Pagpayunir Diha sa Amazon

LASANG sa Amazon! Halos ang tanan nakadungog niana. Apan diyutay lamang ang nakahigayon sa pag-adto sa pagtan-aw sa maong lugar. Apan, sa nanglabayng dekada, ubay-ubayng mga payunir o bug-os panahong mga ministro, nakahimo niana. Labing hinungdanon, ilang gidala ang maayong balita sa Gingharian sa Diyos didto. Sakay sa barko sa Watch Tower Society nga El Refugio (Ang Dalangpanan), kini nakasuot sa lasang sa Amazon pinaagi sa mga suba nga nagkuros sa amihanang-sidlakan sa Peru.

Pagkamakaikag nga asaynment kadto! Daghang mga tribo sa mga Indian ang nakatag sa tanang bahin sa dakong teritoryo niini. Ang gagmayng chacras, o mga uma, makita sa ibabaw ug sa ubos sa mga suba, sa tampi, ug sa halayo maitom nga dapit sulod sa lasang. Bisag hilit, kining mga tawhana kinahanglang makadungog sa mga balita sa Bibliya bahin sa kinabuhi.​—Mateo 24:14; 28:19, 20.

Duol sa siyudad sa lasang sa Iquitos, duha ka dagkong mga suba​—ang sulog ug mabudhiong Ucayali ug ang Marañón—​nag-abot nga nagpormag dakong Amazon. Kanunayng lubog, nagaliyoliyo, ug nagsugwak, gikankan niining mga subaa ang iyang mga daplin ug ginatumba ang dagkong mga kahoy nga giagos sa gutom nga mga sulod niini. Moporma ang mga piliw diha sa tampi sa usa lang ka gabii busa nagausab sa agos sa tubig.

Samtang naglawig sa suba sa Ucayali, kalit nga nabangga ang El Refugio diha sa naunlod nga piliw. Natumba ang mga tripulante tungod sa kalit nga pag-uyog, apan wala sila malagpot sa suba tungod kay nakahawid man sila sa barandilyas ug rehas sa barko. Gipaatras sa kapitan ang barko, apan wala magsilbi. Kini naungot. Busa ang unom ka igsoon duha sa barko nag-ilis ug purol, unya miambak sa piliw, ug gisugdan pagdiskarga ang 40 ka kahon sa libro aron mogaan ang karga. Sa kalit, misinggit ang usa ka tripulante: “Pagbantay! May bitin sa suba nga misaka sa barko.” Tinuod man, usa ka unom ka piye nga berdeng bitin ang nagsaka sa kilid sa barko. Apan sa pipila ka kalit nga witik sa bugsay, kini nalagpot sa tubig. Unya, sa napagaan ang karga niini, nakalingkawas ang barko ug miandar na usab.

Organisadong mga Paagi sa Pagsangyaw

Ang El Refugio dili usa ka dakong barko, ug siyempre dili labing kusog modagan nga sakyanan. Sa pagkatinuod, nag-aginod kini dihang mosugat sa kusog nga sulog. Busa, aron daghang makobrehang mga teritoryo sa ilaya, ang mga payunir nakahimog plano sa paglihok. Sa wala pa mogikan sa ilang gigikanang puy-anan sa siyudad sa Iquitos, ilang gisusi kon unsay anaa sa partikular nga lugar nga ilang gustong kobrehan. Pinaagi sa pagpangutana sa mga tawo nga lumad sa maong lugar, nakahimo silag mapa sa mga baryo ug sa chacras niana nga teritoryo. Ang gagmayng mga suba o sapa gitiman-an nga kaeskalahan. Busa, kon ang napiling luna dunay daghang mga baryo, ang barko modunggo sa usa ka semana o duha. Sa kasagaran, upat sa unom ka payunir ang mokobre sa hilit nga mga uma, samtang ang kapitan ug ang nanghibilin sa payunir moadto sa lasang, nga dili maabot sa barko. Gihimo kini pinaagi sa pagsakay sa ayroplano sa usa ka kompaniya sa petrolyo nga mopaingon ngadto sa usa ka kampo.

