Ting-ani Diha sa Yuta sa Yelo ug Niyebe
ANG Greenland, nga mao ang labing dakong isla sa kalibotan, sa pagkatinuod maoy usa ka yuta sa yelo ug niyebe. Ang kadaghanan niining hapit 2,700 ka kilometros nga isla nahimutang sa amihanan sa Arctic Circle ug permamente nga dunay yelo nga moaberids ug 1.5 ka kilometros ang gibag-on. Ang nahibilin sa Greenland naputos sa niyebe nga gikan sa lima ngadto sa walo o kapin pang mga bulan sa tibuok tuig. Ginaingon nga ang unang mga eksplorador nga Viking ang nagngalan niining Greenland aron sa pagdanig mga lumolupyo. Sa panahon sa mubong ting-init, hinunoa, ang pipila ka dapit duol sa dagat mohaom sa maong ngalan.
Sa tingpamulak, ang migahi sa katugnaw nga dagat sa amihanang-sidlakan sa Greenland mabungkag, ug ang dagkong tibugol sa yelo motungha. Kining mga yeloha maanod paingon sa dagat sa sidlakan, sa Cape Farewell, ug paingon sa dagat sa kasadpan, nga nagapalisod kaayo sa biyahe sa dagat sa daghang bulan. Sa tingtugnaw, ang dagat palibot sa dakong bahin sa isla mogahi sa kabugnaw, nga nakapalain sa mga lugar nga dunay molupyo. Sa literal, ang yelo maoy nangibabaw sa yuta, sa dagat, ug sa mga paagi sa kinabuhi sa mga tawo. Lisod handurawon kon unsay anihon niining nasora.
Pagsugod
Ang Eskimo sa mga kulturang Inuit nagkinabuhi ingong mga mangangayam sa Greenland sa daghang siglo. Niadtong 1721 ang Lutherano nga ministro si Hans Egede miabot sa Greenland ingong misyonaryo. Sa ulahi, ang Moravian Mission nahimong aktibo sa nagkalainlaing mga koloniya. Ang uban nilang mga misyonaryo naghubad sa pipila ka basahon sa Bibliya sa pinulongan sa Greenland, gipabilin ang personal nga ngalan sa Diyos, si Jehova, sa ilang hubad. Apan sukad sa 1900, ang Lutheran Church sa Denmark na lamang ang naglihok sa Greenland.
Niadtong 1953, samtang koloniya pa ang Greenland sa Denmark, nahitabo ang usa ka hinungdanong resulta sa mga hitabo. Sumala sa bag-ong Batakang Balaod sa Denmark nga miepekto niadtong tuiga, ang relihiyosong mga grupo gawas sa Lutheran Church gitugot na sa Greenland. Busa, sa Enero 1955, duha ka mga Saksi ni Jehova nga gikan sa Denmark miabot ingong mga misyonaryo. Ang ilang asaynment mao ang 2,000 ka kilometros nga sa kadaplinan sa baybay sa kasadpang-habagatan, diin halos ang tanang mga taga Greenland nagpuyo—sa populasyong 27,000, nga gilangkoban sa mga mangangayam ug mga mangingisda.
Si Kristen Lauritsen, usa sa duha ka Saksi, nahinumdom: “Kami wala gayoy kasayoran bahin sa Greenland, apan may dako kaming tinguha sa pagtudlo sa mga taga Greenland sa kamatuoran sa Pulong sa Diyos. Kami dunay pipila ka tracts sa pinulongan sa Greenland, ug ang pulyetong ‘Kining Maayong Balita sa Gingharian’ miabot sa ulahi niadtong tuiga.” Sa unsang paagi gihimo nila ang ilang buluhatong pagsangyaw?
“Sa sinugdan migamit kami ug mga pinatik nga mga kard nga nagpatin-aw sa katuyoan sa among pagduaw. Apan sa kadugayan nakakat-on kami ug pipila ka mga pulong. Kanunayng barko ang among sakyan sa among pagbiyahe paingon sa mga lungsod ug dili regular ang biyahe, sanglit wala may taknaan sa mga panaw niadto. Komung eksperyensiya nga dagaton kami. May mga problema usab kami sa pagpangitag kaabtan. Kasagaran, magmantenil na lang kamig tolda nga kanunay namong ginadaladala uban sa among mga bagahe.”
