Nagasanong sa Panawag sa mga Isla sa Micronesia
ANG mga ngalan sama sa Truk, Yap, Ponape, Guam, ug Saipan tingali pamilyar nga pamation kanimo. Apan komosta ang Belau, Rota, Kosrae, Nauru, or Kiribati? Kini ug uban pa maoy bahin sa kapin sa 2,000 ka isla ug mga pulo nga nagkatag sa kapin sa siyete milyones otso-siyentos mil ka kuwadrado kilometro sa kasadpang Pasipiko ug sa katibuk-an nailhan ingong Micronesia, o gagmayng mga isla.
Sulod niining lapad, halos sama sa gidak-on sa Australia o sa kontinente sa Tinipong Bansa, ang mga Saksi ni Jehova puliki sa pagwali sa maayong balita sa Gingharian. (Marcos 13:10) Sa pagkakaron, kining buluhatona ginahimo sa mga 740 ka mga magmamantala sa Gingharian diha sa 13 ka kongregasyon. Sa tinuod, adunay dakong panginahanglan alang sa dugang mga mamumuo sa pagpangani niining halayong mga isla sa dagat.—Itandi sa Jeremias 31:10.
Kapin sa 20 ka tuig kanhi, ang mga tawo nga gikan sa Hawaii, sa Pilipinas, Canada, ug sa Tinipong Bansa, ug Australia misanong sa panawag ug midawat sa misyonerong pag-alagad sa mga isla sa Micronesia. Dihang miabot ang una kanila sa 1965, diha lamay 76 ka mga magmamantala sa Gingharian sa tanan niining halapad nga teritoryo. Apan, sa 1987, ang total nga 4,510 ka tawo mitambong sa Memoryal sa kamatayon ni Jesu-Kristo. Sa matin-aw, ang mga kahago sa gugma sa Kristohanon sa nangaging mga tuig tugob nga gipanalanginan.
Karon, adunay 49 ka misyonero nga nag-alagad diha sa 14 ka balay sa mga misyonero nga nakatag taliwala sa mga isla, ang tanan nagtrabaho ilalom sa pagdumala sa sangang buhatan sa Watch Tower Society sa Guam. Ang ilang gugma alang kang Jehova ug sa ilang mga silingan sa Micronesia ang nakatukmod kanila sa pagsanong sa misyonero nga panawag. Unsay ilang mga eksperyensiya samtang nag-alagad niining halayong mga isla? Kon bahin sa bag-ong mga pinulongan ug mga kustombre, unsang mga hagit ang ilang buntogon? Ug unsay nakatabang kanila sa pagpabilin sa ilang mga tinudlong-buluhaton? Atong pamation ang pipila kanila bahin sa ilang buluhaton niining mga islaha.
Ang Hagit sa Bag-ong mga Pinulongan
Adunay walo o siyam ka dagkong pinulongan sa Micronesia. Sanglit wala man kini isipa nga sinulat nga mga pinulongan, malisod alang sa bag-ong mga misyonero sa pagkakitag mga libro aron magamit sa pagtuon niini. Apan, ilang gipaningkamotan kini. Ang usa ka epektibong paagi, sila gisultihan, mao ang paggamit dayon sa nakat-onang pulong diha sa buluhatong pagsangyaw. Buweno, ilang mahinumdoman gihapon ang daghang kataw-anan—ug makauulaw pa gani—nga mga situwasyon nga mitungha dihang gihimo nila kana.
Si Roger, nga taga Hawaii, nakahinumdom sa usa niining kahimtanga dihang miabot siya sa Belau sa 13 ka tuig kanhi. “Dihang miingon ang usa ka tagbalay nga, ‘Katoliko ako,’ ang ako lamang nga nahibaloang pulong sa Palau sa pagtubag mao ‘Ngano?’” Dayon gisaysay kini sa tagbalay sa hataas nga panahon. “Wala gayod akoy nasabtan sa iyang gipamulong. Sa dihang natapos na siya, ang akong gisulti lamang kaniya ang pulong nga akong nahibaloan, ‘Salamat,’ ug milakaw!”
Si Salvador, nga miabot sa Truk uban sa iyang asawa, si Helen, sa napulo ka tuig kanhi, nakahinumdom nga nangutana sa taga Truk nga babaye kon gusto ba siyang malipay (pwapwa). Apan, ang iyang gipangutana kon gusto ba niya nga maburos (pwopwo). Ug si Zenette, nga gikan sa Canada uban sa iyang bana, si David, nakahinumdom sa panahon dihang misulay siya sa pag-ingong “Salamat” (kilisou) apan nakaingon ug “Lagong” (kiliso). Dili na kinahanglang isulti pa, sila hanas na kaayo niadtong mga pulonga karon.
Dihang gibalhin si James sa isla sa Kosrae tapos nakaalagad sa Ponape ug upat ka tuig, kinahanglan magsugod na usab siya. Siya ilabinang nakahinumdom dihang iyang gihigala ang usa ka tagbalay. Apan inay mangutana, “Komosta ka?” iyang giingnan siya, “Abnormal ka”! Karon, human sa napulo ka tuig, siya miingon: “Sa sinugdan, malisod kaayo ang paglitok sa pila ka mga pulong sa Kosrae tungod kay balikas silang pamation sa Iningles.”