Kining mga kampoha maoy mga hawan sa tunga sa lasang nga kanunay may nagapangalot ug asiete. Usa ka gatos o kapin pang mga lalaki ang anaa diha sa maong kampo. Ang mga Saksi naghimog kahikayan nga makigsulti sa mga lalaki sa panahon sa panihapon, human sa panahon sa pagtrabaho. Diha sa usa ka kampo, ang payag nga kan-anan nakitang maayo kaayong awditoryom. Ang mga tawo namati, ug daghan human niadto nangutanan mahitungod sa moral nga mga problema nga ilang giatubang samtang nagpuyo nga halayo sa ilang mga pamilya. Pagkamaayong higayon sa paghatag ug panghunahuna sa Bibliya bahin sa kahinlo sa moral! Human sa pangutanag-tubag nga sesyon, daghang mga lalaki mihangyog mga Bibliya ug mga giya sa pagtuon sa Bibliya. Gikuha ang mga ngalan, ug sa ulahi gisugdan ang mga pagtuon sa Bibliya sa pipila niining mga tawhana ug sa ilang mga pamilya sa Iquitos. Upat ka kampo sa petrolyo ang gikobrehan niining paagiha​—tulo pinaagi sa pagsakay sa ayroplano ug ang usa pinaagi sa pagduaw sa El Refugio.

Sa matag panahon nga may makit-ang caserío, o gamay nga baryo, diha sa daplin sa suba, igaod sa mga payunir ang barko sa labing duol lig-ong gaoranan nga makahawid niini. Apan, susihon una sa maalamong tripulante ang tampi sa suba sa dili pa moambak. Ang daw bantok nga tagaytay nga natipon sa suba daw luwas nga tan-awon apan puno sa kakurat. Ang walay kalibotang lumulukso makakita sa iyang kaugalingon nga mahulog sa lapok nga kutob sa hawak!

Sa dihang makaabot nga luwas sa daplin sa suba, mosiut ang mga igsoon sa naandang grupo sa masukiton, sabang mga bata ug mangita sa pangulo sa baryo. Ipatin-aw nila sa mubo kaniya ang katuyoan sa ilang pagduaw ug mohangyo sa paggamit sa lokal nga tunghaan nga payag o tagboanan sa baryo alang sa pakigpulong sa Bibliya. Kasagaran, tugotan kami. Himoon ang pahibalo sa binaba sa dihang ang mga bata molibod sa tanang direksiyon nga nagpakaylap sa imbitasyon. Sa dili pa magsugod ang pakigpulong, igugol ang adlaw sa pagsangyaw sa payag sa payag. Mahigalaon ang mga tawo ug maabiabihon ug maikagong midawat sa among basahon sa Bibliya. Kon walay kuwarta, ibaylo ang mga libro sa mga bao, mga unggoy, o mga manok, mga periko, prutas, o matahom nga orkid.

Kon may panahon pa, naghimo kamig pagbalik duaw sa hapon. Kadtong mopakitag tagsaong interes hangyoon sa pagdala sa ilang mecheros, o mga sudlanan, nga may gas ug pabilo alang sa suga. Sa kasagayan, sa pagka-alas siyete, ang tanan nakalingkod na, nga nagdalad suga sa usa ka kamot ug ang ilang Bibliya sa pikas kamot. Pagkahuman sa pakigpulong, magsugod ang mga pangutana. Ang mga Saksi ni Jehova ba nagtuo ug impiyernong kalayo? Sa unsang paagi ang mga pagtulon-an sa mga Saksi ni Jehova lahi gikan sa Katolikong relihiyon? Ang kadaghanan nalipay sa pagkakita sa mga tubag diha sa ilang kaugalingong mga Bibliya.

Makapalipayng mga Eksperyensiya

Human sa pakigpulong nga sama niini, ang usa ka lalaki ug ang iyang asawa miduol sa payunir nga may luha sa ilang mga mata. “Mga igsoon, dugay na kaming naghulat sa pagpaminaw ug mga pulong sama sa among nadungog karong gabhiona,” miingon ang tawo. “Gimahal namo ang among yuta ug ang ideya sa usa ka yutan-ong paraiso nga diin kita makapabilin nga suod niana. Karon, kinsa ba kini sila nga imong giingon nga moadto sa langit?” Pagkamakalipay nga nahilayo kaayo diha sa lasang sa Amazon, nga milya ug milya gikan sa “sibilisasyon,” ug makakitag mga karnerohong mga tawo.

Ang mga payunir nagtanyag ug koleksiyon sa mga libro, sanglit dugay-dugay pa nga sila makabalik sa mga baryo. Usa ka adlaw, balik sa Iquitos, gipahunong sa usa ka tawo nga sakayanon ang usa sa mga igsoon ug mihangyod koleksiyon sa 8 ka libro. Unsay nahitabo sa iyang unang koleksiyon sa mga libro? Ang usa ug usa sa mga libro, gihulaman sa iyang mibisitang mga paryente. Ang basahon nihit sa halayong lasang. Niining paagiha, ang mga libro nakaabot sa mga dapit nga dili gayod maabot sa mga payunir mismo. Pinaagi sa maong espiritu, gitino ni Jehova nga ang atong Kristohanong mga publikasyon makaabot ngadto sa tukmang mga kamot.

