Pagbukas sa Dalan Alang sa Pag-uswag sa Gibraltar
NAKITA ang istadyom sa Gibraltar—mga usa ka kilometro ug tunga ang gilay-on. Apan, kapin sa 13 ka tuig, ang mga taga Gibraltar kinahanglang mobiyahe ug labing menos napulo ka oras aron makaabot didto. Apil niini mao ang panaw una agi sa dagat ngadto sa North Africa, dayon balik sa Espanya, ug sa kataposan mosakay ug bus. Nganong layo man kaayog panaw sa usa ka dapit nga haduol ra kaayo?
Sa 1969 gisira sa rehimen ni Franco sa Espanya ang utlanan sa hikting-yuta nga nagsumpay sa Espanya ug Gibraltar. Resulta kadto sa kabangian tali sa Espanya ug Britanya bahin sa pagdumala sa lugar nga Rock o Bato, nga maoy pagtawag usahay sa Gibraltar. Apan, kining kakulian, dili butang bag-o alang sa mga taga Gibraltar. Tungod kay estratihikong lugar kini, ang Gibraltar nahimong kuta nga nahilain gikan sa kanait nga mga nasod.
Sayo sa ikawalong siglo, gisulong sa mga Moor ilalom ni Ṭārik kining yutaa ug ginganlan kanag “Jabal Ṭāriq” (Bukid ni Ṭārik), nga sa ulahi gitawag nga “Gibraltar.” Gilig-on sa mga Moor ang Bato, nga nagbantaaw hapit 430 ka metro ibabaw sa lebel sa dagat. Sa nangaging mga siglo, kadto nahimong dapit sa daghang mga paglikos sa mga Moor ug sa mga Katsila. Sa kataposan nakuha sa mga Katsila ang Gibraltar sa 1462, ug gihawiran kini hangtod sa 1704, dihang nailog kini sa Ingles ug nagtukod didto ug base nabal.
Gawas pa nga usa ka garison, ang mga tawo nga gikan sa nagkalainlaing mga nasod mipuyo sa lungsod nga nahimutang tiilan sa Bato, nga misangpot ug sarisaring populasyon gikan sa kagikang Moor, Katsila, Ingles, Hebreohanon, ug taga Genoe nga mga lalin. Kinatsila ug Iningles ang sinultihan sa kadaghanan sa populasyon karon.
Ang Kamatuoran sa Diyos Midangat sa Gibraltar
Sa modernong panahon, ang mga binhi sa kamatuoran sa Bibliya unang gitanom sa Gibraltar sa ting-init sa 1958. Gipahimuslan sa mga Saksi ni Jehova nga mipanaw sa pagtambong sa kombensiyon sa London, Inglaterra, ang ilang pag-iskala sa Gibraltar sa pagsangyaw sa maayong balita sa Gingharian. Gidawat sa pila ka mga molupyo ang suskrisyon sa Ang Bantayanang Torre.
Miabot ang magtiayong misyonero sa Gibraltar sa pagkasunod tuig sa pagbisibis niining maong “mga binhi.” Apan nagpadaog ang mga awtoridad sa pag-ipit gikan sa relihiyosong mga lider ug gipalagpot ang magtiayon sa duha ka tuig sa ulahi. Apan, dihay usa ka gamayng grupo nga duolan sa 25 ka Saksi ang naporma, ug ang ilang matinumanong buluhaton sa nanglabay ang mga tuig nabaslan sa anam-anam nga pag-uswag, nga miabot ug 132 ka magmamantala sa Gingharian sa Marso 1987. Dayag, nga kining pagtubo nagpamatuod sa paglahutay sa kongregasyon atubangan sa mga problema nga tagsaon sa Gibraltar.
Pagkanahilain—Usa ka Tagsaong Problema
Gawas pa sa ekonomikanhon ug sosyal nga mga problema nga mibangon sukad nga gisira ang utlanan, nabaldag dako ang mga Saksi ni Jehova sa pakig-uban sa kauban sa ilang pagtuo sa silingang mga kongregasyon sa Espanya. Apan, sulod sa 13 ka tuig nga pag-ali sa yuta, wala gayod silay nasipyatan sa tugob espirituwal nga pagkaon nga ginadalit diha sa sirkitong asembliya ug distritong mga kombensiyon. Ang programa soblion kanunay sa ulahi diha sa lokal nga Kingdom Hall sa Gibraltar.
