Pagpalanog sa Kamatuoran Diha sa Alpino sa Austria

ANG Austria ilado sa kabalilihan sa alpino, sa Kakahoyan sa Vienna, ug sa matahom asul nga subang Dunube. Kini ug ang ubang iladong mga talan-awon nakadani sa mga bisita gikan sa tibuok kalibotan ngadto ning gamayng nasod sa tunga sa Uropa.

Sa panahon nga daghang turista sa miaging Agosto, usa ka grupo nga duolan sa usa ka gatos ka bisita nga gikan sa 17 ka langyawng mga nasod miabot sa lahi nga katuyoan. Miabot sila sa Vienna sa pagtambong sa dedikasyon sa bag-ong sangang buhatan sa Austria sa Watch Tower Society, nga nagadumala sa buluhaton sa pagsangyaw sa mga Saksi ni Jehova sa Austria.

Gikan sa Gamayng Sinugdan

Ang unang sangang buhatan sa Sosyedad sa Austria gitukod sa Vienna sa 1923. Kana wala makaabot ug napulo ka tuig tapos sa unang pagduaw diha sa upat ka mga tigsuskriber sa Bantayanang Torre nianang siyudara. Niadtong panahona, ang gidaghanon sa mga magmamantala sa Gingharian mitubo ngadto sa mga usa ka gatos. Dayon miabot ang Gubat sa Kalibotan II ug ang okupasyon sa Nazi, usa ka yugto sa grabeng mga pagsulay ug kalisod alang sa matinumanong mga igsoon. Apan sila milahutay, ug sa kataposan sa gubat, ang ilang gidaghanon mitubo nga kapin sa 700.

Aron sa pagdumala sa nagakauswag nga buluhaton, usa ka tinukod diha sa Gallgasse 44 ang gipalit sa 1957. Sa nanglabayng katuigan, daghang mga kausaban ang gihimo sa tinukod aron sa pagpaigo sa padayong pag-uswag sa buluhaton sa Gingharian sa yuta. Sa 1973 ang numero sa mga magmamantala miabot sa 10,000 nga marka. Busa, sa sayong mga tuig sa 1980, gihimo ang mga plano sa pagpadako. Ang legal nga mga kababagan sa ulahi nawala, ug ang mga yuta nga sikbit sa sanga nakuha. Sa Marso 1983 gisugdan sa kompaniya sa gawas ang tigbayon. Tapos niadto, mipuli ang mga igsoon ug maoy mitapos sa tinukod.

“Nagtukod sa Among Bethel”

Ang mga Saksi gikan sa tanang bahin sa Austria mibuluntaryo alang sa trabaho. “Nagtukod kami sa among Bethel” mao ang panultihon. Sila nangabot pinaagi sa mga kotse ug sa mga bus, miabot ug 190 sa usa ka hinapos sa semana. Gibanabana nga usa sa matag lima ka magmamantala sa nasod nakabahin sa buluhaton. Ang uban mga propesyonal—mga arkitekto, mga tubero, ug uban pa. Ang pipila mihatag ug mga materyal o mitanyag sa pagpagamit sa ilang mga talyer. Ang uban mihunong sa ilang mga trabaho ug miabot sa pagtrabaho sa bug-os panahon sa pagtukod.

Ang usa ka igsoon kinsa migugol sa iyang bakasyon diha sa gitukoran misulat: “Buot kong magpasalamat kaninyo pag-usab sa matahom nga semana sa bakasyon. Daw sama kadto nga anaa ka sa malinawong isla nga gilibotan sa nagkisaw nga dagat sa katawhan. Katingalahan gayod ang pagtagamtam sa pisikal ug sa espirituwal nga pagpahayahay nga walay gasto.” Bisan ang mga batang gagmay nakabahin. Ang usa ka otso anyos misulat: “Nakadungog ako nga nagkinahanglan kamog kuwarta alang sa pagtukod sa Bethel. Buot kong magpadala kaninyo ug gamayng kuwarta nga akong natigom. Gisukip ko ang 200 ka shilling [mga $16, U.S.] uban ning sulata.” Ang uban naglutog tinapay o namupog mga berry ug naghimog mga ilimnon alang sa mga buluntaryo. Ang mga magmamantala sa 36 ka kongregasyon sa Vienna mitaganag mga pabugnaw matag Sabado sa bug-os nga panahon sa pagtukod.

Nasangkapan Alang sa Dugang Pag-uswag

Uban sa pagbag-o sa orihinal nga tinukod ug ang dugang nagalibot nga bag-ong mga tinukod, ang pasilidad sa sanga karon maoy kapin na sa tulo ka pilo nga gidak-on kay sa miagi, nga dunay bug-os nga luna nga 5,400 metro kuwadrado. Ang pasilidad naglakip sa 38 ka lawak, komedor alang sa 80 ka tawo, bag-ong kosena, ug labhanan. Ang bag-ong Kingdom Hall nahimutang sa luyo sa daang tinukod. Ang mga opisina sa administrasyon ug nagkalainlaing mga departamento maoy nag-okupar sa nanghibilin sa mga tinukod.

Sa Agosto 22, 1987, mao ang adlaw sa dedikasyon alang sa bag-ong mga pasilidad sa sanga. Lakip sa 282 ka dinapit mao ang duolan sa usa ka gatos ka bisita gikan sa 16 ka mga sangang buhatan sa Uropa ug usa gikan sa Korea. Presente usab mao ang mga usa ka gatos ka karaang mga Saksi sa Austria nga nakalahutay sa mga pagsulay sa Gubat sa Kalibotan II. Ang labing tigulang kanila mao ang 102-anyos nga si Maria Hack nga gikan sa Graz. Ang tumatambong nga 6,810 ka tawo diha sa pito ka lokasyon nakadungog usab sa programa sa dedikasyon pinaagi sa linya sa telepono.

Ang pangunang mga mamumulong sa programa sa dedikasyon mao sila si T. Jaracz ug M. G. Henschel sa Nagamandong Lawas sa mga Saksi ni Jehova sa Brooklyn, New York. Nagpakigpulong bahin sa tema “Mga Sanga nga Nagapamunga sa Kahimaayan ni Jehova,” gigamit ni Igsoong Jaracz ang Juan 15:2, 8 sa pagpakita nga ang ‘mga sanga’ nagaalagad sa paghimaya kon sila mamungag daghang bunga. Ang bag-ong mga pasilidad sa sanga makaamot ug dako sa pagpamunga sa kahimayaan ni Jehova.

Diha sa pakigpulong sa dedikasyon, gipasiugda ni Igsoong Henschel nga si Jehova maoy Diyos sa katuyoan. Iyang gipahibalong daan dili lamang ang iyang katuyoan kondili nakapasundayag usab nga siya may katakos sa pagpatuman niini. Bisan pa sa pagsupak ni Satanas, makasalig kita nga matuman ang katuyoan sa Diyos.

Dihang hapit nang matapos ang programa, ang tanang mitambong nadasig sa pagpadayon sa buluhaton sa pagsangyaw uban sa napasig-uling kalagsik. Sa matin-aw, ang maayo bag-ong mga pasilidad nagasangkap sa mga Saksi sa Austria sa pagpalanog sa maayong balita sa Gingharian sa mas sangkad pa niining nasod sa alpino, sa kahimayaan ug kadayegan sa Dakong Maglalalang, si Jehova.

[Mga hulagway sa panid 23]

Bag-ong tinukod, sumala sa malantaw gikan sa tanaman

Kingdom Hall

Dakong Entrada

Bag-ong tinukod, lakip sa giusab nga tinukod sa tuo