Apan, kining mga eksperyensiyaha, wala gayod makapaluya sa buut sa mga misyonero sa pagpadayon sa ilang pagtuon sa pinulongan. “Wala gayoy mahimo aron matabangan ang mga tawo kon dili magtuon sa pinulongan,” miingon ang usa ka misyonero. “Kini nakahatag ug tinuod nga padasig sa kuging pagtuon.”
Mga Kustombre ug mga Patuotuo
Alang sa mga bag-ohan, daghan kaayo ang lokal nga mga kustombre nga daw kataw-anan. Pananglitan, nakahibalag si David ug tawo nga ginganlan ang iyang tulo ka mga anak nga lalaki nga Sardine, Tuna, ug Spam. Sa ulahi, siya gipailaila sa tulo ka lalaki nga ginganlag Desire, Sin, ug Repent. Katingalahan alang kang Zenette nga tawgon sa mga tawo ang ilang mga apohan nga Papa ug Mama ug ang ilang mga ginikanan sa ilang mga ngalan. Dihang unang miabot si Sheri gikan sa Hawaii, kataw-anan alang kaniya nga gamiton sa mga tawo ang ilang ilong sa pagtudlo sa mga direksiyon. Ug dili ka dayon maanad niining kustombreha: Kon mosulod ang babaye ug publikong panagtigom, siya “molakaw” nga magluhod ngadto sa iyang “lingkoranan” diha sa salog sa pagpakitag pagtahod sa mga lalaki.
Daghan, usab, ang mga patuotuo. Sa Marshall Islands, pananglitan, kon may mamatay magbutang ang pamilya ug pagkaon, tabako, ug mga bulak sa lubnganan sa namatay. O kon may langgam nga maglupadlupad palibot sa balay nga nagaawit, gituohan kini nga nagkahulogang katalagman ug taliabot nga kamatayon sa usa sa membro sa pamilya.
Ang uban diha sa isla nalangkit kaayo sa espiritismo. Usa kanila sa Jon. Ansiano niadto sa simbahang Protestante, siya nakapagawas ug mga demonyo pinaagi sa mga pag-ampo ug sa mga medisina nga gihimo gikan sa lana sa lubi.
“Usa ka adlaw niana usa ka mangil-ad ug nawong nga demonyo nga ingon kadakoa sa pultahan ang mitungha sa pultahan sa akong kuwarto,” miasoy si Jon. Sa sinugdan abi ni Jon ug nagdamgo siya apan sa ulahi nakamatikod nga siya nagmata diay.
“Gisultihan ako sa demonyo nga gikan kaniya ang akong mga gahom sa madyik. Nakurat ako niini ug nakapahibulong kanako kon nganong nadutlan ako sa mga demonyo, nga usa ka deakono sa simbahan, ug nganong ang ministro mismo moduol kanako alang sa demonyohanong mga serbisyo.” Si Jon sa ulahi nahibalag sa mga misyonerong Saksi ug gisugdan sa pagtuon sa Bibliya.
“Nakahatag kanakog dakong kalipay ang pagkakat-on sa kamatuoran bahin sa mga demonyo ug kon unsaon sa pag-ila sa tinuod nga relihiyon,” nanumdom si Jon. Mibulag siya gikan sa iyang simbahan ug mihunong sa iyang pagpraktis ug demonismo. Karon iyang gipasidan-an ang uban sa paglikay sa tanang demonyohanong mga buhat.—Deuteronomio 18:9-13; Pinadayag 21:8.
Giduaw ang Gagmayng mga Isla
Ang paghatod sa maayong balita ngadto sa mga tawo diha sa halayo gagmayng mga isla maoy tinuod nga hagit. Ang paagi lamang aron maabot sila mao ang pagpalista aron makasakay sa barko nga tigkargag kopras. Sa dihang moeskala ang barko sa matag isla sa pipila ka oras o adlaw aron sa pagkuhag karga, ang mga misyonero ug ubang mga magmamantala sa Gingharian okupado sa pagsangyaw sa mga taga isla. Ang senemanang pagsibya sa radyo maoy laing paagi sa paghatod sa maayong balita kanila.
Ang mga molupyo sa halayong mga isla usahay mobiyahe sa sentrong isla aron sa pagpamalit ug pagkaon, pagpatan-aw sa doktor, ug sa pag-eskuyla. Samtang didto, tingali makontak sa mga Saksi ni Jehova sila ug makakuhag mga basahon sa Bibliya. Sundan ang interes pinaagi sa pagsulat ug sa dihang moduaw ang mga magmamantala sa ilang isla. Nakontak ang usa ka magtiayon niining paagiha sa Majuro sa Marshall Islands ug dayon mipauli sa ilang gipuy-ang isla sa Ailuk, 400 ka kilometro ang kalay-on. Miuswag sila sa ilang pagsabot sa Bibliya. Wala magdugay ilang giputol ang ilang pagkamembro sa simbahan, gilegal ang ilang kaminyoon, ug gibawtismohan. Karon ang duha madasigong nagawali sa ilang hilit nga isla, nagaalagad kanunay ingong mga auxiliary payunir.