Apan dihay mga balos. Ang mga taga Greenland maoy mga tawong mahigalaon ug maabiabihon. Ilang kinaiyahan ang pagtuo ug Diyos ug pagtahod sa Bibliya. Halos ang tanang balay dunay kompletong Bibliya sa ilang kaugalingong sinultihan. Nakahinumdom si Kristen nga giduol siya sa usa ka batang babaye nga dunay sulat nga nag-ingon: “Kon kamo wala pay lugar nga kasak-an, dali kamo ug saka sa amo.” Kining pamilyaha mitabang usab kanila sa pagpangitag lugar nga ilang gihikay nga pasalidahan sa usa sa mga pelikula sa Sosyedad.
Miabot ang mga Tagana
Sa pagka 1961 ang mga pamilya nga gikan sa Denmark misugod sa pagbalhin ngadto sa Greenland sa pag-alagad sa dapit nga dako ang panginahanglan ug mga Saksi. Mihimo silag dalayegong paningkamot sa pagtuon sa lisod kaayong pinulongan sa Greenland ug sa pag-antos sa pagkanahilain gikan sa isigkamagtutuo. Regular nga gihimo nila ang ilang mga tigom ug nagpabiling malig-on sa ilang pagtuo ug sa Kristohanong kalihokan. Ang ilang mga kahago sa pagkatinuod wala makawang. Niadtong tuiga ang unang duha ka kongregasyon ang natukod sa Greenland, ang usa diha sa kaulohan sa Nûk (Godthåb) ug ang lain sa Qaqortoq (Julianehåb), sa amihanan. Nakahatag kinig dakong kalipay sa mga Saksi sa dihang ang ubang mga taga Greenland nga mibalhin ngadto sa Scandinavia gibawtismohan.
Sa katuigang 1970 daghang batan-on ug madasigong mga espesyal payunir nga mga magtiayon miabot, nanguna sa pagsangyaw nga buluhaton. Sa pagka 1973 Ang Bantayanang Torre ug ang librong Ang Kamatuoran nga Motultol sa Kinabuhing Dayon nabatonan sa pinulongan sa Greenland. Busa nasangkapan, gitaboktabok sa mga payunir ang mga lugar duol sa dagat, nagaduaw sa mga lungsod ug sa mga baryo, dagayang nanagpugas sa binhi sa kamatuoran. Sa unang higayon, ang pagsangyaw nga buluhaton nakaabot sa hilit nga mga lugar duol sa baybay sa sidlakan libot sa Ammassalik (Angmagssalik). Pagkadako sa kalipay sa dihang usa ka taga Greenland ang midawat sa kamatuoran sa Greenland niadtong tuiga!
Nakaani sa Kataposan!
Sa dihang napatik ang ubang mga giya sa pagtuon sa Bibliya sa lokal nga pinulongan, daghang basahon ang napahimutang. Pananglitan, komun sa magkaubang mga Saksi nga nag-alagad sa teritoryo nga wala pa kasangyawi sa pipila ka semana nga makapahimutang ug 300 ngadto sa 400 ka libro, ug sama usab kadaghana sa mga pulyeto, ug 1,000 ka magasin, ug nakakuha usab ug 60 o 70 ka suskrisyon.
Ingong resulta sa tanang pagpugas ug pagbisibis, ‘gipatubo sa Diyos ang mga butang’ diha sa netibong mga taga Greenland ug sa mga Danis nga nagpuyo sa Greenland. (1 Corinto 3:5-7) Karon, 117 ka magmamantala sa Gingharian ang nag-alagad sa pito ka kongregasyon ug sa usa ka nahilain nga grupo, nga nakatag sa tibuok yuta sa yelo ug niyebe. Himamaton ta ang pipila sa kugihang mga mamumuo.
Miduaw sa Kanataran sa Greenland
Ang maayong dapit nga sugdan mao ang habagatang kongregasyon, sa Qaqortoq (Julianehåb). Lima ka pamilya ang miabot gikan sa Denmark aron sa pag-alagad didto. Ang uban kanila naningkamot pag-ayo nga makakat-on sa pinulongan sa Greenland aron sila makapamatuod sa mga taga Greenland nga dili makasabot sa sinultihan sa Denmark. Si Flemming, lalaking may pamilya ug payunir (bug-os panahong magmamantala sa Gingharian) niining kongregasyona, miingon: “Ang among teritoryo dako kaayo. Nag-apil kini sa daghang balangay sa pangisda ug sa mga karnerohan nga nasabak diha sa mga kutay sa pangpangon nga mga isla diha sa kadaplinan sa dagat sa habagatan.” Ginamit ang ilang mga sakayang-de-motor, tigbiyahe ang mga Saksi bisan sa gilay-ong 640 ka kilometros aron sa pagduaw sa mga tawo nga nagpuyo niining halayong mga lugar.
