Pagkapukan sa Babilonya Gimantala sa Hapon

“SIYA napukan na! Ang Dakong Babilonya napukan na, nga nagpainom sa mga nasod sa bino sa kasuko sa iyang pakighilawas!” Kanang makapaukay nga pahibalo sa manulonda nadungog sa unang panahon ni apostol Juan niadtong unang siglo sa atong Komung Panahon. Hinuon, sa atong panahon, sa “adlaw sa Ginoo,” gipalanog kini sa Kristohanong mga Saksi ni Jehova nga madungog sa tanang tawo.—Pinadayag 1:10; 14:8.

Ang Dakong Babilonya mao ang tibuok-kalibotang sistema sa bakak nga relihiyon, nga ang Kakristiyanohan mao ang labing salawayong bahin niini. Latas sa “panahon sa kataposan,” ang mga paghukom ni Jehova batok kaniya maisogong gimantala sa mga Saksi ni Jehova sa tibuok nga kalibotan. (Daniel 12:4) Pananglitan, ang mga isyu sa Bantayanang Torre sa Abril ug Mayo sa miaging tuig may kusganong mga artikulo nga nagyagyag sa pagkasad-an sa bakak nga relihiyon ug sa umaabot niyang kalaglagan. Kapin sa 50 milyong kopya sa maong mga isyu ang gipanagtag sa tibuok nga kalibotan—usa ka gamhanang deklarasyon sa kalaglagan sa Dakong Babilonya!

Hapon Nangandam

Usa ka pananglitan sa kadasig sa mga Saksi ni Jehova alang niadtong espesyal nga mga isyu nakita sa Hapon, ang kuta sa Shinto-Buddhistang seksiyon sa Dakong Babilonya. Sa Hapon ang Disyembre 1988 nga isyu sa Atong Ministeryo sa Gingharian nagpahibalo sa mga kongregasyon sa usa ka espesyal nga kampanya sa pagsangyaw sa kanataran nga giplano alang sa mga bulan sa Abril ug Mayo 1989. Ang mga awhag sa pagsuportar niining kalihokan sa espesyal nga magasin migawas sa misunod nga mga isyu sa Atong Ministeryo sa Gingharian, ingon man pinaagig mga sulat ngadto sa mga kongregasyon ug mga lawas sa mga ansiano.

Talagsaon ang sanong. Sa tabang ni Jehova, sulod niadtong duha ka bulan sa miaging tuig, nadawat sa Hapon ang usa ka pamatuod nga labaw kay sukad masukad.

Auxiliary Payunir nga Pag-alagad

Ang pahibalo sa Disyembre 1988 nag-apil niining mga pulong: “Gidasig namo kamo nga himoong tumong ang pagpahimulos sa auxiliary nga pagpayunir sa Abril ug Mayo, ilabina sa Abril.” Kining ideyaha gisubli sa Pebrero 1989 isyu sa Atong Ministeryo sa Gingharian, nga giawhag ang mga igsoon nga ‘ipasibo ang ilang inadlawng eskedyul aron ang labing daghang nagpahinungod nga mga ministro kutob sa mahimo makapalistang auxiliary nga mga payunir sa Abril.’

Gibutang sa mga Saksi kining maong mga pahinumdom sa kasingkasing. Ang resulta? Kinatas-ang ihap sa tanang panahon sa gidaghanon sa auxiliary nga mga payunir. Sa Marso 1989 ang gidaghanon sa mga auxiliary payunir nakaabot nag bag-ong kinatas-ang ihap nga 24,115. Apan sa Abril ang maong numero halos nadoble ngadto sa 41,055. Tinuod nga talagsaong paningkamot!

Sa daghang kongregasyon, ang tanan o kinadaghanang magmamantala miapil sa usa ka bahin sa bug-os-panahong pag-alagad sa duha ka bulang espesyal nga kalihokan. Nagkinahanglan kadtog dakong pag-organisar. Usa ka ginang sa panimalay nagduhaduha nga siya makaapil, sanglit siya nagapuyo sa duolag 900 metros sa itaas sa kabukiran diin limitado ang serbisyo sa transportasyon. Bisan pa niana, buot gayod niyang mag-auxiliary payunir. Busa gihikay sa mga ansiano nga tabangan siya sa transportasyon, ug siya, uban sa tanang ubang magmamantala sa kongregasyon, nakapahimulos sa usa ka bulan sa pagpayunir.

