Si Jehova Nagatukod ug Balay
ANG adlawng Sabado, Marso 21, 1987, mao ang adlaw nga dili gayod makalimtan sa mga membro sa sangang buhatan sa Watch Tower Society sa South Africa. Historikal nga okasyon kadto. Ang bag-ong tinukod diha sa Roodekrans gipahinungod—sa kataposan sa unom ka tuig sa kuging pagtrabaho. Apan iya kang Jehova ang kadungganan. Sama sa gipahayag niana ni Solomon: “Gawas kon si Jehova ang magatukod sa balay, kawang lamang ang kahago niadtong mga nagatukod niini.”—Salmo 127:1.
Atong subayon sa lakbit ang pag-uswag sa mga Saksi ni Jehova sa South Africa. Sa 1902 ang unang duha ka lokal nga indibiduwal misugod sa pagtuon sa mga publikasyon sa Sosyedad ug misangyaw ngadto sa uban. Sa 1910 si Will Johnston gisugo ni Igsoong Russell sa pagbukas ug usa-ka-tawo nga sangang buhatan sa Durban. Sa pagkasunod tuig ang unang kongregasyon sa Aprika giorganisar sa kasikbit nga Ndwedwe. Sa yugto sa hinungdanong tuig sa 1914, ang unang kombensiyon gihimo sa Durban ug may tumatambong nga 50. Ang sangang buhatan gibalhin sa Cape Town sa 1923, ug sa pagkasunod tuig ang usa ka yanong prensa gigamit. Gibalhin ang sangang buhatan sa mas dakong lugar sa 1933, apan walay Puloy-anang Bethel.
Laing hinungdanong pagbalhin nahitabo sa 1952, sa Elandsfontein—mga 1,500 ka kilometro sa amihanan sa Cape Town ug mga 20 kilometro sa sidlakan sa Johannesburg. Kadto ang unang mga tinukod sa South Africa nga gidesinyo mismo sa Sosyedad, busa kini may igong luna alang sa pagprinta ug Puloy-anang Bethel, o residensiya. Kasamtangan, mibukas ang buluhaton sa Gingharian diha sa daghang mga nasod nga giatiman sa sangang buhatan sa South Africa. Busa ang sangang buhatan kinahanglang padakoon sa 1959, ug sa 1971 usab, ug sa 1978 na usab. Ug wala nay lugar pa alang sa dugang pagpadako niadtong lugara.
Ang orihinal nga duha ka magmamantala sa South Africa miuswag ngadto sa mga 28,000. Panahon na kadto sa pagpangitag bag-ong lugar, nga mikabat ug dugay nga pagpangita. Sa kataposan usa ka umahan nga 87 ka ektarya ang nakit-an sa Roodekrans, nga mga 60 ka kilometro gikan sa Elandsfontein. Ang pagtultol ug tabang ni Jehova tataw kaayo sa pagpangita ug pagpalit niining matahom nga dapit.
Pagbuntog sa mga Suliran
Apan, seryosong mga suliran ang kinahanglang buntogon. Ang unang kantidad daw dako kaayo, ug gikinahanglan ang linain nga mga permiso sa pagtukod ug pabrika, mga opisina, ug residensiya diha sa lungsod. Nakadugang sa kalisod mao ang pagkaadunay itom nga mga Saksi nga mga maghuhubad sa pagpuyo didto. Daw milagroso kaayong nabuntog kining mga sulirana, nga nagpamatuod nga si Jehova ang nagatukod sa balay. Laing problema mao ang kakulang ug mga artesano. Apan ang buluntaryong mga trabahante dali kaayong nakakat-on sa nagkalainlaing mga trabaho. Lakip niini ang mga igsoong babaye. Ang usa ka magtatan-aw miingon: “Pinog linihokang mga batan-ong babaye nga dili mohaom sa lugar sa pagtukod nahimong ekspertong tigbaldosa. Wala pa ako sukad makakita ug mas maayo pa nga pagkatrabaho.”