Human sa pagbiyaheg tulo ka oras pinaagi sa barko agi sa matahom nga pangpangon nga mga isla, miabot kami sa sunod nga kongregasyon, sa Narsaq. Nagpuyo dinhi mao ang nag-inusarang pamilya sa upat ka magmamantala sa Gingharian. Bisan nalain, nakadasig sila ug nakatukod ug naglinig-onay sa usa ug usa sa espirituwal pinaagi sa mahimsog sa mga batasan sa pagtuon ug sa regular nga pakigbahin sa mga tigom ug sa pag-alagad sa kanataran.
Karon nanakay kami ug de-pasaherong barko nga moabot dinhi kada semana sa panahon sa mga bulan nga ting-init. Kining 24-oras nga biyahe mohatod kanato ngadto sa Paamiut (Frederikshåb), diin dunay napulo ka Saksi. Sa katunga sa dalan, mihapit kami sa usa ka balangay diin dunay duha ka nalain nga mga magmamantala. Ang usa kanila, si Ane Marie, dunay anak nga si Nûk kinsa nakahibalo sa kamatuoran sa pila ka tuig nga milabay ug misugod sa pagsangyaw sa iyang inahan pinaagi sa telepono ug sulat. Siya nakasabot sa gisulti sa iyang anak kaniya. Pinaagi sa pagbasa sa tanang basahon nga mabatonan sa pinulongan sa Greenland ug sa pagpaminaw sa mga teyp sa mga Saksi nga taga Greenland nga nag-asoy sa ilang mga eksperyensiya, si Ane Marie mibarog alang sa kamatuoran. Kapin na sa 60 anyos ang panuigon ug walay tabang sa lokal nga kongregasyon, siya milampos sa pag-undang sa iyang 50 ka tuig nga batasan sa pagpanabako, mihunong sa pagsaulog sa Pasko ug sa mga komplianyo, ug misugod sa pagsangyaw sa tibuok balangay. Ingong resulta sa iyang mapailobong paningkamot ug maayong pananglitan, duolan sa napulo ka interesadong mga tawo nagatigom sa regular aron sa pagtuon sa Bibliya ug sa pagpamati sa girekord nga mga tigom.
Mibiya sa Paamiut, ang 14-oras nga biyahe sa barko diha sa baloron dakong dagat mihatod kanamo sa Nûk. Niining kaulohang siyudad sa 13,000 ka molupyo, adunay 43 ka magmamantala sa kongregasyon, ug kapin sa ikatulong bahin kanila mga taga Greenland. Ang senemanang mga tigom maoy sagol sa pinulongan sa Denmark ug sa Greenland, nga sa dayag maoy usa ka hagit sa duha ka grupo sa pinulongan.
Balik sa de-pasahero nga barko pag-usab, ang otso-oras nga biyahe mohatod kanato sa Maniitsoq (Sukkertoppen). Dinhi, upat ka pamilya nga gikan sa Denmark nag-alagad uban sa pipila ka bag-ong lokal nga mga magmamantala sa Gingharian. Bug-os nilang nakobre ang teritoryo sa lungsod ug nakapahilunag daghan kaayong basahon sa Bibliya nga sa ingon ang kada panimalay adunay kopya sa Akong Basahon sa mga Estorya sa Bibliya sa pinulongan sa Greenland. Pinaagi sa ilang mga sakayan nga de-motor, naghikay usab sila ug regular nga mga biyahe sa pagsangyaw sa halayong mga balangay.
Mipadayon sa amihanan, ang among sunod nga paghapit maoy napulo ka oras nga gilay-on, sa Sisimiut (Holsteinborg). Lima ka pamilya nga Danis ug pipila ka lokal nga mga magmamantala ang naglangkob sa kongregasyon dinhi. Ang magtiayong espesyal payunir gikan dinhi tigduaw matag karon ug unya sa lugar duol sa dagat sa sidlakan. Kini nag-apil ug tunga sa oras nga pagsakay ug helikopter ngadto sa tugpahanan, duha ka oras nga biyahe sa ayroplano tabok sa sentral nga ice cap o pulos niyebe nga lugar, ug laing daklit nga paghapit sa helikopter tabok sa lanaw sa Ammassalik duol sa dagat sa sidlakan. Ang talan-awon didto matahom kaayo—habog nga mga bukid nga nagbantaaw sa ibabaw ug sa glaciers o bukid nga yelo nga nagpuno sa lungag sa ubos. Ang mga tawo masanongon sa mensahe sa Gingharian, apan pipila pa lang ang mibarog sa kamatuoran.