Ang maayong pagpanguna sa mga ansiano gihulagway sa Osaka Prefecture, Takatsuki City, Otsuka nga Kongregasyon sa 77 ka magmamantala, diin ang tanang ansiano ug ministeryal nga mga alagad nahiapil sa 73 nga nakig-ambit sa usa ka matang sa payunir nga pag-alagad. Ang maong mga payunir nag-apil usab sa tanang batan-ong bawtismadong magmamantala nga nag-eskuyla pa. Ang espiritu sa pagpayunir nga gipakita sa maong batan-ong mga Saksi mahulagwayon sa makita diha sa daghang kongregasyon. Pananglitan, sa 23 ka bawtismadong mga tin-edyer sa Heiwadai nga Kongregasyon sa Tokyo Prefecture, 11 maoy regular nga mga payunir, ug 11 ang nag-auxiliary payunir sa Abril. Nianang kongregasyona, ang katibuk-ang 93 ka magmamantala nagpayunir niadtong bulana mismo.

Usa ka Espesyal nga Adlaw sa Kalihokan

Ang Marso nga isyu sa Hapones nga edisyon sa Atong Ministeryo sa Gingharian nagdasig sa mga igsoon niining mga pulonga: “Ang buluhaton sa magasin gisuportahan dili ra sa ikaduha ug ikaupat nga mga Sabado kondili sa matag Sabado sa bulan. Ang kadasig nga ginapakita sa mga igsoon dalayegon. Sa Abril ang buluhaton sa magasin gieskedyul usab alang sa matag Sabado, apan palihog himoa ang espesyal nga paningkamot sa paggahin sa Abril 8 alang sa adlaw sa magasin aron ang tanan makaapil sa buluhaton sa magasin sa maong adlaw. Aron ipalanog ang pasidaan sa tanan nga mamati, kinahanglang ipanagtag nga kaylap kining tukma-sa-panahong mga isyu.”—Isaias 61:2; Pinadayag 18:4, 5.

Sa Pebrero ang Hapones nga edisyon sa Atong Ministeryo sa Gingharian mipasiugda na niining hinungdanong buluhaton. Kini miingon: “Sa ikaduhang Sabado, Abril 8, himoa nga ang matag usa sa mga Saksi ni Jehova sa Hapon—nga karon may gidaghanon nga kapig 130,000—moambit sa buluhaton sa magasin.” Ang mga ansiano gidasig sa pag-eskedyul sa lainlaing mga matang sa kalihokan sa magasin nga magakobre sa tibuok adlaw aron ang labing daghan kutob sa mahimo ang makaambit. Salamat sa positibong sanong sa mga ansiano ug sa tibuok-kasingkasing nga pagsuportar sa uban pang mga magmamantala, ang adlaw maoy dakong kalamposan. Kami makaingon nga niadtong adlawa ang kinakusgang tingog nakab-ot sa Hapon sa pagmantala sa mga paghukom ni Jehova sa Dakong Babilonya.

Pananglitan, sa Ushioda nga Kongregasyon sa Yokohama City, gihikay sa mga ansiano ang pag-alagad nga mopadayon sa 13 ka oras, gikan sa 7:00 s.b. hangtod sa 8:00 s.g. Naapil mao ang duha ka yugto sa pagsangyaw sa dalan, ingon man sa mga panahon sa pagduaw sa mga tawo nga sa nangagi wala diha sa balay ug sa regular balay-balay nga pagsangyaw. Ang kadaghanang magmamantala nakaambit sa labing menos usa sa gihikay nga mga bahin sa pag-alagad, ug ang ubay-ubay nakaambit sa halos tanang bahin sa kalihokan nga giplano.

Ang mapinadayonong pag-alagad giplano usab sa Jonan nga Kongregasyon, Fukuoka City. Didto, gihimo ang mga kahikayan nga magakobre sa mga oras gikan sa 8:00 s.b. hangtod 9:00 s.g., nga may mubo rang pahulay sa udto. Naapil mao ang panahon sa balay-balay nga pagsangyaw, pagduaw sa komersiyal nga teritoryo ug mga dapit sa tindahan, ug pagduaw sa dapit diin walay nahibalag sa nangaging mga pagduaw. Ang pila ka Saksi sa maong kongregasyon mitahog abot sa walo ka oras nga kalihokan sa pagsangyaw niadtong adlawa!

Ang bug-os-kasingkasing nga pagsanong sa mga igsoon nakita sa Wakayama Prefecture, diin ang tanang 55 ka magmamantala sa Kainan nga Kongregasyon nakig-ambit sa espesyal nga adlaw sa kalihokan. Usa ka igsoong babaye didto, usa ka regular payunir, nanganak sa Abril 7. Nakapugong ba kana kaniya sa pagsangyaw sa Abril 8? Wala. Gitanyag niya ang mga magasin didto mismo sa ospital! Nga nagpakita sa samang espiritu, usa ka igsoong lalaki nga taga-Osaka Prefecture napugos sa pag-atiman sa mga butang diha sa iyang sekular nga trabahoan sa Abril 8. Sa unsang paagi makaambit siya sa espesyal nga kalihokan? Gihimo niya ang iyang trabahoan nga iyang teritoryo ug nakakuhag lima ka suskrisyon.

