Ang Ipasabot sa mga Balita

Malaw-ayng Edukasyon

Sulod sa miaging napulo ka tuig, usa ka kolehiyo sa Estado sa New York nagtanyag ug kurso bahin sa tawhanong seksuwalidad nga makaani sa estudyante ug tulo ka kredit sa kolehiyo. Ang mga estudyante “obligado sa pag-adto sa ‘gawas’ aron sa pagpakigsulti sa mga pampam, sa pagduaw sa mga bar sa mga bayot o sa pagtan-aw ug mga baybayon sa mga hubo,” mitaho ang kolumnista sa New York Post. Ang libro sa tunghaan ginaingon nga naghatag tino nga mga instruksiyon sa pakigsekso nga ipaagi sa baba, ug nagdasig sa praktis sa masturbasyon. Sumala sa Post, ingong bahin sa karikulom sa lawak-tunghaan, ang mga estudyante gipakitaan ug salida nga nagpasundayag sa “managparis nga nagsekso,” ug maingon man sa “gipadul-ang mga hulagway sa mga anatomiya sa lalaki ug babaye.” Unsa pay dugang napalayo gikan sa kinaiyanhong pagkaputli ug kaligdong?​—Filipos 4:8, 9.

Samtang ang mga batan-on angay makahibalo sa mga kamatuoran sa kinabuhi ug sa pagbaton ug himsog nga tinamdan bahin niini, ang mga ginikanan mao ang dunay pangunang kaakohan sa pagtagana sa maong instruksiyon. (Proverbio 22:6) Ang bisan unsang kurso sa tunghaan nga nagadasig ug sekso sa gawas sa kaminyoon ug nagpaobligar sa mga estudyante sa pagtan-aw ug X-rated nga mga pelikula ug sa pagsusi sa homoseksuwalidad ug pagpamampam, siyempre, dili gayod madawat sa tinuod nga mga magsisimba sa Diyos. Ang Bibliya klarong nagtawag niadtong nagapraktis sa pakighilawas, panapaw, ug homoseksuwalidad ingong mga tawo nga dunay “makauulawng mga pangibog sa sekso,” nagahimog butang “malaw-ay.” Mahitungod niining mga butanga, ang Bibliya nagsugo: “Paglikay gikan sa pahighilawas.” Dugang pa, kini nagaingon: “Ang pakighilawas . . . dili gayod angay pagahisgotan sa inyong taliwala.”​—Roma 1:24-32; 1 Tesalonica 4:3; Efeso 5:3, 5; Galacia 5:19, 21.

Bakak nga Paglaom

Ang mga tawo nga nagapangitag “labi pang personal nga pagpanaw” ngadto sa kamatayon nagpalayo gikan sa naandang mga paagi sa paglubong ug mipabor sa karaang batasan sa paghimo sa patayng lawas nga mummy, mitaho ang The Wall Street Journal. Sa pinakaubos nga kantidad nga $7,500 “ang kustomer ihumol sa bino, mga yerbas ug kemikal nga mga preserbatibo sulod sa duha ka bulan, ug haplasan usab ug humot nga mga lana ug putson sa lino, fiberglass, polyethelene ug iskayola,” nag-ingon ang Journal. Ang bronseng lungon nga giporma sa lawas gipulogan ug bulawan o mga mutya nga mokantidad ug $100,000 ug taas pa.

Apan, dili lamang ang pagkatagsaon sa paghimog sa patayng lawas nga mummy ang nakadani sa mga kustomer. Ang usa ka tawo miingon nga “kon tinuod ang gipamulong sa ubang mga Kristohanon nga sa Adlaw sa Paghukom tawgon kita ni Kristo gikan sa lubnganan, nan gusto ko nga sa labing matahom ako ug dagway.”

Sama sa karaang mga Ehiptohanon kinsa nagtuo nga ang lawas kinahanglang ipreserbar aron kapaulian sa kalag sa laing-kinabuhi, gibase niining mga tawhana ang ilang paglaom diha sa pagtulon-an nga ang kalag dili-mamatay. Ang relihiyosong mga lider nagtudlo nga sa Adlaw sa Paghukom, ang mga lawas sa mga matarong ug sa mga daotan mahiusa uban sa ilang tagsa-tagsang mga kalag aron makaambit sa kalipay sa langit o sa silot nga impiyernong-kalayo.

Apan, ang doktrina sa kinaiyanhong pagkadili-mamatay sa kalag wala itudlo sa Bibliya. Hinunoa, ang Bibliya nagtudlo nga ang kalag mamatay. “Ang kalag nga makasala​—kini mamatay.” (Ezekiel 18:4) Busa, ang Biblikanhong paglaom alang sa umaabot nga kinabuhi nasandig, dili sa pagkabuhi sa usa ka dili-mamatay nga kalag, kondili sa pagbanhaw sa Diyos sa usa ka tawo uban sa iyang kaugalingong sumbanan sa kinabuhi ug usa ka angay nga lawas nga dunay samang kinaiya ug panumdoman sa dihang siya namatay. Sa tukma, si Jesus miingon: “Ang takna nagasingabot na nga ang tanan nga atua sa handumanang mga lubnganan managpakabati sa iyang tingog ug managpanggula.”​—Juan 5:28, 29.

“Dili Bahin sa Kalibotan”

Ang Watchtower Bible and Tract Society of New York, Inc., nagtagbo sa New York City Board of Estimate sa miaging tuig sa paghangyo ug zoning variance o lisensiya sa pagtukod ug 19-ka-andanang puy-anan nga tinukod. Samtang ang kadaghanan sa mga membro sa hunta mitutol sa proyekto, ang duha ka butos nga pabor sa pag-usab sa sona maoy gikan sa mayor sa New York City si Edward Koch. Diha sa usa ka pahayag nga nagsaysay sa basehanan sa iyang desisyon, si Mayor Koch miingon nga ang “mga Saksi ni Jehova . . . maisip nga maayong mga silingan . . . taas kaayo ang akong pagtamod kanila.” Dayon siya midugang: “Ako gisultihan nga alang sa relihiyosong mga katarongan sila dili mobotar sa bisan unsang eleksiyon ug tingali maoy usa sa mga suliran niining maong proyekto, tungod kay malisod kaayong makadaog ang mga dili-botante sa kontrobersiyal nga kaso diin ang napiling mga opisyal ginasigingsiging sa daghan kaayong tawo.”

Dalayegon si Mayor Koch sa iyang kaisog ug pagkawalay-pagpihig sa atubangan sa daghan kaayong mga magsusupak. Bisan pa nga tingali lahi ang resulta niini kon ang mga Saksi ni Jehova moapil pa sa politikal nga mga eleksiyon, sila dili mahaylo gikan sa ilang neyutral nga baroganan bahin sa politikal nga mga isyu​—bisan unsa pa ka dakoa ang balos. Alang sa tinuod nga mga Kristohanon ang baroganan matin-aw. Si Jesus miingon: “Sila dili bahin sa kalibotan, sama nga ako dili bahin sa kalibotan.”—Juan 17:16.