Ang Usa ka Bag-ong Kalibotan—Napasig-uling Paraiso!
ANG puloy-anan sa usa ka bag-ong kinasal maanindot kaayo—dako kaayo ang tanaman nga puno sa mga bulak, mga kahoy, mga langgam, ug mga hayop. Usa gayod kadto ka Paraiso, usa ka madagayaong gasa gikan sa ilang mahigugmaong Amahan! Sila ba “malipayong nabuhi sa walay kataposan”? Wala. Wala magdugay, nawala kanila ang ilang puloy-anan. Apan ngano?
Kadtong Paraisong puloy-anan nawala tungod kay wala pabilhi sa magtiayon ang gihimo sa ilang Amahan alang kanila. Labing mangil-ad pa, sila masupakon. Aron sa pagsulay sa ilang integridad, gisultihan sila sa ilang Amahan nga sila makahimo sa pagkaon sa bunga sa tanang kahoy gawas sa usa, apan sila rebelyosong misupak ug gikaon kadto.—Genesis 2:15-17; 3:6, 7.
Nganong may ingon nga silot alang nianang daw usa ka gamay nga krimen? Tingali ang usa ka ilustrasyon makatabang kanato sa pagtubag nianang pangutanaha. Ang tag-iya sa tindahan nagpaempliyog manedyer nga dunay kinahanglanong mga kredensiyal. Aron maseguro nga kasaligan ang maong empliyado, gihatag sa tag-iya kaniya ang mga yawi apan miingon nga bisan unsa pay mga kahimtang dili gayod niya ablihan ang usa ka hunos. Kon ablihan kini sa empliyado, siya pagawason. Siya gipasagdan, ug nadaog sa pagkamasukiton ang manedyer ug giablihan ang hunos. Nadakpan siya sa tag-iya sa akto ug gipagawas siya.
Paraiso Nawala
Unsay kalabotan niini sa batan-ong magtiayon? Tungod kay mikaon man sila sa gidiling prutas, gipagawas sila sa ilang Amahan gikan sa ilang matahom nga puloy-anan. Gawas sa Paraiso sa Eden, giatubang ug mga tunok ug sampinit kadtong magtiayon, nga si Adan ug Eva. Imbes hingpit, sila karon nahimong dili-hingpit. Ug inay magkinabuhi sa walay kataposan, sila misugod sa pagkamatay. Ang ilang mga anak nakapanunod sa ilang pagkadili-hingpit, pagkamakasasala, ug kamatayon.—Roma 5:12.
Sa ulahi, “nakita ni Jehova nga ang pagkadaotan sa tawo dako.” Busa, sa mga adlaw ni Noe, gigamit sa Diyos ang Lunop sa paghinlo sa yuta. Diha bay mga tawong naluwas? Walo lamang—Si Noe ug ang iyang tulo ka anak nga lalaki uban sa ilang upat ka asawa. Sa pagpangandam nianang gitawag nga ilang panaw ngadto sa lahi nga kalibotan, ilang gisunod ang mga instruksiyon sa Diyos ug mihimog dakong arka nga nakahimo sa pagdala kanila, sa daghang mga hayop, ug igong suplay sa mga pagkaon. (Genesis 6:5-7, 13-22) Ang tanaman nga gitagamtam niadto ni Adan ug Eva napapha sa Lunop. Busa, nawala ang Paraiso—apan dili sa kataposan!
Paraiso Ipasig-uli
Sa milabay ang mga siglo, gipadala sa Diyos ang iyang bugtong Anak sa yuta aron sa paglukat sa katawhan gikan sa sala ug kamatayon. Kini ang nakapaposible alang sa mga tawong may pagtuo kang Jesu-Kristo nga makabaton ug kinabuhing walay kataposan. (Juan 3:16) Si Jesus mitagna usab nga ipasig-uli ang Paraiso. Sa pagkatinuod, sa himalatyon na si Jesus diha sa kahoy sa pagsakit, iyang gisultihan ang kriminal nga gilansang sa iyang tapad: “Adto ikaw sa Paraiso uban nako.”—Lucas 23:43.