Usa ka igsoong babaye sa Saitama Prefecture nangandoy nga makaambit sa espesyal nga kalihokan niadtong adlawa, apan kinahanglang mobiyahe siyag halos 1,280 kilometros paingon sa Asahikawa City uban sa iyang dili-magtutuong bana. Bisan pa niana, siya wala mosurender. Sa Asahikawa, siya miadto sa estasyon sa tren kauban sa iyang duha ka bata, ug didto, sa gawas sa estasyon, napalgan niya ang iyang gilaoman: usa ka panon sa mga magmamantala gikan sa lokal nga kongregasyon nga naghimo sa pagsangyaw sa kanataran. Siya nakaambit uban kanila sa mga kalihokan sa maong adlaw.

Pagsangyaw sa Dalan

Ang Hapones nga Atong Ministeryo sa Gingharian nagdasig nga linain sa mga ansiano sa paghikay sa pagsangyaw sa dalan alang sa Abril 8, ug kini nahimong usa ka dakong bahin niadtong espesyal nga adlaw. Sumala sa nahitabo, may kusog nga ulan sa tibuok nasod, apan kadto wala makapabugnaw sa kadasig sa mga igsoon. Ang kadaghanan nagpakita sa samang espiritu sumala sa nakita diha sa tulo ka baldadong igsoong babaye sa Minamata nga Kongregasyon, Kumamoto Prefecture. Bisan pa sa ilang mga edad—65, 80, ug 85—ilang gisungsong ang daotang panahon ug nakapadasig kaayo sa uban pa sa kongregasyon; nadani usab nila ang pagtagad sa daghang umalagi.

Samtang naghimo sa pagsangyaw sa dalan, usa ka igsoong babaye sa Kashiwa City West Congregation nangutana sa usa ka lalaki: “Nakadungog ka na ba sa Dakong Babilonya?” Sa gitanyag ang Abril nga mga isyu sa mga magasin, ang tawo miingon, “Dili interesado” ug milakaw. Apan, sa pag-abot niya sa kinasang-an sa riles ug mihunong, siya mibagotbot sa iyang kaugalingon, “Unsa ba ang Dakong Babilonya?” Ang usa ka igsoong lalaki nga naghimog pagsangyaw sa dalan sa duol nakadungog kaniya ug mikuyog sa paglakaw kaniya ubay sa dalan, nga nagpatin-aw kon unsay Dakong Babilonya. Gidawat sa lalaki ang mga magasin.

Ang pila ka kongregasyon wala pa sukad makahimog pagsangyaw sa dalan. Apan sukad sa Abril 8, gihimo nila kining regular nga bahin sa ilang kalihokan. Ug dili katingad-an! Ang pagsangyaw sa dalan maoy malamposon kaayong paagi sa pagkaplag sa mga tawo nga dili mahibalag sa laing paagi. Usa ka igsoong babaye sa Naha City, Okinawa, mihimo sa pagsangyaw sa dalan sa gawas sa usa ka opisina diin ang mga Saksi ni Jehova dili tugotang mosulod sa tuyo sa pagsangyaw. Napahimutang niya ang 12 ka magasin sa usa ka oras pinaagi sa pagduol niadtong nagasulod ug nagagawas sa tinukod.

Usa ka igsoong babaye sa Muroran City, Hokkaido, mihimo sa pagsangyaw sa dalan sa gawas sa mga dagkong tindahan sa sentro sa siyudad. Giingnan niya ang usa ka tawong midawat sa mga magasin: “Kon buot nimong mahibalo sa dugang, makaduaw kami nimo sa imong balay.” Iyang gihatag kaniya ang iyang pinuy-anan, iyang numero sa telepono, mapa paingon sa iyang balay, ug ang mga panahon nga siya maanaa sa balay! Sa sunod semana, siya ug usa ka igsoong lalaki miduaw kaniya ug nakadiskobreng siya nagpuyo sa usa ka apartment nga dili motugot sa regular nga mga pagduaw aron sa pagsangyaw sa mga Saksi ni Jehova. Ang batan-ong lalaki kombinsido sa iyang personal nga pagbasag Bibliya nga ang Kakristiyanohan wala makabaton sa pag-uyon sa Diyos. Nangita siya sa tinuod nga Kristiyanidad ug nalipay sa pagsugod sa regular nga pagtuon sa Bibliya sa balay.