Hinay ang lakat sa pagtukod sa sinugdan. Dayon mihugop ang mga buluntaryo sa Roodekrans—mga itom, mga puti, ubang Kolor, ug mga Indian. May mga igsoon gani nga miabot gikan sa ubang nasod, sama sa New Zealand ug sa Tinipong Bansa. Tagsaon kaayo kini sa South Africa. “Maanindot kaayong tan-awon ang mga igsoong lalaki ug babaye nga nagtambayayong sa pagtrabaho, nagkalainlain ang mga nasyonalidad ug mga rasa nga gikan sa nagkalainlaing mga kagikan,” miingon ang usa ka buluntryo. Mihunong ang kadaghanan sa ilang maayong mga trabaho ug mibakasyon ug dugay aron sa pagtabang sa pagtukod diha sa Roodekrans. Lakip kanila mao ang bansay kaayong mga mekaniko, arkitekto, enhinyero, lisensiyadong mga tigplano, ug mga kapatas sa pagtukod. Ang kadaghanan sa mahal nga mga makinarya gidonar o gipahulam.
Komosta ang dakong galastohang nalangkit? Ang Nagamandong Lawas sa mga Saksi ni Jehova nagpahulam ug dakodakong kantidad, ug ang lokal nga mga Saksi sa tanang rasa ug panuigon madagayaong miamot. Ang usa ka batang babaye nga sayis anyos misulat: “Akong gitigom kining kuwartaha aron ipalit ug monyeka, apan akong gipadala kini kaninyo. Naghinaot ako nga matapos ang Roodekrans uban niini nga kuwarta. Kon modako na ako, gusto ko usab nga moadto sa Roodekrans ug motrabaho didto.” Giamot sa usa ka singko-anyos nga batang lalaking Indian ang iyang balon sulod sa unom ka bulan!
Sa mga hinapos sa semana dugang mga Saksi miabot sa pakigbahin niining dakong proyekto. Ang ubang mga buluntaryo miabot sa adlaw-adlaw, sa kasagaran naghimog tinuod nga mga pagsakripisyo ug naningkamot sa paghimo niini. Nagpanglingolingo ang dili Saksing mga bisita sa pagkadili-makatuo sa pagkakita sa dako, madasigong pagsuportar. Ang mga tawo nga nagpuyo sa duol nakadayeg kaayo. Ang lokal nga mga kompaniyang komersiyal nag-indigay sa negosyo diha sa Roodekrans, ug ang ilang mga hawas mikomento sa atmospera sa kalinaw ug panaghiusa.
Usa ka Matahom nga Tinukod Diha sa Matahom nga Lugar
Ang mga bakilid diha sa habagatang kiliran sa dapit nga gitukoran nagbantaaw sa matahom nga walog ug suba. Bisan pa nga ang propidad duol ra sa maanindot nga residensiya, aduna gihapoy ihalas nga mga mananap, sama sa guinea fowl ug mga kuneho. Mopatim-aw usab usahay ang itom nga mga agila ug mga jackal. Ang residensiya nga tinukod, nga nahimutang sa ubos nga mga bakilid sa kabungtoran sa mga 360 ka metro, ginama sa pula nga tisa. Tulo ka andana kini, nga may matahom nga talan-awon. Sa tunga mao ang service area nga may komedor, kosina, labhanan, ug klinika. Sa duol mao ang bloke sa opisina ug dakong imprentahan, nga halos sama kadakoa sa arka ni Noe. Nahimutang dinhi ang upat ka kolor nga TKS offset press.
Sa kasadpan sa tinukod nga residensiya mao ang kaumahan ug dakong kamalig, nga gigamit ingong komedor ug kosina sa panahon sa pagtukod. May dakong kasagbotan ug kompayan diin dinhi manibsib ang panon sa mga baka nga kakuhaan ug gatas. Dunay gatosgatos ka sagbot nga protea sa kabungtoran sa likod sa residensiya. Dugang pa sa taas nga kahoyng eucalyptus, daghang bag-ong mga kahoy, matahom nga tanaman sa mga bulak, ug dakong lagwerta ang gitanom.
Ang Programa sa Dedikasyon
Ang mga tawo nga duolan sa 4,000 nagtigom sa bukas nga lugar duol sa tinukod nga residensiya alang sa dedikasyon sa Sabado sa hapon, Marso 21, 1987. Usa ka temporaryong entablado nga nag-atubang sa kabungtoran, nahimong daw ampiteyatro. Gibasa sa tsirman, si Igsoong R. F. Stow, ang mga mensahe sa pahalipay gikan sa 17 ka nasod. Ang labing makatandog niini mao kanang gikan kang Maud Johnston, ang asawa sa unang sangang magtatan-aw sa Durban. Sa panuigong 92, nag-alagad gihapon siya sa Bethel sa Australia.