Human mibalik ug lupad tabok sa ice cap, mihunong kami sa kataposang paghapit sa Ilulissat (Jakobshavn), ang halayong amihanan nga kongregasyon. Ang Ilulissat maoy pinulongan sa Greenland alang sa “icebergs,” ug haom kini nga ngalan. Sa duol mao ang labing dakong glacier sa Amihanang Hemisperyo, ug ang bukid nga yelo naglutaw sa tibuok luuk ug sa pangpangon nga mga isla, naghimo sa talan-awon nga hilabihan katahom. Unom ka pamilya gikan sa Denmark ug usa ka magtiayong taga Greenland maoy naglangkob niining aktibo kaayo nga kongregasyon. Dugang pa sa lungsod sa Ilulissat ug sa enterong lugar sa Disko Bay, ilang nabatonan tingali ang labing halayong amihanang teritoryo sa kalibotan, nga moabot hangtod sa balangay sa Kullorsuaq (Devil’s Thumb) nga hapit 75 grado sa amihanang latitude.
Ang mga espesyal payunir sa Ilulissat regular nga nagaduaw niining halayong dapit, nagapamatuod sa mga tawo sa Upernavik ug Uummannaq. Si Bo ug Helen mitaho: “Kining halapad kaayong amihanang dapit maoy wala matandog nga paraiso sa Arktiko. Ang lugar hilang sa mga molupyo, ug ang mga tawo nagkinabuhi sa pagpangayam kay sa pangisda. Simple ang ilang kinabuhi, ug sila wala kaayo mabalaka sa umaabot. Ang kadaghanan kanila interesado sa espirituwal nga mga butang. Sila andam nga mamati sa mensahe nga among gidala.” Ang panahon ray mag-igo kon kining mga karnerohong mga tawo matigom ngadto sa usa ka matuod nga “panon” ubos sa “usa ka magbalantay,” si Jesu-Kristo.—Juan 10:16.
Ang mga payunir nga Danis lamang ang nakaalagad niining dapita, apan duolan sa walo ka taga Greenland sa Nûk mihimog video tape recording sa katibuk-ang pagpamatuod sa atong mga pagtuo ug sa dalan sa kinabuhi. Sa dihang gamiton sa mga payunir kining teyp diha sa ilang balay-ug-balay nga ministeryo, nakaaghat kini sa mga tawo sa pagbangon ug daghang pangutana, ilabina bahin sa atong dili-pagsaulog sa Pasko ug sa dili pagbunyag sa mga masuso. Mahimong ikadugang nga duolan sa 200 ka libro ang napahimutang sa panahon sa tibuok upat ka semanang panaw nga bag-o pa lang giasoy.
Ang Pagpangani Nagpadayon
Bisan pa sa malisod nga palibot ug sa babag sa pinulongan, ang pagpangani sa Gingharian nagpadayon. Daghang taga Greenland nakakat-on sa pinulongang Danis aron makapahimulos sa mga tigom sa kongregasyon. Apan, nagkadaghang mga tigom ginahimo sa pinulongan sa Greenland, nga nagpaposible sa daghan pa sa pag-ambit sa espirituwal nga pagpangaon.
Pananglitan, bisan pag ang programa sa 1988 nga “Balaang Hustisya” Distritong Kombensiyon gipahayag sa Danis diha sa Nûk, mga usa sa ikatulong bahin sa mga pakigpulong gihubad sa pinulongan sa Greenland. Ang total nga 163 ang mitambong. Ang mga delegado gikan sa halayong amihanang kongregasyon sa Ilulissat ug sa halayong habagatang kongregasyon sa Qaqortoq mibiyahe hapit duha ka adlaw sa matag usa ka pagpaingon didto. Upat ang gibawtismohan sa kombensiyon.
Unsa may palaabuton alang sa umaabot nga pagpangani? Maayo kaayo! Sa 1989 dakong kalipay ang pagtan-aw sa 205 nga mitambong sa Memoryal sa kamatayon ni Kristo. Sa pagkakaron, kapin sa usa ka gatos ka pagtuon sa Bibliya ang gidumala. Oo, tugob nga gipanalanginan ni Jehova ang kuging pagtrabaho sa iyang mga alagad niining yuta sa yelo ug niyebe.