Ang Tanan Bang Maayong Tawo Moadto sa Langit?

“Natapos na ang paglubong apan nagpabilin ang kaguol. . . . Daw dili katuohan nga sa pipila lang ka semanang miagi ang akong gamayng anak nga lalaki nagsugod pa lang sa pagkat-on sa paglakaw, ang iyang gamayng nawong masanag sa tumang kalipay nga nakalakaw. Apan karon patay na si Andrew! . . .

“Nagtindog ako sa bentana, nagtan-aw sa kagabhion, nagpangita sa langit, ‘Hain kaha ang akong anak karon?’ Ako nahibulong. ‘Atua ba kaha siya didto sa langit uban sa mga bitoon?’”

Ang kamatayon sa usa ka anak tingali mao ang labing masulob-ong hitabo nga maagian sa mga ginikanan. ‘Hain kaha ang akong anak karon?’ sila nahibulong. ‘Sa langit ba o sa ubang dapit?’ Ang kadaghanang mga relihiyon nagtudlo nga ang mga bata nga mamatay moadto sa langit. Sa Johannesburg, sa South Africa, ang lapida sa usa ka lubong mabasa: “Gusto ang Diyos ug bulak nga nagbuswak, gikuha sa iyang anghel ang among bulak.” Apan tingali ang usa nahibulong: ‘Nganong gusto man ang Diyos ug “bulak nga nagbus-wak” nga kon buot hunahunaon, sumala sa popular nga pagtuo, siya duna may daghang mga bulak?’ Ug daghan pang mga tawo ang nahibulong. . .

‘Unsa Kaha ang Langit?’

Ang kadaghanang mga tawo wala kaayoy ideya kon unsa ang langit. Ang uban mohisgot ug “himaya sa langit dihang ikaw mamatay.” Apan unsay gisulti sa Bibliya? Ang unang bersikulo niini nag-ingon: “Sa sinugdan gibuhat sa Diyos ang langit ug ang yuta.” (Genesis 1:1) Naghisgot kini sa pisikal nga langit, ang mahimayaong han-ay sa bitoon ug sa mga galaksiya. (Deuteronomio 4:19) Apan dunay espirituwal nga langit usab. Busa, ang Bibliya naghisgot bahin sa “mahimaya-ong pinuy-anan sa pagkabalaan ug katahom.”—Isaias 63:15.

Kinsa ang unang misaka niining “mahimayaong pinny-anan” sa atong langitnong Amahan? Ang iyang pinalanggang Anak, si Jesu-Kristo. Siya miingon: “Walay makasaka ngadto sa langit gawas lamang kaniya nga nanaog gikan sa langit, nga mao ang Anak sa tawo.” (Juan 3:13) Kini sa matin-aw nagpakita nga walay tawhanong linalang ang nakaadto sa langit. Apan si Jesus misaad nga dunay pila ka tawo nga moadto didto. Sa wala pa siya mikayab sa langit, siya miingon sa iyang matinumanong mga tinun-an: “Moadto ako aron sa pag-andam ug luna alang kaninyo . . . ug pagadawaton ko kamo nganhi uban kanako, aron nga diin gani ako atua usab kamo.”—Juan 14:2, 3.

Nan, sa dayag, dunay pipila ka maayong tawo ang moadto sa langit. Apan ang tanan bang maayong tawo makaadto sa langit? Unsay ikasulti bahin sa pinuy-anan sa tawo—ang yuta? Kini ba pagalaglagon pinaagi sa nukleyar nga gubat ug mahimong abo nga maglutawlutaw sa wanang? Dili gayod. Ang Bibliya nag-ingon: “Usa ka kaliwatan moagi, ug lain nga kaliwatan moabot; apan ang yuta mopabilin sa walay kataposan.” (Ecclesiastes 1:4) Ug nganong laglagon man sa Maglalalang kining matahom nga yuta, bisan pa nga ang mga bahin niini gihugawan man sa mga tawong hakog? Ang Pulong sa Diyos nagsaad: “Ang mga matarong makapanunod sa yuta, ug magapuyo sila sa ibabaw niini sa walay kataposan.”—Salmo 37:29.

Nan, tin-aw nga ang yuta dunay makaikag nga palaabuton. Diha sa iyang iladong Wali sa Bukid, si Jesus mitagna: “Malipayon ang mga maaghop, kay sila magapanunod sa yuta.” (Mateo 5:5) Dugang pa, ang kataposang basahon sa Bibliya, ang Pinadayag, naghisgot nga ang yuta mahimong paraiso. Bahin sa masinundanong katawhan kini nag-ingon: “Ang Diyos magapakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon wala na, ni paghilak, ni kasakit.”—Pinadayag 21:3, 4.

Sumala sa nag-una, tataw nga dunay pila ka maayong tawo nga moadto sa langit, samtang tagamtamon sa uban ang kinabuhi dinhi sa yuta. Kini nagkahulogan nga dunay duha ka lahi nga mga grupo sa tawo ang nalangkit. Sa unsang paaging posible kana? Busa, sama sa inahan ni Andrew, daghan ang nabalaka bahin sa mahitabo sa ilang mga anak nga walay bunyag. Gitudloan ang mga Romano Katoliko nga sila moadto sa dapit nga gitawag Limbo. Naglungtad ba gayod kining dapita? Moadto ba ang mga bata didto? Ang makatagbaw ug makahupay nga mga tubag gihatag sa sunod nga artikulo.