Usa ka magmamantala sa Kawasaki City nakig-ambit sa pagsangyaw sa dalan sa hapon sa Abril 8. Sa natapos ang panahong gigahin niya, siya nakigsulti sa kataposang tawo, usa ka batan-ong babaye nga nag-ingon nga siya sa nangagi nagtuon sa Bibliya uban sa mga Saksi ni Jehova. Apan siya gisupak sa iyang mga ginikanan ug human niadto mitungha sa unibersidad ug mibalhin ngadto sa usa ka dormitoryo. Busa mihunong siya sa iyang pagtuon. Bisan pa niana, salamat sa pagsangyaw sa dalan, malipayon niyang gisugdan na usab ang iyang pagtuon sa Bibliya ug nagatambong na sa mga tigom.

Pagpanagtag ug Magasin

Ingong resulta sa pagsuportar sa daghan kaayo sa espesyal nga kalihokan, ang napahimutang nga mga magasin—ilabina kadtong nasudlan sa mga mensahe sa paghukom batok sa Dakong Babilonya—daghan kaayo. Ang usa ka magmamantala sa kongregasyon sa Osaka Prefecture nakapahimutang ug 205 ka magasin sa Abril. Sa Kagoshima City, East Congregation, 14 ka magmamantala nakapahimutang ug kapin sa gatos ka magasin ang matag usa, samtang ang nahilit nga grupo sa 12 ka magmamantala sa Ogawa Town, Ibaraki Prefecture, nakapanagtag sa total nga 1,388 ka magasin sa Abril.

Sa pagkamatuod, sa Hapon sa katibuk-an, 3,293,266 ka magasin ang napahimutang sa Abril sa miaging tuig—92 porsiento nga labaw kay sa Abril 1988! Pagkakusog ang paglanog sa mensahe sa paghukom ni Jehova batok sa Dakong Babilonya!

Gahom nga Labaw sa Kasagaran

Sa pagkamatuod, sama sa tanang ubang bahin sa kalibotan, ang mga Saksi ni Jehova sa Hapon positibo ug madasigon sa tingpamulak sa 1989. Ang ilang mga kasinatian mihatag ug tin-awng ebidensiya nga si Jehova nagpanalangin sa ilang kadasig ug nagpaluyo sa ilang paningkamot sa pagmantala sa iyang mga paghukom batok sa bakak nga relihiyon. Alang sa pipila, dili sayon ang pagpakigbahin; bisan pa niana, sila determinado, ug gipanalanginan ni Jehova ang ilang kadasig. Daghan ang nagapuyo sa teritoryo nga subsob ginasangyawan, apan sila nagpakita sa samang espiritu sa pagkadinalian ug kadasig sama sa ilang mga igsoon sa ubang mga dapit. Sa tanang kahimtang, ang mga pulong ni Isaias natuman: “Siya nagahatag ug gahom sa usang gikapoy; ug sa usa nga walay dakong kusog iyang gipadagaya ang bug-os nga kagahom.”—Isaias 40:29.

Pihong ang ilang mga kasinatian nagpahinumdom kanila sa mga pulong ni apostol Pablo: “Nabatonan namo kining bahandi diha sa mga sudlanan nga yuta, nga ang gahom nga labaw sa kasagaran mamaiya sa Diyos ug dili sa among kaugalingon.” (2 Corinto 4:7) Oo, sa dihang ang usa ka tawo magabutang sa Kristohanong ministeryo, “kining bahandi,” nga una sa iyang kinabuhi, masinati niya ang hinatag-sa-Diyos nga “gahom nga labaw sa kasagaran.” Hinaot si Jehova mopadayon sa paggamit sa iyang mga alagad sa Hapon ug sa tanang ubang kayutaan sa paghatag ug bug-os nga pamatuod sa dili pa moabot ang kataposan.—Mateo 24:14.

Karong tuiga, ang Abril ug Mayo nga mga isyu sa Ang Bantayanang Torre magadala sa serye sa hapin bahin sa “Kinsay Motultol sa Katawhan Ngadto sa Pakigdait?” “Pakigdait sa Kalibotan—Unsa Unyay Tinuod nga Kahulogan Niini?” “Milyonmilyong Patay Karon Mabuhi Pag-usab,” ug “Armageddon—Kanus-a?” Nganong dili magplano sa pagpakig-ambit niining impormasyona ngadto sa imong mga silingan? Tinoa nga ang labing daghan mahibalo sa kahibulongang maayong balita nga gitipigan sa Diyos diha sa Bibliya alang sa atong adlaw.