Ang pagpasig-uli sa Paraiso mosunod nianang sagad gitawag nga kataposan sa kalibotan, nga gitagna ni Jesus dihang nangutana ang iyang mga tinun-an: “Unsa may ilhanan sa imong presensiya ug sa konklusyon sa sistema sa mga butang?” Sa pagtubag, gipunting ni Jesus ang gubat, kakulang sa pagkaon, mga linog, mga kamatay, pagdaghan sa pagkadaotan, ug tibuok-kalibotang kampaniya sa pagwali sa Gingharian. Kini ug ang ubang mga bahin sa ilhanan nakita na sukad pa sa 1914. (Mateo 24:3-14) Sila maoy mga tilimad-on sa kataposan niining sistemaha ug sa pagpasig-uli sa Paraiso niining yutaa.
Diha sa mao gihapong tagna, si Jesus miingon usab: “Gikan sa kahoyng igira tun-i ninyo kining usa ka ilustrasyon niining puntoha: Inigpanglumoy na sa iyang mga sanga ug manalingsing na, inyong masayran nga nagkaduol na ang ting-init. Ingon man usab niini, inigkakita ninyo niining tanang mga butanga, masayran na ninyo nga haduol na siya sa mga pultahan. Sa pagkatinuod magaingon ako kaninyo nga sa dili pa mahanaw kining kaliwatana kining tanang mga butang magakahitabo gayod.” (Mateo 24:32-35) Ang ubang mga tagna sa Bibliya nagpakita usab nga ang pagpasig-uli sa Paraiso duol na kaayo, nga ang usa ka bag-ong kalibotan anaa na sa kapunawpunawan. Apan sama sa unsa unya kini?
Ang Bag-ong Kalibotan—Lahi Gayod Kaayo!
Ang presenteng-adlaw nga mga kagamhanan pulihan sa Gingharian sa Diyos. (Daniel 2:44) Duna unyay hustisya ug dumalayong kalinaw alang sa tanan diha sa bag-ong kalibotan ilalom sa pagmando sa Gingharian ni Jesu-Kristo, ang “Prinsipe sa Pakigdait.” (Isaias 9:6, 7) Sanglit laglagon man niya ang daotan ug ang daotang mga elemento nga karon nangibabaw sa kalibotan, ang mga mahigugmaon lamang sa kalinaw ang mga “matul-id” ang magpabilin. (Proverbio 2:21, 22; Pinadayag 19:11-21; 16:14-16) Oo, ang mga mangaluwas maoy mga maaghop, makigdaitong katawhan. Pagkadakong kahupayan unya kana!
Ang rasanhon ug ubang mga porma sa pagpihig mawala diha sa bag-ong kalibotan. Sa pagkatinuod, ang dakong panon sa katawhan dugay nang naningkamot sa pagbuntog ning butanga. Kinsa sila? Ang mga Saksi ni Jehova. Ug nganong lahi sila kaayo? Tungod kay kugi nilang ginatun-an ang Bibliya, gipadapat kini sa ilang kinabuhi, ug naghigugmaay sa usag usa. (Juan 13:34, 35; Buhat 10:34, 35) Milyonmilyon na ang gidaghanon sa mga Saksi karon sa tibuok-kalibotan, apan ang Bibliya nagtagna nga ang yutan-ong mga magsisimba ni Jehova sa ulahi mahimong “usa ka dakong numero, nga dili maihap, gikan sa tanang kanasoran, kabanayan, ug katawhan ug pinulongan.”—Pinadayag 7:9, The Jerusalem Bible.
Wala na unyay mamatay sa gubat. Dili na mogasto ug binilyon alang sa nukleyar nga mga hinagiban, ug ubang mga armas, ug mga kasundalohan. Ang mga rebolusyon, mga away sa tribo, ug ubang matang sa kapintasan dili na maglungtad. (Isaias 2:4) Ang pagbansaybansay sa militar ug pagreklutag mga sundalo mohunong na, kay dili na kini kinahanglan. Pagkamalipayong adlaw unya sa dihang taposon na sa Diyos ang mga gubat!—Salmo 46:8, 9.
Molungtad ang tinuod nga pakigdait. “Sa dili madugay,” miingon ang salmista, “ug ang daotan mangawala . . . Apan ang mga maaghop makapanunod sa yuta, ug sila makakaplag ug tumang kalipay sa kadagaya sa pakigdait.”—Salmo 37:10, 11.
