Relihiyosong Kagawasan Gilabanan sa India
ANG hukom sa Korte Suprema sa New Delhi niadtong Agosto 11, 1986 nakapakurat sa milyonmilyon. Sa usa ka panahong kusog ang nasyonalismo, diyutay ra ang nagdahom nga ang relihiyosong kagawasan sa usa ka wala kaayo hiilhing relihiyosong minoriya pagatahoron. Apan tapos sa suod nga pag-utingkay sa mga kamatuoran, gihukom sa labing taas nga korte sa India nga ang mga anak sa mga Saksi ni Jehova dili mapugos sa pag-awit sa nasodnong awit. Sa usa ka timailhang desisyon ang korte miingon:
“Sa presenteng kaso, kami natagbaw nga ang pagpalagpot sa tulo ka bata gikan sa tunghaan nga tungod sa ilang gituohan sa binuotan nga relihiyosong pagtuo, sila dili moduyog sa pag-awit sa nasodnong awit sa katigoman sa buntag bisan pag sila motindog nga matinahoron sa dihang awiton ang nasodnong awit, maoy paglapas sa ilang pundamental nga katungod ‘sa kagawasan sa konsensiya ug sa libreng pagtuo, pagtuman ug pagpakaylap sa relihiyon.’”
Si Huwes O. Chinnappa Reddy ug Huwes M. M. Dutt sa Korte Suprema sa India mao ang mga huwes nga naghusay sa karon bantog nga kaso bahin sa nasodnong awit sa mga Saksi ni Jehova.
Kon sa Unsang Paagi Mitungha ang Isyu
Halos katunga sa 8,000 ka Saksi ni Jehova sa India hikaplagan sa gamayng estado sa Kerala sa labing habagatang bahin niining luag kaayong nasod. Sa kadaghanang mga tunghaan didto, ang nasodnong awit ginaawit kada adlaw. Ang batasan sa linaing tunghaang gikalalisan mao nga ang tanang estudyante moawit nga dungan sa nasodnong awit. Ugaling, ang mga anak sa mga Saksi ni Jehova nagtindog lamang samtang nag-awit ang uban. Sumala sa giingon sa hukom sa Korte Suprema: “Walay mausang nagtagad. Walay mausang nabalaka. Walay naghunahuna nga kana dili matinahoron o dili makinasod. Ang mga bata wala tugawa ug gipasagdan sa ilang mga tinuohan.” Kana ang kahimtang sa daghang katuigan.
Unya miabot ang Hulyo 1985. Usa ka membro sa Asembliya Lehislatibo sa Estado misupak nga siya naghunahuna nga dili patriotikanhon nga may modumili sa pag-awit sa nasodnong awit. Misunod ang diskusyon, ug kon unsay gihisgotan gipatik diha sa daghang iladong mga mantalaan sa nasod.
Ang mga awtoridad sa kadaghanang mga tunghaan sa Kerala, kinsa sa nangagi mabination sa mga anak sa mga Saksi ni Jehova, nangahadlok tungod sa pagsupak sa Asembliya Lehislatibo ug sa negatibong publisidad. Ingong resulta, ang mga anak sa mga Saksi ni Jehova gipalagpot gikan sa sunodsunod nga tunghaan.
Mga Bata Kontra Estado
Si V. J. Emmanuel, kansang tulo ka anak nga menor de edad, si Bijoe, Binu Mol, ug Bindu, gipalagpot sa tunghaan, nangitag subay-balaod nga solusyon. Si Gn. Emmanuel kombinsido kaayo nga pabor kaniya ang balaod. Siya nasayod nga, sumala sa Artikulo 25 (1) sa Batakang-Balaod sa India, “ang tanang tawo managsamang may katungod sa kagawasan sa konsensiya ug sa katungod sa libreng pagtuo, pagtuman ug pagpakaylap sa relihiyon.”
Sa kadugayan ang usa ka Dibisyon nga Hukmanan sa Hataas nga Korte sa Kerala naghusay sa kaso, apan kadto nagsalikway sa apelasyon ni V. J. Emmanuel. Kadto nakapakurat kaayo kay ang Batakang-Balaod sa India wala mag-ingon nga ang nasodnong awit kinahanglang pagaawiton sa pagpakitag pagtahod niana. Kini nagaingon lamang nga ang mga lungsoranon angay “mosunod sa Batakang-Balaod ug motahod sa mga mithi ug mga institusyon niini, sa Nasodnong Bandera ug sa Nasodnong Awit.” Walay laing balaod nga nagabaod nga ang tanang lungsoranon sa India magaawit sa nasodnong awit.
Ang kaso giapelar ngadto sa Korte Suprema sa India. Sa pagsupak sa Hataas nga Korte sa Kerala, ang hukom sa Korte Suprema miingon: “Ang Hataas nga Korte nawala sa tumong ug natipas. Sila nagsusi, nga hinagpat kaayo, sa matag usa ka pulong ug diwa sa Nasodnong Awit ug mihinapos nga walay pulong o diwa sa Nasodnong Awit nga makapasakit sa relihiyosong mga pagbati ni bisan kinsa.” Bisan pa niana, sumala sa tukmang giingon sa Korte Suprema, “kana dili gayod maoy gilantugian.”
Ang isyu maoy relihiyoso, nga mao, ang katungod sa mga indibiduwal sa paghupot sa ilang kagawasan sa pagsimba. Ang kamatuoran mao, ang mga Saksi ni Jehova dili moawit sa nasodnong awit sa bisan unsang nasod. Sa pagkamatuod, ang maong mga nasodnong awit maoy mga himno o mga pag-ampo nga giduyogan sa musika, ug ang mga Saksi ni Jehova nagatutol sa pag-awit kanila sumala sa konsensiya. “Sila modumili sa aktuwal nga pag-awit,” mipatin-aw nga masinabtanon ang hukom sa Indian nga Korte Suprema, “tungod sa ilang matinud-anong pagtuo ug kombiksiyon nga ang ilang relihiyon dili magtugot kanila sa pag-apil sa bisan unsang mga rituwal gawas kon kana diha sa ilang mga pag-ampo kang Jehova nga ilang Diyos.”
