Pagkaplag sa Kalipay—Apan Diin?
SI Jesus miingon: “Malipayon ang mga mahunahunaon sa ilang espirituwal nga panginahanglan.” (Mateo 5:3) Usa ka sinserong batan-ong babaye sa Tungang Sidlakan mahunahunaon sa iyang espirituwal nga panginahanglan ug nagtinguha sa pagpahimuot sa Diyos. Sa kataposan, iyang nakaplagan ang kalipay—apan diin? Ato siyang pasaysayon.
“Ako gipadako sa usa ka relihiyoso kaayong Katolikong Maronite nga pamilya. Kaming mga bata gibansay sa pagpangadye kada gabii sa atubangan sa mga estatwa, ug sukad sa pagkabata nakabaton ako sa tinguha sa pag-alagad sa Diyos.
“Sa edad 17, ako misulod sa usa ka kombento aron mahimong madre, kay naghunahuna nga kadto usa ka paagi sa pagtagbaw sa akong tinguha. Ugaling, nakakita akog daghang butang taliwala sa mga madre nga nakapalibog kanako. Sila tiglibak sa usag usa. Ang mga estudyante dili hatagag igong makaon, samtang ang mga madre nagpahimulos sa labing lamiang pagkaon. Ug dihay imoral nga mga buhat tali sa mga madre ug sa pari. Kay mapait nga nahiubos, ako migawas sa kombento tapos sa siyam ka bulan ug mipauli.
“Ako may daghan pang pangutana nga wala matubag, ug sa dihang wala ako makakaplag ug makapatagbawng mga tubag kanila, ako nahidangat sa punto nga walay pagtagad sa relihiyon. Dayon, niadtong 1982, sa dihang ako 22 anyos, ang akong igsoong lalaki ug babaye sa unod nagtuon sa Bibliya uban sa mga Saksi ni Jehova. Ang akong mga ginikanan ug ako misupak kanila. Naagoman sa akong igsoong lalaki ang daghang paglutos, mga pagbun-og, ug pagkapriso tungod sa iyang bag-ong pagtuo. Hinuon, ang nakapahingangha kanako mao ang dagkong kausabang iyang gihimo sa iyang kinabuhi. Dugang pa, iyang gihatag ang makataronganong mga tubag sa Bibliya sa mga pangutana nga akong gisukna sa dugay nang panahon. Busa gisugdan ko ang pagbasang sekreto sa Bibliya sa akong kaugalingon sa magabii.
“Usa ka adlaw ako mikuyog aron maniid sa usa ka asembliya sa mga Saksi ni Jehova. Ako nakadayeg sa gugma nga gipakita didto. Walay kalainan tali sa dato ug pobre. Ang mga Saksi nagakinabuhing nahiuyon sa ilang ginatudlo. Kombinsido ako nga nabatonan nila ang kamatuoran.
“Pagkatapos gayod sa asembliya, gihangyo nako ang usa kanila sa pagtuon uban kanako. Giingnan ko siya nga buot ko lang magtuon, dili motambong sa mga tigom o mogula sa pagsangyaw. Hinunoa, sa wala madugay nakaamgo ako nga nakat-onan ko ang kamatuoran. Miampo ako ug mihukom sa pag-alagad kang Jehova. Sa Oktubre 28, 1983, ang akong igsoong lalaki, akong igsoong babaye, ug ako nabawtismohan. Karon nakaplagan ko na ang paagi sa pagtagbaw sa tinguha sa pag-alagad sa Diyos nga akong nabatonan sukad sa pagkabata.
“Duha ka bulan tapos sa bawtismo, misugod ako sa pag-auxiliary payunir, ug walo ka bulan sa ulahi ako nahimong regular nga payunir. Usa ka tuig ug tunga sa ulahi, ako gidapit sa pag-alagad sa sangang buhatan sa mga Saksi ni Jehova, nga nailhang Bethel, nga akong gihimo sa temporaryong paagi sulod sa duha ka tuig. Ako nakadayeg sa pagkamapaubsanon nga gipakita sa tanan. Ang labawng responsableng mga igsoong lalaki miambit pa sa buluhaton sa paghugas sa plato tapos sa panihapon.
“Sa Marso 14, 1988, ako nahimong permanenteng membro sa pamilyang Bethel. Pagkamasadyaong okasyon! Oo, nakaplagan ko ang kalipay. Diin? Taliwala sa dedikadong mga Saksi ni Jehova! Karon gibati ko sama sa salmista nga miingon: ‘Ang usa ka adlaw sa imong mga sawang labaw pa kay sa usa ka libo sa laing dapit.’”—Salmo 84:10.