Pulihan ang kakulangan sa pagkaon ug kadagaya. Diha sa daghang mga dapit, ang kabus nga mga mag-uuma nakigbisog sa mga tunok ug mga sampinit, umaw nga mga yuta, nagkadakong mga disyerto, hulaw, ug malaglagong paghugpa sa mga dulon. Kining tanan baliskaron. (Isaias 35:1, 6, 7) Ang resulta? Usa ka dakong pag-uswag sa abot sa yuta! (Salmo 72:16) Wad-on ang mga kakulangan sa pagkaon ug mainom, si Jehova motaganag “usa ka kombira”!—Isaias 25:6.
Pahimuslan sa tanan ang magantihong buluhaton. Pagkamapatagbaw unya ang pagtukod ug mga balay, pagtanom ug mga kahoy nga nagapamunga, ug sa pag-atiman sa mga tanaman! Ug pagkamakalipay ang paglingkod sa ilalom sa imong kaugalingong kahoyng igira ug sa pagkaon sa lamiang bunga!—Miqueas 4:4.
Ang maanindot nga balay itagana alang sa tanan. Karong adlaw, milyonmilyon ang nanagpuyo sa mga barongbarong. Pagkadili-malipayong kinabuhi! Sa Aprika, pananglitan, minilyon sa itom nga populasyon nagpuyo sa mga siyudad, apan sila nanagpuyo sa mga balay nga lapok o yutang-kolonon nga tapak-tapak nga karton ang atop, sa dili limpiyong mga kahimtang, o walay pribasiya. Diha sa bag-ong kalibotan, hinunoa, ang mga tawo magatukod ug maanindot nga mga balay ug magapuyo niana.—Isaias 65:21, 22.
Momlabo ang hingpit nga panglawas puli sa sakit nga makapatay sama sa AIDS. Ang dinasig nga propeta mitagna nga wala na unyay moingong: “May sakit ako.” Dugang pa, diha sa bag-ong kalibotan nga duol na “ang mga mata sa buta mangabuka, ug ang mga igdulongog sa mga bungol makadungog. Niana unyang panahona ang mga bakol molukso sama sa lagsaw, ug ang dili sa mga amang moawit.”—Isaias 33:24; 35:5, 6.
Ang kamatayon, mga luha, ug mga punerariya mangawala. (Pinadayag 21:4) Apan komosta ang bilyonbilyong patay na? Ingong tawo pa dinhi sa yuta, gibanhaw ni Jesus ang daghang mga tawo. Pananglitan, siya nakasugat kas-a ug prosesyon sa paglubong nga nag-uban sa patay sa usa ka batan-ong lalaki nga bag-o lang namatay sa siyudad sa Nain. Human sa paglipay sa namatyang inahan, nga usa ka babayeng balo, si Jesus miingon: “Dong, ingnon ko ikaw, Bangon!” (Lucas 7:11-17) Diha sa laing okasyon, si Jesus mihatag niini nga pasalig: “Ang takna nagasingabot na nga ang tanan nga anaa sa mga lubong . . . managpanggula.” (Juan 5:28, 29) Sanglit naglalang ang Diyos ug kintilyong mga bitoon ug ubang langitnong mga butang ug nagatawag “kanila sa ngalan,” siyempre ang pagbanhaw sa bilyonbilyong mga tawong patay dili problema.—Isaias 40:26.
Kini ba Alang Kanimo?
Katuyoan ni Jehova nga Diyos sa sinugdan nga ang katawhan dili gayod mamatay apan magatagamtam ug maayong mga butang sa iyang mahigugmaong mga tagana. Busa handurawa lang ang mga panalangin sa kinabuhi diha sa bag-ong kalibotan nga may malipayong mga pamilya! Palandonga ang mga bata nga makadula nga luwas uban sa mga hayop nga peligroso kaayo karong adlawa. (Isaias 11:6-9) Palandonga ang mga pananglitan sa pakigdait, maayong pamalay, magantihong mga trabaho, dagayang pagkaon. Oo, ug palandonga ang pagkinabuhing walay kataposan diha sa usa ka paraiso sa yuta.
Mahimo bang matua ka didto? Oo, kon ikaw modawat ug molihok sa tukmang kahibalo sa pulong sa Diyos. Ang mga Saksi ni Jehova andam sa pagtabang sa pagtukod sa imong pagtuo diha sa dili-mapakyas nga mga katuyoan ni Jehova. Ikaw makasalig nga ang Paraiso sa dili madugay mapasig-uli, alang sa usa ka bag-ong kalibotan nga duol na kaayo!