Diha sa usa ka gamay nga baryo, duha sa mga igsoon nagpabilin sa barko samtang gisubay sa uban ang dalan-dalan sa lasang. Dagko kaayo ang mga kahoy nga nanuybo sa panganod, nga nakasalipod sa kahayag, samtang ang daghag-kolor nga mga langgam nanaglupad diha sa lunhawng mga dahon. Human sa 15-minutos nga pagbaktas, nakaabot ang mga Saksi sa dako nga hawan. Mikabay ug hapit usa ka oras ang pagduaw sa tanang mga payag didto. Sa dihang talilakaw na ang mga igsoon, usa ka tawo ang miduol ug gihangyo sila nga magpabilin, sanglit duna siyay daghang mga pangutana. Busa usa sa mga payunir ang nagpabilin samtang ang uban namauli sa barko.

Misugyot ang payunir sa paghatag ug pahayag publiko sa gabii. Busa gipadala ang mga bata, nga giadto ang mga dalan-dalan nga nasipyatan sa mga igsoon, sa pagkuha sa mga silingan. Kasamtangan, dihay gihimong pagtuon sa Bibliya sa baryo, gihisgotan ang mga kapitulo sa librong Ang Kamatuoran nga Motultol sa Kinabuhing Dayon nga nagkobre sa mga pangutana nga gibangon sa maabiabihong tawo. Sa dihang mikuyanap ang kabugnaw sa kagabhion nga mitabon sa kainit, ang mga bulos sa kawayan sa kalit mialingisngis. Daw ang tanan sa ginatos ka periko misugod sa pagtwit-twit, nga morag nag-abiabi sa kabugnaw sa kagabhion.

Sa sayo nga gabii, 20 ka edaran ug daghang mga bata mialirong sa mamumulong. Ang sigang lampara nakahatag maayong kahayag alang sa pagbasa, apan gidugokan kinig daghang mga insekto sa lasang. Mga katunga pa lang sa pakigpulong, nakatulon ug usa ka insekto ang mamumulong! Human sa daghang mga pagdapi, katawa, ug simpatiya, siya mipadayon, nga gidala ang pakigpulong sa malamposong konklusyon niini. Ning higayona, nawala na ang kaulaw, ug misugod ang bibong diskusiyon.

Human nga nakalakaw ang kataposang silingan, nagtaod ang interesadong tawo ug moskitero diha sa usa ka suok nga walay atop nga luna sa iyang balay, nga may haliging 1.5 ka metros ibabaw sa yuta. Gibiyaan ang payunir sa pagpahimutang ilalom sa moskitero, gikuha sa tawo ang iyang mga hayop ug gihigot sila ilalom sa plataporma ingong panalipod batok sa mga manunugok sa lasang. Samtang ang igsoon naghigda didto nga miampo sa pagpasalamat kang Jehova sa iyang panalipod, nakatulog siya sa ulahi sa tingog sa lasang.

Daw dili pa dugay sa iyang pagkatulog nga kalit nga nakabangon ang igsoon. Mituktugaok ang manok, ug daw ang tingog sa manok diha gayod sa ilalom sa iyang gikatulgan. Ug tinuod man didto ang manok. Una mituktogaok ang manok, gayon mipaghot ang iro, sunod mikalakala ang pabo, ug sa kataposan mibahehe ang kanding. Human niini, ang tanang matang sa mga langgam misugod sa ilang pagtwit-twit sa butang. Misugod na ang bag-ong adlaw.

Human sa makapatagbaw nga pamahaw, migikan ang igsoon subay sa dalan-dalan aron sa pagduyog pag-usab sa iyang mga kauban. Sa unahan nakakita siyag daw usa ka dakong kahoy nga nagbabag sa dalan. Sa nakakita sa duol kadto usa diay ka sawa, nga duolan sa 8 ka metros ang gitas-on. Milihay ang payunir niini ug nakaabot nga luwas sa barko.

Nasugpo ang Pagsupak sa Klero

Ang sunod nga baryo dil masanongon. Samtang nagdulong ang barko sa dunggoanan, nakurat ang mga igsoon sa pagkakitag dakong grupo nga nagpundok sa daplin sa suba. Gipangunahan sa Katolikong pari, ilang gisinyasan ang barko sa pagpalayo, misinggit nga wala sila magkinahanglan ug mga basahon sa Bibliya. Busa mipadayon ang mga igsoon ug midunggo sa usa ka lugar ubos sa baryo.