Si P. J. Wentzel, magtatan-aw sa Service Department, mao ang unang mamumulong, ug siya mihatag ug mubong sumariya sa kasaysayan sa buluhaton sa Gingharian sa South Africa. Iyang gitandi ang tumatambong nga 50 sa unang asembliya sa 1914 sa tumatambong nga 99,000 sa 1986 nga mga kombensiyon. Sunod, gibatbat ni J. R. Kikot, magtatan-aw sa pabrika, ang pagprinta sa literatura diha sa daghang pinulongan ug ang buluhaton sa kapin sa 50 ka maghuhubad. Iyang gihisgotan usab nga ang 1979 nga dakong TKS nga prensa, nga gasa gikan sa sangang buhatan sa Japan, gitaod, apan nagapatik lamang kini ug duha ka kolor. Dili pa dugay, ang duha pa ka makina, nga gasa gihapon sa Japan, ang gidugang sa prensa. Ingong resulta, ang The Watchtower sa Abril 1, 1987, gipatik sa upat ka kolor, sa kalipay sa tanan.
Gibatbat ni C. F. Muller, ang koordinetor sa Komite sa Sanga, kon sa unsang paagi mitabang si Jehova sa pagtagana sa lugar, sa kuwarta, sa mga eksperto, ug sa hanas nga mga trabahante. Ang espiritu sa Diyos mihatag usab ug maayong panaghiusa taliwala sa nagkalainlaing mga rasa. Bisan pa nga sa sinugdan daw malisod ang pagtukod ug pabrika diha sa dakong residensiyal nga lugar ug sa pagpapuyo sa mga itom didto, gibuksan ni Jehova ang dalan, busa siya mao ang tinuod nga Pangulong Magtutukod!
Ang sunod nga mipakigpulong mao si Carey Barber, usa sa membro sa Nagamandong Lawas sa mga Saksi ni Jehova. Ang iyang maanindot nga pakigpulong gibase sa Isaias 65:17-19, nga nagtagna kon sa unsang paagi ang katawhan ni Jehova “magmasadya . . . ug malipay sa walay kataposan.” Gisaysay sa mamumulong nga ang “pagsadya” nagkahulogang “pag-ambak sa kalipay” ug nga kini mao ang kinatas-ang porma sa kalipay. Usa gayod kadto ka malipayong adlaw alang niadtong mitambong. Ang pakigpulong sa dedikasyon gihatag ni Milton Henschel, nga membro usab sa Nagamandong Lawas. Mihatag siya ug linain nga pag-ampo kang Jehova, nagpasalamat sa pagtagana sa tinukod, nga karon gipahinungod Kaniya.
Sa pagkasunod adlaw 28,250 ka Saksi ug mga interesado ang nagtigom diha sa Rand Stadium, sa Johannesburg, diin ilang nadungog ang mubong sumariya sa programa sa Roodekrans. Diha sa usa ka pakigpulong nga gihubad sa Zulu, gipakita ni Henschel kon sa unsang paagi ang mga Saksi ni Jehova, nga gipangunahan ni Jehova ug Jesus, madaogon sa tanang dapit ug nagapakaylap sa “matam-is nga kaamyon ni Kristo” ug sa ubang kahibalo sa Bibliya. (2 Corinto 2:14-17) Mitapos siya uban sa daghang makadasig nga mga eksperyensiya nga nakahatag kalipay sa daghang tumatambong.
Sa pagkasunod nga mga adlaw, daghang mga tigom ang gihimo diha sa Durban ug Cape Town. Kini mao ang mga okasyon nga dili gayod makalimtan sa mga Saksi ni Jehova sa South Africa. Ang pamilyang Bethel sa Roodekrans sa pagkatinuod makahinumdom gayod sa dedikasyon sa ilang bag-ong puy-anan. Kapin sa 40,000 ka Saksi ang aktibo karong panahona inay 28,000 dihang gisugdan ang trabaho diha sa Roodekrans, ang ‘balay nga gitukod ni Jehova’ nakatagana sa dinalian ug hinungdanong panginahanglan.