Gamiton sa mga misyonero sa Ponape, Truk, ug Belau ang ilang kaugalingong mga lantsa aron sa pagsangyaw sa isla. Sanglit wala may pasilidad nga kadunggoan, sa kasagaran mag-ubog sila sa lapok kutob sa ilang mga tuhod paingon sa daplin. Ang kadaghanang mga molupyo mahigalaon ug maabiabihon sa mga bisita pinaagi sa pagbukhad ug mga banig alang kanila ug sa pagsilbi kanilag bugnawng tubig sa butong. Tawgon ang tibuok pamilya ug mamati pag-ayo. Sanglit ang kadaghanan wala may kuwarta, komung makita nga magdala ang mga magmamantala sa pagpauli human sa duha o tulo ka adlaw nga ang ilang lantsa puno sa prutas nga nadawat baylo sa mga basahon sa Bibliya.
Mga Sakripisyo ug mga Ganti
Alang sa mga misyonero, ang kinabuhi diha sa mga isla dili sama balik sa gigikanang nasod. Kinahanglang anaron nila ang kanunayng pagpalong sa koryente ug kakulang sa tubig, depende sa abiyo sa tubig sa ulan. Diha sa ubang mga isla, walay koryente, walay tubig, o sistema sa kanal, dili sementado ang dalan, ug walay mga sakyanan. Apan ang mga misyonero nakakat-on sa pagkahimong mapasiboon. “Dihang makita nako ang lokal nga mga igsoon nga nagpuyo sa mga balay nga gitukod gikan sa biya nga tabla ug salog, naluoy kami kanila, ug kini mopakiling kanamo nga magmatimbang sa among mga panginahanglan ug mga kagustohan,” miingon si Julian, nga matinumanong nag-alagad sulod sa 17 ka tuig sa Guam ug sa Marshall Islands.
Si Rodney ug Sheri miabot sa Truk gikan sa Hawaii. Siya miadmiter: “Sa pagkatinuod, nakaeksperyensiya ako ug kakurat sa kultura.” Karon, napulo ka tuig sa ulahi, siya misulat: “Kami adunay matagbawon kaayong kinabuhi dinhi. Kami may mga kalisod ug kahamugaway; usahay bation namo ang kaluya sa buut ug kamingaw. Apan buot kaming magpadayon sa pangagpas sa among katuyoan sa kinabuhi sa misyonerong buluhaton dinhi.” Ug si Sheri malipayong midugang: “Ang nagasakripisyo sa kaugalingon nga mga tawo maoy malipayong mga tawo.”
Sa tinuod, ang ilang mga pagsakripisyo tugob nga gigantihan. Si Clemente ug ang iyang asawang si Eunice, nga miabot sa Marshall Islands sa napulo ka tuig kanhi, karon nagadumala ug 34 ka mga pagtuon sa Bibliya kada semana. “Napulog-upat sa mga estudyante nakasimbolo na sa ilang pagpahinungod kang Jehova pinaagi sa bawtismo sa tubig,” siya mitaho, “ug ang uban nagauswag paingon sa bawtismo. Kining makaluwas ug kinabuhing buluhaton bililhon kaayo sa among mga mata.” Si James, nga misyonero kapin na sa napulo ka tuig, miingon: “Ang pagtan-aw sa pag-antos sa atong mga igsoon sa Kosrae sa tanang tuig maoy tinuod nga panalangin.” Sa Belau, si Roger mikomento: “Gipanalanginan kami ug bag-ong Kingdom Hall ug maunongong grupo sa mga magmamantala.” Ug nagapan-awg balik sa nangaging katuigan, si Placido miingon: “Ang pagtultol ug balaang espiritu ni Jehova dayag diha sa among mga kinabuhi. Kini ang nakatabang kanamo sa pagkahimong suod kaniya.”
Kining mga eksperyensiyaha nakadasig sa mga misyonero sa pagpabilin sa ilang mga tinudlong-buluhaton. Ang kadaghanan kanila makatan-awg balik ug makahinumdom sa pagkaporma sa unang kongregasyon sa ilang dapit. Sama kang apostol Pablo, sila may tagsaong kalipay sa ‘pagtukod dili ibabaw sa patukoranan nga gipahimutang na sa ubang tawo.’ (Roma 15:20) Ang ilang pagbati maayo kaayong pagkapahayag niining komentoha: “Aduna pay daghang himoong buluhaton. Nagtuo ako nga buksan pa ni Jehova ang daghang mga kahigayonan sa pagpasulod ug daghan pang samag karnero nga mga tawo sa mga isla, ug kami nakapribilehiyo sa pakigbahin niana.”
“Ang panalangin ni Jehova—magapadato, ug siya wala magadugang ug kasubo niana,” miingon ang Bibliya diha sa Proverbio 10:22. Kadtong nakasanong sa panawag sa misyonero sa mga isla sa Micronesia tinuod nga nakaeksperyensiya niini nga panalangin uban sa kalipay ug katagbawan nga nagagikan sa pag-alagad kang Jehova.