Ang pinugos nga pagkanahilain nakahatag ug tagsaong pagsulay sa mga batan-on diha sa kongregasyon. Nakutohan diha sa 5.8 kuwadrado kilometrong yuta sa Gibraltar, kinahanglang maalamong molihok sila sa pag-atubang sa mga isyu bahin sa nasyonalismo, materyalismo, ug kaminyoon.
Kaminyoon? Oo, tungod kay kinutohan diha lamang sa ilang gamayng kongregasyon ang ilang opurtunidad sa pagkakitag angay nga kapikas sa kaminyoon gamay ra. Ang mga babaye nga sakop sa kongregasyon gihugopan ug mga imbitasyon sa kalibotanong mga batan-on nga gustong makigdeyt kanila. Kinahanglang isilsil sa batan-ong mga Saksi sa Gibraltar ang maalamong tambag sa Bibliya sa pagminyo “diha lamang sa Ginoo.”—1 Corinto 7:39; itandi sa Genesis 24:1-4.
Sa usa ka kaso gisalikway sa usa ka batan-ong Saksi, ang tambag gikan sa Awtor sa kaminyoon, misugod sa pakigdeyt sa lokal nga babaye nga dili sakop sa kongregasyon. Apan ang mapailobong tabang sa mga ansiano nakapahunahuna kaniya sa seryoso bahin sa kapeligrohang nalangkit. Sa kataposan, iyang giatubang ang iyang trato ug gisultihan siya nga bisan ug may dako siyang pagbati kaniya, ang iyang kahibalo sa Bibliya nagpaobligar kaniya sa pagputol sa ilang relasyon. ‘Gusto kong pakaslan ang babaye nga ikaipon kong mabuhi sa walay kataposan, dili lamang sa pipila ka mga tuig,’ matud pa niya.
Bisag nakurat ug nasubo, naikag siya kon unsa gayoy nakapainteres sa iyang trato labaw pa kay sa ilang relasyon. Sa ulahi gisugdan siya sa pagtuon sa Bibliya. Ang gisugdan ingong panguryoso lamang nahimong tinuod nga interes, ug tulin ang iyang pag-uswag sa kamatuoran ug gibawtismohan. Human ning tin-aw nga timaan sa iyang tinguha sa pag-alagad kang Jehova, mibalik ang igsoong lalaki sa pagpangulitawo kaniya. Sa ulahi malipayong nagpakasal sila, ginaani ang panalangin sa pagsunod sa maalamong tambag ni Jehova bahin sa kaminyoon.
Pagbukas sa Utlanan Mitultol ug Teokratikong Pag-uswag
Sa Disyembre 14, 1982, gibuksan ang dalan sa utlanan. Dayon sa Pebrero 6, 1985, gibalik ang libreng pag-agi. Ang molupyo nakabaton ug mas relaks nga palibot. Gipahimuslan kining situwasyona, gipakusog sa lokal nga kongreasyon ang ilang buluhaton sa pagsangyaw ug gipahimuslan ang mga okasyon sa pagtigom diha sa mas dagkong mga tigom. Ang maayog kabubut-ong mga tawo karon may dakong mga kahigayonan sa pagdangat sa kahibalo sa gugma ug panaghiusa nga naglungtad taliwala sa natigom nga katawhan ni Jehova.
Pananglitan, usa ka tawo nga nahimong Saksi ang asawa sulod na sa 20 ka tuig midesider sa pagdawat sa imbitasyon sa pag-uban sa iyang asawa ug mga anak samtang mitambong sila sa sirkitong asembliya sa Espanya. Nalipay kaayo siya sa programa ug pag-ubanay nga tungod niana mihukom siya sa pagpabilin alang sa ikaduhang adlaw. Dihang natapos ang asembliya, gitanyagan siya ug pagtuon sa Bibliya. “Nganong dili?” siya mitubag, nga midugang: “Unsa kaha kon magsugod ta karong semanaha?” Ang iyang asawa, tapos sa dugayng katuigan sa pag-ampo niini nga sangpotanan, nalipay kaayo.