Wala ra magdugay nga may balsa nga milarga nga nagdalag saging gikan sa baryo. Sa nag-anod kini, gitawag sa mga igsoon ang tulo ka lalaki nga nagpadagan sa balsa sa pagpadip-ig sa El Refugio. Sa nakadip-ig na sila, tulo ka payunir misakay sa balsa ug misugod sa pagsangyaw. Ang tag-iya nangutana nganong ang pari dil gusto nga modunggo ang Saksi sa baryo, ug gitubag sa mga payunir nga wala sila makasabot nganong dili gusto ang pari nga makasabot ang mga tawo sa Bibliya. Pananglitan, unsa may daotang resulta sa pagbasa sa Akong Basahon sa mga Estorya sa Bibliya? Sa nakakita ang mga tawo sa libro, dili sila makabutang niini.

Sa pagkasunod adlaw, daghang mga bangka ang mipaingon sa El Refugio. Ang librong Akong Basahon sa mga Estorya sa Bibliya nakaukay sa baryo. Gisultihan ang mga igsoon nga pinaagi sa pagbaktas ug pila ka distansiya moabot sila sa usa ka dalan-dalan nga modala kanila sa baryo agi sa likod. Sa dihang nakaabot didto ug sa pagduaw gikan sa pultahan ug pultahan, nalipay ang mga payunir sa mas maayong pag-abiabi. Daghang mga taga baryo mikuha sa tanang koleksiyon sa mga libro, sa dakong kalagot sa lokal nga pari.

Hilit nga Kingdom Hall Gitukod

Sa ulahi ang walay kahadlok nga mga payunir miabot sa luna sa Amazon diin ang tulo ka nasod nag-abot. Tulo ka baryo, nga duol sa usa ug usa, nahimong makisaw nga sentro sa komersiyo. Kini mao ang Caballococha sa Peru, Leticia sa Colombia, ug Tabatinga sa Brazil. Ang pagsulod niining mga lungsora dili lisod, sanglit wala may mangayog pasaporte diha sa tunga sa lasang.

Diha sa Tabatinga, among nahibaloan nga duha ka payunir nga mga babaye nga taga Brazil ang mikobre sa lungsod. Sila dunay gamayng grupo nga interesado sa pagtigom apan walay lugar nga katigoman. Ang duha ka igsoong babaye mihangyo sa mga igsoong lalaki sa pagpabilin ug sa paghatag mga pakigpulong sa maong lugar, nga malipayon nilang gihimo. Ang sunodsunod nga mga diskusyon nagpakita nga dihay igong kontribusyon sa tunga sa grupo aron makapalit ug kahoy sa pagtukod ug gamayng tigomanan diha sa luna nga yuta nga gidonar. Ang mga igsoong babaye nakakita nag gabsanan diha sa duol sa suba nga dunay tawong interesado nga misaad nga mohatag ug ubos nga prisyo sa tabla. Mikabat ug duha ka biyahe sa El Refugio sa paghakot sa tabla. Sulod sa 15 ka adlaw, gitukod sa mainandamong mga kamot ang usa ka dakong Kingdom Hall nga igo nga makapalingkod ug 80 ka tawo. Giamot sa mga tripulante sa barko ang ilang kaugalingong atril, o tilindogan sa mamumulong, ug daghang mga bangko aron makapalingkod sa naghinamhinam nga grupo. Pagkadako sa ilang kalipay sa pagbaton ug ilang kaugalingong tigomanan sa kataposan!

Dunay pa gihapoy dakong teritoryo nga kobrehan sa tampi sa Amazon ug sa sumpayng mga suba niini. Kadtong mipatalinghod sa panawag sa Macedonia “sa pagwali sa maayong balita” niining hilit nga mga lugar gipanalanginan ug dako. (Buhat 16:9, 10) Karon ang El Refugio duna nay bag-ong tripulante sa mga payunir. Sila usab bug-os misalig kang Jehova nga maoy mogiya ug mopanalipod kanila sa ilang balaang pag-alagad.

[Mapa sa panid 25]

(Alang sa aktueal nga pagkahan-ay, tan-awa ang publikasyon)

COLOMBIA

Leticia

PERU

Iquitos

Amazon

Marañón

Ucayali

BRAZIL

Tabatinga

[Hulagway sa panid 26]

Mga payunir sakay sa “El Refugio” nga nagdala sa makahatag-kinabuhi nga kamatuoran ngadto sa mga tawo sa tampi sa Amazon