Makahuloganon, ang Batakang-Balaod sa India nagagarantiya sa “kagawasan sa pagsulti ug pagpahayag,” nga nagaapil sa kagawasan sa pagpakahilom. Kana ang gibuhat sa mga bata dihang giawit ang nasodnong awit panahon sa panagkatigom sa buntag sa tunghaan—sila nagpabiling hilom. Bisan pa niana, sa aktuwal, ang edukasyonal nga mga awtoridad sa Kerala nagpahamtang sa usa ka pagdili sa pagpakahilom. Busa mitungha ang isyu kon kaha ang maong pagdili nahiuyon sa mga katungod nga gigarantiya sa Batakang-Balaod.
Kini ang gihinapos bahin niini sa Korte Suprema: “Kami makaingon dayon nga walay probisyon sa balaod nga nagaobligar ni bisan kinsa sa pag-awit sa Nasodnong Awit ni kami nagahunahuna nga pagkadili-matinahoron sa Nasodnong Awit kon ang usa ka tawo nga motindog nga matinahoron dihang awiton ang Nasodnong Awit dili moduyog sa pag-awit.”
Sumala sa giingon nga sayosayo, ang katungdanan sa matag lungsoranon, sumala sa Batakang-Balaod, mao ang ‘pagtahod sa Nasodnong Awit.’ Mahitungod sa maong pagtahod, ang Pagsanta sa mga Insulto sa Nasodnong Kadungganan nga Akta sa 1971 nagaingon: “Si bisan kinsa nga tinuyong mosanta sa pag-awit sa Nasodnong Awit o mopahinabog mga pagsamok sa bisan unsang katigoman nga naghimo sa maong pag-awit silotan sa bilanggoan sa tagal nga moabot tingalig tulo ka tuig, o mga multa, o sa duruha.” Ugaling lamang, ang mga anak sa mga Saksi ni Jehova wala gayod magpugong kang bisan kinsa sa pag-awit sa nasodnong awit. Sila wala gayod magpahinabog kasamok sa bisan unsang katigoman nga naghimo sa maong pag-awit.
Usa ka Kapeligrohan sa Nasodnong Panaghiusa?
Usa sa mga argumento sa Estado mao nga ang pag-awit sa nasodnong awit kinahanglanon alang sa panaghiusa ug pagkamaunongon sa nasod. Apan, tinuod ba nga ang pinugos nga pag-awit sa usa ka nasodnong awit makaamot sa panaghiusa sa nasod o sa pagkamaunongon sa mga lungsoranon niini?
Makaiikag, ang nasodnong awit sa India anaa lamang sa usa ka pinulongan sa usa ka estado, ug busa kini dili hisabtan sa kinabag-an sa mga Indian nga nagaawit niini. Busa, alang sa kinabag-an, ang pag-awit sa nasodnong awit lagmit walay kahulogan ug, sa panguna, maoy walay-unod nga rituwal. Ang mga Saksi ni Jehova dili moapil sa maong mga rituwal. Sila nagaampo lamang ngadto sa ilang Diyos, si Jehova.
Giergo usab nga kon ang hukom sa Korte Suprema mopabor sa mga Saksi ni Jehova, kana makapameligro sa seguridad sa nasod. Apan ang mga Saksi ni Jehova sa India maoy gamay nga minoriya, nga ang gidaghanon maoy mga 8,000 ka tawo lamang. Ang mao bang gamayng grupo kapeligrohan sa nasod nga kapin ug 800 milyong tawo? Gawas pa, ang mga Saksi ni Jehova ilado sa tibuok kalibotan tungod sa ilang pagkamatinud-anon ug pagkamasinugtanon sa mga balaod sa mga gobyerno nga ubos niana sila nagapuyo.
Sa Nigeria usa ka abogado miingon: ‘Ang mga Saksi maoy tigbayad-sa-buhis ug tigsunod-sa-balaod nga mga lungsoranon. Si bisan kinsang Saksi nga mahimong matinud-anon sa iyang relihiyon sa gidak-ong sundon kana sa riyesgo nga mawad-ag pila ka pribilehiyo mahimong matinud-anon nga sama sa kadaghanang ubang butang. Ang hinungdang siya dili mangawat sa kuwarta sa gobyerno samtang ang iyang ubang mga kauban nagaawit sa nasodnong awit ug bisan pa niana mangawat sa kuwarta mao nga ang iyang Bibliya nga nagabaod nga siya dili moawit sa nasodnong awit nagaingon usab nga siya dili angay mangawat.’
Ang kataposang tudling-pulong sa timailhang hukom sa Korte Suprema talagsaon. Kini miingon: “Buot lamang namong modugang: ang atong tradisyon nagatudlog pagkamatinugoton; ang atong pilosopiya nagatudlog pagkamatinugoton; ang atong Batakang-Balaod nagapraktis sa pagkamatinugoton; dili nato sambogan kana.” Pabilhan kaha sa gobyerno ug mga lider kining maayong hunahuna? Magpabilin kahang pangataposan ang desisyon sa Korte Suprema? Panahon lamay motug-an.
[Mga Letrato sa panid 23]
Ang tulo ka bata nga matinahorong midumili sa pag-apil sa makinasod nga seremonyas
Ang dedikadong pamilya sa tulo ka bata
Kining pamilya nakabasa bahin sa kaso sa korte, nagtuon sa Bibliya, ug nabawtismohan