Aron bug-os pang mapahimuslan ang dugang mga higayon sa pagsangyaw, miuswag ang gidaghanon sa mga Saksi nga nag-alagad ingong auxiliary payunir (mga tawong nagagugol ug 60 ka oras sa usa ka bulan sa pag-alagad sa katilingban). Kining madasigong kalihokan miresultag duolan sa 35-porsientong pag-uswag sa kongregasyon sukad sa 1982.
Dakong bahin usab ang nahimo sa impormal nga pagpamatuod sa pag-uswag sa kongregasyon. Duha ka Saksi nga nag-inspeksiyon sa pantalan sa panahon sa ilang sekular nga trabaho nakakitag New World Translation Bible nga natabonan ug diyutay diha sa bentana sa yate. Dihadiha, ilang gipangita ang tag-iya. Nasusihan nga tagdumala siya sa piyer, nga nakatuon sa mga Saksi ni Jehova sa Britanya sa wala pa mibalhin sa Gibraltar. Nagpabalik dayon siya sa pagtuon ug tulin nga miuswag uban sa iyang gipuyopuyong babaye. Dayon ilang gipalegal ang ilang kahimtang sa kaminyoon ug gibawtismohan. Gigugol niining taga Britanyang magtiayon karon ang ilang dakong panahon diha sa ministeryo nga nagtrabaho taliwala sa Iningles ug sinultihang komunidad ug nahimong instrumento sa pagkatukod sa grupo sa pagtuon didto.
Ang usa ka pagtuon sa Bibliya nga ilang gisugdan mao si Tim ug Tracy, batan-ong magtiayon nga nagpuyo sa barak sa militar. Si Tim ang tigtugtog sa trombon sa banda sa rehimento, apan desidido siya sa paggugol sa iyang kaugalingon sa bug-os diha sa malinawong intereses sa Gingharian ni Jehova. Giipit sa mga paryente ang magtiayon, gisulsolan sila sa paghunong na sa pakig-uban sa mga Saksi. Apan, nagpadayon sila sa ilang pagtuon sa Bibliya ug labi pang nalig-on sa ilang pagtuo.
Mihangyo si Tim nga moundang na, bisan pa nga sa sinugdan nagpalista siya nga mosilbi ug unom ka tuig. Dihang daw langan kaayo ang pagrebista sa iyang kaso, nakigsulti si Tim sa doktor sa militar, nga gibatbat nga ang pagkawalay katinoan sa ilang umaabot nakaapektog dako sa iyang asawa. Misugot ang doktor ug gigamit ang iyang impluwensiya aron mapadali ang pagrebista. Wala magdugay gibalik sa Tim sa Inglaterra uban sa iyang rehimento, diin sa kataposan gitugotan siya sa pagluwat. Karon ang duha nag-alagad ingong dedikadong mga Saksi.
Mga Kalaoman sa Umaabot
Uban sa pagbukas sa utlanan, ang mga Saksi sa Gibraltar nakatabang usab sa duol nga mga kongregasyong Espanyol. Sila nagasangyaw sa iladong Costa del Sol (Sun Coast), diin dinhi makita ang daghang mga tawo nga Iningles ug sinultihan.
Bisan pa nga ang “problema sa Gibraltar” wala pa masulbad gikan sa politikanhong punto de bista, ang mga Saksi ni Jehova sa Gibraltar ug Espanya bug-os nga nahiusa sa espirituwal nga paagi, nga tinuod usab diha sa tibuok yuta. Sila misalig sa “Bato” kansang kusog walay kataposan, nga nagapalanog sa mga pulong sa salmista: “Oh umari kamo manag-awit kita nga malipayon kang Jehova! Manghugyaw kita sa madaogon sa atong Bato ug kaluwasan.”—Salmo 95:1.