagdulag hinungdanong papel aron sa pag-establisar sa pangunang relihiyosong kagawasan sa Sweden. Kini miobra sa kaayohan sa tanan.
Pananglitan, sama sa ubang kayutaan, ang mga Saksi ni Jehova sa Sweden sa tagsa-tagsa determinado sa paghupot sa Kristohanong neyutralidad. (Juan 17:16) Ingong resulta, daghan ang gisentensiyahan ug daghang tuig sa pagkabilanggo. Apan sa 1966 nakab-ot ang relihiyosong kagawasan sa dihang ang mga awtoridad mihukom nga samtang gihusay pa ang tagsa-tagsa ka kaso, ang mga Saksi dili tawgon alang sa pagkasundalo. (Isaias 2:2-4) Ang relihiyosong kagawasan sa Sweden nagsilbing usa ka modelo alang sa ubang mga kagamhanan.
Ang laing butang nga nalangkit maoy bahin sa mga katungod sa mga pasyente. Ang mga Saksi ni Jehova seryosong nagtuman sa sugo sa Bibliya sa ‘paglikay gikan sa dugo’ ug busa nagadumili sa mga pag-abuno sa dugo. (Buhat 15:28, 29) Bisan pag dili tanang mga doktor ug medikal nga mga trabahante ang nagatahod niining Kasulatanhong baroganan, ang usa ka lindog sa labing iladong medikal nga mantalaan sa Sweden sa dili pa dugay nagbutyag diha sa usa ka ulohan: “Ang Pagdumili sa Pagdugang ug Dugo Kinahanglang Tahoron Kon ang Pasyente Nahibalo sa mga Sangpotanan.”
Kining mga pulonga maoy ulohan sa usa ka taho diha sa miting sa National Board of Health and Welfare ug sa Delegation for Medical Ethics of the Swedish Society of Medicine. Human nga nahisgotan ang kahimtang sa mga Saksi ni Jehova, kini nga mga awtoridad midesider sa pag-awhag sa tanang mga doktor sa pagsunod kon may igo nang edad ang pasyente sumala sa balaod—gikan sa 15 anyos ang edad pataas—modumili sa pag-abuno sa dugo. Ilang giila nga karon dunay mas dako na ang pagpugong sa pagdugang ug dugo tungod sa riyesgo nga makapasa ug mga sakit. Labing hinungdanon, hinunoa, mao nga ang ilang nadan-agan nga desisyon nagasuportar sa pangunang katungod sa mga pasyente nga modumili sa partikular nga paagi sa pagtambal.
Sa pagkamatuod, ang kadaghanang mga molupyo sa Sweden nagatagamtam ug maayong kinabuhi sa materyal. Apan daghan ang gikinahanglan aron mapalig-on ang moral ug ang espirituwal. Sa walay duhaduha, ang matuod nga mga Kristohanon nianang yutaa nagatabang sa pagpauswag sa mga kinabuhi sa tanan nga gustong magtuon ug mopadapat sa Pulong sa Diyos. Kanang maong masanongong mga tawo nalipay sab sa palaabuton nga kinabuhing dayon diha sa umaabot bag-ong kalibotan sa Diyos.—Juan 17:3; 2 Pedro 3:13; Pinadayag 21:3, 4.
[Mapa sa panid 22]
(Alang sa aktuwal nga pagkahan-ay, tan-awa ang publikasyon)
NORWAY
SWEDEN
FINLANDIYA
U.S.S.R.
DENMARK
KASADPANG ALEMANYA
SIDLAKANG ALEMANYA
POLANDIYA